Rom 16 | KxfSCKRC | STEP | He pwe̤ǐlṳ bǎ sî ta pa pṳmamǔ Phǐbe awi̤akè̌. A mî̌ Kekharewî̤ pwa̤yṳǎta̤ aprṳ̂aho hǐkǒdû̌ tapwa̤.

Romans 16

Ta̤hî̌mo̤hî̌wǒ toǒ

1 He pwe̤ǐlṳ bǎ sî ta pa pṳmamǔ Phǐbe awi̤akè̌. A mî̌ Kekharewî̤ pwa̤yṳǎta̤ aprṳ̂aho hǐkǒdû̌ tapwa̤. 2 Htû̌꤮ a hèto̤kû̌ sî pě dě kaǎshǔ yǎ pwǐ pwa̤yṳǎna̤ǎ Běcǎ Ye̤shǔ dě asǒsǒta sî htǒonu nî̌꤮. Kaǎshǔ a pwǐ Cǒmara akòyò cahtǐ toǒ to kè̌ǐkhwè̌ǐ kònu nî̌꤮. A lo̤bǎ titètè̌꤮ bǎbǎnu ma̤jèdǒ yǎ nî̌꤮, ma̤tè̤hî̌dě he bǎbǎ, kòhǔwa̤ toǒ bǎbǎ, a phî̌jèma̤jè plṳ̂ kò hǒ.
3 He sûcû̌ he ta̤hî̌mo̤hî̌wǒ htǒo dě Akǔlǎ ta ama Prî̌kǐlǎ a ǒ. Asî mî̌ a ma̤kû̌dǒ he ta Ye̤shǔkhrî̌stu aya. ^a 4 A sî̌ya ta kò glè ma̤si asî pwǎ̤ta a khòsikhòǒ lǒkho ana̤, dě a ma̤lû̌htò̌gehto he hǒnu. A ma̤bwǐma̤sîrî tû̌ he mè̤tò̤, a ma̤bwǐma̤sîrî dǒbò pwa̤yṳǎta̤ aprṳ̂aho htě a htû Yṳ̌daphû̌ mè̤tò̤nu toǒ akhû̌akhî, pa hî̌bwǐhî̌sîrî asî.
5 Hî̌mo̤hî̌wǒ bǎdǒ he pwa̤yṳǎta̤ aprṳ̂ahophû̌ htě a hè subusaba kû̌ nû̌û dě hǐnu toǒ nî̌꤮.
Hî̌mo̤hî̌wǒ bǎdǒ he khobǒsû̌bǒmo̤ Èpanǐtǔ nî̌꤮. Kòyò htě a yṳǎ wǐgutṳ̌ Khrî̌stu dě Ashǎgakû numî̌ a hǒ.
6 He sûcû̌ he ta̤hî̌mo̤hî̌wǒ dě Marǐa a ǒ. A mî̌ a ma̤ bǎ mè̤mè̤̌ ta̤ ta sîya tapwa̤.
7 Sû cû̌ nṳbǎdǒ he ta̤hî̌mo̤hî̌wǒ dě Adronicǔ ta Junia nî̌꤮. Asî mî̌ Yṳ̌daphû̌ sǒsǒta he htǒonu pwǎ. Kò dǒlò̤te̤ plǒhtu asî ta he dě apo̤kû. Asî mî̌ pwa̤nophû̌ htě kò bè̌dubè̌na̤ na̤cè̌ toǒ. Asî gûwǐbò Khrî̌stu akò ta he nî.
8 He sûcû̌ nṳdǒ he ta̤hî̌mo̤hî̌wǒ dě Apliatǔ a ǒ. A mî̌ pa htû nû̌ûta Khrî̌stu tacǎnǔpa akhû̌akhî, he mo̤ǐ mè̤mè̤̌ yǎ.
9 He sûcû̌nṳ he ta̤hî̌mo̤hî̌wǒ dě Ǔrabanǔ htě a ma̤ plǒhtu Khrî̌stu a ta̤phî̌ta̤ma̤ ta he htǒonu tapwa̤ ta he khobǒsû̌bǒmo̤ Satakhǔ a ǒ.
10 Sûcû̌nṳ bǎdǒ he ta̤hî̌mo̤hî̌wǒ dě Apele a ǒnu nî̌꤮. A mî̌ pwa̤ma̤ta̤ htě a kè̌shǐshěto̤bǎhto ta̤ma̤jîma̤jû toǒ dě a sò̌phlǒpî̌ kû̌kò tò̤ tapwa̤ khû̌khî, kòyò htě la̤nǎla̤ǐ na̤cè̌ a tapwa̤hǒ.
Sûcû̌nṳ bǎdǒ he ta̤hî̌mo̤hî̌wǒ htǒonu dě Aristobulǔ ta a hǐphû̌phòphû̌nu toǒ a ǒ nî̌꤮.
11 Sûcû̌nṳ bǎdǒ he ta̤hî̌mo̤hî̌wǒ dě Herǒdè a ǒ nî̌꤮. A mî̌ Yṳ̌daphû̌ lò̤ta he pwǎ.
Sûcû̌nṳ bǎdǒ he ta̤hî̌mo̤hî̌wǒ dě pṳwè̤ Khrî̌stuphû̌ htě a ǒ dě Nasǐsǔ ahǐnu toǒ nî̌꤮.
12 Hî̌mo̤hî̌wǒ nṳbǎ he Htarǔphè̌nǎ ta Htarǔphosa sò̌gini̤nu nî̌꤮. Asî mî̌ mamǔ toǒ htě a ma̤ mè̤mè̤̌ ta̤ ta Běcǎ aya.
Hî̌mo̤hî̌wǒ nṳbǎdǒ hekhomo̤ǐ Perasǐ nunî̌꤮. A mî̌ mamǔ htě a jipwi̤ ma̤ mè̤mè̤̌ta̤ ta Běcǎ aya tapwa̤ hǒ.
13 Hî̌mo̤hî̌wǒ nṳbǎdǒ he Rǔwǔ nunî̌꤮. A mî̌ pwa̤ma̤ta̤ htě ami̤dû̌ ta ta̤yṳta̤nǎ tokho tapwa̤. Hî̌mo̤hî̌wǒ nṳbǎdǒ he amo̤ nunu nî̌꤮. Akè̌ǐkhwè̌ǐ he lò̤ta aphû̌ ta ana̤nu. ^b
14 Hî̌mo̤hî̌wǒ nṳbǎdǒ he Asakhrǐtǔ, Phalekò̌, Hema, Pahtrò̌ba, Hama sî toǒnu nî̌꤮. Htodě hî̌mo̤hî̌wǒ nṳbǎdǒ he pṳwè̤ Khrî̌stuphû̌ htě a hè saba to̤kû̌ ta asînu toǒ nî̌꤮.
15 Hî̌mo̤hî̌wǒ nṳbǎdǒ he Philolokǔ ta ama Jǔlia, Nerǔ ta apṳmamǔ, ta Olympas ta lǒ̤꤮ bò Cǒmara akòyò cahtǐ htě a hè saba dǒkû̌ ta asînu toǒ nî̌꤮.
16 Bǎ sî kè̌shǐ glashǔ nû̌û tapwa̤ ta tapwa̤ akhanu, gomo̤shǔ nû̌û ta ta̤gomo̤ htě a cahtǐnu akû nî̌꤮.
Khrî̌stu a pwa̤yṳǎta̤ aprṳ̂ahophû̌ lǒ̤꤮ bò sûhè bǎ sî ta asî ata̤hî̌mo̤hî̌wǒ toǒ pwǎ.

Ta̤mǎlò̤ gutṳ̌lò̤ toǒ

17 Pṳwè̤ sî, he sò̌le̤tûsûbǎ sîkò ta, ǒsè̌rè̌ lǒkho sîna̤ ta kòyò htě a hènṳma̤ htò̌pò̌htò̌shî ta̤nu toǒ nî̌꤮. Asî ta̤sû̌ta̤tòwò toǒnu a htû̌sǒbǎ cû̌ tephekè kòyò dě sîkla toǒǒ ta Khrî̌stu pě. Asî ta̤sû̌ǐ toǒnu a nûkhǒtû̌ ta Khrî̌stu awi̤akè̌ htě kò sû̌ǐhto sînu toǒ. Ǒtephekè ta asî nî̌꤮. 18 Ma̤tè̤hî̌dě kòyò hǐnu toǒ mî̌ a ma̤ Běcǎ Khrî̌stu ata̤ma̤ mè̤tò̤. Mî̌tanu, a lṳ̂ma̤mo̤ ma̤sò̌phlǒmo̤ lǒkho ana̤klû a ta̤sò̌yṳ toǒ pwǎ. A hî̌bǎmo̤ hî̌bǎjò kò, htû̌sò̌ǐ kò htě asî lǒǎplò̤ǎ kòyò dě a jûle̤phî̌yo̤sǔ ta̤nu toǒ pě. 19 Sî jûle̤phî̌yo̤ gana̤dewǒ yo̤nu, kò gana̤de lǒ̤꤮ bò pṳ̂̌꤮ tapwa̤ hǒ. Dě sî ǒhtûpwa̤ hǐnu akhû̌akhî, he sò̌le̤ jòjî̌꤮ tò̤. Pwǎ̤tadě ta̤wǒ mî̌ hî̌tènu, he sò̌yṳ nosî̌yaphlowǒ sî. Htodě ta̤phû̌mò̤ mî̌ hî̌tènu, he sò̌yṳ noǒ mṳ̂plîwǒ pwǎ sî.

20 Ǒyî̤tò̤ pěmî̌ ta̤pè̤ta̤dû a Cǒmara htǒo noyî̤pwî̌ mǔkè khînǎmo̤pha hǐkǒdû̌ htǒotado ta sî khǎlǎla̤ pě.

Běcǎ Ye̤shǔkhrî̌stu abwǐasîrî ǒkû̌ tû̌ta asî nî̌꤮.

21 Timò̤̌te htě a ma̤htukû̌ ta̤ ta he htǒotapwa̤ sûhèdǒ a ta̤hî̌mo̤hî̌wǒ dě sî ǒ. Htodě Lṳsǐa, Ya̤so ta Sosipatarǔ htǒotoǒ sûhènṳ kû̌kû̌. Asî mî̌ Yṳ̌daphû̌ toǒ sǒsǒta hehtǒo hǒ. ^c

22 He mî̌ Terǎtǐ. Lî̤htǒonu mî̌ Pò̌lu nokhwè̌ pwǎ he. Dě he hî̌mo̤hî̌wǒ cû̌nṳ sî ta Khrî̌stu ami̤akû.

23 Kayǔ hî̌mo̤hî̌wǒ cû̌nṳ sî. A kaǎshǔwǒ tû̌ he dě ahǐ mè̤tò̤, a kaǎshǔbò pwa̤yṳǎta̤ aprṳ̂ahophû̌ lǒ̤꤮ bò. A kaǎshǔwǒ mè̤mè̤̌ shǐpwa̤shǐmè̤. ^d

Pwa̤ǒpo̤ bǎkò wî̤ doshǐ wû Erǎtǔ htǒo ta pa pṳwè̤ Kwatǔ sûhè bǎdǒ sî ata̤hî̌mo̤hî̌wǒ toǒ. ^e 24 Pa Běcǎ Ye̤shǔkhrî̌stu abwǐasîrî ǒkû̌ tû̌ta sî lǒ̤꤮ bò nî̌꤮. Amè̤. ^{▼▼Lî̤phě htě kò khwè̌ wǐgutṳ̌ nû̌û dě꤮ nukha toǒnu amaphû̌ (24) htǒo a ǒpa tò̤.}

Ta̤htû̌sò̌ǐ a ta̤kwisaba gutṳ̌lò̤

25 Dě he dǒhtû̌ǐlṳ bǎ kò ta ta̤sò̌le̤sò̌lò̤ awi̤akè̌ htǒo ta Ye̤shǔkhrî̌stu awi̤akè̌htǒo akhû̌akhî, Cǒmara ma̤shû̌htò̌ bǎ sî ta̤yṳ dě pa htû̌sò̌ǐ a hò̌꤮. Ye̤shǔkhrî̌stu awi̤akè̌ htǒonumî̌, kò bè̌hǔyî̤kè yǎ hǒ pwǎ̤tadě khònò̤htǒo kò dǔlṳhtò̌ yǎ hǒ. 26 Pwǎ̤tadě khònò̤htǒo pwǐ pwa̤po̤ pwe̤ǐnǎhtonu, htodě pwǐ Cǒmara htě a htûpwa̤ tûjûpwa̤ htǒotapwa̤ mǎnǎhto ayo̤ toǒ ta, ma̤pûhǐ Yṳ̌daphû̌ mè̤tò̤ toǒ yṳǎ Khrî̌stu dě asî gana̤de nû̌ûyo̤ ayanu, kò ǐsî̌yalṳbò bǎ asî pṳ̂̌꤮ tò̤glò hǒ. 27 Dě Cǒmara htě a ma̤jò tû̌pwǎ ta̤ htǒotapwa̤nu, Ye̤shǔkhrî̌stu akhû̌akhî, a nî̤bǎ tû̌ ta̤sîrîdû̌sîrîhtû tûjûpwa̤ pě. Amè̤.