Rom 12 | KxfSCKRC | STEP | Hǐnudě, pṳwè̤ sî꤮, Cǒmara a ta̤gwèbǎǐ panu, adû̌ayǒ tûlû̌shû̌ ta paya akhû̌akhî, he kwigwèbǎǐ sî ta sî glè ǐlò̤ sî na̤saklû htǒo dě Cǒmara a ǒ pwǐ ta̤lṳ htě a htûpwa̤, pwǐ ta̤lṳ htě a cahtǐ ta pwǐ ta̤lṳ htě ato nû̌ûsò̌phlǒ a ta̤sò̌yṳnu nî̌꤮. Sî to sabahtò̌ Cǒmara pwǐhè̌onumî̌ klè̌ htě atoabǎ tabo hǒ.

Romans 12

Ǒhtûpwa̤ ta Cǒmara aya

1 Hǐnudě, pṳwè̤ sî꤮, Cǒmara a ta̤gwèbǎǐ panu, adû̌ayǒ tûlû̌shû̌ ta paya akhû̌akhî, he kwigwèbǎǐ sî ta sî glè ǐlò̤ sî na̤saklû htǒo dě Cǒmara a ǒ pwǐ ta̤lṳ htě a htûpwa̤, pwǐ ta̤lṳ htě a cahtǐ ta pwǐ ta̤lṳ htě ato nû̌ûsò̌phlǒ a ta̤sò̌yṳnu nî̌꤮. Sî to sabahtò̌ Cǒmara pwǐhè̌onumî̌ klè̌ htě atoabǎ tabo hǒ. 2 Ǒhtûpwa̤ kè̌mò̌mṳ pûma̤ pwǐ kòyò htě a sî̌ya kû̌kò Cǒmara tò̤nu toǒ ala̤klo ǒhtûpwa̤nu ma̤ nî̌꤮. Ma̤pûhǐ sî ǒhtûpwa̤ khǒtû̌ ta asînu dě, nohtû̌lè̌ tèplè̌sa khǒkè sî ta̤gènè̤ toǒnu ta Cǒmaranu nî̌꤮. Sî dè ma̤hǐnu mî̌ sî sî̌yahèbò̌ pwǎ ta̤ htě Cǒmara sò̌yṳ noma̤ sînu toǒ pwǎ. Hǐnudě sî sî̌yahè ta̤wǒ, ta̤ma̤mo̤ Cǒmara asò̌phlǒ, ta ta̤sî̌ya lǒbehè Cǒmara a ta̤sò̌yṳ toǒ pě.

3 Cǒmara abwǐasîrî khû̌khî, a bè̌htò̌ he ta he htû pwa̤nophû̌ tapwa̤, he hî̌bò sî pṳ̂̌꤮ tapwa̤ ta, gènè̤dû̌khlo pûma̤ sîna̤ ta pwî̌ sî to gènè̤ǐ sîna̤nu ma̤ nî̌꤮. Mî̌tanu sî tobǎ gènè̤ǐpwǎ sîna̤ pwî̌ atoabǎnu. Gwè lò̤kè̌ tû̌ sî ta̤yṳta̤nǎ htě Cǒmara ǐ sî numî̌ adû̌ pwî̌꤮ tènu gènè̤sǒ lǒkho pwî̌nupwǎ nî̌꤮. 4 Pana̤ mî̌ atucu pwǎ nû̌û tapwa̤ pwǎ pwǎ̤tadě pana̤klû aphwǐaphrû̌ toǒ numî̌ a ǒkhǒnû̌û. Aphwǐaphrû̌ tacǎ ta tacǎnu, a ma̤ sǒsǒnû̌û ta̤ma̤ tò̤. ^a 5 Hǐnudě pa ǒplṳ̂ǒphǎ pwǎ̤tadě pa htûhtò̌ nû̌û na̤klûtapwǎ̤꤮ pa dě Khrî̌stu akûhǒ. Pa tǒhtubò nû̌û pṳ̂̌꤮ tapwa̤hǒ. 6 Pa glè noǎ pa sû htě Cǒmara ǐbwǐǐsîrî khǒnû̌û tapwa̤ ta tapwa̤ htǒonu. Cǒmara nodǒhtû̌ǐ kòyò tapwa̤pwa̤ ta ale̤ayo̤ dèhî̌dě, a tobǎ dǒhtû̌ǐ pwî̌ Cǒmara ǐ nû̌û ta̤yṳta̤nǎnu pwǎ. ^b 7 Cǒmara ǐ kòyò tapwa̤pwa̤ a ta̤sî̌ta̤jò dě a noma̤jè nû̌û ta kòhǔwa̤ dèhî̌dě, a tobǎ ma̤jè kò. A ǐ kòyò tapwa̤pwa̤ a ta̤sî̌ta̤jò dě a nosû̌ǐ nû̌û ta kò dèhî̌mò̌nu, a tobǎ sû̌ǐ kò. 8 Cǒmara ǐ kòyò tapwa̤pwa̤ a ta̤sî̌ta̤jò dě a bǎ tûsû kòyòkò dèhî̌mò̌nu a tobǎ tûsû kò. Kòyò tapwa̤ a dè sò̌phlǒsho ma̤lṳma̤tò̌ kòyò shuphǔshèwèphû̌ toǒ ta a ta̤kî̌ta̤kû̌ toǒ dèhî̌dě a tobǎ sò̌phlǒsho ma̤lṳma̤tò̌ bǎ kò. Cǒmara ǐ kòyò tapwa̤pwa̤ a ta̤sî̌ta̤jò dě a bǎ htû hǐkǒdû̌ hî̌dě a tobǎ ma̤ sapwa̤ tû̌. Kòyò tapwa̤pwa̤ a dè sò̌yṳ ma̤jè kò dèhî̌dě, a tobǎ ma̤ ta ta̤sò̌le̤sò̌lò̤ akû.

9 Mo̤khěmo̤khǒ pûma̤ kò ma̤ nî̌꤮. Wi̤jakè ta̤phû̌mò̤shî̌hto nî̌꤮. Phǒměwǒ lǒkho ta̤wǒ nî̌꤮. 10 Mo̤ǐ nû̌û pwǐ pṳwè̤ tṳgumṳ kûnu nî̌꤮. Bè̌dubè̌na̤ nû̌û tapwa̤ ta tapwa̤ nî̌꤮. 11 Gûma̤ lǒkho Běcǎ ata̤ma̤ nî̌꤮. Cè̌klè lǒkho pûma̤꤮. Dè ma̤ Běcǎ ata̤ma̤ hǒ hî̌numî̌ bè̌sho lǒkho sî sò̌phlǒ nî̌꤮. 12 Sî ta̤kè̌shuǐ htě Cǒmara ma̤wǒ bǎ sîya htǒotoǒnu, sò̌le̤sò̌lò̤ lǒkho nî̌꤮. Bǎ ta̤pò̤ta̤sha hèbǎ sî akhanu, khòsò̌do lǒkho, kwisaba lǒkho pṳ̂̌꤮ plǎ nî̌꤮. 13 Cǒmara akòyò toǒ dè shuphǔshèwè hî̌dě, phî̌jèma̤jè asî nî̌꤮. Kè̌ ǐǎǐoshǔ lǒkho shǐpwa̤shǐmè̤ nî̌꤮. Kaǎ hǎmoǒpa̤ lǒkho asî dě sî hǐdǒkû nî̌꤮.

14 Howi̤homò̤ tû̌ kòyò htě a ma̤jîma̤jû sînu toǒ nî̌꤮. Kwisaba ta Cǒmara glè howi̤ asînu nî̌꤮, ǐshoǐběshǔ pûma̤ asî ma̤ nî̌꤮. ^c 15 Sò̌le̤sò̌lò̤ plǒhtu ta kòyò htě a sò̌le̤sò̌lò̤nu toǒ nî̌꤮. Sǎpla̤sǎyṳ plǒhtu ta kòyò htě a sǎpla̤sǎyṳnu toǒ nî̌꤮. 16 Ǒhtûpwa̤ plǒbò nû̌û ta sò̌phlǒ tamǎ꤮ pa akû nî̌꤮. Phî̌htò̌yî̤ lǒkho pûma̤ sî sò̌phlǒ ma̤ nî̌꤮. Mî̌tanu, bǒsû̌khǎkho lǒkho ta kòyò shuphǔshèwèphû̌nu toǒ nî̌꤮. Gènè̤dû̌ pûma̤ nana̤ ma̤ nî̌꤮. ^d

17 Kòyò htě a ma̤jî nanu, ma̤jî geshǔ pûma̤ asî ma̤ nî̌꤮. Ta̤ma̤ htě kò pṳ̂̌꤮ tapwa̤ gènè̤ ta awǒ toǒnu, jipwi̤ kè̌lǎma̤ lǒkho ta̤ma̤ hǐnu toǒ nî̌꤮. 18 A jògutṳ̌ dè hî̌mî̌, jipwi̤ ǒhtûpwa̤ mo̤kla kû̌ lǒkho ta kònu nî̌꤮. 19 Sû̌kho sî, kò dè ma̤sha sî hî̌dě, ma̤ geshǔsǒ pûma̤ kò ta li̤ ma̤ nî̌꤮. Nocèròtû̌ yǎta Cǒmara pě, ma̤tè̤hî̌dě lî̤cahtǐkû hî̌, “Pwa̤ htě a ma̤shǔ gesǒ kòyò htě a ma̤ ta̤phû̌mò̤nu toǒ mî̌ he pwǎ. He ma̤ geshǔtû̌ atali̤ ta hena̤ pě,” ^e Běcǎ hî̌ hǐnu. 20 Mî̌tanu, pwǐ lî̤cahtǐkû hî̌,

“Kòyò htě a sò̌khě na toǒnu, a dè sǎǎsò̌o hî̌dě, tûrû̌ ǐǎ a nî̌꤮. A dè lòdǒ sò̌oshi hî̌dě, tûrû̌ ǐo a nî̌꤮, sî dè ma̤hǐnu hî̌mî̌, a sòwò̤ tû̌ ana̤ sǒsǒta sî bè̌htò̌ mî̌klû̌ dě a hǐkǒkhû̌nu pě.” ^f

21 Noma̤pè̤ pûma̤ ta̤phû̌mò̤ ta nana̤ ma̤ nî̌꤮. Ma̤pè̤kè ta̤phû̌mò̤ htǒonu ta ta̤wǒ htǒonu nî̌꤮.