Titus 2
Bǎphî̌bǎma̤ nṳbò mo̤pwa̤ ta phijaû̌ toǒ aya
1Pwǎ̤ta Tǐtǔ, na dě sû̌ǐtosû̌ǐbǎ bǎ kò ta ta̤sû̌ǐtòwòǐ htě acǒatè̤nu toǒ nî̌꤮. 2Ma̤pûhǐ mo̤pwa̤ makhû toǒ jîsapwa̤ kû̌ lǒkho ana̤, ma̤pûhǐ kò bè̌dubè̌na̤ asî, dě ma̤pûhǐ asî khòǐpè̤ lǒkho asò̌phlǒnu dě, sû̌ǐtòwòǐ lǒkho asî nî̌꤮. Asî tobǎ ǒ ta a ta̤yṳta̤nǎ ashû̌asho, asî tobǎ lǒbe ta ta̤mo̤ǐkòyò, asî tobǎ khòjîkhòjû khòsò̌dobò̌ lǒkho. 3Hǐnuakho, ma̤pûhǐ mamǔ mo̤pwa̤ toǒ bè̌sû̌bè̌sǎ a ta̤ǒhtûpwa̤ dě a tobǎ ǒhtûpwa̤ bè̌cahtǐ lǒkho asò̌ ta Cǒmara ǒ ayanudě, sû̌ǐtòwòǐ lǒkho asî nî̌꤮. Htodě asî tobǎ dǒ kòyo̤ tò̤, a tobǎ htû shisî̌khǎ ajû tò̤. Kò tobǎ ma̤ta̤wǒ hî̌tèhî̌tènu, asî tobǎ sû̌ǐ kòyò. 4Asî dè ma̤hǐnu pěmî̌ mamǔ mo̤pwa̤ htǒotoǒnu, a sû̌ǐjò bǎ mamǔ phijaû̌ toǒ ta asî tobǎ mo̤ǐ lǒkho awṳ̂ ta aphû̌ali̤ toǒ hî̌tè pwǎ. 5Ma̤pûhǐ kò pi̤jishǐcǒ pû Cǒmara ale̤ayo̤ tò̤nu, mamǔ mo̤pwa̤ htǒotoǒnu, a bǎ sû̌ǐbǎ mamǔ phijaû̌ toǒ. Dě a bǎ sû̌ǐ asî ta asî bǎ htû mamǔ toǒ htě a khòǐpè̤ asò̌phlǒ, asî sò̌phlǒ bǎ mṳ̂plî, asî bǎ htû ma htě a kè̌ǐkwè̌ǐ wǒ ahǐaphò, asî bǎ ma̤ta̤ awǒ, dě a bǎ jûle̤phî̌yo̤ awṳ̂ yo̤. 6Hǐnuakho, ǐkhû̌ǐǎdǒ makhû phijaû̌ toǒnu ta a glè khòbò̌jò kû̌ lǒkho asò̌phlǒ. 7Na lè̌dě, na ma̤ta̤ titètè̌꤮ bǎbǎ, ma̤pûhǐ makhû phijaû̌ toǒ kè̌mò̌mṳ nanu dě, ma̤pwǎ ta̤wǒnu toǒ nî̌꤮. Bǎ na sû̌ǐtòwòǐ kòyò akhanu, bè̌cǒtè̤ na sò̌phlǒ htodě jîsapwa̤ nana̤ nî̌꤮. 8Bǎ na sû̌ǐtòwòǐ kò akhanu, ma̤pûhǐ kò bè̌jòpe pû na ta̤sǔ tò̤nu, hî̌bǎcǒtè̤ nayo̤ nî̌꤮. Na dè ma̤hǐnu hî̌dě asî la̤hî̌ phû̌mò̤shî̌hto pawi̤pakè̌nu a ǒpe tò̤ akhû̌akhî, asî glè sòwò̤kè pwǎ. 9Kòyò htě a htû jûphû̌ toǒnu a ma̤ titètè̌꤮ bǎbǎ, a tobǎ ǐpǒ ana̤ ta aběcǎ dě asî bǎ ma̤to aběcǎ toǒ asò̌phlǒ. Asî bǎ klî̌shǔ htè̌shǔ aběcǎ tò̤. 10Asî tobǎ ǎhǔǎkě aběcǎ ata̤ tò̤, mî̌tanu, ma̤pûhǐ aběcǎ yṳǎ te̤mǎjò asî ayanu, asî tobǎ ǒhtûpwa̤ lṳwǒ bǎ aběcǎ. Dè ma̤hǐnu hî̌dě kò htû̌sò̌ǐbò Cǒmara htě a ma̤lû̌htò̌ge pa htǒotapwa̤ a ta̤sû̌ǐtòwòǐ htǒo dě ta̤pṳ̂̌꤮ tacǎ akû pě. 11Ma̤tè̤hî̌dě ma̤pûhǐ Cǒmara ma̤lû̌htò̌ge kòyòhǎkhû̌phû̌ lǒ̤꤮ bò ayanu, a dǔlṳ abwǐasîrî hǒ. 12Cǒmara abwǐasîrîhtǒo, a sû̌ǐ pa ta pa glè wîkè klè̌ htě a phû̌mò̤ toǒ ta hǎkhû̌ a ta̤sò̌yṳ toǒ. Khònò̤dě Cǒmara abwǐasîrî sû̌ǐ pa ta pa tobǎ khòǐbò̌jò pa sò̌phlǒ. Dě pa tobǎ ǒhtûpwa̤ cǒtè̤, htohǒtò̤ pa tobǎ ǒhtûpwa̤ pwǐ ato Cǒmara asò̌phlǒnu. 13Bǎ pa ǒpo̤kè̌shuǐ ta̤howi̤ amṳni̤ mî̌ htû̌꤮ papha Cǒmaradû̌ ta pwa̤ma̤lû̌htò̌ge pa Ye̤shǔkhrî̌stu a ta̤sîrîdû̌sîrîhtû hè ǒlṳhtò̌ pě akhanu, pa bǎ ǒhtûpwa̤ pwǐ a hî̌ pa htǒonu toǒ. 14Ma̤pûhǐ a ma̤lû̌htò̌ge pa dě ta̤phû̌mò̤shî̌hto lǒ̤꤮ bò toǒ akû, a htohǒtò̤ ma̤pûhǐ a ma̤mṳ̂plîge pa dě pa glè htûhtò̌ akòyò, htohǒtò̤ pa sò̌phlǒsho ma̤ta̤ awǒ toǒ ayanu, a khòsi asò̌ ta paya hǒ. b 15Sû̌ǐtòwòǐdǒ bǎ lǒkho asî htǒonu toǒ. Ǐkhû̌ǐǎ asînu. Sǎhtǎ lǒkho asî dě noǎbò na ta̤sîrîshû̌shonu nî̌꤮. Nogènè̤pî̌tî̌ pûma̤ kò ta nana̤ ma̤ nî̌꤮.
Copyright information for
KxfSCKRC