Titus 1
1He mî̌ Pò̌lu, he khwè̌cû̌ bǎ na lî̤ htǒotabǎ. He mî̌ Cǒmara ajû ta Ye̤shǔkhrî̌stu a pwa̤nophû̌ tapwa̤. Cǒmara wû̌lǎ he dě a nocû̌ ma̤jè he ta kòyò htě a wû̌lǎ nû̌ûnu toǒ a ta̤yṳta̤nǎ, dě a glè sî̌ya lǒkho ta̤te̤ta̤mǎ. Ta̤te̤ta̤mǎ htǒonumî̌ a ma̤jè asî dě a glè ǒhtûpwa̤ to ta Cǒmara asò̌phlǒ htǒonu toǒ hǒ. 2Ta̤cǒta̤tè̤ htǒonu a ǐ asî ta̤kè̌shuǐ htě asî glè nî̤bǎ yolahtûpwa̤ tûjûpwa̤ talakhǎ aya hǒ. Bǎ hǎkhû̌ htûhtò̌ hǒtò̤ akhanu, Cǒmara htě a lòhonǒ dǐkhò̌꤮ tò̤ htǒotapwa̤nu, a olò̤nǎhto ta a glè ǐ pa ta̤htûpwa̤ htǒonu hǒ. 3Cǒmara htě a ma̤lû̌htò̌ge pa htǒotapwa̤ ǐsî̌ya bǎ pa ta̤wi̤ta̤kè̌ htǒonumî̌, a toshutokha dě a yṳǎ he ta a nolò̤ he dě he glè ǐsî̌ya bǎ sî ta ta̤wi̤ta̤kè̌ htǒonu hǒ. 4Tǐtǔ꤮, he khwè̌cû̌ lî̤ htǒotabǎ dě naǒ. Na ta̤yṳta̤nǎ sǒsǒta pa tacǎ꤮ pa akhû̌akhî, nanu asǒsǒta hephû̌ sana̤ ta hena̤. a Pha Cǒmara ta pwa̤ma̤lû̌htò̌ge pa Ye̤shǔkhrî̌stu htǒo ǐtû̌ta na ta̤bwǐta̤sîrî ta ta̤gûjûkabǎ nî̌꤮.Tǐtǔ ta̤ma̤ bǎ Grete shikholophû̌jo
5He bè̌kè na bǎ Grete shikholophû̌jo htǒonumî̌ ma̤pûhǐ na cû̌ tîwî̌tòwò ma̤toma̤bǎ htophlǔkèbò ta̤ htě a lo̤bǎma̤pe dě wî̤htǒo pṳ̂̌tî̤wî̤ akûnu toǒ pwǎ. Dě na glè bè̌htò̌ pwa̤yṳǎta̤ aprṳ̂aho wè̤khǔwè̤pwa̤ toǒ pwǐ he yṳ̂klè̌nè̌klòhto nanu nî̌꤮. 6Pwa̤yṳǎta̤ aprṳ̂aho hǐkǒdû̌ toǒ numî̌, asî bǎ htû kòyò htě kò la̤bè̌ ta̤sǔ dě asî lo̤nu a tobǎ ǒ tò̤. Ama bǎ ǒpwǎ tapwǎ̤꤮ pa, aphû̌ toǒ numî̌ a bǎhtû pwa̤yṳǎphû̌ dě asî mi̤ bǎlṳ ta awî̤awǒ, tò̤mî̌ta a bǎ nò̌kudu tò̤, htodě a bǎ mè̤ta kòyò htě a gana̤de yo̤toǒ. b 7Ma̤tè̤hî̌dě, pwa̤yṳǎta̤ aprṳ̂aho hǐkǒdû̌ tapwa̤nu, ta̤ma̤ lò̤bǎ akhû̌ dě a tobǎ ma̤ Cǒmara a ta̤phî̌ta̤ma̤ akhû̌akhî, kò la̤bè̌ a ta̤sǔ mî̌ a tobǎ ǒ tò̤. Hǐkǒshò̌ ta sò̌phlǒdû̌htò̌phwè toǒnu a tobǎ ǒ tò̤, bǎ ǎmṳopǒ tò̤, bǎphlěbǎpo̤ kòhǔwa̤ tò̤, bǎ ǎ wû dě kòkhû̌ tò̤. 8Mî̌tanu, a tobǎ mè̤ta kòyò htě a dǒshuǐ shǐpwa̤shǐmè̤, a tobǎ mè̤ta kòyò htě a mo̤ǐ ta̤ awǒ, a tobǎ khòbò̌jò ana̤, a tobǎ ǒ ta ta̤cǒta̤tè̤ ta ta̤cahtǐ ta ta̤sè̌rè̌bò̌ ana̤, 9Ma̤pûhǐ a ǐkhû̌ǐǎbò̌ kò ta ta̤sû̌ǐtòwòǐ htě ato toǒ, htohǒtò̤ ma̤pûhǐ a sû̌ǐtòwòǐ geshǔjò kòyò htě a hî̌ tukutakǎshǔ ta̤wi̤ta̤kè̌ htǒotoǒ ayanu, a tobǎ yṳǎ pṳ̂měǐwǒ ta̤wi̤ta̤kè̌ htě kò yṳǎ a pwǐ kòyò sû̌ǐhto nû̌ûnu toǒ. 10Ma̤tè̤hî̌dě kòyò htě a hî̌ tukutakǎshǔ ta̤ toǒnu a ǒplṳ̂. Asînu toǒmî̌, a hî̌bǎ ta̤ htě amûasǎ ǒtò̤ toǒ, dě a hî̌bǎ lòhǎlòhobò kòyò. Kòyò hǐnu toǒmî̌, ǒǎtîkî̌, pa kè̌shǐjò asî bǎtè hî̌dě, asînu toǒmî̌, a hî̌bǎ shû̌tuklǔ lǒkho ta ma̤pûhǐ kò nî̤bǎ ta̤lû̌htò̌ge ayanu, kò bǎ dǔtṳphěkhi, a hî̌ lǒkho hǐnu toǒ aklanu hǒ. 11Tobǎ noǒsî̌tukǔkè asî ta̤hî̌bǎnu toǒ, ma̤tè̤hî̌dě ta̤sû̌ǐtòwòǐ htě a tobǎ sû̌ǐ tò̤ toǒnu asî cû̌sû̌ǐ kò akhû̌akhî, asî cû̌ ma̤shû̌shǎ dǐdòbò kò hǐphû̌phòphû̌ pṳ̂̌꤮ tapwa̤ a ta̤yṳta̤nǎ. Asî sò̌yṳ nî̤bǎ lǒkho wû dě a cû̌sû̌ǐ pwǎ kò. 12Asî Grete shikholophû̌jo pwa̤po̤ tû̌ akla tapwa̤nu a hî̌ ta, “Grete shikholophû̌jo toǒmî̌ kòyòlòho pṳ̂̌꤮ taplǎ, asî mî̌ alò̤ta ta̤mi̤ta̤mò̤ htě akhuahîphû̌mò̤ toǒ htodě asî mî̌ kòyò cè̌klèlèbǒphû̌ dě a ǎtûlû̌ otûlû̌ toǒ.” 13A hî̌ ta̤ htǒotoǒ numî̌ a topwǎ akhû̌akhî, ma̤pûhǐ asî ǒcǒǒtè̤ dě ta̤yṳta̤nǎ akûnu, sǎhtǎshû̌ asî nî̌꤮. 14Htodě ma̤pûhǐ asî wîkè Yṳ̌daphû̌ ata̤dǒnè lò̤we̤ dě꤮ wǐnu toǒ, htodě ma̤pûhǐ asî wîkè ta̤mǎlò̤ htě kòyò la̤lò̤kè ta̤cǒta̤tè̤ toǒ ta̤hî̌bǎ ayanu, sǎhtǎshû̌ asînu. 15Kòyò tapwa̤pwa̤ a mṳ̂plî Cǒmara a lo̤mo̤nu, ta̤ lǒ̤꤮ bò mṳ̂plîbò dě alo̤mo̤ hǒ. Pwǎ̤tadě kòyò htě a mṳ̂plî kû̌kò tò̤ dě a yṳǎna̤ǎ kû̌kò tò̤ toǒnu, dě alo̤mo̤nu a mṳ̂plî dǐcǎ꤮ tò̤. Asî ta̤sǔ toǒnu a ma̤ phû̌mò̤bò getû̌ asî ata̤gènè̤ ta asò̌phlǒ dě a sî̌yatû̌ ta̤wǒ ta ta̤phû̌mò̤ htǒonuhǒ. 16Asî hî̌ ta a sî̌ya Cǒmara pwǎ̤ta ta̤ma̤ htě asî ma̤ toǒnu, a ǒlṳhtò̌ ta asî sî̌ya Cǒmara dî̌kî̌꤮ tò̤. Asînu toǒmî̌ la̤wi̤ja, htodě kòyò htě a gana̤de kû̌kò yo̤ tò̤ toǒ, asî glè ma̤ta̤ awǒ tacǎcǎnu a ma̤bò̌ kû̌kò tò̤.
Copyright information for
KxfSCKRC