Rev 9 | KxfSCKRC | STEP | Hǐnuhtodě bǎ tanaphû̌ yè̤̌pwa̤ tapwa̤ ǔhtò̌ atǔ akhanu, he kè̌shǐ tanaphû̌phû̌mò̤ htě alò̤ta shǎ tama lòte̤ ǒhto bǎ hǎkhû̌bǎo dě kò ǐ shǎ htǒotama ta khokûdû̌ khokûyo̤ tûkû asò̌shî̌.

Revelation of John 9

1 Hǐnuhtodě bǎ tanaphû̌ yè̤̌pwa̤ tapwa̤ ǔhtò̌ atǔ akhanu, he kè̌shǐ tanaphû̌phû̌mò̤ htě alò̤ta shǎ tama lòte̤ ǒhto bǎ hǎkhû̌bǎo dě kò ǐ shǎ htǒotama ta khokûdû̌ khokûyo̤ tûkû asò̌shî̌. 2 Shǎhtǒo tama bòmo khokûdû̌ khokûyo̤ htǒotûkû dě mî̌khǔhtò̌ akû a sǒsǒta mî̌khǔhtò̌ mî̌po̤dû̌ akûnu. Mî̌ khǔhtò̌ akhû̌akhî, lṳmṳ mî̌ akhǐkhǐ, mǒla̤ mî̌ a khǐkèbò. ^a 3 Dèpo̤ toǒ ǒ mî̌khǔkla wi̤hǎhtò̌ a wi̤hǎhtò̌ lò̤bò hǎkhû̌ dě asî nî̤bǎ ta̤po̤ta̤phǎ shû̌sho dě a glè wè̤ kòyò, dě a wè̤ sǒsǒta donè̤ hǎkhû̌bǎo toǒ ěwè̤ kònu pě. ^b 4 Kò hî̌nǎ asî ta a bǎ ma̤pî̌nṳ mi̤mṳ toǒ tò̤, sǒgoto̤ sǐso toǒ tò̤, sǒmî̌wû̌ sîtoǒ dî̌kî̌꤮ tò̤. Asî bǎ ě pwǎpǒ̤ kòyò htě a ǒ ǐ Cǒmara ata̤ma̤dòǐ dě a me̤htò̌lo̤ tò̤nu toǒ pwǎ. ^c 5 Dèpo̤ htǒotoǒnu, kò hî̌ asî ta a bǎ ma̤sinṳ kòyò htǒotoǒ tò̤, pwǎ̤ta asî ma̤shajî ma̤shajûnṳ kòyò yè̤̌la akû. Ta̤ma̤jîma̤jû kò htǒonu, ěwè̤sha sǒsǒta donè̤ ěnu. 6 Htǒoyè̤̌la akûnu, kòyò htǒotoǒ glè kè̌lǎ ta̤si hǐnudě a kè̌shǐ tò̤. Asî sò̌yṳ si hǐnudě ta̤si amo̤pha khlè̌ tephekè asî gûla̤ pě. ^d

7 Dèpo̤ toǒnu alò̤ta tîsî̌ toǒ dě a ma̤wǒnǎ ana̤ ta a glè shěta̤ ayanu. Dě asî hǐkǒlo̤nu alò̤ta a glûnṳ khû̌glûhtanu, htodě asî mi̤sǎnu, alò̤ta kòyò mi̤sǎ. ^e 8 Asî khû̌lṳnu, alò̤ta mamǔ toǒ akhû̌lṳ dě akhû̌khinu alò̤ta sî̌ò̌ toǒ akhû̌khi. ^f 9 Dě asî soolo̤nu alò̤ta a sǒnṳ hǐdote̤htò̌ dě a gapla̤ aděgenu apo̤ kookasha sǒsǒta kò htò̌shě ta̤shě dě kò wṳ̂ pṳtṳpè̤tè̤htò̌ plṳ̂ tîsî̌lo̤ toǒnu. ^g 10 Agòme̤nu, a sǒsǒta donè̤ dě a ěwè̤ sǒsǒta donè̤. Agòme̤ htǒonu, aǒ ta ata̤khû̌awè̤ shû̌sho dě a ějîějû kò yè̤̌la akû pě. 11 Khwǐcophǎ htě a pǒǐ asînu a ǒtapwa̤. A mî̌ tanaphû̌ tapwa̤ htě a pǒǐ khokûdû̌ khokûyo̤ htǒotûkûnu tapwa̤ hǒ. Ebrephû̌ ayo̤ numî̌ ami̤ ta Abado dě Greek ayo̤ numî̌, a hî̌ nû̌ûta Apò̌lia. ^{▼▼Amûasǎ mî̌ pwa̤ma̤pî̌ ta̤.}

12 Ta̤jîta̤jû awǐgutṳ̌ tacǎ numî̌, a tûlû̌kèhto hǒ. Htǒotacǎ htopě mî̌ ta̤jîta̤jû hèpo̤ pě ginǐ̤cǎ.

13 Bǎ tanaphû̌ apwa̤ susǒnu tapwa̤ ǔhtò̌ atǔ akhanu, he gana̤de yo̤po̤htò̌ dě ta̤lṳwa̤hta ane̤ lǐ̤bo akû htě a ǒ Cǒmara alo̤mo̤nu. ⁱ 14 Yo̤sǎ hî̌lò̤ tanaphû̌ apwa̤ susǒ htě a pṳ̂měnǎ tǔnu tapwa̤, “Plûhǎhtò̌cû̌ tanaphû̌nu sò̌li̤ htě kò coklomě asî dě shikhî̌ Uphrětǐ akûnu.” 15 Tanaphû̌ apwa̤ susǒ htǒotapwa̤nu, a cû̌ plûhǎhtò̌kè tanaphû̌ htǒosò̌li̤ dě, asî htǒonu, kò ma̤wǒnǎ khǒtû̌ asî dě a glè ma̤si totǐkè kòyòhǎkhû̌phû̌ sulè̌tèlè̌ bǎ ta̤na̤rî̤ akû, ti̤ni̤ akû, tala akû ta taně akû htǒonu pě. 16 Kli htě a dò̌ tîsî̌ toǒnu, a ǒplṳ̂ pwî̌꤮ tènu, he gana̤de kò pwe̤ǐbǎ he ta a ǒ asě ginǐ̤rî̌.

17 Dě he ta̤kè̌shǐlṳnǎ akûhtǒonu he kè̌shǐ tîsî̌ toǒ ta pwa̤dò̌ nû̌û toǒ. Asî sǒ lǒkho hǐdote̤htò̌ toǒ dě alî̤ sǒsǒta mî̌, a ǒpholo̤kî, htodě a bò sǒsǒta ya̤sû̌bò htě kò kaǎ nû̌ûta Sulphurnu. Tîsî̌ htǒotoǒ ahǐkǒnu, alò̤ta sî̌ò̌ hǐkǒ dě tîsî̌ htǒotoǒ agokûnu, mî̌, mî̌khǔ toǒ ta ya̤sû̌bò Sulphur hǎhtò̌bò. 18 Mî̌gèhtò̌, mî̌khǔhtò̌, ya̤sû̌bò hǎhtò̌ dě tîsî̌ htǒotoǒ agokû. Dě ta̤htǒosucǎ ma̤jîma̤jû kò akhû̌akhî, kòyò si sulè̌tèlè̌. 19 Ma̤tè̤hî̌dě tîsî̌ toǒ a ta̤po̤ta̤phǎshû̌sho dě a glè ma̤shakònu, a ǒ dě asî gokû ta agòme̤ alo̤nu. Agòme̤ toǒnu a hǐkǒ ǒ dě agòme̤ htǒotoǒnu, alò̤ta wṳ̂ hǐkǒ, dě a ma̤shǐma̤shabò kò ta agòme̤ htǒotoǒ.

20 Kòyò htě a ǒlû̌kè ta ta̤ma̤jîma̤jû ata̤shasila̤ htǒotoǒnu, a ma̤ sělěhè tû̌ a ta̤phû̌mò̤shî̌htonu toǒ. A shò̌lò̤ge lǒkho asò̌phlǒ tò̤. Asî saba sadape lǒkho khînǎkhîno, pwa̤yo̤ htě kò ma̤ yǎta hta, kò ma̤ yǎta wû, kò ma̤ yǎta tîlî ta lo̤ ta sǒ dě a kè̌shǐjòtò̤, htodě a gana̤de jòtò̤, a cû̌jòtò̤nu toǒ. ^j 21 Htohǒtò̤ asî ata̤ma̤si kòyòhǎkhû̌phû̌, ata̤ma̤ kěǎ kòyo̤ toǒ, a ta̤cû̌sǔnṳ mamǔmakhû ta a ta̤ǎhǔǎkě toǒnu, a shò̌lò̤sû̌shò̌lò̤sò̌ kû̌pe asò̌phlǒ dǐkhò̌꤮ tò̤.