Rev 17 | KxfSCKRC | STEP | Htǒotaplǎdě tanaphû̌ susǒtapwa̤ htě a pṳ̂měǐ balo̤dû̌ susǒtabǎ akla tapwa̤nu, a hè he ǒ dě a hî̌ he, “Hèmò̌ dě he dǔlṳ na ta Cǒmara glè cèrò mamǔpò̤lò̤ mi̤dû̌ htǒotapwa̤ hî̌tè pěnu. Mamǔpò̤lò̤ htǒotapwa̤ mî̌ wî̤dû̌wî̤htû htě a ǒ dě shikhî̌dû̌ pṳ̂̌bo alo̤ htǒotî̤wî̤.

Revelation of John 17

Mamǔpò̤lò̤ htě a mi̤dû̌ tapwa̤

1 Htǒotaplǎdě tanaphû̌ susǒtapwa̤ htě a pṳ̂měǐ balo̤dû̌ susǒtabǎ akla tapwa̤nu, a hè he ǒ dě a hî̌ he, “Hèmò̌ dě he dǔlṳ na ta Cǒmara glè cèrò mamǔpò̤lò̤ mi̤dû̌ htǒotapwa̤ hî̌tè pěnu. Mamǔpò̤lò̤ htǒotapwa̤ mî̌ wî̤dû̌wî̤htû htě a ǒ dě shikhî̌dû̌ pṳ̂̌bo alo̤ htǒotî̤wî̤. ^a 2 Hǎkhû̌ Khwǐcophǎ toǒ cû̌sǔnṳplěnṳ lǒkho ta mamǔ htǒotapwa̤. Htodě kòyòhǎkhû̌phû̌ toǒ ǎmṳopǒbò ana̤ ta sî̌yo̤ mî̌ mamǔ htǒotapwa̤ a ta̤putupatǎ toǒnu hǒ.” ^b

3 Dě Běcǎ sǎcahtǐ a ta̤ma̤jè akhû̌akhî, mǒkhû̌ tanaphû̌ kaǎcû̌ he dě lo̤měshǒkla tò̤glò. He cû̌ bǎnu tò̤glò dě he cû̌kè̌shǐ mamǔ tapwa̤ hǎnòò̌ ta̤mi̤ta̤mò̤ lî̤pî̤sǐnu tado akhû̌. Ta̤mi̤ta̤mò̤ htǒotado ana̤lo̤ sapwa̤bònu, kò khwè̌nǎbò nû̌ûta mi̤ dě kò khwè̌nǎ ami̤ ta “A pi̤jishǐcǒ Cǒmara” hǐnu. Ta̤mi̤ta̤mò̤ htǒotadonu, ahǐkǒdû̌ ǒ susǒtama dě ane̤ ǒ phòshǐ. ^c 4 Mamǔ htǒotapwa̤nu a kûsǒhtò̌ hǐdopo̤to̤ lî̤lǒso ta alî̤pî̤sǐ dě a tîwî̌htò̌nṳ ana̤ ta hta, lo̤ le̤dû̌pwî̤htû ta pî̌sǎ toǒ. Dě a cǔdekûnu, a pṳ̂měǐ balo̤hta tabǎ dě balo̤ htǒonu a ǒ betî̌pî̌ ta ta̤wi̤japhǎkò toǒ ta a ta̤putupatǎ phû̌mò̤shî̌hto toǒ. ^d 5 Dě a me̤htò̌lo̤nu, kò khwè̌nǎ nû̌ûmi̤ dě aǒ ta amûasǎ ta̤bè̌hǔ tophlǒ dě a hî̌,

“Wî̤dû̌ Babulo

Mî̌ bò꤮ mamǔpò̤lò̤ toǒ

Ta hǎkhû̌ a ta̤phû̌mò̤shî̌hto toǒ amo̤,”

Kò khwè̌nǎ hǐnu.

6 Dě he kè̌shǐ mamǔnu tapwa̤ omṳ ana̤ ta Cǒmara akòyò htě acǒtè̤ ta Ye̤shǔ dě kò ma̤si nû̌ûnu toǒ asǐ.

Bǎ he kè̌shǐ a akhanu, he sû̌pi̤sò̌pi̤ jòjî̌꤮ tò̤. 7 Tanaphû̌ gwè he, “Na sû̌pi̤sò̌pi̤ ma̤tè?” He glè pwe̤ǐ bǎ na ta̤htě amûasǎ ta̤bè̌hǔ mamǔ htǒotapwa̤ awi̤akè̌, htodě a mî̌ ta̤mi̤ta̤mò̤ htě aǒ ta ahǐkǒ susǒtama htǒonu tado ta ane̤ ǒ phòshǐ dě a dò̌ǐnu tado awi̤akè̌. 8 Ta̤mi̤ta̤mò̤ htě na kè̌shǐhto taplǎkhanu aǒhto hǒ pwǎ̤tadě khònò̤htǒo a ǒpe tò̤nu tado ǒlṳhtò̌ gesǒ pě. ^e A ǒ khokûdû̌ khokûyo̤ nutûkû dě a hǎhtò̌ pě. Dě Běcǎ kaǎcû̌ nû̌û ta̤cèrò agûla̤ dě a ma̤pî̌kè nû̌û tûjûpwa̤ pě. Tèhtò̌ bǎ kò bǒlò̤ hǎkhû̌ akhape, kòyò htě a ǒhtûpwa̤ hǎkhû̌ bǎotoǒ dě kò khwè̌kû̌dǒ asîmi̤ dě lî̤htûpwa̤ akû hǒtò̤ toǒnu, a sû̌pi̤sò̌pi̤bò lǒkho bǎ asî kè̌ ta̤mi̤ta̤mò̤ htǒotado akhanu pě, ma̤tè̤hî̌dě, taplǎkhanu ta̤mi̤ta̤mò̤ htǒotado ǒhtûpwa̤ khònò̤ dě a ǒpe tò̤, pò̤̌ta a ǒlṳgesǒ pě akhû̌akhî, asî sû̌pi̤sò̌pi̤bò lǒkho pwǎ. ^f

9 Ma̤pûhǐ na sî̌ya htǒonu, na tobǎ lîmò. Hǐkǒ susǒtama mî̌ a sò̌le̤ hî̌ klolophû̌ susǒtama htě mamǔ htǒotapwa̤ hǎnòò̌ǐ nû̌ûnu toǒ hǒ. 10 Khwǐcophǎ susǒtapwa̤ mî̌ amè̤mè̤. Dě asîklanu a lò̤te̤kè sò̌yè̤ hǒ. Tapwa̤nu a pǒǐpe ta̤, a ǒkèpe tapwa̤, pò̤̌ta a hè hǒtò̤, htû̌꤮ a hè pěnu a pǒǐpwǎ teděsǎ pa. 11 Ta̤mi̤ta̤mò̤ htě a ǒhtûpwa̤hto taplǎ dě khònò̤htǒo a ǒpe tò̤ tadonu, a mî̌ Khwǐcophǎ apwa̤lǐ̤sǒnu tapwa̤ hǒ. A mî̌ a ǒpadǒ kû̌ dě Khwǐcophǎ susǒtapwa̤nu toǒ akla. Běcǎ kaǎcû̌ nû̌û dě a glè cû̌ cèrò ma̤pî̌kè nû̌û.

12 Ane̤ ǒ phòshǐ dě na kè̌shǐhto yǎnu mî̌ Khwǐcophǎ apwa̤shǐ htě a pǒǐ shiga hǒtò̤ toǒ pwǎ̤tadě kò glè ǐ asî ta̤sîrîshû̌sho dě a pǒǐyî̤ ta̤na̤rî̤ pě. A pǒǐ dǒkû̌ ta̤ ta ta̤mi̤ta̤mò̤ pwǐ Khwǐcophǎ toǒnu pě. ^g 13 Bò꤮ khwǐcophǎ apwa̤shǐ htǒonu, a ǒbò ta a ta̤yè̤lò̤nǎ dě a sǒsǒnû̌û toǒnu, a glè ǐlò̤kè a ta̤sîrîpo̤phǎ ta a ta̤sîrîshû̌sho dě ta̤mi̤ta̤mò̤nu tado a cǔdekû pě. 14 Asî shě sophû̌nu tado pě, pò̤̌ta sophû̌ htǒotado shěpè̤kè asî pě, ma̤tè̤hî̌dě sophû̌ htǒonumî̌ amî̌ Běcǎ toǒ a Běcǎ, Khwǐcophǎ toǒ akhwǐcophǎ, dě kòyò htě a ǒkû̌ ta anu toǒ mî̌ kòyò htě Cǒmara kaǎ asî, htohǒtò̤ Cǒmara wû̌lǎ asî, htodě asî mî̌ kòyò htě acǒatè̤ ta ayo̤ toǒ.

15 Dě tanaphû̌ pwe̤ǐ he, “Shikhî̌ pṳ̂̌bo htě na kè̌shǐ mamǔpò̤lò̤ hǎnòò̌ dě akhû̌nu toǒ numî̌ kòyò pṳ̂̌꤮ tapwa̤, khlilèphû̌ pṳ̂̌꤮ tacǎ, ta yo̤ pṳ̂̌to̤yo̤ dě hǎkhû̌ htǒonuhǒ. 16 Ane̤ ǒ aphòshǐ dě na kè̌shǐhtonu ta ta̤mi̤ta̤mò̤nu tado sò̌khěkè mamǔpò̤lò̤nu tapwa̤ pě. Asî phî̌sigwikèbò nû̌û ta̤ lǒ̤꤮ bò htě aǒǐnu toǒ pě, dě a noǒkoyokè nû̌û pě. Asî ǎkè nû̌ûyî̌ pě, dě a shû̌gèkèbò nû̌û ta mî̌ pě. 17 Ma̤tè̤hî̌dě ma̤pûhǐ asî ma̤lǒbehtò̌ Cǒmara a ta̤yè̤lò̤nǎ htǒo ayanu, Cǒmara shû̌nṳhto a ta̤yè̤lò̤nǎ htǒo dě asî sò̌phlǒkû ta asî glè sò̌yṳ ǐlò̤kè a ta̤sîrîshû̌sho htǒonu ta ta̤mi̤ta̤mò̤ htě a pǒǐ to̤htû̌ Cǒmara ale̤ayo̤ lǒhtò̌behtò̌ pěnu. 18 Mamǔ htě na kè̌shǐ yǎ tapwa̤nu mî̌ mî̌pwǎ wî̤dû̌ nutî̤wî̤ htě a pǒǐ hǎkhû̌ akhwǐcophǎ toǒ nupwǎ.”