Revelation of John 2

Sûcû̌ ta̤wi̤ta̤kè̌ dě Ephè̌shia pwa̤yṳǎta̤ aprṳ̂aho aǒ

1“Khwè̌cû̌ lî̤htǒo dě Ephè̌shia pwa̤yṳǎta̤ aprṳ̂aho a tanaphû̌nu tapwa̤ ǒnu,” a hî̌ he hǐnu. Dě a hî̌, “Ta̤wi̤ta̤kè̌ htǒonumî̌ a hè dě pwa̤ htě a pṳ̂měǐ shǎ susǒtama acǔdemû akû dě a cû̌ mî̌kohta susǒtama aklanu tapwa̤ ǒ dě a khwè̌cû̌bǎ asî pwǐhè̌o, 2Na ma̤ ta̤htǒonu he sî̌ya, na ma̤ lòdǒlòde nana̤ numî̌꤮ he sî̌yaya, htodě na khòsò̌dobò̌ ta̤jîta̤jû toǒ numî̌꤮ he sî̌yaya. Na ǒkû̌jòdǒ ta kòyò ma̤ ta̤phû̌mò̤shî̌hto toǒ tò̤ numî̌꤮ he sî̌yaya. Htodě kòyò htě a hî̌ lò̤tû̌ ana̤ ta pwa̤nophû̌ htě na sèlè asî dě na kè̌shǐ ta asî mî̌ pwa̤nophû̌ mè̤tò̤, mî̌pwǎ pwa̤hî̌bǎ lòhǎlòho toǒ pwǎ numî̌꤮ he sî̌yaya. 3Dě hemi̤ akhû̌akhî, na ma̤khòma̤bò̌ na khòbǎ ta̤jîta̤jû dě na sò̌phlǒ pî̌tò̤ numî̌꤮ he sî̌yaya.

4“Pwǎ̤tadě he la̤bè̌ta̤sǔ dě nalo̤ numî̌ aǒ tacǎ, aǒ hî̌tèhî̌dě na mo̤ǐ he khònò̤htǒonu a sǒsǒpe ta na mo̤ǐ he dě awǐkhanu tò̤. 5Na cû̌tepheyî̤kè ta na ta̤mo̤ǐ dě khû̌lû̌kha pwî̌꤮ tènu gènè̤ kè̌mò̌. Shò̌lò̤sû̌shò̌lò̤sò̌ gesǒ nasò̌ dě ma̤gesǒpû na ma̤ dě akhû̌lû̌ akhonu. Na dè shò̌lò̤sû̌shò̌lò̤sò̌ gesǒ nasò̌ tò̤ hî̌mò̌nu he hè naǒ dě he hèphî̌ tephekè na mî̌konu dě agûla̤ htǒonu pě. 6Pwǎ̤ta na ta̤wǒ ǒpe tacǎ. Aǒpe mî̌titèhî̌dě na sò̌khě Nikò̌laphû̌ ma̤ ta̤phû̌mò̤ toǒnu a sǒsǒkû̌ta he sò̌khě asî ta̤ma̤nu hǒ.

7“Na nò̌ku dè ǒ dě gana̤de ta̤ htě Běcǎ sǎcahtǐ pwe̤ǐ pwa̤yṳǎta̤ aprṳ̂aho htǒotoǒnu. ^a Kòyò htě a ma̤pè̤ta̤ tapwa̤nu, he ǐ a ta̤sîrîshû̌sho dě a ǎnṳ sǒhtûpwa̤ asǎ htě a ǐkò ta̤htûpwa̤ htǒonu tosǒ pě. Sǒhtǒo tosǒnu a dǒ dě Cǒmara a we̤kû htě kò kaǎ yǎta Paradǐsu akûnu pě.” ^b

Sûcû̌ ta̤wi̤ta̤kè̌ dě Samǔranǎwî̤ pwa̤yṳǎta̤ aprṳ̂aho ǒ

8“Khwè̌cû̌ lî̤htǒo dě Samǔranǎwî̤ pwa̤yṳǎta̤ aprṳ̂aho a tanaphû̌nu tapwa̤ ǒnu,” a hî̌ he hǐnu. Dě a hî̌, “Ta̤wi̤ta̤kè̌ htǒonu, a hè dě pwa̤ htě a sihto a htûpwa̤gesǒ htǒotapwa̤ ǒ. A mî̌ ta̤akòshî̌ ta agutṳ tapwa̤. ^c 9Napò̤nasha, na hǒwi̤shèwè numî̌ he sî̌ya. Pwǎ̤tadě sû̌sò̌ tokhonu, na dû̌yò̤htò̌sa. Kòyò htě a hî̌lò̤ tû̌ ana̤ ta pa mî̌ Yṳ̌daphû̌ toǒ mè̤na̤cè̌ pwǎ̤tadě a mè̤na̤cè̌ mè̤tò̤ htǒotoǒ dǒ sîyo̤ numî̌ he sî̌ya. Asînu toǒ mî̌ khînǎmo̤pha hǐkǒdû̌ a ta̤sabahǐ saprṳ̂phû̌ toǒ pwǎ. 10Ta̤htě na glè̌ khòbǎ khònò̤ htǒonu, ǐsha pû ala̤ dî̌kî̌꤮ ma̤ nî̌. Khînǎmo̤pha hǐkǒdû̌ ma̤wǒ kòyò dě kòyò glè ma̤kè̌bǎ sî akhû̌akhî, a dǒnṳ sî dě apo̤kû toǒǒ pě. Kòyò ma̤jîma̤jû sî ani̤shǐ asashǐ pě. To̤htû̌ na kè̌shǐbǎ ta ta̤si bǎbǎ, tûrû̌ cǒtè̤ ta henu, he ǐtû̌ na ta̤htûpwa̤ a khû̌glûhta pě.

11“Na nò̌ku dè ǒ dě gana̤de ta̤ htě Běcǎ sǎcahtǐ pwe̤ǐ pwa̤yṳǎta̤ aprṳ̂aho htǒotoǒnu. Kòyò htě a ma̤pè̤ta̤ toǒ a khòbǎpe sû̌sò̌ tokho ata̤si tûjûpwa̤ htǒonu tò̤ hǒ.” ^d

Sûcû̌ ta̤wi̤ta̤kè̌ dě Pekamǔwî̤ pwa̤yṳǎta̤ aprṳ̂aho ǒ

12“Khwè̌cû̌ lî̤htǒo dě Pekamǔwî̌ pwa̤yṳǎta̤ aprṳ̂aho a tanaphû̌nu tapwa̤ ǒnu,” a hî̌ he hǐnu. Dě a hî̌, “Ta̤wi̤ta̤kè̌ htǒonumî̌ a hè dě pwa̤ htě aǒ ta nò̌she dě a htò cî̌htè̌cî̌khobò tabǎ tapwa̤ ǒ. 13Na ǒtò̤ ta khînǎmo̤pha hǐkǒdû̌ la̤hǎnòò̌ gògohtò̌yî̤ agûla̤ numî̌ he sî̌ya. Bǎ kòyò ma̤si Atǐpa mî̌pwǎ pwa̤khòlṳ htě a cǒtè̤ ta hehtǒonu tapwa̤ bǎ na wî̤kû dě khînǎmo̤pha hǐkǒdû̌ la̤ǒ agûla̤nu hǐnudě na cǒtè̤ ta he, na wîkè na ta̤yṳta̤nǎ tò̤.

14“Pwǎ̤tadě ta̤wi̤ta̤kè̌ htě he la̤bè̌ta̤sǔ dě nalo̤ numî̌ aǒpe tîkî̌, mî̌titè toǒtè hî̌numî̌, kòyò ǒ dě sîkla toǒǒnu, a gûma̤kû̌ Bala a ta̤sû̌ǐtòwòǐ. ^e Bala sû̌ǐtòwòǐ Khwǐbalè ta a glè htû̌sǒbǎ Israelphû̌ sîtoǒ ta asî glè ǎ shǎǎshǎo htě kò tòhtò̌ǐ yǎta pwa̤yo̤pwa̤gî htǒonu toǒ, htodě a glè cû̌sǔnṳ lǒkho mamǔmakhû hǐnu. ^f 15Hǐnuakho, dě sîklanu kòyò htě a gûma̤kû̌ Nikò̌laphû̌ a ta̤sû̌ǐtòwòǐnu aǒ toǒǒ. 16Khònò̤dě wîkèmò̌ na ta̤sǔta̤plěnu. Na dè wîkè tò̤ hî̌mò̌nu he hèlǎ phwè dě na ǒ pě dě he hèshě kòyònu toǒ ta tǒ̤phû̌ htě a hǎhtò̌ dě he gokû htǒonu tabǎ pě.

17“Na nò̌ku dè ǒ dě gana̤de ta̤ htě Běcǎ sǎcahtǐ pwe̤ǐ pwa̤yṳǎta̤ aprṳ̂aho htǒotoǒnu. ^g A hî̌ hî̌tèhî̌dě, bò kòyò htě a ma̤pè̤ ta̤ toǒnu he ǐ yǎ mû̌manǎ htě kò bè̌ǒhǔ a htǒoto̤glo pě. Htodě he ǐ asî lo̤bû tapwa̤ tama pě, htě kòyò khwè̌sa nû̌ûmi̤ alo̤ htǒonu pě. Mi̤sa htǒonu kò sî̌ya a dǐpwǎ̤tò̤, sî̌ya pwǎpǒ̤ kòyò htě a nî̤bǎ lo̤htǒonu tapwǎ̤ pa pwǎ.” ^h

Sûcû̌ ta̤wi̤ta̤kè̌ dě Twatǐra pwa̤yṳǎta̤ aprṳ̂aho ǒ

18“Khwè̌cû̌ lî̤htǒonu dě Twatǐra pwa̤yṳǎta̤ aprṳ̂aho a tanaphû̌nu tapwa̤ ǒnu,” a hî̌ he hǐnudě a hî̌, “Ta̤wi̤ta̤kè̌ htǒonumî̌ a hè dě Cǒmara aphû̌khû ǒ. A mi̤sǎphlǒnu a gèplo̤htò̌ sǒsǒta mî̌, a khò̌lopo̤nu, a shěrakha sǒsǒta tîlîbò htě kò htǔplò̌shǐ yǎnu. 19Na ma̤kwè̌ hî̌tènu he sî̌ya. Na ta̤mo̤ta̤kla, na ta̤yṳta̤nǎ, na ta̤phî̌ta̤ma̤, na ma̤khòma̤bò̌ ta̤ toǒnu he sî̌ya. Ta̤htě na ma̤ khònò̤htǒo toǒnu, a ǒ dû̌khlope ta ta̤htě na ma̤htonu toǒ mî̌ he sî̌yaya.

20“Pwǎ̤tadě he la̤bè̌ta̤sǔ dě nalo̤ numî̌ aǒ tacǎ. Mî̌titè hî̌dě, na plû nosû̌ǐtòwòǐ mamǔ Ye̤sabělè dě a hî̌lò̤ ana̤ ta he mî̌ Cǒmara apwa̤po̤ tapwa̤, nu tapwa̤. A sû̌ǐtòwòǐ kò akhû̌akhî, a sûcû̌sǔbò hekòyò jûphû̌ toǒ dě a glè cû̌sǔnṳ mamǔmakhû, htodě a ǎ shǎǎshǎo htě kò tòhtò̌hto yǎta pwa̤yo̤nu toǒ. ⁱ 21He ǒyṳ̂ yǎ dě a glè shò̌lò̤sû̌shò̌lò̤sò̌ gesǒ a ta̤cû̌sǔnṳ mamǔmakhûnu toǒ pwǎ̤tadě a sò̌yṳ wîkè tò̤. 22Dě a ma̤hǐnu akhû̌akhî, he nosha hǎmoǒlò̤ a dě la̤mi̤khû̌ pě. Kòyò htě a cû̌sǔnṳ ta mamǔ htǒotapwa̤nu, he nokhòbǎjî khòbǎjû yǎ pě. Ta̤phû̌mò̤shî̌hto htě asî cû̌sǔnṳ ta mamǔ htǒotapwa̤ toǒnu, asî dè yò̤lò̤pe asò̌ tò̤ hî̌kǎlè̌ he nokhòbǎjî khòbǎjû asî pě. 23He ma̤si dǒǔkè akhophijaû̌ toǒ pěpě. Hǐnudě pwa̤yṳǎta̤ aprṳ̂aho pṳ̂̌tṳgumṳ sî̌ya ta he mî̌ pwa̤ htě a sî̌ya kò pṳ̂̌꤮ tapwa̤ a ta̤gènè̤ ta a ta̤sò̌yṳ toǒnu pě. ^j Sî tapwa̤ ta tapwa̤ ma̤htobò kwè̌ pwî̌tènu, he dǔlṳ gekhîshǔ sî pwǐ sî ma̤htonu toǒ pě. ^k 24Pwǎ̤tadě sî Twatǐra pwa̤yṳǎta̤ aprṳ̂ahophû̌ htě a ǒkè htǒotoǒnu, sî gûma̤kû̌ kòyò mamǔ Ye̤sabělè a ta̤sû̌ǐtòwòǐ phû̌mò̤shî̌hto htě kò kaǎ yǎta khînǎmo̤pha hǐkǒdû̌ ata̤ bè̌hǔ adû̌ayǒ htǒotoǒnu tò̤. He bè̌htò̌pe ta̤bǐta̤glî dě sîlo̤ dǐcǎ꤮ tò̤. 25Pwǎ̤tadě pṳ̂měǐ wǒ lǒkho ta̤htě aǒ ta sînu toǒ to̤htû̌ he hèlò̤ pě taplǎnu nî̌꤮.

26– 27“Ûpèpè̌꤮ bǎbǎ a ma̤pè̤ta̤ htě a dè ma̤ hèpo̤ to̤htû̌ agutṳ pwǐ he ta̤sò̌yṳ ǒnu hî̌kǎlè̌, he ǐyǎ ta̤sîrîshû̌sho htě alò̤ta he nî̤bǎ dě hepha ǒnu toǒ pě. ^l

‘He ǐyǎ ta̤sîrîshû̌sho htě a pǒ shiga toǒ ta khî̌po̤ te̤htò̌ pě, dě a demǔdeprî̌bò asî pwǐ kò demǔdeprî̌ gopo̤lo̤hǎnu pě.’ 28He ǐ a shǎto̤wo̤ pěpě. 29Na nò̌ku dè ǒ dě gana̤de ta̤ htě Běcǎ sǎcahtǐ pwe̤ǐ pwa̤yṳǎta̤ aprṳ̂aho toǒnu.”