Revelation of John 20
Anětîrî̌
1Hǐnuhtodě he kè̌shǐ tanaphû̌ tapwa̤ ǒ mǒkhû̌ hèlò̤ dě a pṳ̂měǐ khokûdû̌ khokûyo̤ htǒotûkû asò̌shî̌ ta sǒpli̤te̤htò̌dû̌ tabo dě a cǔdekû. 2A hè pṳ̂měkè wṳ̂sapo̤pṳ htě khînǎmo̤pha hǐkǒdû̌ děwǐkha nutabo. A mî̌ kò kaǎ nû̌û ta Sehto. Dě a cokloměyî̤ nû̌û anětîrî̌. a 3Tanaphû̌nu tapwa̤ wîlòte̤kè nû̌û khokûyo̤ nutûkû akû dě a è̌měbǐkè nû̌û dě a ma̤dòǐkè nû̌û. Ma̤pûhǐ a cû̌ lǒplò̤pe pû khlilè toǒ tò̤nu, a dǒ ǒbe nû̌û anětîrî̌. Dě anětîrî̌be pěnu, kò plûhǎhtò̌sǒ nû̌û pě teděsǎ. 4Htodě he kè̌shǐ Khwǐcophǎ gògohtahtò̌yî̤ toǒ. Kòyò hǎnòò̌ gògohtahtò̌yî̤ alo̤ toǒnu, kò ǐ asî ta̤sîrîshû̌sho dě a cèrò kò pě. He kè̌shǐ kû̌po̤ kòyò htě a khòlṳ ta Ye̤shǔ awi̤akè̌ dě a dǒhtû̌ǐ bǎ kò Cǒmara ale̤ayo̤ toǒ akhû̌akhî, kò pe̤tṳkè asî yolahtûpwa̤ toǒ a gobo. Ta̤mi̤ta̤mò̤ bǎbǎ, ta̤mi̤ta̤mò̤ apwa̤yo̤ htǒonu bǎbǎ, asî sabahtò̌nǒ kû̌kò tò̤. Pwǎhǐnuhtohǒtò̤ ta̤mi̤ta̤mò̤nu tado a ta̤ma̤dòǐ htě kò bǎ ma̤dòǐ yǎ dě me̤htò̌lo̤ nubǎbǎ, mètò̤mî̌ kò bǎ ma̤dòǐ yǎ dě cǔdelo̤ nubǎbǎ, a phî̌shǔbǎ kû̌kò ta̤ma̤dòǐ dǐcǎ꤮ tò̤. Asî htûpwa̤gesǒ dě a pǒǐ dǒkû̌ ta̤ ta Khrî̌stu anětîrî̌. b 5Htǒomî̌ ta̤htûpwa̤ge awǐgutṳ̌ taplǎ hǒ. Anětîrî̌be hǒtò̤nu, kòyò htě a sihto dě a ǒpe hǎla̤ toǒnu, a htûpwa̤ge hǒtò̤. 6Kòyò ǒkû̌dǒ dě ta̤si htûpwa̤ge wǐgutṳ̌ htǒo taplǎ akû toǒ numî̌ a nî̤bǎ ta̤howi̤ dě asî mî̌ kòyò cahtǐphû̌ toǒ. A lû̌kè ta ta̤si ginǐ̤plǎtaplǎ hǒ. Asî htû Cǒmara ta Khrî̌stu a pwa̤lṳhtò̌ta̤ toǒ pě. Asî pǒǐ kû̌dǒ ta Khrî̌stu anětîrî̌ pě.Ta̤ma̤pè̤ khînǎmo̤pha hǐkǒdû̌
7Anětîrî̌ behtò̌hto pěnu, kò plûhǎhtò̌ khînǎmo̤pha hǐkǒdû̌ dě apo̤kû pě. 8Dě a hǎhtò̌cû̌bò hǎkhû̌ lǐ̤ga dě a lǒplò̤bò khlilèphû̌ toǒ pě. Kò kaǎ asî ta Gò̌phû̌ ta Magò̌phû̌. c Asî bǎ htò̌shěta̤ akhû̌akhî, khînǎmo̤pha hǐkǒdû̌ kaǎ ǒplǒdǒbò asî pě. Asî ǒplṳ̂ sǒsǒta lo̤semě dě shidû̌shite̤we̤htu toǒnu pě. d 9Asî hǎhtò̌cû̌ hǎkhû̌tebě dě cû̌bo te̤we̤bǐbò Cǒmara akòyò toǒ ta wî̤ htě Cǒmara mo̤ǐ nû̌û htǒotî̤wî̤. Pwǎ̤ta mî̌ ǒ dě mǒkhû̌ hèlò̤ gèkèbò asî. 10Khînǎmo̤pha hǐkǒdû̌ htě a lǒplò̤ asî htǒotadonu, kò wîlòte̤kè nû̌û mî̌kla dě kò shû̌gè nû̌ûta ya̤sû̌bò htǒonu tokoǒ akû. Mî̌htǒo tokoǒ numî̌ kò la̤wîlòte̤ ta̤mi̤ta̤mò̤nu tado ta pwa̤po̤ lòhonu toǒ agûla̤nu hǒ. Dě asî khòbǎ ta̤jîta̤jû lṳmṳkhǐkhǐ lṳmṳshasha tûjûpwa̤ talakhǎ pě.Ta̤cèrò gutṳ̌lò̤
11Htodě he kè̌shǐ Khwǐcophǎ gògohtabûdû̌ htò̌yî̤ tabǎ ta pwa̤ hǎnòò̌ akhû̌nu tapwa̤. Dě mǒkhû̌ ta hǎkhû̌ nûcû̌kè a lo̤mo̤ dě kò kè̌shǐpe yǎ tò̤hǒ. e 12Dě he kè̌shǐ kòyò htě ami̤ lṳshilṳga ta kòyò htě kò gènè̤pî̌tî̌ nû̌û dě a sihto toǒ ihtǒ ǒ Khwǐcophǎ gògohtabûdû̌ htò̌yî̤ htǒo alo̤mo̤. Kò bòmohtò̌ lî̤toǒ htodě kò bòmohtò̌ lî̤ ahǔwa̤ tabǎ htě kò kaǎ nû̌ûta lî̤htûpwa̤ htǒo. Kòyòsi htǒotoǒnu, kò cèrò asî pwǐ a ma̤bǎhtonu ta pwǐ kò khwè̌mǎ dě lî̤htǒo akûnu toǒ. 13Htodě shidû̌shite̤we̤ htǒonu a ǐ akòyò si htě a ǒ dě akûnu toǒ. Ta̤si amo̤pha ta lṳnǎkhwǎ ado toǒnu, a ǐ lǒkho kòyòsi ǒ dě asîkûnu toǒǒ. Dě kò cèròbò kòyò pṳ̂̌ tapwa̤ pwǐ asî ma̤hto ta̤nu. 14Htodě anǒkònu, ta̤si amo̤pha ta lṳnǎkhwǎ ado toǒnu, kò wîlòte̤kè asî dě mî̌kla. Mî̌ htǒomî̌ ta̤si ginǐ̤plǎtaplǎ hǒ. 15Kòyò tapwa̤pwa̤nu kò dè kè̌shǐ kò khwè̌nǎ ami̤ dě lî̤htûpwa̤ htǒotabǎ akû tò̤ hî̌nu, kò bǎ wîlòte̤kè a dě mî̌ htǒotoǒ akla.
Copyright information for
KxfSCKRC