Mar 10:46-52 | KxfSCKRC | STEP | Ye̤shǔ ta akhophijaû̌ toǒ cû̌to̤ Yerikhò̌wî̤ bǎ asî hǎhtò̌cû̌kè dě Yerikhò̌wî̤ akhanu, kòyò saprṳ̂saphǎ bǎ wî̤kûnu toǒ hǎhtò̌cû̌ kû̌ta asî. Bǎ asî hǎhtò̌cû̌ akhanu, kòyòmakhû mi̤sǎkhǐ hǎnòò̌lò̤ kwiǎshǎ bǎ klè̌htunu tapwa̤ ami̤ ta Batimè̤̌, a mî̌ Tǐmè̤̌ aphû̌khû tapwa̤.

Mark 10:46-52

Ye̤shǔ ma̤lîkè Batimè̤̌ ami̤sǎ

(Matěo 20:29-34; Lǔka 18:35-43)

46 Ye̤shǔ ta akhophijaû̌ toǒ cû̌to̤ Yerikhò̌wî̤ bǎ asî hǎhtò̌cû̌kè dě Yerikhò̌wî̤ akhanu, kòyò saprṳ̂saphǎ bǎ wî̤kûnu toǒ hǎhtò̌cû̌ kû̌ta asî. Bǎ asî hǎhtò̌cû̌ akhanu, kòyòmakhû mi̤sǎkhǐ hǎnòò̌lò̤ kwiǎshǎ bǎ klè̌htunu tapwa̤ ami̤ ta Batimè̤̌, a mî̌ Tǐmè̤̌ aphû̌khû tapwa̤. 47 Bǎ a gana̤de ta Nǎ̤sèrèwî̤phû̌ Ye̤shǔ hè dě klè̌lo̤ akhanu, a sahtò̌ kaǎgu ta, “Kǒ꤮ Dǎ̤wi̤ aphû̌khû Ye̤shǔ꤮ gwèbǎǐpû he.”

48 Kòyò saprṳ̂saphǎ sǎhtǎ nû̌û dě a hî̌ lǒkho nû̌û, “Pwǎpwǎ ǒmò̌꤮” pwǎ̤tadě atǐ̤ yi̤kǒhtò̌ shû̌shû̌, “Kǒ꤮ phadǎ̤wi̤ aphû̌khû Ye̤shǔ꤮ gwèbǎǐ pû he nî̌꤮.”

49 Ye̤shǔ ǒkǔ dě a hî̌, “Cû̌kaǎhè yǎ bǎo,” dě asî cû̌ kaǎhè nû̌û dě a hî̌ nû̌û, “Sǎpla̤ pûma̤, ihtǒmò̌, Ye̤shǔ kaǎ na hǒ.” 50 Dě a plû̌htò̌ ahǐdokhlo dě a pa̤lò̤kè nû̌û. Htodě a pe̤ihtǒ dě a hè Ye̤shǔ ǒ.

51 Ye̤shǔ gwè yǎ, “Na sò̌yṳ noma̤ he mî̌titè?”

Kòyò mi̤sǎkhǐ htǒotapwa̤ hî̌shǔ nû̌û, “Sara꤮ he sò̌yṳ kè̌shǐjò kû̌kò.”

52 Dě Ye̤shǔ hî̌ yǎ, “Na gemî̌anî̤hǒ. Na ta̤yṳ ma̤bǎ bǎ na hǒ.” Bǎnu taplǎpa ami̤sǎ lîhè dě a gûcû̌kû̌ Ye̤shǔ akò.