Mar 3:1-6 | KxfSCKRC | STEP | Ye̤shǔ ginṳsǒ ta̤sabahǐkû dě bǎnu tò̤glònu, kòyò cǔgosi ǒ tapwa̤.

Mark 3:1-6

Kòyò cǔgosi

(Matěo 12:9-14; Lǔka 6:6-11)

1 Ye̤shǔ ginṳsǒ ta̤sabahǐkû dě bǎnu tò̤glònu, kòyò cǔgosi ǒ tapwa̤. 2 A to ta mṳni̤dǔ akhû̌akhî, Pharisè̌phû̌ toǒǒnu a sò̌yṳ kè̌lǎ Běcǎ Ye̤shǔ ata̤sǔ dě a ǒpo̤kè̌ nû̌ûta mṳni̤dǔ htǒonumî̌ a ma̤bǎ bǎ kòyò cǔgosi htǒotapwa̤ pě ya, mî̌ tò̤ ya hǐnu. 3 Dě Ye̤shǔ hî̌ kòyò cǔgosi tokhonu tapwa̤, “Hè dě alo̤mo̤.”

4 Htodě a gwè asî, “Pa ta̤sû̌ta̤tòwò hî̌ pa ta bǎ Yṳ̌daphû̌ a mṳni̤dǔ akhanumî̌, pa tobǎ ma̤jè kòyò ya? mè̤tò̤mî̌ pa tobǎ ma̤pò̤ma̤sha kòyò ya? Pa tobǎ ma̤lû̌htò̌ge kòyò tapwa̤pwa̤ ayola htûpwa̤ ya? Mè̤tò̤mî̌ pa tobǎ ma̤si kòyò ya?” Pwǎ̤ta asî dò̌tûklû̌bò pwǎ.

5 A bǎshajî̌ Ye̤shǔ a sò̌phlǒ, ma̤tè̤hî̌dě asî nò̌kudubò pṳ̂̌꤮ tapwa̤, ta̤gwèbǎǐ kònu a ǒ dî̌kî̌꤮ tò̤ akhû̌akhî, Ye̤shǔ kè̌ asî dě a sò̌phlǒdû̌ tûlû̌shû̌ dě a hî̌ kòyò cǔgosi tokho htǒotapwa̤, “Yṳ̂htò̌ na cǔgonu,” dě a yṳ̂htò̌ acǔgo, dě acǔgo wǒgebò sǒ. 6 Pharisè̌phû̌ toǒ hǎhtò̌cû̌ tephekè dě taplǎpa asî cû̌ǒplǒ ta kòyò htě a gûkû̌ Khwǐherǒ akònu toǒ dě asî cû̌ ǒhtuhî̌bǎplǒ kè̌khînû̌û ta tobǎ ma̤si Ye̤shǔ hî̌tènu awi̤akè̌.