Romans 15

Ǒhtûpwa̤ lṳ̂ma̤mo̤ bǎ kòsò̌phlǒ

1Pa ǒsho ta ta̤yṳta̤nǎ htǒotoǒnu, pa to khòsò̌do ma̤jèdǒ bǎ kòyò htě a ta̤yṳta̤nǎ pî̌tî̌pe dě asò̌phlǒ wò̌wè̌pe tû̌ayanu toǒ. Pa to lṳ̂ma̤mo̤lò̤ tû̌ pana̤ tò̤. 2Ma̤pûhǐ a htûbwǐhtûsîrî bǎ asî ya, htodě ma̤pûhǐ asî dû̌htò̌htûhtò̌ ta ta̤yṳta̤nǎ akûnu, pa to lṳ̂ma̤mo̤ bǎ pa pṳwè̤ Khrî̌stuphû̌ toǒ asò̌phlǒ. 3Ma̤tè̤hî̌dě, Khrî̌stu sana̤nu a lṳ̂ma̤mo̤ tû̌ ana̤ tò̤. Mî̌tanu, lî̤cahtǐkû hî̌, “Ta̤ htě kò pi̤jishǐcǒ na toǒnu, a hèbǎ he hǒ.” ^a 4Ma̤tè̤hî̌dě, lî̤cahtǐ htě kò khwè̌nǎ yǎ dě꤮ wǐkha toǒnu, a khwè̌nǎ ta a bǎ sû̌ǐtòwòǐ pa aya. Ma̤pûhǐ pa ǒ ta ta̤kè̌shuǐnu, lî̤cahtǐ ǐ pa ta̤khòsò̌do ta ta̤khû̌ta̤ǎ toǒ hǒ.

5He kwisaba ta Cǒmara htě a ǐ sî ta̤khòsò̌do htǒo ta ta̤khû̌ta̤ǎ htǒotapwa̤nu, a glè ma̤jè tû̌ sî ma̤pûhǐ sî tapwa̤ ta tapwa̤ ǒnî̤dû nû̌û ta sò̌phlǒ tamǎpa pwǐ sî kè̌mò̌mṳ Ye̤shǔkhrî̌stu a ta̤ǒhtûpwa̤nu toǒ nî̌꤮. 6Sî dè ma̤hǐnu hî̌dě sî htû̌sò̌ǐbò̌ lǒkho pa Běcǎ Ye̤shǔkhrî̌stu apha Cǒmara htǒonu ta sò̌phlǒ tamanǔ꤮ pa akû ta ta̤hî̌bǎhtò̌ plǒnû̌û tacǎ꤮ pa akû pwǎ.

Ta̤sò̌le̤sò̌lò̤ awi̤akè̌ htě Yṳ̌daphû̌ mè̤tò̤ toǒ aya

7Hǐnudě kaǎshǔ lǒkho nû̌û tapwa̤ ta tapwa̤ nî̌꤮. Ma̤pûhǐ kò htû̌sò̌ǐ lǒkho Cǒmara dě kaǎshǔ nû̌û tapwa̤ ta tapwa̤ pwǐ Khrî̌stu kaǎshǔhto sînu nî̌꤮. 8Ma̤tè̤hî̌dě, he hî̌ sî ta Khrî̌stu hèlò̤htû bǎ Yṳ̌daphû̌ toǒ apwa̤ma̤ta̤ hǒ, ma̤tè̤hî̌dě ma̤pûhǐ Cǒmara cǒtè̤ ta ayo̤ dě a olò̤hto ta asî aphiaphu dě꤮ wǐkha toǒnudě Khrî̌stu hèlò̤htû hǐnu. 9Htohǒtò̤, ma̤pûhǐ Yṳ̌daphû̌ mè̤tò̤ toǒ htû̌sò̌ǐ dǒ Cǒmara a ta̤gwèbǎǐ asî htǒo ayanudě, Khrî̌stu hèlò̤ bǎ asîyaya. Lî̤cahtǐkû hî̌ ta,

“Hǐnudě, he htû̌sò̌ǐ na dě Yṳ̌daphû̌ mè̤tò̤ toǒ akla pě, he htû̌sò̌ǐ na ta he ta̤sò̌po̤ sîtoǒ pě.” ^b

10Dě a hî̌po̤,

“Kǒ Yṳ̌daphû̌ mè̤tò̤ sî, sò̌le̤sò̌lò̤ dǒkû̌mò̌ ta Cǒmara kòyò Yṳ̌daphû̌ htǒotoǒ nî̌꤮.” ^c

11A hî̌pepe ta,

“Yṳ̌daphû̌ mè̤tò̤ sî꤮, htû̌sò̌ǐ lǒkho Běcǎ, htû̌sò̌ǐ lǒ̤bò a pṳ̂̌꤮ tapwa̤ nî̌꤮.” ^d

12Pwa̤po̤ Isaǐa hî̌po̤sǒ ta,

“Yeshè̌ akhlialè hè ǒlṳhtò̌pě tapwa̤, dě a pǒǐ Yṳ̌daphû̌ mè̤tò̤ toǒ pě. Yṳ̌daphû̌ mè̤tò̤ toǒ kè̌shuǐ lǒkho nû̌û pě.” ^e

13Bǎ sî yṳǎ Cǒmara htě a ma̤jè sî htǒo akhanu, a mî̌ Cǒmara tapwa̤ htě pa la̤kè̌shuǐ a kòshî̌kòtṳ akhû̌akhî, a ma̤lǒbe tû̌bǎ sî ta̤sò̌le̤sò̌lò̤ ta sî sò̌phlǒ a ta̤gûjûkabǎ nî̌꤮. Htohǒtò̤ ma̤pûhǐ sî ta̤kè̌shuǐ shû̌htò̌shohtò̌ sělě kû̌po̤ dě alo̤mo̤ ta Běcǎ sǎcahtǐ a ta̤po̤ta̤phǎ akhû̌akhî pwǎnu he kwisaba bǎ sîya.

Pò̌lu a ta̤phî̌ta̤ma̤

14Pṳwè̤ sî꤮, he yṳǎ te̤mǎ sî ta sî ǒhtûpwa̤ lǒbe ta ta̤wî̤ta̤wǒ, ta ta̤sî̌khû̌sî̌ya dě alǒabe, dě sî sû̌ǐtòwòǐjò tû̌ lǒkho nû̌û tapwa̤ ta tapwa̤ hǒ. 15Pwǎ̤ta, Cǒmara ǐ he ta̤bwǐta̤sîrî dě he glè ma̤ ta̤ma̤htǒo akhû̌akhî, ma̤pûhǐ sî sî̌yahtò̌bǎgepo̤ yo̤sǎ htě he sû̌ǐtòwòǐ sînu toǒ dě, toǒǒnu he khwè̌lò̤lî bǎ sî hǒ. 16Cǒmara abwǐasîrî akhû̌akhî, a ǐ he ta̤ma̤ dě he glè ma̤ Ye̤shǔkhrî̌stu ata̤ma̤ bǎ Yṳ̌daphû̌ mè̤tò̤ toǒ akla. Ma̤pûhǐ Yṳ̌daphû̌ mè̤tò̤ toǒ htûhtò̌ ta̤lṳ tacǎ dě Cǒmara phî̌shǔ yǎ, htodě ta̤lṳ tacǎ htě Běcǎ sǎcahtǐ ma̤wî̤ma̤cahtǐhto nû̌û dě, Cǒmara wû̌lǎ khǒtû̌ he ta he glè ma̤ta̤ pwǐ pwa̤lṳhtò̌ta̤ htě a dǒhtû̌ǐlṳ bǎ kò ta Cǒmara a ta̤sò̌le̤sò̌lò̤ awi̤akè̌nu tapwa̤ hǒ.

17Hǐnudě, he htûhtò̌ ta Ye̤shǔkhrî̌stu tacǎpa akhû̌akhî, he gènè̤dû̌ na̤cè̌ ta̤ma̤ htě he ma̤ bǎ Cǒmara htǒonu hǒ. 18– 19Ta̤ ahǔwa̤ sî toǒnu he hî̌bǎhtò̌yî̤ bǔkû̌nǒ kòyò tò̤. He hî̌bǎhtò̌yî̤ bǔpwǎpǒ̤ Khrî̌stu ata̤ma̤ htě a ma̤jè hehtǒo awi̤akè̌ pwǎ. Dě he hî̌bǎ yǎ awi̤akè̌ htǒo akhû̌akhî, htodě asî kè̌shǐ he ta̤ma̤ toǒ, htohǒtò̤ Cǒmara a sǎcahtǐ ǐ he ata̤po̤ta̤phǎ htǒo dě, he ma̤lṳbǎ asî ta̤cǒklî̌kî̌ya htǒotoǒ ta ta̤htò̌te̤pe̤ sû̌pi̤sò̌pi̤nu toǒ akhû̌akhî, he yṳ̂klè̌nè̌klòbò̌ bǎ Yṳ̌daphû̌ mè̤tò̤ toǒ dě a glè gana̤de jûle̤phî̌yo̤ Cǒmara hǒ. Bǎ he cû̌ dǒhtû̌ǐbò bǎ kò ta Khrî̌stu a ta̤sò̌le̤sò̌lò̤ awi̤akè̌ akhanu, he cû̌nṳ pwe̤ǐlṳbò bǎ kò pṳ̂̌꤮ tapwa̤, pṳ̂̌tado htě doǒ cû̌ Ye̤rǔshèlèwî̤nu to̤dě Elǔrǐkhaganu toǒ hǒ. 20Htǒomî̌ ta̤ htě he sò̌yṳ kè̌shu ma̤nu hǒ. Gûla̤ bǎtè꤮ tò̤glò bǎbǎ, a gana̤de Khrî̌stu awi̤akè̌ tò̤nu he dǒhtû̌ǐbǎ asî ta ta̤sò̌le̤sò̌lò̤ awi̤akè̌, ma̤tè̤hî̌dě asǒsǒta hǐtama htě kò bǒlò̤hto akòkhǒ ta lo̤nu, he sò̌yṳ cû̌ ma̤htò̌ tṳtṳ kògûla̤ htě kò bǒlò̤hto htǒonu tò̤. 21Mî̌tanu, pwǐ lî̤cahtǐkû hî̌, “Kòyò htě kò hî̌nǒ bǎ asî ta a awi̤akè̌ hǒtò̤ toǒnu, asî kè̌shǐ nû̌û pě, kòyò htě a gana̤debǎ hǒtò̤ toǒnu asî sî̌yaphlohè pě,” ^f a hî̌ hǐnu.

Pò̌lu tîwî̌tòwò ta a glè cû̌ǒlè kû̌ Khrî̌stuphû̌ dě Rò̌mǎwî̤kûnu toǒ

22Dě ta̤htǒotoǒ akhû̌akhî, he glè hè dě sîǒnu, ta̤ma̤dǐdò sala̤ he hǒ. ^g 23Pwǎ̤tadě, khònò̤htǒo, lǒ̤꤮ bò gûla̤ te̤we̤lû bǎo tò̤glònu, he ma̤htobò hǒ, he la̤ma̤ gûla̤gûbò̌nu a ǒpe tò̤. Htohǒtò̤ he sò̌yṳ hè ǒlè kè̌shǐ mè̤mè̤̌ sî. 24Hǐnudě htû̌꤮ he cû̌ dě Sapega akhapěnu, he gènè̤ sò̌yṳcû̌ǒlè to̤kû̌ sî pě. Htû̌꤮ he cû̌ dě Sapega akhapěnu he cû̌ǒlè kû̌ sî bǎ Rò̌mǎwî̤kûnu pě dě he cû̌ bǒsû̌khǎkho tû̌ta sî pě teděsǎ he gènè̤ hǐnu. Htodě he kè̌shuǐ ta sî ǐ he sî ta̤ma̤jè htě he ta̤cû̌sělě Sapega htǒonu pě, he kè̌shuǐ hǐnu. 25Pwǎ̤tadě, khònò̤htǒo he cû̌ Ye̤rǔshèlèwî̤. Dě he cû̌phî̌ wû htě kò ma̤lṳma̤tò̌ toǒ bǎnu pě, dě he ma̤jè yǎta Cǒmara akòyò bǎ Ye̤rǔshèlèwî̤kûnu toǒ pě. ^h 26Ma̤tè̤hî̌dě, Makedò̌nia gaphû̌ toǒ ta Akhaya gaphû̌ toǒnu, a sò̌phlǒsho ǐcû̌dǒ wûtoǒ ta Cǒmara a pwa̤cahtǐphû̌ htě a shuphǔshèwè dě a ǒ lǒkho Ye̤rǔshèlèwî̤kûnu toǒ. 27Asî sò̌phlǒsho ma̤lṳ mè̤mè̤̌. Dè hî̌ mè̤mè̤̌mî̌, asî lo̤bǎma̤jè Yṳ̌daphû̌ htě a yṳǎge htǒotoǒ hǒ. Asǒsǒta asî mi̤shû̌ ǒplṳ̂ Yṳ̌daphû̌ htǒotoǒ hǒ. Ma̤tè̤hî̌dě Yṳ̌daphû̌ htǒotoǒnu a ǐǎpa̤dǒ tṳtṳ Yṳ̌daphû̌ mè̤tò̤ toǒ sû̌sò̌ ta̤howi̤ toǒ. Hǐnudě Yṳ̌daphû̌ mè̤tò̤ toǒ mi̤shû̌ǒ Yṳ̌daphû̌ toǒ ta a glè bǎ mèǎ gesǒ asî ta ta̤howi̤ wûhta ta ta̤kî̌ta̤kû̌ htǒotoǒ hǒ. ⁱ 28Hǐnudě htû̌꤮ he ǐkèhto wû dě asî cǔdekû pěnu, htodě htû̌꤮ he sî̌ya te̤mǎ ta asî nî̤bǎhto wû pě akhanu, he hǎhtò̌cû̌ dě Sapega pě, dě he nṳǒlè kû̌nǎ sî bǎnu pě. 29He sî̌ya ta htû̌꤮ he hèto̤ dě sî ǒpěnu, he phî̌hènṳ Khrî̌stu a ta̤howi̤ htě alǒabe htǒonu pě.

30Pṳwè̤ toǒ꤮, pa Běcǎ Ye̤shǔkhrî̌stu ta Běcǎ sǎcahtǐ a ta̤mo̤ǐ akhû̌akhî, he kwigwèbǎǐ sî ta sî kwisaba plǒkû̌dǒ ta he pě, dě sî kwisabahtò̌ dǒbǎ he dě Cǒmara a ǒ pě dě sî kwisaba lǒ̤sû̌lǒ̤sò̌ dǒbǎ heya pě nî̌꤮. 31Htodě, ma̤pûhǐ Cǒmara ma̤lû̌htò̌ he ta kòyò htě a ǒ Yṳ̌dagakû dě a yṳǎ kû̌kò Khrî̌stu tò̤nu toǒ a cǔdekûnu dě, kwisaba bǎ heya nî̌꤮. Htodě kwisaba kû̌po̤ bǎ pwa̤yṳǎphû̌ htě a ǒ dě Ye̤rǔshèlèwî̤kû toǒ glè sò̌le̤sò̌lò̤ phî̌shǔ ta̤ma̤lṳ htě he sûcû̌ bǎ asî htǒotoǒ nî̌꤮. 32Cǒmara dè sò̌phlǒǒ ta he hèǒlè to̤kû̌ sî pě hî̌dě, he hèǒkǔkû̌ sî pě, dě he hè sò̌le̤sò̌lò̤ kû̌dǒ ta sî pě. Htohǒtò̤ he hè nî̤bǎ ta̤ǐkhû̌ǐǎ he ta asa toǒ pě. 33Cǒmara a ta̤pè̤ta̤dû ǒkû̌ tû̌ta sî lǒ̤꤮ bò nî̌. Amè̤.