Luk 22:14-23 | KxfSCKRC | STEP | Bǎ khîkha hèto̤ ta tobǎ ǎo ta̤cû̌tûlû̌pwè akhanu, Běcǎ Ye̤shǔ ta pwa̤nophû̌ toǒ hǎnòò̌ te̤we̤plǒbò nû̌û la̤ǎdîjowa̤ akòshî̌.

Luke 22:14-23

Běcǎ a ta̤ǎocahtǐ lṳmṳhǎ

(Matěo 26:26-30; Mǎ̤riko 14:22-26; Kòrî̌tiaphû̌ awǐlǒ tabǎ 11:23-25)

14 Bǎ khîkha hèto̤ ta tobǎ ǎo ta̤cû̌tûlû̌pwè akhanu, Běcǎ Ye̤shǔ ta pwa̤nophû̌ toǒ hǎnòò̌ te̤we̤plǒbò nû̌û la̤ǎdîjowa̤ akòshî̌. 15 Dě a hî̌ asî, “Bǎ he khòbǎ ta̤jîta̤jû hǒtò̤ akhanu, he sò̌yṳ ǎhtuohtu jòjî̌ kû̌ta sî ta̤cû̌tûlû̌pwè htǒotaplǎtò̤. 16 Ma̤tè̤hî̌dě, he hî̌ sî, Cǒmara dè hèhtè̌ge phlǔhtobò akòyò hǒtò̤ dě a hè htûkhwǐ dě apǒǐ asî hǒtò̤nu, he ǎbǎkû̌pe ta̤cû̌tûlû̌pwè shǎǎshǎo htǒonu ta sî tò̤.”

17 Ye̤shǔ phî̌htò̌ ba dě a hî̌bwǐhî̌sîrîhtò̌ Cǒmara htodě a hî̌, “Phî̌mò̌ bahtǒo dě yṳ̂lò̤o pa̤ nû̌û. 18 Ma̤tè̤hî̌dě he hî̌ sî, tèhtò̌ khònò̤nu tǒ̤hè to̤htû̌ Cǒmara hè pǒshipǒga pě taplǎnu, he openǒ sobîshi htǒo tò̤hǒ.”

19 Htodě Ye̤shǔ phî̌ mû̌ dě a hî̌bwǐhî̌sîrîhtò̌ Cǒmara. Htodě a bî̌phò̌ mû̌ dě a ǐlò̤ nû̌ûta asî. Dě a hî̌ asî, “Htǒomî̌ he na̤klû htě he ǐlò̤kè yǎta sîyanu hǒ. Ǎ lǒkho htǒo dě gènè̤htò̌nṳ he nî̌꤮.”

20 Bǎ a ǎhto lṳmṳhǎshǎǎ akhanu, a phî̌htò̌lè̌ bahtǒo dě a ma̤ sǒsǒnû̌û pwǐ a ma̤ mû̌nu dě a hî̌, “Htǒomî̌ hesǐ htě a ma̤měma̤gle ta̤wṳ̂dò asa dě a sǐlò̤ bǎ sîyanu hǒ. ^a 21 Pwǎ̤tadě kè̌ lǒkho! Kòyò htě a glè shaǎlò̤kè he htǒotapwa̤nu, a ǒkû̌dǒpwǎ ta he bǎ la̤ǎdîjowa̤ kòshî̌ bǎonu. ^b 22 Kòyòphû̌khû mî̌ hehtǒo a bǎ si pwǐ Cǒmara a ta̤yè̤lò̤ǒnǎnu pě pwǎ̤ta kòyò htě a glè shaǎlò̤kè he htǒotapwa̤nu, a khòbǎ mè̤mè̤̌ ta̤jîta̤jû pě!” 23 Dě asî gwè kè̌khînû̌û tapwa̤ ta tapwa̤ dě a hî̌ lǒkho, bǎtè tapwa̤ shaǎlò̤kè yǎ pě ya?