Rev 6 | KxfSCKRC | STEP | He kè̌shǐ sophû̌nu tado kèè̌mohtò̌ kò klǎměhtu ta̤ma̤dòǐ susǒtukǔ aklahtǒo awǐgutṳ̌ tukǔ dě he gana̤de ta̤htûpwa̤nu lǐ̤do akla tadonu ayo̤po̤htò̌ sǒsǒta tî̌lî̌lò̤nu dě “Hèmò̌” a hî̌ hǐnu.

Revelation of John 6

Kò ma̤měwǒ ta̤ma̤dòǐ toǒ

1 He kè̌shǐ sophû̌nu tado kèè̌mohtò̌ kò klǎměhtu ta̤ma̤dòǐ susǒtukǔ aklahtǒo awǐgutṳ̌ tukǔ dě he gana̤de ta̤htûpwa̤nu lǐ̤do akla tadonu ayo̤po̤htò̌ sǒsǒta tî̌lî̌lò̤nu dě “Hèmò̌” a hî̌ hǐnu. 2 He kè̌ dě he kè̌shǐ tîsî̌bû tado, dě kòyò htě a dò̌ nû̌û tapwa̤nu a pṳ̂měǐ khlǐ tabǎ dě kò ǐyǎ khû̌glûhta tama. Anu, alò̤ta kòyò htě a shěpè̤hto kò tapwa̤nu. Khònò̤dě a dò̌nṳ gesǒ tîsî̌ dě a hǎhtò̌cû̌ ma̤pûhǐ a cû̌shěpè̤ gesǒ kònu. ^a

3 Bǎ sophû̌htǒo kèè̌mohtò̌ ta̤ma̤dòǐ ginǐ̤kǔtukǔ akhanu, he gana̤de ta̤htûpwa̤ ginǐ̤do tado htǒonu hî̌, “Hèmò̌.” 4 Dě tîsî̌lî̤ tado hǎhtò̌, dě kòyò htě a dò̌ nû̌û tapwa̤nu, kò ǐ nû̌û ta̤po̤ta̤phǎ dě a glè phî̌hè ta̤shěta̤pe̤ hǎkhû̌bǎo. Dě hǎkhû̌phû̌ toǒ glè ma̤si tû̌ kè̌khînû̌û tapwa̤ ta tapwa̤. Htohǒtò̤ kò ǐ nû̌û nò̌she tabǎ. ^b

5 Htodě sophû̌nu tado kèè̌mohtò̌ ta̤ma̤dòǐ sukǔtukǔ htě kò ma̤mě anu, dě he gana̤de ta̤htûpwa̤ sudonu tado hî̌, “Hèmò̌” a hî̌ hǐnu. He kè̌ dě he kè̌shǐ tîsî̌lo̤ tado dě kòyò htě a dò̌ nû̌û tapwa̤nu a ǒǐ cò̌cû̌lǎ dě a cǔdekû. ^c 6 He gana̤de dě ta̤htûpwa̤ lǐ̤dohtǒo aklanu, alò̤ta yo̤po̤htò̌ tacǎ, dě a hî̌, “Wè̤ta̤ ti̤nǐ̤ mṳhǎnu, a ǐ pwǎ akhû̌kǎ bǔkû̌lǎ taba pwǎ, mètò̤mî̌ bǔbali̤ suba pwǎ. Dě ma̤pî̌kè pû Oliveshi ta sobîshisî̌yo̤nu ma̤ nî̌꤮.”

7 Htodě sophû̌nu tado kèè̌mohtò̌ ta̤ma̤dòǐ lǐ̤kǔtukǔ htě kò ma̤mě anu, dě he gana̤de ta̤htûpwa̤ lǐ̤donu tado hî̌, “Hèmò̌” a hî̌ hǐnu. 8 He kè̌ dě he kè̌shǐ tîsî̌bòbûla tado. Dě kòyò htě a dò̌ nû̌û tapwa̤nu kò kaǎ nû̌ûmi̤ ta ta̤si. Dě lṳnǎkhwǎ ado gûtî̤tî̤ kû̌ nû̌ûkò. Kò ǐ asî asîrîshû̌sho dě a ma̤pî̌kè hǎkhû̌ lǐ̤lè̌tèlè̌ pě. Hǐnudě a ma̤si kò ta ta̤shěta̤pe̤, ta̤hǒwi̤shèwè, ta̤shǐta̤sha ta a noma̤si kò ta ta̤mi̤ta̤mò̤ toǒ pě. ^d

9 Htodě sophû̌nu tado kèè̌mohtò̌ ta̤ma̤dòǐ htě kò ma̤mě a yè̤̌kǔtukǔ. He kè̌shǐ kòyò htě a dǒhtû̌ǐ bǎ kò ta Cǒmara ale̤ayo̤, htohǒtò̤ a khòlṳ cǒtè̤, dě kò ma̤sihto asî toǒnu, he kè̌shǐ asî yolahtûpwa̤ toǒ ǒdě ta̤lṳwa̤ ala̤nu. 10 Asî yi̤kǒhtò̌shû̌ lǒkho ayo̤ ta, “Běcǎ htě a jòta̤lǒ̤bò dě a cahtǐ, acǒatè̤ tapwa̤, kòyòhǎkhû̌phû̌ htě a ma̤si pa htǒotoǒnu, na glè cèrò asî, na ma̤ gesǒ asî ta li̤ bò̌khòtè pě?” 11 Kò ǐ asî hǐdopo̤to̤bû pṳ̂̌꤮ tapwa̤, htodě kò hî̌ asî ta asî glè ǒkǔpo̤. Dě asî ǒkǔ to̤htû̌ kò ma̤si behtò̌ asîkho jûphû̌ toǒ ta apṳwè̤ htě a yṳǎna̤ǎta̤ toǒ pwǐ kò ma̤sihto asînu pě.

12 He kè̌ dě, he kè̌shǐ sophû̌nu tado kèè̌mohtò̌ ta̤ma̤dòǐ akǔ susǒ htǒotukǔ. ^e Htǒotaplǎdě, tṳtṳhtû̌dî̌ ma̤shû̌ mè̤mè̤̌, lṳmṳ khǐkè sǒsǒta hǔgòpwî̌ tûphrûlo̤ tṳpṳnu, htodě la mî̌ alî̤ pi̤sǐkè sǒsǒta sǐnu. ^f 13 Shǎ toǒ lòte̤jabò hǎkhû̌ sǒsǒta gili̤sǎ hèdû̌ dě dǐshisǎ mi hǒtò̤ toǒ lòte̤bò hǎkhû̌nu. ^g 14 Mǒla̤nu a hǎmǎkè sǒsǒta kò tûlûhǔkè lî̤tûklûnu. Kholo pṳ̂̌tama ta shikholophû̌jo pṳ̂̌tamanu, a sǒsǔ cû̌kèbò ta agûla̤. ^h

15 Bǎnukha pěnu, hǎkhû̌ Khwǐcophǎ toǒ, pwa̤pǒta̤ toǒ, kli hǐkǒdû̌ toǒ, pwa̤dû̌yò̤htò̌sa toǒ ta pwa̤khû̌ǎdû̌ toǒ, htodě bò꤮ jû toǒnu bǎbǎ, bò꤮ pwa̤ nî̤bǎ ta̤pelesesǎ sî toǒnu bǎbǎ, a cû̌ ǒhǔ lǒkho ana̤ dě khokû, lo̤te̤shǒplǎ htě a ǒ dě khomǔkholoklanu toǒ pě. ⁱ 16 Asî yi̤kǒhtò̌ lǒkho kholotoǒ ta lo̤toǒ dě a hî̌ lǒkho, “Lòte̤ja palo̤ bǎo dě lòte̤jabǐ bǎkè pa ta pwa̤ htě a hǎnòò̌ dě Khwǐcophǎ gògohtahtò̌yî̤ akhû̌nu tapwa̤ ami̤sǎ ta sophû̌ a ta̤sò̌dû̌ pa htǒonu. ^j 17 Ma̤tè̤hî̌dě, mṳni̤mṳsa hèto̤hǒ dě Cǒmara ta sophû̌ glè cèrò kòyò pṳ̂̌꤮ tapwa̤, ûpè tapwa̤ glè̌ khòbǎ pěpè?” ^k