Rom 2 | KxfSCKRC | STEP | Sû̌kho sî, na dè hî̌ kò ta, “Asî numî̌ kòyò wǒtò̤,” pwǎ̤tadě na mî̌ kòyò wǒtò̤ sǒsǒpwǎta asî. Na cû̌hî̌ lû̌htò̌jò nana̤ mî̌ anî̤ tò̤. Bǎ na hî̌ ta asî mî̌ kòyòjî dě Cǒmara to cèrò asî khanu, na cèrò tû̌ nana̤, ma̤tè̤hî̌dě na mî̌ na ma̤ sǒsǒpwǎta hǐnu.

Romans 2

Cǒmara a ta̤cèrò mî̌ atoabǎ, acǒatè̤

1 Sû̌kho sî, na dè hî̌ kò ta, “Asî numî̌ kòyò wǒtò̤,” pwǎ̤tadě na mî̌ kòyò wǒtò̤ sǒsǒpwǎta asî. Na cû̌hî̌ lû̌htò̌jò nana̤ mî̌ anî̤ tò̤. Bǎ na hî̌ ta asî mî̌ kòyòjî dě Cǒmara to cèrò asî khanu, na cèrò tû̌ nana̤, ma̤tè̤hî̌dě na mî̌ na ma̤ sǒsǒpwǎta hǐnu. ^a 2 Pa sî̌ya ta Cǒmara cèròcǒ cèròtè̤ pwǎ kòyò htě a ma̤ ta̤sǔ hǐnu toǒ pwǎ. 3 Pwǎ̤tadě sû̌kho sî, kòyò ma̤ ta̤sǔ hǐnu toǒnu, na cû̌ pi̤jishǐcǒ kò ma̤tè? Na sana̤nu mî̌ na ma̤ sǒsǒpwǎta asî ma̤ ta̤sǔ. Hǐnudě, na gènè̤ nana̤ ta na lû̌htò̌ ta Cǒmara a ta̤cèrò pě hǐnu ya? 4 Cǒmara wǒ dě nakhû̌ pwî̌꤮ tè, A khòsò̌do bǎ na pwî̌꤮ tè, a sò̌phlǒhtû bǎ na pwî̌꤮ tènu, na bè̌dubè̌na̤ yǎtò̤ ya? Ma̤pûhǐ na yò̤lò̤gesǒ nasò̌ ayanudě, Cǒmara jipwi̤ dǔlṳ bǎ na ata̤mo̤ ta̤wǒ toǒ dě nakhû̌ numî̌ na sî̌ya te̤mǎ tò̤ ya?

5 Ma̤tè̤hî̌dě na mî̌ kòyò hǐkǒshò̌ dě sò̌phlǒbû̌tèplè̌yû tò̤ tapwa̤, hǐnudě, htû̌꤮ Cǒmara sò̌phlǒdû̌ dě a cèròcǒtè̤ta̤ ǒlṳhtò̌ pě akhanu, a sò̌phlǒdû̌khlo na pě dě a cèròjîkhlo na pě. 6 Cǒmara ǐ kò ta̤ma̤khû̌kǎ pṳ̂̌꤮ tapwa̤ pwǐ kò ǒhtûpwa̤ ma̤hto ta̤nu toǒ pě. ^b 7 Kòyò htě a ma̤ hèsělě ta̤wǒ, dě a kè̌lǎ Cǒmara ǐ nû̌û ta̤sîrîdû̌sîrîhtû, ta̤bè̌dû̌bè̌htû ta ta̤htûpwa̤ htě a sijòpè̤ tò̤ toǒnu, Cǒmara ǐ nû̌û yolahtûpwa̤ tûjûpwa̤ pě. 8 Pwǎ̤tadě kòyò htě a mo̤ǐlò̤ tû̌ ana̤ toǒ, ta a wîkè ta̤te̤ta̤mǎ, dě a gûma̤kû̌ ta̤phû̌mò̤shî̌hto toǒnu, Cǒmara sò̌phlǒdû̌ asî pě dě a bǎ cèrò asî pě. 9 Kòyò lǒ̤꤮ bò htě a ma̤ ta̤phû̌mò̤ toǒnu, a khòbǎ ta̤pò̤ta̤sha ta ta̤guta̤gè pě. Yṳ̌daphû̌ toǒ khòbǎ wǐgutṳ̌ pě, htopědě Yṳ̌daphû̌ mè̤tò̤ toǒ khòbǎkû̌ nǒkò pě. 10 Pwǎ̤tadě Cǒmara glè ǐ kòyò htě a ma̤ lǒ̤꤮ bò ta̤wǒnu toǒ, ta̤sîrîdû̌sîrîhtû, ta̤bè̌dubè̌na̤ nû̌û ta ta̤sò̌phlǒ gûjûkabǎ pě. A ǐ wǐgutṳ̌ Yṳ̌daphû̌nu toǒ pě htopědě a ǐnǒ Yṳ̌daphû̌ mè̤tò̤nu toǒ nǒkò pě. 11 Ma̤tè̤hî̌dě Cǒmara cèrò sǒsǒbò pwǎ nû̌û pě. A kè̌dû̌ kè̌pî̌tî̌ kò dǐpwǎ̤꤮ tò̤. ^c

12 Ta̤sû̌ta̤tòwò htě Cǒmara nokhwè̌mǎnǎ Mǒ̤jè toǒnu, Yṳ̌daphû̌ mè̤tò̤ toǒ ata ǒ kû̌kò tò̤ pwǎ̤tadě Cǒmara cèrò asî ta̤sǔ pě. Yṳ̌daphû̌ htě a ǒ ta ta̤sû̌ta̤tòwò htǒotoǒnu bǎbǎ, a gana̤de lǒkho Cǒmara a ta̤sû̌ta̤tòwò tò̤ dě a ma̤sǔ lǒkho ta̤ akhû̌akhî, Cǒmara cèrò asî pěpě. 13 Cǒmara bè̌cǒbè̌tè̤ kòyòhǎkhû̌phû̌ ta a gana̤debǎ ta̤sû̌ta̤tòwò khû̌khînu mè̤tò̤. Cǒmara bè̌cǒbè̌tè̤ kòyòhǎkhû̌phû̌ ta a gûma̤kû̌ pwǐ ta̤sû̌ta̤tòwò mǎnǎ ta̤hî̌bǎnu toǒ pwǎ. 14 Yṳ̌daphû̌ mè̤tò̤ toǒnu a nî̤bǎkû̌ Cǒmara a ta̤sû̌ta̤tòwò tò̤ pwǎ̤tadě tukutaplǎnu, asî sò̌phlǒ la̤klo gènè̤ ta̤toǒnu a sǒsǒta pwǐ ta̤sû̌ta̤tòwò hî̌nu aǒ toǒ. Hǐnudě asî sò̌phlǒkûnu a dǔlṳ ta asî sî̌ya ta̤wǒ ta ta̤phû̌mò̤. Hǐnudě asî sana̤ tû̌ htǒonu a htûhtò̌ bǎ asî ta̤sû̌ta̤tòwò hǒ. 15 Asî ta̤hî̌bǎhî̌sho, a ta̤ǒhtûpwa̤hǎnòò̌ sî toǒnu, a dǔlṳ ta Cǒmara a ta̤sû̌ta̤tòwò hî̌bǎ nû̌û dě a sò̌phlǒkû. Asî sò̌phlǒ htě a sî̌ya tû̌ ta̤wǒ ta ta̤phû̌mò̤ htǒonu a pweǐlṳ bǎdǒ asî. Asî sò̌phlǒ a ta̤gènè̤ htǒonu, taplǎplǎ a nè̌gesǒ tû̌ nû̌û ta a sǔ, taplǎplǎ dě a to, a ma̤ hǐnu. 16 Bǎ Cǒmara ǐlò̤ a ta̤po̤ta̤phǎ shû̌sho htě Ye̤shǔkhrî̌stu bǎ cèrò kò lǒ̤꤮ bò pě ti̤ni̤nu, a sǒsǒ ta hǐnu pě. Bǎnukhapě, kòyò lǒ̤꤮ bò a ta̤gènè̤ bè̌hǔ toǒnu, Cǒmara cèròbò asî ata̤bè̌hǔnu toǒ pě. Htǒomî̌ ta̤sò̌le̤sò̌lò̤ awi̤akè̌ htě he dǒhtû̌ǐ bǎ kò htǒonuhǒ.

Yṳ̌daphû̌ toǒ ta ta̤sû̌ta̤tòwò

17 Na htû Yṳ̌daphû̌ htǒo lè̌lè꤮, na hî̌ nana̤ ta he mî̌ Yṳ̌daphû̌ tapwa̤ mè̤tò̤ya. Na yṳǎ Mǒ̤jè a ta̤sû̌ta̤tòwò dě na gènè̤ nana̤ ta Cǒmara mo̤ǐmè̤mè̤̌ na mè̤tò̤ya. Sî hî̌bǎ bè̌htò̌yî̤ sîna̤ ta, “Cǒmara wû̌lǎ pa Yṳ̌daphû̌ dě pa glè htûhtò̌ ta akòyò,” mè̤tò̤ya. 18 Cǒmara sò̌yṳ noma̤ kwè̌꤮ na mî̌titènu na sî̌ya hǒ. Kòyò sû̌ǐ na ta ta̤sû̌ta̤tòwò toǒ akhû̌akhî, na sî̌ya wû̌lǎjòbò̌ ta̤htě a tokhlo kòyò toǒ hǒ. 19 Na gènè̤ nana̤ ta na mî̌ kòyò htě a yṳ̂bǎ Yṳ̌daphû̌ mè̤tò̤ dě alò̤ta kòyò mi̤sǎkhǐ toǒ aklè̌. Na gènè̤ nana̤ ta na lîhtò̌ bǎ kòyò ǒ dě ta̤khǐta̤lo̤ htǒotoǒ aya. 20 Na gènè̤ nana̤ ta na yṳ̂bò̌ bǎ kòyò ǒò̌phuhtò htǒotoǒ aklè̌ dě na sû̌ǐtòwòǐjò bǎ kòyò htě alò̤ta phijaû̌ dě a onû̌penu toǒ, ma̤tè̤hî̌dě ta̤sû̌ta̤tòwò yṳ̂klè̌nè̌klòbò bǎ sî ta sî glè sî̌ya Cǒmara awi̤akè̌ ta ta̤te̤ta̤mǎ toǒ hǒ. 21 Na sû̌ǐ bǎ kò lè! Mî̌ma̤tè̤dě na sû̌ǐlò̤ tû̌ nana̤ tò̤̌? Na dǒhtû̌ǐ bǎ kò ta ǎhǔhǎkě pûma̤ kòyò ta̤ ma̤ nî̌꤮, na hî̌ hǐnu pwǎ̤ta mî̌ na cû̌ ǎhǔ kòyò ta̤ ya? 22 Cû̌sǔnṳ pûma̤ kòphû̌kòma ma̤ nî̌, na hî̌ hǐnu pwǎ̤ta mî̌ na cû̌sǔnṳ kòphû̌kòma ya? Na wi̤ja pwa̤yo̤pwa̤gî pwǎ̤ta mî̌ na cû̌phî̌sigwi Yṳ̌daphû̌ mè̤tò̤ toǒ a ta̤le̤dû̌pwî̤htû dě a ta̤lṳhtò̌hokûnu toǒ ya? 23 Na phî̌dû̌ mè̤mè̤̌ nana̤ ta Cǒmara ǐlò̤ na ata̤sû̌ta̤tòwò pwǎ̤ta na jûle̤phî̌yo̤ gana̤de kû̌kò ta̤sû̌ta̤tòwò tò̤ akhû̌akhî, mî̌ na cû̌ ma̤ sòwò̤ Cǒmara ya? 24 “Sî Yṳ̌daphû̌ toǒ akhû̌akhî, Yṳ̌daphû̌ mè̤tò̤ toǒ pi̤jishǐcǒbò Cǒmara,” lî̤cahtǐkû hî̌hǐnu. ^d

25 Sî dè gana̤de ta̤sû̌ta̤tòwò hî̌dě, sî dǔtṳphě ^{▼▼Ta̤dǔtṳphě amûasǎ mî̌ Yṳ̌daphû̌ toǒ a ta̤subusaba ala̤klo ma̤měma̤gle tacǎ. Bǎ Yṳ̌daphû̌ makhû toǒ ǒlò̤behtò̌ ani̤ lǐ̤sǒnu, Cǒmara nodǔtṳ a phû̌makhû toǒ. Htǒomî̌ mî̌pwǎ Cǒmara a ta̤wṳ̂dò a ta̤ma̤dòǐ ta asî tacǎ hǒ.} numî̌ a le̤dû̌pwî̤htû lè. Pwǎ̤tadě sî dè gana̤de tò̤ hî̌dě Cǒmara a lo̤mo̤nu sî lò̤pwǎta kòyò htě a dǔtṳphě tò̤nu toǒ pwǎ. 26 Hǐnudě asî dǔtṳ kû̌kò phětò̤ toǒnu, a dè gana̤de ta̤sû̌ta̤tòwò hî̌numî̌ Cǒmara bè̌sǒsǒ asî pwǐ kòyò htě a dǔtṳphěnu toǒ hǒ. 27 Hǐnudě Yṳ̌daphû̌ mè̤tò̤ toǒ dě a dǔtṳ kû̌kò phětò̤ toǒnu, a dè gana̤de Cǒmara a ta̤sû̌ta̤tòwò hî̌dě a yṳ̂lò̤ na ta̤sǔ pě. Na ǒ ta ta̤sû̌ta̤tòwò dě na dǔtṳphě bǎbǎ, na gana̤de kû̌kò ta̤sû̌ta̤tòwò tò̤ akhû̌akhî, ayṳ̂anè̌ na ta̤sǔ pě.

28 Dè hî̌bò ta̤hî̌bǎ hî̌dě, pa gû ǒhtûpwa̤ kû̌ pwǐ Yṳ̌daphû̌ ala̤klonu toǒ akhû̌akhî, pa htûhtò̌bò̌jò Yṳ̌daphû̌ a na̤cè̌ dǐpwǎ̤꤮ tò̤, htohǒtò̤ Yṳ̌daphû̌ na̤cè̌ tapwa̤ numî̌ a dǔtṳ pwǎpǒ̤ na̤klûphěyî̌nu mè̤tò̤. 29 Yṳ̌daphû̌ na̤cè̌ tapwa̤ numî̌ a bǎ dǔ a sò̌phlǒ dě a mî̌ Běcǎ sǎcahtǐ htû̌lè̌ tèplè̌kè nû̌ûsò̌phlǒ htǒonu. Ta̤sû̌ta̤tòwò htǒonu a htû̌lè̌ tèplè̌jòkè nû̌ûsò̌phlǒ tò̤. Kòyòhǎkhû̌phû̌ htû̌sò̌ǐ kòyò htě a dǔ asò̌phlǒnu toǒ tò̤ pwǎ̤tadě Cǒmara htû̌sò̌ǐ tû̌ asî. ^f