Rom 8 | KxfSCKRC | STEP | Hǐnudě khònò̤htǒo, kòyò htě a htûhtò̌ kû̌ta Ye̤shǔkhrî̌stu tacǎnǔ꤮ pa toǒnu, Cǒmara cèrò nû̌û dǐkhò̌꤮ tò̤.

Romans 8

Ta̤ǒhtûpwa̤ dě Běcǎ sǎcahtǐ akû

1 Hǐnudě khònò̤htǒo, kòyò htě a htûhtò̌ kû̌ta Ye̤shǔkhrî̌stu tacǎnǔ꤮ pa toǒnu, Cǒmara cèrò nû̌û dǐkhò̌꤮ tò̤. ^{▼▼Lî̤cahtǐ ali̤kû hî̌po̤, “Kòyò htě a ǒhtûpwa̤ to pwǐ Běcǎ sǎcahtǐ a ta̤sò̌yṳ dě a ǒhtûpwa̤ pwǐ phěyî̌ a ta̤sò̌yṳ phû̌mò̤nu mè̤tò̤ toǒ”} 2 Ma̤tè̤hî̌dě pa htûhtò̌ kû̌ta Ye̤shǔkhrî̌stu tacǎnǔ꤮ pa akhû̌akhî, Cǒmara a sǎcahtǐ ma̤ bǎ paklè̌ asa tabo hǒ. Htodě a ma̤lû̌htò̌ge he ta ta̤sǔ ala̤klo ma̤sapṳnṳ dě a sûcû̌ he ta̤si sû̌sò̌ htǒo akûnu hǒ. 3 Dě mî̌titè akhû̌akhî hî̌dě, ma̤pûhǐ pa bǎ ǒkǔkè ta pa ma̤ ta̤sǔ htǒo ayanu, pa gana̤de gûma̤kû̌ ta̤sû̌ta̤tòwò htǒo akò dě, a ta̤shû̌ta̤sho htě a glè ma̤jè bǎ panu a ǒtò̤, ma̤tè̤hî̌dě akhû̌aǎ htě a glè ma̤pè̤kè phěyî̌ a ta̤sò̌yṳ htǒonu a ǒtò̤. Hǐnudě Cǒmara ma̤ ta ana̤, a nohèlò̤ a phû̌makhû dě a hèlò̤ sûlûana̤ pwǐ hǎkhû̌phû̌ sǒsǒta pa dě a ma̤ ta̤sǔ htǒotoǒ. Pwǎ̤tadě ta̤sǔ ala̤klo ma̤sapṳnṳ htǒo pǒǐjò nû̌û tò̤. A hè khòbǎ pa ta̤sǔta̤plě, dě a ma̤pî̌kè ta̤sǔ a ta̤pǒǐ pa htǒotoǒ hǒ. ^{▼▼Lî̤ htě kò khwè̌ wǐgutṳ̌ akòshî̌ dě꤮ wǐnukha toǒnu, kò shû̌nṳkhlopo̤ ta, “Kòyò htě a ǒhtûpwa̤to pwǐ Běcǎ sǎcahtǐ htě a ǒhtûpwa̤ pwǐ phěyî̌ a ta̤sò̌yṳ mè̤tò̤ toǒnu, Cǒmara cèròpe nû̌û tò̤.”} 4 Ma̤pûhǐ pa ma̤lǒma̤bebò ta̤sû̌ta̤tòwò ata̤kwi toǒnu, Cǒmara ma̤hto bǎ paya hǒ. Pa gana̤de gûma̤kû̌pe na̤klûphěyî̌ a ta̤sò̌yṳ tò̤ htǒotoǒ, dě pa ma̤ pwǐ Běcǎ sǎcahtǐ yṳ̂klè̌nè̌klò pa htǒotoǒ ayanu, Cǒmara ma̤htobò bǎpa hǒ.

5 Kòyò htě a ǒhtûpwa̤ pwǐ na̤klûphěyî̌ a ta̤sò̌yṳ phû̌mò̤ toǒnu, a gènè̤ còcè̌pwǎ ta̤sò̌yṳ htě a phû̌mò̤ toǒ pwǎ. Pwǎ̤tadě kòyò htě a ǒhtûpwa̤ pwǐ Běcǎ sǎcahtǐ yṳ̂klè̌nè̌klò nû̌û toǒnu, a gènè̤ còcè̌pwǎ pwǐ Běcǎ sǎcahtǐ a ta̤sò̌yṳnu toǒ pwǎ. 6 Kòyò htě a gènè̤ còcè̌pwǎ na̤klûphěyî̌ a ta̤sò̌yṳ phû̌mò̤ toǒnu, a ǒhtûpwa̤ kû̌ta Cǒmara tûjûpwa̤ tò̤. Pwǎ̤tadě kòyò htě Běcǎ sǎcahtǐ pǒǐ nû̌û ta̤gènè̤ toǒnu, a bǎ nî̤bǎ ta̤mo̤ta̤kwǐ htǒotuhtu pě, htohǒtò̤ a ǒkû̌ta Cǒmara tûjûpwa̤ pě. 7 Ma̤tè̤hî̌dě, kòyò htě a gènè̤ còcè̌pwǎ na̤klûphěyî̌ a ta̤sò̌yṳ phû̌mò̤shî̌hto toǒnu, a htûhtò̌ pwa̤ htě a sò̌khě Cǒmara. Ma̤tè̤hî̌dě a jûle̤phî̌yo̤ kû̌nǒ Cǒmara a ta̤sû̌ta̤tòwò dǐkhò̌꤮ tò̤. A jû꤮ mî̌ a jûle̤phî̌yo̤ bò̌kû̌nǒ tò̤tò̤. 8 Kòyò htě a nopǒǐ ana̤ ta phěyî̌ a ta̤sò̌yṳ phû̌mò̤ toǒnu, a ma̤sò̌le̤sò̌lò̤ bò̌kû̌ Cǒmara dǐkhò̌꤮ tò̤.

9 Pwǎ̤ta, sîdě, phěyî̌ a ta̤sò̌yṳ phû̌mò̤ pǒǐ sî tò̤. Cǒmara a sǎcahtǐ dè ǒhtûpwa̤ dě sîkû hî̌dě, a Běcǎ sǎcahtǐ htǒonu pǒǐ sî pě. Ûpèpè̌ bǎbǎ, a nî̤bǎ kû̌kò Khrî̌stu a sǎcahtǐ tò̤ toǒnu a htû ta Khrî̌stu ata mè̤tò̤. 10 Pwǎ̤tadě Khrî̌stu dè ǒhtûpwa̤ dě sîkû hî̌dě, sî yola htě a ǒ dě sîkû toǒnu a htûpwa̤ tûjûpwa̤ pě, ma̤tè̤hî̌dě Cǒmara bè̌cǒbè̌tè̤hto sî hǒ. Dě sî ta̤sǔ akhû̌akhî, sî na̤klû htǒonu, a sikè pě pwǎ̤tadě sî htûpwa̤ tûjûpwa̤ pě. 11 Cǒmara htě a ma̤htûpwa̤gesǒ Ye̤shǔkhrî̌stu ta ta̤si htǒotapwa̤ a Běcǎ sǎcahtǐ dè ǒhtûpwa̤ dě sîkû hî̌dě, sî na̤klûhtǒo a si pě bǎbǎ, Běcǎ sǎcahtǐ ǒhtûpwa̤ dě sîkû akhû̌akhî, Cǒmara ǐ sî ta̤htûpwa̤ pě. ^c

12 Ma̤hǐnudě sû̌kho sî꤮, ta̤ma̤ lò̤bǎ pakhû̌ dě pa bǎ ǒhtûpwa̤ pwǐ Běcǎ sǎcahtǐ hî̌ panu. Pa tobǎ ǒhtûpwa̤pe pwǐ sǐshiphěyî̌ a ta̤sò̌yṳ phû̌mò̤nu tò̤. 13 Ma̤tè̤hî̌dě, sî dè ǒhtûpwa̤ pwǐ sî phěyî̌ a ta̤sò̌yṳ phû̌mò̤ hî̌nu, sî sikè pě. Pwǎ̤tadě Běcǎ sǎcahtǐ ma̤jè sî dě sî dè ma̤sikè na̤klûphěyî̌ a ta̤sò̌yṳ phû̌mò̤shî̌hto htǒotoǒ hî̌numî̌, sî htûpwa̤ pě. 14 Ma̤tè̤hî̌dě, kòyò htě a ǒhtûpwa̤ pwǐ Cǒmara a sǎcahtǐ yṳ̂klè̌nè̌klò nû̌û toǒ numî̌ mî̌pwǎ Cǒmara a phû̌mǔphû̌khû toǒ hǒ. 15 Ma̤tè̤hî̌dě Běcǎ sǎcahtǐ htě Cǒmara ǐ sî htǒonu, a nosò̌gònò̤ sî, a noǐshagesǒ sî pwǐ jûnu mè̤tò̤. ^dMî̌tanu, Běcǎ sǎcahtǐ ma̤htûhtò̌hto bǎ sî ta sî htû Cǒmara a phû̌mǔphû̌khû akhû̌akhî, a bè̌ sî pwǐ a phû̌mǔphû̌khû toǒnu hǒ. Běcǎ sǎcahtǐ akhû̌akhî, pa kaǎ Cǒmara ta, “Abǎ, pha” pwǐ sîpha sana̤ tapwa̤ numî̌ anî̤ hǒ. ^e 16 Běcǎ sǎcahtǐ sana̤ khòlṳ, pwe̤ǐlṳ plṳ̂dǒ bǎkû̌po̤ ta pa sò̌phlǒ htǒo ta pa mî̌ Cǒmara a phû̌mǔphû̌khû toǒ, hǐnuhǒ. 17 Khònò̤htǒo pa dè htû aphû̌ali̤ dě a ǐ pa a ta̤howi̤ û̌cata̤bî̌ htě a bè̌wǒ bǎ panu toǒ pě. A ǐ ta̤howi̤ ta aphû̌ali̤ toǒ to nî̤bǎnu toǒ pě. Htohǒtò̤ û̌cata̤bî̌ htě a měgle tûjûpwa̤ htǒo pa nî̤bǎpo̤ kû̌ta Khrî̌stu pě. Pa dè khòjîkhòjû plǒhtukû̌ ta Khrî̌stu hî̌dě pa nî̤bǎ plǒhtukû̌ ta̤sîrîdû̌htû ta a pě.

Cǒmara ǐ pa ta̤sîrîdû̌htû

18 He kè̌shǐshěto̤bǎ ta ta̤jîta̤jû htě pa khòbǎ khònò̤kha htǒonu, he dè dǒtûkè̌ ta Cǒmara dǔlṳ pa ta̤sîrîdû̌sîrîhtû htû̌꤮ nǒkòpěnu, ta̤jî khònò̤ htǒo, he bè̌ yǎta ta̤dǐcǎ꤮ tò̤. 19 Cǒmara bǒlò̤ lǒ̤꤮ bò sǒmî̌wû̌, ta̤phû̌ta̤li̤ ta kòyò pṳ̂̌꤮ tapwa̤ htǒonu, a sò̌phlǒ ǒyṳ̂ kè̌shuǐshû̌ na̤cè̌ ta Cǒmara dǔlṳhtò̌ a phû̌mǔphû̌khû toǒ pě. 20 Cǒmara bǒlò̤ ta̤ lǒ̤꤮ bò htǒotoǒnu a bǎ pî̌kèbò pě. Asî sò̌yṳ to̤dě ta̤pî̌ta̤lṳ̂ hǐnu tò̤ pwǎ̤tadě Cǒmara ma̤htobò asî pwǐ ata̤ ma̤wǒnǎnu hǒ. ^f 21 Pwǎ̤tadě ta̤bǒlò̤ lǒ̤bò htǒotoǒnu a kè̌shuǐpe ta, ma̤pûhǐ a gusiguso tò̤nu, Cǒmara ma̤lû̌htò̌ge asî pě dě a ǐ asî ta̤pelesesǎ ta ta̤sîrîdû̌sîrîhtû htě asǒsǒta aphû̌ htǒotoǒ pě.

22 Pa sî̌yabò ta̤bǒlò̤ htǒotoǒnu, a kookasha ǐbò ata̤sha htě asǒsǒta mamǔ phû̌ǒ phusha dě a yi̤kǒnu pě. A kookasha to̤ lǒkhope khònò̤. 23 Ta̤bǒlò̤ lǒ̤꤮ bò htǒotoǒ kookasha tû̌ mè̤tò̤, pa lǒ̤꤮ bò htǒo bǎbǎ, pa kookasha kû̌dǒbò pwǎ. Pa dě pa nî̤bǎ Běcǎ sǎcahtǐ mî̌ Cǒmara ǐko sû htě awǐlǒ htǒotoǒnu bǎbǎ, pa kookasha tû̌ dě sò̌phlǒkûkû. Pa ǒpo̤kè̌shu kookasha kû̌ Cǒmara ta htû̌꤮ a hè bǔǐ pa ta aphû̌ pě ti̤ni̤, ta htû̌꤮ a hèǐ pa na̤klû asa pě htǒonuhǒ. ^g 24 Tèhtò̌ bǎ Cǒmara ma̤lû̌htò̌ge panu, pa kè̌shuǐ htě a ma̤ bǎ pa htǒotoǒ pě. Pwǎ̤tadě kòyò tapwa̤pwa̤ dè nî̤bǎhto ta̤ htě a kè̌shuǐ htǒonu, a lo̤bǎ ǒpo̤kè̌shuǐpe tò̤ hǒ. Kò ǒpo̤kè̌shuǐ ta̤ htě kò nî̤bǎ htohǒnu a ǒ dǐpwǎ̤꤮ tò̤. 25 Pwǎ̤tadě pa dè kè̌shuǐ ta̤ htě pa nî̤bǎ yǎ tò̤ toǒnu, pa sò̌phlǒhtû ǒpo̤kè̌shuǐ pwǎ.

26 Hǐnudě, bǎ pa khû̌ǎyû̌lò̤ akhanu, Běcǎ sǎcahtǐ hè ma̤jè pa. Pa to kwisaba Cǒmara titènu pa sî̌yatò̤ pwǎ̤ta Běcǎ sǎcahtǐ ana̤ kwibǎ pagûla̤. Bǎ a kwibǎ paya akhanu, yo̤sǎ htě pa hî̌ htò̌lṳjò tò̤ toǒnu a koohtò̌lṳ bǎ pa dě Cǒmara ǒ. 27 Htodě Cǒmara htě a kè̌lǎ sèlèkè̌ pa sò̌phlǒ a ta̤gènè̤ htǒotapwa̤nu, a sî̌ya te̤mǎ ta̤ htě Běcǎ sǎcahtǐ sò̌yṳ kwibǎ paya htǒotoǒ, ma̤tè̤hî̌dě Běcǎ sǎcahtǐ kwibǎ Cǒmara akòyò cahtǐ toǒ aya pwǐ Cǒmara a ta̤sò̌yṳǒnu pwǎ.

28 Kòyò htě a mo̤ǐ Cǒmara, dě Cǒmara kaǎ nû̌û ta a ta̤yè̤lò̤nǎ aya toǒnu, ta̤ma̤htûhtò̌ ana̤ ta asî hî̌tètè̌ bǎbǎnu, Cǒmara ma̤bǎ asîya ta̤wǒ numî̌, pa sî̌ya pwǎ. 29 Ma̤tè̤hî̌dě, kòyò htě a glè yṳǎ Cǒmara toǒnu a sî̌yanǎ wǐtû̌hǒ. Htohǒtò̤ a bè̌lò̤nǎhto asò̌phlǒ dě꤮ wǐnukha ta a nohtûhtò̌ sǒsǒkû̌ asî ta aphû̌khû htǒonu pě. Hǐnudě aphû̌khûhtǒo htûhtò̌ phû̌wè̤pwa̤ tapwa̤ dě apṳwè̤ tṳ̂prṳ̂taphǎ htǒotoǒ akla hǒ. 30 Htohǒtò̤, kòyò htě Cǒmara bè̌lò̤nǎhto asò̌phlǒ ta asî dě꤮ wǐkha htǒotoǒnu, a kaǎ asî dě a glè htûhtò̌ akòyò hǒ. Htodě kòyò htě a kaǎ nû̌û htǒotoǒnu, a bè̌cǒbè̌tè̤hto asî hǒ. Htohǒtò̤ kòyò htě a bè̌cǒbè̌tè̤hto htǒotoǒnu, a ǐ asî ta a ta̤sîrîdû̌sîrîhtû toǒ hǒ.

Cǒmara ata̤mo̤ǐ

31 Dèhî̌hǐnudě, ta̤ lǒ̤꤮ bò htě he hî̌ bǎ sî htǒotoǒnu, pa glè gènè̤ hî̌tè? Cǒmara dè ǒkû̌ ta pa tokho dèhî̌dě, mî̌ûpè tapwa̤ glè shěpe̤jò pa pè? 32 Cǒmara htǒotapwa̤nu, aphû̌ ta ana̤nu a sò̌le̤ǐ tò̤ dě a ǐlò̤kè aphû̌ ta pa lǒ̤꤮ bò toǒ aya. A dè ǐlò̤ko pa ta aphû̌khû Ye̤shǔkhrî̌stu dèhî̌dě, ta̤ lǒ̤꤮ bò htě a ǒkè ahǔwa̤ toǒnu, a ǐ lò̤kopo̤ pa pě mè̤tò̤ ya? 33 Kòyò htě Cǒmara wû̌lǎ asî htǒotoǒnu mî̌ûpè tapwa̤ glè hè bè̌jò ata̤sǔ pè? Pwa̤ htě a bè̌cǒbè̌tè̤ asî mî̌ Cǒmara hǒ. 34 Hǐnudě, mî̌ûpè glè cèrò asî pè? Ta̤pwǎ̤꤮ mî̌ kò cèròjò asî tò̤. Ma̤tè̤hî̌dě, Ye̤shǔkhrî̌stu mî̌ pwa̤ htě a si ta pa ta̤sǔ aya tapwa̤, htohǒtò̤ Cǒmara ma̤htûpwa̤gesǒ nû̌û ta ta̤si tapwa̤. Dě Cǒmara ǐ nû̌û gûla̤ acǔdemû tokho. Ma̤pûhǐ Cǒmara ma̤jè panu Ye̤shǔ nṳkwigwèbǎǐ bǎ pa gûla̤ hǒ. 35 Mî̌ûpè tapwa̤ htěpa̤jòkè Ye̤shǔkhrî̌stu ata̤mo̤ǐ pa htǒonu pè? Bǎ pa khòbǎ ta̤pò̤ta̤sha akhanu bǎbǎ, ta̤jîta̤jû akhanu bǎbǎ, kò ma̤jîma̤jû pa akhanu bǎbǎ, ta̤hǒwi̤shèwè bǎbǎ, ǒkoyo sǒkû bǎbǎ, ta̤sò̌gònò̤ ǐsha akhanu bǎbǎ, kò ma̤si ma̤hǎmǎ pa akhanu bǎbǎ, kò htěpa̤jòkè pa ta Ye̤shǔkhrî̌stu a ta̤mo̤ǐ pa htǒonu dǐpwǎ̤꤮ tò̤. 36 Lî̤cahtǐkû hî̌,

“Sîkhû̌sîkhî, pa kè̌shǐbǎ ta ta̤si ti̤nǐ̤mṳhǎ hǒ. Kò gènè̤ pa ta pahtǒo asǒsǒta sophû̌ htě kò glè ma̤si yǎnu,” ^h a hî̌ hǐnu.

37 Ta̤ lǒ̤꤮ bò htǒotoǒ htûhtò̌ pwǎ̤tadě Khrî̌stu htě a mo̤ǐ pa htǒotapwa̤ akhû̌akhî, pa ma̤pè̤ bòmṳ̂sîglîbò ta̤htǒotoǒ pě. 38 Ta̤si bǎbǎ, ta̤htûpwa̤ bǎbǎ, mǒkhû̌tanaphû̌ bǎbǎ, khînǎkhîno bǎbǎ, ta̤ma̤htûhtò̌ ana̤ khònò̤htǒo toǒ bǎbǎ, htû̌꤮ nǒkòpě toǒ bǎbǎ, ta̤po̤ta̤phǎ toǒ bǎbǎ, he yṳǎ te̤mǎ ta a htěpa̤jòkè pa ta Cǒmara ata̤mo̤ǐ tò̤. 39 Ta̤ ǒ dě mǒla̤ toǒ bǎbǎ, a ǒ dě hǎkhû̌ teběhtǒo ala̤ toǒnu bǎbǎ, ta̤bǒlò̤ ahǔwa̤ toǒ bǎbǎ, pa Běcǎ Ye̤shǔkhrî̌stu ma̤hto bǎ paya akhû̌akhî, ta̤ lǒ̤꤮ bò htǒotoǒnu a htěpa̤jò pa ta Cǒmara ata̤mo̤ǐ tò̤.