Rev 4 | KxfSCKRC | STEP | Ta̤htǒotoǒ htodě he kè̌shǐlṳnǎpo̤ ta̤hǔwa̤ tacǎ. Dě mǒkhû̌nu, takha tabǎ lṳ̂mo dě he gana̤de ta̤po̤htò̌ tacǎ dě a po̤ sǒsǒta Tǔpo̤ pwǐ he gana̤dehto akhû̌lû̌ akhanu, dě a hî̌bǎ he dě a hî̌, “Htò̌bǎo, htǒotoǒ htûhtò̌hto pě dě kwè̌꤮ mî̌titè bǎ htûhtò̌lè̌ pěnu, he glè dǔlṳ bǎ na.”

Revelation of John 4

Kòyò subusabahtò̌ Cǒmara dě mǒkhû̌ shila̤gakû

1 Ta̤htǒotoǒ htodě he kè̌shǐlṳnǎpo̤ ta̤hǔwa̤ tacǎ. Dě mǒkhû̌nu, takha tabǎ lṳ̂mo dě he gana̤de ta̤po̤htò̌ tacǎ dě a po̤ sǒsǒta Tǔpo̤ pwǐ he gana̤dehto akhû̌lû̌ akhanu, dě a hî̌bǎ he dě a hî̌, “Htò̌bǎo, htǒotoǒ htûhtò̌hto pě dě kwè̌꤮ mî̌titè bǎ htûhtò̌lè̌ pěnu, he glè dǔlṳ bǎ na.” 2 Htǒotaplǎdě Běcǎ sǎcahtǐ pṳ̂měǐ he taplǎpa, dě mǒkhû̌nu Cophǎ a gògohtahtò̌yî̤ ǒ tabǎ dě kò hǎnòò̌ akhû̌ tapwa̤. ^a 3 Kòyò tapwa̤nu ami̤sǎ rakha sǒsǒta lo̤ lî̤pi̤sǐ dě kò kaǎ yǎta Jasper tama ta lo̤ lî̤lǒsǒ htě kò kaǎ yǎta Sardius, htodě bǎ Khwǐcophǎ gògohtahtò̌yî̤ akòshî̌nu, kǒwǒshibo ǒ te̤we̤bò nû̌û sǒsǒta lo̤sula htě kò kaǎ yǎta emerald nu. 4 Cophǎ gògohtahtò̌yî̤ ahǔwa̤ gini̤shi lǐ̤ma htǒonu a ǒte̤we̤ ta Cophǎ gògohtahtò̌yî̤ dě Cophǎ gògohtahtò̌yî̤ htǒotoǒ akhû̌nu, wè̤khǔwè̤pwa̤ gini̤shi sò̌li̤ htě a kûsǒhtò̌ hǐdobû dě a glûhtò̌ khû̌glûhta toǒ hǎnòò̌ lǒkho bǎnu. 5 Bǎnuakha, dě Cophǎ gògohtahtò̌yî̤nu tabǎ akûnu, laû̌shě htò̌, mǒgomǒyi̤, tî̌lî̌lò̤bò. ^b Dě Cophǎ gògohtahtò̌yî̤ alo̤mo̤nu, mî̌ tarǎbo susǒtabo mî̌ Cǒmara a sǎcahtǐ susǒtama htǒonu, ^c agè plo̤htò̌ bǎnu. ^d 6 Bǎ Cophǎ gògohtahtò̌yî̤ alo̤mo̤nu, shikoǒdû̌ htě ashěkîtrî̌ sǒsǒta lo̤ bûplò̌ tamanu aǒ tokoǒ. ^e

Ta̤htûpwa̤ lǐ̤do dě a mi̤sǎphlǒ ǒbò anǒkòkò, dě lo̤mo̤mo̤ htǒonu, a ǒ te̤we̤bò lè̌bǎ Cophǎ gògohtahtò̌yî̤ akòshî̌nu. ^f 7 Awǐgutṳ̌ tadonu alò̤ta sî̌ò̌, ginǐ̤do tadonu alò̤ta pṳ̂phadû̌, sudo tadonu ami̤sǎ sǒsǒta kòyò mi̤sǎ dě lǐ̤do tadonu, alò̤ta lòtò̌ htě a wi̤ dě mǒla̤nu. 8 Ta̤htûpwa̤htǒo lǐ̤do bònu, tado mî̌ a děgeǒ a bǎ susǒ, a mi̤sǎphlǒ toǒnu, a ǒbò ana̤ sapwa̤, aǒ to̤bò dě aděgela̤. Asî sò̌po̤ htû̌sò̌ǐ nû̌û pṳ̂̌ni̤ni̤꤮ pṳ̂̌sasa, a ǒkǔ dǐplǎ꤮ tò̤. Dě a sò̌po̤ htû̌sò̌ǐ lǒkho ta, ^g

“Běcǎ Cǒmara htě a ma̤jòta̤ lǒ̤꤮ bò dě a ǒhtûpwa̤ awǐkha, dě a ǒhtûpwa̤ tǒ̤lò̤khònò̤, htodě a glè ǒhtûpwa̤ hèpo̤ htǒotapwa̤nu, a cahtǐ, a cahtǐ, a cahtǐ.” ^h

9 Ta̤htûpwa̤htǒo lǐ̤donu, a sò̌po̤htò̌ a ta̤sîrîdû̌sîrîhtû htodě bè̌dubè̌na̤ ta hî̌bwǐhî̌sîrîhtò̌ Cǒmara dě a hǎnòò̌ bǎ Cophǎ gògohtahtò̌yî̤ akhû̌ dě a htûpwa̤ tûjûpwa̤ talakhǎ htǒonu tapwa̤. Dě bǎ asî sò̌po̤htò̌ pwǐhè̌o akhanu, 10 Wè̤khǔwè̤pwa̤ gini̤shi ta sò̌li̤ htǒonu a gene̤lò̤ dě pwa̤ hǎnòò̌ Cophǎ a gògohtahtò̌yî̤ akhû̌nu tapwa̤ lo̤mo̤ dě a sabahtò̌ kòyò htě a htûpwa̤ tûjûpwa̤ htǒonu tapwa̤. Asî bè̌lòte̤kè a khû̌glûhta htǒotoǒ Cophǎ gògohtahtò̌yî̤ alo̤mo̤ dě a sò̌po̤htò̌ lǒkho ta,

11 “Kǒ꤮ pa Běcǎ Cǒmara, na gwa nî̤bǎ ta̤sîrîdû̌sîrîhtû, ta̤bè̌dubè̌na̤ ta ta̤po̤ta̤phǎ hǒ, ma̤tè̤hî̌dě na bǒlò̤ ta̤ lǒ̤꤮ bò dě na bǒlò̤ asî dě na bè̌ ǒhtûpwa̤ asî jǔ꤮ tû̌ na sò̌phlǒ.”