Titus 3
Ma̤ ta̤ htě awǒ
1Ma̤pûhǐ pwa̤yṳǎphû̌ toǒ nopǒǐ lǒkho ana̤ ta Khwǐcophǎ toǒ dě a glè jûle̤phî̌yo̤ lǒkho asî ayo̤, htohǒtò̤ ma̤pûhǐ asî ma̤wǒ lǒkho ana̤ dě a ma̤ta̤wǒ pṳ̂̌꤮ tacǎ ayanu, ǐ gènè̤bǎ gesǒ asî nî̌꤮. 2Ǐ gènè̤bǎ po̤gesǒ asî ta nopi̤jishǐcǒ pûma̤ kòyò dǐpwǎ̤꤮ ma̤ nî̌꤮. Nosè̌rè̌ǐ lǒkho asî ta ta̤to̤klî̌nû̌ûnu toǒ nî̌꤮. Htodě noǒ lǒkho asî ta sò̌phlǒ sò̌dohobî̌, dě nodǔlṳ bǎ kò ta asî ata̤khòsò̌do a ta̤shò̌lò̤ mè̤mè̤̌ asò̌phlǒnu toǒ ta kòpṳ̂̌꤮ tapwa̤ nî̌꤮. 3Ma̤tè̤hî̌dě děnukha pa toǒ mî̌ kòyònòdû̌ kòyò jûle̤phî̌yo̤ kû̌kò yo̤ tò̤ toǒ. Pa mî̌ kòyò htě a gûsǔkû̌ kòyò lòho toǒ akò. Pa htûhto kòyò htě a sò̌yṳ ma̤mo̤ǐ na̤ toǒ ajû hǒ. Pa ǒhtûpwa̤ ma̤bòkè akhîakha ta pa ma̤ ta̤phû̌mò̤shî̌hto ta ta̤sò̌khěkhû̌khwè kò toǒ hǒ. Htohǒtò̤ kò sò̌khě pa dě pa sò̌khěshǔsǒ kòyò. 4Pwǎ̤tadě bǎ Cǒmara htě a ma̤lû̌htò̌ge pa htǒotapwa̤ a ta̤gwèbǎǐ ta ata̤mo̤ǐ pa ǒlṳhtò̌ akhanu, a ma̤lû̌htò̌ge pa hǒ. 5Ta̤htě a ma̤lû̌htò̌ge pa htǒonu mî̌htě pa sana̤ ma̤tû̌ ta̤cǒta̤tè̤ akònu mè̤tò̤, mî̌pwǎ a gwèbǎǐ pa akhû̌akhî, a ma̤lû̌htò̌gepwǎ pa. Běcǎ sǎcahtǐ a ta̤po̤ta̤phǎ akhû̌akhî, a shǔbòkè pa, htodě a ǐ pa ta̤ǒphijaû̌lò̤ asa ta ta̤ǒhtûpwa̤ asa toǒ. 6Ye̤shǔkhrî̌stu htě a ma̤lû̌htò̌ge pa htǒotapwa̤ akhû̌akhî, Cǒmara sò̌yṳ lò̌lò̤yûpwǎ a sǎcahtǐ dě palo̤. 7Cǒmara bè̌cǒbè̌tè̤ pa ta abwǐdû̌sîrîhtû khû̌khî hǒ. Hǐnudě khònò̤htǒo pa nî̤bǎ pa ta̤kè̌shuǐ htě a mî̌ yolahtûpwa̤ û̌cata̤bî̌ tûjûpwa̤ talakhǎ htǒonu hǒ. 8Ta̤hî̌bǎ htǒonumî̌ acǒatè̤. Ma̤pûhǐ kòyò htě a yṳǎna̤ǎ Cǒmara toǒ glè bè̌sû̌bè̌sǎ dě ǐlò̤kû̌ lǒkho asò̌ ta a ma̤ ta̤wǒ toǒ ayanu, he sò̌yṳ ta na glè bè̌sû̌bè̌sǎ sû̌ǐ te̤mǎ kòyò ta ta̤wi̤ta̤kè̌ htǒotoǒ. Ta̤htǒotoǒ mî̌ awǒ mè̤mè̤̌ dě a htûbwǐhtûsîrî mè̤mè̤̌ kò pṳ̂̌꤮ tapwa̤ aya. 9Pwǎ̤ta sè̌rè̌ǐ lǒkho sîna̤ ta ta̤hî̌bǎ gègokè̌khî nòdû̌nû̌ûnu toǒ ta ta̤dǒkhlidǒlè htě ahtû toǒ. Htodě sè̌rè̌ǐ lǒkho ta̤gègo htò̌pò̌htò̌shî kè̌khînû̌û ta ta̤sû̌ta̤tòwò akònu toǒ nî̌꤮, ma̤tè̤hî̌dě ta̤ htǒotoǒ numî̌ abwǐasîrî ǒ dǐcǎ꤮ tò̤. A nòdû̌ pwǎ. 10Kòyò tapwa̤pwa̤ dě a ǐ ǒhtò̌ ta̤htò̌pò̌htò̌shî toǒnu, ǐsè̌rè̌ a ginǐ̤plǎ htodě nǒkònu bǒsû̌pe pûma̤ yǎ ma̤ nî̌꤮. 11Na sî̌ya te̤mǎ ta kòyò hǐnu toǒ mî̌ kòyò htě a bû̌tèplè̌kè ta̤te̤ta̤mǎ dě a ma̤hè sělě lǒkhopwǎ ta̤sǔ. Htohǒtò̤ ata̤sǔ toǒnu a khòlṳ nû̌û ta a mî̌ kòyò ta̤sǔǒ tapwa̤.Ta̤sû̌ǐtòwòǐ gutṳ̌lò̤ toǒ
12Htû̌꤮ he nohèlò̤ Aratemǎ mètò̤mî̌ Tǔkǐkǔ dě naǒpe akhanu, jipwi̤ hèwǐ dě heǒ bǎ Nikapò̌lǐwî̤nu pě nî̌꤮, ma̤tè̤hî̌dě he bè̌lò̤hto he sò̌phlǒ ta gawo̤kha htǒopěnu, he cû̌ǒ bǎnu pě. a 13Jipwi̤ htǒkhû̌htǒǎ ma̤shû̌ma̤jo pû pwa̤cèrò ta̤ Senǎ ta Apò̌lu a ta̤cû̌ta̤ge aya htǒonu nî̌꤮. Htohǒtò̤ kè̌ ma̤wǒpo̤ ta̤ htě asî lo̤bǎnu toǒ nî̌꤮. b 14Ma̤pûhǐ pa Grete Khrî̌stuphû̌ htǒotoǒ noǎjò kû̌kò akhîakha htě a ma̤ ta̤wǒ toǒ ayanu, tobǎ sû̌ǐ bǎ asî htodě ma̤pûhǐ a ma̤jèbò̌ kòyò htě a lo̤bǎ mè̤mè̤̌nu toǒ, htohǒtò̤ ma̤pûhǐ asî ǒhtûpwa̤ nòdû̌ pûma̤ ta ta̤ htě abwǐasîrî ǒtò̤nu toǒ aya ma̤nu, tobǎ sû̌ǐ asîsî. 15Kòyò htě a ǒkû̌bò ta he bǎo toǒ sûhè bǎ na ata̤hî̌mo̤hî̌wǒ. Dě sûcû̌ tṳtṳ bǎ pa ta̤hî̌mo̤hî̌wǒ htǒonu dě pwa̤yṳǎphû̌ htě a mo̤ǐ panu toǒ a ǒ nî̌꤮. Cǒmara abwǐasîrî ǒkû̌ tû̌ta sî nî̌꤮.
Copyright information for
KxfSCKRC