Rom 9 | KxfSCKRC | STEP | He ta Khrî̌stu htûhtò̌ nû̌û tacǎnǔ꤮ pa akhû̌akhî, he hî̌bǎcǒhî̌bǎtè̤ pwǎ sî pwǎ. He lòho nǒ sî tò̤. Běcǎ sǎcahtǐ pǒǐ sû̌ǐ he sò̌phlǒ, dě he sò̌phlǒhtǒo a hî̌měglejè kû̌po̤ ta he hî̌bǎ ta̤htǒonumî̌ ato pwǎ.

Romans 9

Cǒmara ta a kòyò saprṳ̂ toǒ

1 He ta Khrî̌stu htûhtò̌ nû̌û tacǎnǔ꤮ pa akhû̌akhî, he hî̌bǎcǒhî̌bǎtè̤ pwǎ sî pwǎ. He lòho nǒ sî tò̤. Běcǎ sǎcahtǐ pǒǐ sû̌ǐ he sò̌phlǒ, dě he sò̌phlǒhtǒo a hî̌měglejè kû̌po̤ ta he hî̌bǎ ta̤htǒonumî̌ ato pwǎ. 2 He sǎpla̤sǎyṳ jòjî̌꤮ tò̤. Asha he sò̌phlǒ htǒo, a hǎmǎpè̤pe tò̤ hǒ. 3 Ma̤tè̤hî̌dě, he pṳwè̤ Yṳ̌daphû̌, mî̌ hekhlilèphû̌ tû̌, hesǐheshi tû̌ htǒotoǒ ayanu, Cǒmara dè ǐshokè hehtǒo mî̌ anî̤ pwǎ, htodě Cǒmara dè htěpa̤kè he ta Khrî̌stu dě asî glè nî̤bǎ ta̤ma̤lû̌htò̌ge pě dèhî̌dě a htěpa̤kè he mî̌ anî̤ pwǎ, he sò̌yṳ khòbǎ mè̤mè̤̌ asîya hǒ. 4 Asî mî̌ Israelphû̌ toǒ. Cǒmara bǔǐ asî pwǐ aphû̌ali̤ sana̤nu hǒ. Dě a dǔlṳ bǎ asî ta a ta̤sîrîdû̌sîrîhtû hǒ. Cǒmara ǎměma̤měhto shǎ ta asî dě a ǐlò̤hto asî ta a ta̤sû̌ta̤tòwò hǒ. Asî nî̤bǎ ta̤saba aklè̌aklò ta̤lṳhtò̌hokû dě a nî̤bǎ lǒkho Cǒmara a ta̤olò̤mèlò̤ toǒ hǒ. ^a 5 Asî phiphu khlilè mî̌ Ebrephû̌ akhlialè htě ami̤dû̌ dě꤮ wǐnukha toǒ. Bǎ Khrî̌stu hè ǒphijaû̌lò̤ pwǐ kòyòhǎkhû̌phû̌ akhanu, a hèǒ dě asî akhlialè akû. A mî̌ Cǒmara htě a pǒǐta̤ lǒ̤꤮ bò tapwa̤, dě kò htû̌sò̌ǐ tû̌ta a tûjûpwa̤ talakhǎ nî̌꤮. Amè̤.

6 Dèhî̌hǐnudě, Cǒmara ma̤pî̌kè a ta̤olò̤mèlò̤ htǒonu ta Yṳ̌daphû̌ htǒotoǒ hǒ ya? A ma̤pî̌kè nǒ tò̤. Ma̤tè̤hî̌dě Israelphû̌ lǒ̤꤮ bò htě akhlilè gilò̤ ta Yǎ̤kò ǒ toǒnu, a htûbò mè̤mè̤̌ Cǒmara kòyò pṳ̂̌꤮ tapwa̤ mè̤tò̤. 7 Akhlialè lǒ̤꤮ bò gilò̤ dě Abraham ǒ toǒnu bǎbǎ, a htûbò Abraham aphû̌ pṳ̂̌꤮ tapwa̤ mè̤tò̤. Mî̌tanu, Cǒmara olò̤ ta, “Nakhlinalè toǒnu a hèlò̤ tṳtṳ dě Isǎko a ǒ pě.” ^b 8 A sò̌yṳ hî̌ amûasǎ hî̌tènu, kòyòhǎkhû̌phû̌ phû̌ǒ dě akhlilè hǎte̤ tṳtṳ ta Abraham sǐshi toǒnumî̌, Cǒmara aphû̌ali̤bò pṳ̂̌꤮ tapwa̤ mè̤tò̤. Kòyò htě a ǒphijaû̌lò̤ pwǐ Cǒmara a ta̤olò̤mèlò̤nu toǒmî̌ kò glè bè̌tû̌ asî pwǐ Abraham akhlialè pwǎ. 9 Ma̤tè̤hî̌dě, Cǒmara olò̤mèlò̤kè ayo̤ ta, “Htû̌꤮ akhîakha te̤bǎte̤to pěnu, he hè gesǒ pě dě Shǎra phû̌ǒlò̤nṳ phû̌makhû pě.” ^c

10 Tǒ̤hǐnupatò̤, Ribè̌ka phû̌ǒ sègwèhto amakhû sò̌gini̤ hǒ, dě apha mî̌ tapwǎ̤꤮ pa pwǎ. Apha mî̌ mî̌pwǎ papha Isǎko dě꤮ awǐnu tapwa̤ hǒ. 11 – 12 Bǎ aphû̌ǒ sègwè htǒosò̌gini̤ ǒlò̤ hǒtò̤ akha, htodě bǎ aphû̌ htǒosò̌gini̤ ma̤ ta̤sǔ ta ta̤wǒ hǒtò̤ akhanu, Cǒmara pwe̤ǐnǎwǐ amo̤ ta, “Awè̤pwa̤ tapwa̤ bǎwè̤ bǎ apṳnu tapwa̤ ata̤ma̤ pě.” ^d Ma̤pûhǐ kò sî̌ya ta jǔ꤮ Cǒmara wû̌lǎ tû̌ asò̌phlǒ pwǐ a ta̤yè̤lò̤ǒnǎhto nudě, a ma̤ pwǐ a ta̤yè̤lò̤ǒnǎ htǒonu hǒ. Dě kòyò tapwa̤pwa̤ ma̤hto ta̤tacǎcǎ akhû̌akhî, a wû̌lǎ nû̌û mè̤tò̤. Mî̌tanu, a ǒ Cǒmara a cǔdekû dě a wû̌lǎ tû̌pwǎ nû̌û. 13 Lî̤cahtǐkû hî̌, “He mo̤ǐ Yǎ̤kò, he sò̌khěkhû̌khwè Ětò̌,” ^e a hî̌hǐnu.

14 Dè ma̤hǐnudě pa bǎ hî̌ hî̌tè? Cǒmara ma̤ ta̤ tûkû, acǒtè̤tò̤, pa hî̌ hǐnu ya? Pa hî̌ hǐnu mî̌ ato tò̤. 15 Ma̤tè̤hî̌dě, taplǎkha a hî̌ Mǒ̤jè,

“He gwèbǎǐ kòyò tapwa̤pwa̤ dě jǔ꤮ tû̌ he sò̌phlǒ gwèbǎǐ nû̌ûnu tapwa̤ pě. He ma̤jèko kòyò tapwa̤pwa̤ dě jǔ꤮ tû̌ he sò̌phlǒ sò̌yṳ ma̤jènu tapwa̤ pě.” ^f

16 Hǐnudě pa la̤nǎla̤ǐ pa kòyòhǎkhû̌phû̌ a ta̤sò̌yṳ, mè̤tò̤dě, ata̤ jipwi̤ toǒ numî̌ anî̤ tò̤. Ta̤lǒ̤꤮ bò htě pa la̤nǎla̤ǐ numî̌ pwǎpǒ̤ Cǒmara a ta̤gwèbǎǐ pwǎ. 17 Ma̤tè̤hî̌dě lî̤cahtǐkû hî̌ Khwǐpharǒ, “Ma̤pûhǐ he dǔlṳ tṳtṳ he sîrîpo̤phǎ toǒ ta na, htohǒtò̤ ma̤pûhǐ hemi̤ lṳshilṳgabò dě hǎkhû̌tebě htǒonudě, he nohtò̌htûpwǎ na ta Khwǐ,” ^g a hî̌ nû̌û hǐnu. 18 Ma̤hǐnudě Cǒmara gwèbǎǐ kò jǔ꤮ tû̌ a gwèbǎǐnu, a ma̤shò̌ kòyò hǐkǒ dě jǔ꤮ tû̌ a sò̌yṳ ma̤shò̌ kònu toǒ pwǎ.

Cǒmara a ta̤sò̌dû̌ ta a ta̤gwèbǎǐ

19 Kǎlè̌mî̌ dě sîklanu, a glè gwè he, “Dè ma̤hǐnudě mî̌ma̤tè̤ a cû̌ bè̌sadape pa ta̤sǔ ma̤tè? Ûpè tapwa̤ glè ma̤dǐtṳbò̌ nû̌û sò̌yṳma̤ta̤ htǒonu pè?” 20 Pwǎ̤ta he glè hî̌ na ta, na mî̌ kòyòhǎkhû̌phû̌ pwǎ. Na lo̤bǎ pi̤ji hî̌geshǔ Cǒmara hǐnutò̤. Po̤hǎ tamanu, a dè hî̌ geshǔ pwa̤bǒlò̤nû̌û htǒotapwa̤ ta, “Na cû̌bǒlò̤ he hǐnu ma̤tè?” ^h a hî̌ geshǔ hǐnu numî̌ anî̤ tò̤. 21 Hǎpèè̌ tabǒnu, a ǒ dě pwa̤bǒpo̤hǎ htǒotapwa̤ a cǔdekû pwǎ, a glè bǒpo̤hǎnu jǔ꤮ tû̌ pwǐ a sò̌yṳ bǒnu mî̌ anî̤ pwǎ. Hǎpèè̌ tabǒ akûnu, a glè bǒpo̤hǎ dě kò noǎ khǒsǒtû̌ a bǎ pwè akhanu bǎbǎ, mè̤tò̤dě a glè bǒpo̤hǎ dě kò noǎ a lṳmṳhǎlṳmṳlî ayanu bǎbǎ, jǔ꤮ tû̌ asò̌phlǒ sò̌yṳ bǒnumî̌ anî̤ pwǎ.

22 Jǔ Cǒmara sò̌yṳ ma̤tû̌ asò̌phlǒnu, anî̤ pṳ̂̌꤮ taplǎ. A sò̌yṳ dǔlṳ bǎ kò ta a ta̤sò̌dû̌ htodě a sò̌yṳ nosî̌ya kû̌kò ta a ta̤po̤ta̤phǎ toǒ. Pwǎ̤tadě kòyò bǎ khòbǎ nû̌û ta̤sò̌dû̌ pě, dě a bǎ to̤htû̌ ta̤pî̌ta̤lṳ̂ pě toǒ ayanu, A dǔlṳ tèplè̌ khǒbǎ asî ta a ta̤khòsò̌do, a ta̤sò̌phlǒhtû toǒ. 23 Ma̤pûhǐ Cǒmara dǔlṳ bǎ kòyò htě a gwèbǎǐ nû̌ûnu toǒ ta a ma̤ bǎ asî ta̤cǒklî̌kî̌ya pwî̌꤮ tènu, a khòsò̌do na̤cè̌ bǎ asî. A wû̌lǎnǎwǐ asî dě a ǐ asî ta a sîrîdû̌sîrîhtû htǒonu pě. 24 Pa mî̌ kòyò htě Cǒmara kaǎ pa toǒ hǒ. A kaǎ tû̌ Yṳ̌daphû̌ toǒ aklanu mè̤tò̤, dě Yṳ̌daphû̌ mè̤tò̤ toǒ aklanumî̌, a kaǎdǒ tû̌tû̌. 25 Pwǐ Cǒmara nohî̌ pwa̤po̤ Hoshea ta,

“Dě wǐkha asî mî̌ a htû hekòyò mè̤tò̤, pwǎ̤tadě he kaǎ asî ta, ‘Hekòyò’ pě, htohǒtò̤, děnukha asî mî̌ kòyò htě he mo̤ǐ yǎ toǒ mè̤tò̤ pwǎ̤tadě khònò̤htǒo he kaǎ asî ta, ‘Kòyò htě he mo̤ǐ yǎ toǒ’ pě.” ⁱ

26 “Gûla̤ htě he hî̌hto sî dě꤮ awǐkha ta, ‘Sî mî̌ hekòyò mè̤tò̤’ nutò̤glònu, khònò̤dě he glè kaǎ asî ta ‘Cǒmara htě a htûpwa̤ tapwa̤ a phû̌mǔphû̌khû toǒ’ hǒ,” ^j Pwa̤po̤ Hoshea hî̌ hǐnu.

27 Pwa̤po̤ Isaǐa hî̌ Israelphû̌ toǒ awi̤akè̌ ta,

“Israelphû̌ toǒnu, a ǒplṳ̂ lò̤ta lo̤semě dě shidû̌shite̤we̤ ahtunu pwǎ̤tadě Cǒmara ma̤lû̌htò̌ge pî̌tî̌pwǎ asî pě. ^k 28 Ma̤tè̤hî̌dě, Cǒmara cèrò gutṳphwèkè hǎkhû̌htǒo pě.” ^l

29 Pwǐ pwa̤po̤ Isaǐa pwe̤ǐnǎhto ta,

“Běcǎ htě a jòta̤ lǒ̤꤮ bò htǒotapwa̤ dè sò̌le̤ǐ pakhlipalè toǒ tò̤ hî̌numî̌, pa glè htûhtò̌ sǒsǒta pwǐ a cèrò phlǔkè Sò̌dowî̤ ta Gòmò̤̌rawî̤nu pwǎ.” ^m ^{▼▼Wî̤kûphû̌ toǒ ma̤ ta̤phû̌mò̤shî̌hto akhû̌akhî, Cǒmara ma̤pî̌kèbò wî̤ginǐ̤wî̤.}

Israelphû̌ ta ta̤sò̌le̤sò̌lò̤ awi̤akè̌

30 Dè ma̤hǐnudě, pa glè hî̌ hî̌tè? Yṳ̌daphû̌ mè̤tò̤ toǒnu, a kè̌lǎ kû̌kò klè̌ htě Cǒmara bè̌cǒbè̌tè̤ kò htǒonutabo tò̤ pwǎ̤tadě asî nî̤bǎ hǒ. Asî ta̤yṳta̤nǎ akhû̌akhî, Cǒmara bè̌cǒbè̌tè̤ asî hǒ. 31 Pwǎ̤tadě Yṳ̌daphû̌ htǒotoǒnu, ma̤pûhǐ a nî̤bǎ Cǒmara a ta̤bè̌cǒbè̌tè̤ asî ayanudě, asî jipwi̤ lṳ̂ma̤kû̌ lǒkho ta̤sû̌ta̤tòwò toǒ pwǎ̤tadě a nî̤bǎjò dǐkhò̌꤮ tò̤. 32 A cû̌ nî̤bǎ to̤tò̤ ma̤tè̤hî̌dě asî jipwi̤ kè̌lǎ ta̤cǒta̤tè̤nu, a nǎla̤ǐ kû̌ lǒkho ta̤yṳ tò̤. Mî̌tanu, asî nǎla̤ǐ lǒkho ta̤wǒ htě asî ma̤nu toǒ alo̤ pwǎ. Asî htò̌tukhubǎ “Lo̤ la̤htò̌tukhu tama.” 33 Pwǐ lî̤cahtǐkû hî̌ Mè̤shǐa awi̤akè̌ ta,

“Kè̌ lǒkho, he bè̌lò̤ lo̤ tama dě Sǐowî̤kû pě, dě kò htò̌tukhu yǎ pě, dě a ma̤lòkhǔpo̤ kò pě.

Pwǎ̤tadě kòyò htě a yṳǎ nû̌û toǒnu, a to̤ dě ta̤sò̌phlǒpî̌ agûla̤ dǐkhò̌꤮ tò̤.” ^o