Romans 7

Ta̤khòmò̤khome ala̤kè̌mò̌mṳ

1Pṳwè̤ sî꤮, sî lǒ̤꤮ bò htǒotoǒnu sî sî̌yahtobò ta̤sû̌ta̤tòwò akhû̌akhî, ta̤ htě he glè hî̌bǎ sî htǒotoǒnu, sî sî̌ya te̤mǎhtobò tû̌hǒ. Kòyò tapwa̤ dè si hǒtò̤nu, ta̤sû̌ta̤tòwò toǒ pǒǐ sadapepwǎ nû̌û. 2Hî̌kû̌nǎ mò̌, mamǔ htě a khòmò̤hto tapwa̤nu, ta̤sû̌ta̤tòwò pṳ̂měǐ kè̌khînû̌û ta, awṳ̂ dè si hǒtò̤nu a bǎ bè̌kè awṳ̂ tò̤. Pò̤̌ta awṳ̂ dè sihtohǒ hî̌dě a lû̌htò̌kè ta ta̤khòmò̤ a ta̤sû̌ta̤tòwò htǒo hǒ. 3Hǐnudě, bǎ awṳ̂ ǒhtûpwa̤pe akhanu, a dè cû̌ khòmò̤khǒ ta makhû ahǔwa̤ tapwa̤ hî̌dě kò glè hî̌ nû̌û ta mamǔ htě a cû̌sǔnṳ makhû. Pò̤̌ta, awṳ̂ dè sihtohǒ dě a lû̌htò̌kè ta ta̤khòmò̤ a ta̤sû̌ta̤tòwò htǒonu hǒ. A dè cû̌phî̌ tèplè̌ awṳ̂ tapwa̤ bǎbǎ, kò hî̌pe nû̌û hǐnutò̤ hǒ.

4Hǐnudě, he pṳwè̤ sî꤮, bǎ Khrî̌stu si dě nò̌dòhtǔlo̤ akhanu, a lò̤ta sî si kû̌dǒ ta a akhû̌akhî, sî ǒpe dě ta̤sû̌ta̤tòwò a ta̤pǒta̤sû ala̤tò̤ hǒ. Khònò̤htǒo sî htûhtò̌ ta a tacǎ꤮ pa dě Cǒmara ma̤htûpwa̤gesǒ nû̌û ta ta̤si htǒonu tapwa̤ hǒ. Dě ta̤ma̤htûhtò̌ hǐnu akhû̌akhî, sî glè sǎhtò̌phohtò̌ lǒkho ta̤ htě awǒ toǒ dě a htûbwǐhtûsîrî ta Cǒmara aya. 5Ma̤tè̤hî̌nudě pa sî̌yahè ta̤sû̌ta̤tòwò hî̌ pa akhû̌akhî, bǎ pa ǒhtûpwa̤ pwǐ kòyòhǎkhû̌phû̌ a sǐshiphěyî̌ a ta̤sò̌yṳ akhanu, pa ta̤sò̌yṳ phû̌mò̤shî̌hto toǒ sǔsǔ aǒplṳ̂hè. Dě ta̤ htǒotoǒnu, a sûcû̌ pa dě ngariǒkû tûjûpwa̤ pwǎ. 6Pò̤̌ta khònò̤ htǒonu, Cǒmara ma̤lû̌htò̌ pa ta ta̤sû̌ta̤tòwò hǒ, ma̤tè̤hî̌dě pa si kû̌dǒta Khrî̌stu akhû̌akhî, ta̤sû̌ta̤tòwò htǒo coklomě sǒsǒta pa pwǐ děnukhanu a nî̤petò̤ hǒ. Cǒmara ma̤lû̌htò̌ge pa ta ta̤sû̌ta̤tòwò htǒo, dě Běcǎ sǎcahtǐ ma̤jè pa ta klè̌ asa htǒotabo akhû̌akhî, pa ma̤ ata̤ma̤ htǒohǒ. Pa ma̤ Cǒmara a ta̤phî̌ta̤ma̤ ta pa gana̤de gûma̤kû̌ ta̤sû̌ta̤tòwò aklè̌li̤ htǒotabo akhû̌akhînu mè̤pe tò̤hǒ.

Ta̤sû̌ta̤tòwò ta ta̤ma̤sǔ

7Ma̤hǐnudě pa bǎ hî̌ hî̌tè? Ta̤sû̌ta̤tòwò mî̌ asǔpwǎ pa bǎ hî̌ hǐnu ya? Pa hî̌ hî̌numî̌ a totò̤. Na ma̤ hǐnumî̌ asǔ ta̤sû̌ta̤tòwò dè yṳ̂lṳ tò̤ hî̌nu, ta̤ htě he ma̤sǔhto kwè̌꤮ titènu he sî̌yage mè̤mè̤̌tò̤. Hî̌kû̌nǎ, “Sò̌yṳ pûma̤ kòyò ta̤ ma̤ nî̌,” ^a ta̤sû̌ta̤tòwò dè khwè̌lṳ hǐnu tò̤ hî̌dě, sò̌yṳ kòyò ta̤ numî̌ a htû ta̤sǔnu, he sî̌ya tò̤. 8Pwǎ̤tadě he htû ta̤ma̤sǔphû̌ akhû̌akhî, ta̤sû̌ta̤tòwò hî̌ he ta sò̌yṳ pûma̤ kòyò ta̤ ma̤ a hî̌dě, he tǐ̤ sò̌yṳ shû̌shû̌. Ma̤hǐnudě ta̤sû̌ta̤tòwò dè ǒtò̤ hî̌nu, ta̤sǔ htǒonu a ta̤shû̌ta̤sho ǒtò̤, a si pwǎ. 9Dě awǐkhanu, he sî̌ya Cǒmara a ta̤sû̌ta̤tòwò tò̤ akhû̌akhî, he ǒhtûpwa̤ topwǎ Cǒmara asò̌phlǒ pwǎ, he gènè̤ sò̌phlǒ hǐnu. Pò̤̌ta bǎ ta̤mǎlò̤ hèto̤ akhanu, ta̤sǔ aklè̌ hènṳ he ta̤ǒhtûpwa̤ akû dě he sikè sû̌sò̌ tokho hǒ. 10He kè̌shǐ ta Cǒmara ǐlò̤ ta̤mǎlò̤ htǒotoǒnu, a tobǎ sûcû̌ pa ta ta̤htûpwa̤ tûjûpwa̤ aklè̌ pwǎ̤tadě gutṳ̌꤮ lò̤nu asûcû̌pwǎ he ta ta̤si.

11Ma̤tè̤hî̌dě, ta̤sǔ kè̌shǐ ashuakhwèwǒ dě a glè gètè̤htò̌nṳ ta̤mǎlò̤ htǒo akhû̌akhî, a lǒǎplò̤ǎ pwǎ he, htodě a noǎ ta̤mǎlò̤htǒo dě a ma̤sikèpwǎ he. ^b 12Hǐnudě, ta̤sû̌ta̤tòwò mî̌ acahtǐ. Dě ta̤mǎlò̤ htǒotoǒ numî̌ acahtǐ, acǒatè̤ ta atoabǎ pwǎ.

Ta̤shěta̤pe̤ ǒ dě pakû

13Dèhî̌hǐnudě, ta̤ awî̤awǒ htǒonumî̌ a ma̤sikè he ya? A ma̤sikè he mè̤tò̤. A ma̤sikè he htǒonumî̌ ta̤sǔta̤plě pwǎ. A noǎ Cǒmara a ta̤sû̌ta̤tòwò htě awǒ htǒo dě a lǒplò̤ ma̤sikèpwǎ he. Ma̤tè̤hî̌dě ma̤pûhǐ he sî̌ya te̤mǎ ta ta̤ htě he ma̤htohǒnu toǒ mî̌ a sǔnu dě, Cǒmara ǐlò̤pwǎ ta̤mǎlò̤. Hǐnudě ta̤mǎlò̤ htǒo akhû̌akhî, he glè kè̌shǐhè ta ta̤sǔhtǒo a phû̌mò̤shî̌hto mè̤mè̤̌.

14Pa sî̌ya ta Cǒmara a sǎcahtǐ ǐlò̤ pa ta̤sû̌ta̤tòwò htǒotoǒ pwǎ̤tadě he mî̌ kòyòhǎkhû̌phû̌ htě a sijòpwǎ tapwa̤. He mî̌ asǒsǒta jû htě kò shaǎ cû̌kè nû̌û ta a glè cû̌htû bǎ ta̤ma̤sǔ běcǎ htǒotapwa̤ ajû pwǎ. 15Mî̌ma̤tè̤dě he cû̌ ma̤tǒ̤ ta̤sǔ pwǐhè̌onu, he sî̌yaǐ hena̤ tò̤. Ma̤tè̤hî̌dě he ma̤ pwǐ he sò̌yṳ ma̤nu mè̤tò̤. Ta̤ htě he sò̌yṳ ma̤ dî̌kî̌꤮ tò̤ toǒnu he cû̌ma̤ tǒ̤tǒ̤. ^c 16Ta̤ htě he sò̌yṳ ma̤tò̤ toǒ dě he cû̌ma̤tǒ̤ numî̌ a dǔlṳ ta ta̤sû̌ta̤tòwò htǒonu, awǒpwǎ he sò̌phlǒtokû̌ hǐnu hǒ. 17Hǐnudě, dèhî̌mè̤mè̤̌mî̌ pwa̤ htě a ma̤ ta̤htǒo tapwa̤ numî̌ he mè̤tò̤. Hǐnumî̌ ta̤sǔ htě a ǒ dě hekû htǒonu tapwa̤ ma̤ pwǎ. 18Dě hephěheyî̌ a ta̤sò̌yṳ akûnu, he sî̌ya ta ta̤wǒ ǒ dǐcǎ꤮ tò̤, ma̤tè̤hî̌dě he sò̌yṳ ma̤ta̤wǒ pwǎ̤tadě he ma̤bò̌tò̤. 19Ta̤wǒ htě he sò̌yṳ ma̤ yǎnu, he ma̤ yǎ tò̤, he cû̌ ma̤ takǎtǒ̤ ta̤phû̌mò̤shî̌hto htě he sò̌yṳ ma̤ yǎ tò̤ toǒ. 20He dè ma̤ pwǐ he sò̌yṳ ma̤nu tò̤ hî̌numî̌, a ma̤nu tapwa̤ mî̌ he mè̤na̤cè̌ mè̤tò̤. Hǐnumî̌ ta̤sǔ htě a ǒ dě hekûnu tapwa̤ ma̤ pwǎ.

21Hǐnudě he kè̌shǐ ta ta̤sǔ htě kòyòhǎkhû̌phû̌ la̤kloma̤ sapṳnṳ htǒonu a ma̤ dě hekû. Bǎ he sò̌yṳ ma̤ta̤wǒ akhanu, he kè̌shǐ còcè̌ ta̤phû̌mò̤ ǒ dě hekû. 22Dě he sò̌phlǒkûnu he mo̤ǐ mè̤mè̤̌ Cǒmara a ta̤sû̌ta̤tòwò hǒ. 23Pwǎ̤tadě he kè̌shǐ la̤kloma̤ sapṳnṳ ta̤sǔ ahǔwa̤ tacǎ htě a noma̤ he na̤klû aphwǐaphrû̌ htǒotoǒ ta ta̤phû̌mò̤shî̌hto toǒ. La̤klo ma̤sapṳnṳ ta̤sǔ htǒonu ashěape̤ ta he sò̌phlǒ dě a sò̌yṳma̤ ta̤wǒ htǒonu. Ta̤sǔ ala̤klo ma̤sapṳnṳ htǒonu, a shěpè̤kè nû̌û dě a nohtûkè he ta ta̤sǔ htě ala̤klo ma̤sapṳnṳ htǒonu ajû hǒ. Dě ta̤sǔ htě ala̤klo ma̤sapṳnṳ ǐ htǒonu a ǒ dě he na̤klû aphwǐaphrû̌ toǒ akû. 24Ǒ꤮ ho! He cû̌htû ta̤sǔ ajû hǐnu dě ajî na̤cè̌ he. Ta̤sǔ htě a ǒ hekûhtǒo dě a sûcû̌ he ta ta̤si htǒonu, ûpè tapwa̤ glè ma̤lû̌htò̌gebò̌ bǎ he pè? 25He hî̌bwǐhî̌sîrî Cǒmara, ma̤tè̤hî̌dě pa Běcǎ Ye̤shǔkhrî̌stu akhû̌akhî, a ma̤lû̌htò̌ge he hǒ.

Hǐnudě ta̤ma̤htûhtò̌ ana̤ ta he mî̌ hî̌tèhî̌dě he sò̌phlǒ htǒonu, a sò̌yṳ ma̤còcè̌pwǎ Cǒmara a ta̤sû̌ta̤tòwò pwǎ̤tadě hephěheyî̌ a ta̤sò̌yṳ htǒonu a ma̤ còcè̌pwǎ ta̤ htě ala̤klo ma̤sapṳnṳ ta̤sǔ htǒotoǒ pwǎ.