1 Corinthians 1

1He mî̌ Khûpò̌lǔ. Cǒmara sǎphlǒô̌ he dě a rû̌htò̌ he kû̌ Yeshǔ Khrǐ a pwa̤nophû̌ tôpwa̤. Dě he kû̌ pa pṳ̌wè̤̌ Khrǐphû̌ Khûsûsate wě̤cû̌ bǎ sî lî̤hǒtôbǎ.

2Pa wě̤cû̌ bǎ lî̤nu dǒ Cǒmara ta̤dòkû ô̌ dǒ Wî̤̌kôritu akû tokhlǒ a ô̌, kû̌ lǒ̤꤮ bò kòyò dǒ a cabahtò̌ Běcǎ Yeshǔ Khrǐ dě a ô̌ lô̌khô dǒ gûlǎ̤ pṳ̂̌ tôkû nutokhlǒ a ô̌. Yeshǔ nî̌ pa Běcǎ mî̌ amè̤̌, asî Běcǎ mî̌ amè̤̌. Dǒ Yeshǔ Khrǐ akhû̌akhî, Cǒmara ma̤plò̌shǐ sî dě a kaǎ sî dǒ sî gǔ ô̌htûpwa̤ plò̌shǐ dû̌htò̌ pô̤̌ aya hǒ. ^a

3Papha Cǒmara kû̌ pa Běcǎ Yeshǔ Khrǐ ǐ pû sî ta̤bwǐta̤sîrî kû̌ sǎphlǒ ta̤gûjû̌kabǎ nî̌꤮.

Khûpò̌lǔ hî̌bwǐhî̌sîrî bǎ Kôritu ta̤dòkû tokhlǒ aya

4Dǒ Yeshǔ Khrǐ akhû̌akhîdě Cǒmara ǐlò̤ sî abwǐsîrî hǒ. Dǒ a ǐ sî pô̤̌o akhû̌akhî, he hî̌bwǐhî̌sîrî bǎ sî Cǒmara pṳ̂̌꤮ taplǎ. 5Ma̤titèhî̌dě, dǒ sî kû̌ Khrǐ htûhtò̌kè lû̌û tôcǒ nô̤̌ hǒ akhû̌akhî, Cǒmara ǐshowî̤ hto sî pṳ̂̌tocǒ hǒ. Dě lǒ̤bò sî ta̤hî̌buhî̌bǎ tokhlǒnu bǎbǎ, sî ta̤sî̌ta̤jò̌ tokhlǒnu bǎbǎ, a ǐshowî̤ bò sî hǒ. 6Dě pa shôbǐǐlṳ̌ bǎ sî Khrǐ awe̤akè tokhlǒnu, a ô̌měô̌gle tě̤tě̤mè̤̌mè̤̌ dǒ sîkû hǒ. 7Pô̤̌nu akhû̌akhî, bǎ sî ô̌pǒ̤kè̌shuǐ Běcǎ Yeshǔ Khrǐ gǔ hèô̌lṳ̌htò̌ pěnu, lǒ̤bò Yôla Plò̌shǐ asû nǐ̤bǎkwe dǒ sî lǎ̤lṳ̂ tokhlǒnu Cǒmara ǐ bò sî hǒ. 8Htû̌ pa Běcǎ Yeshǔ Khrǐ hè alṳmṳ̌ni̤ pě tôni̤nu, pô̤̌khô kòyò lǎ̤bè̌ ta̤sǔ dǒ sîlô̤ gǔ ô̌ pe tô̤̌ ayanu, Běcǎ gǔ pṳ̂̌mětegle tû̌sî tǒ̤dǒ a gutṳ̌ pě. 9Cǒmara hǒtôpwa̤ mî̌ lǎ̤yṳ̌ǎnǐ̤ anǐ̤ mè̤̌ca. A mî̌ pwa̤ dǒ a kaǎ sî dě a sǎyṳ no bǒsû̌khǎkhô sî kû̌ aphû̌khû pa Běcǎ Yeshǔ Khrǐ hǒtôpwa̤nu hǒ.

Pwa̤yṳ̌ǎta̤ ta̤dòkûphû̌ tokhlǒ sǎphlǒ lûkhô̌kè

10Hepṳ̌hewè̤̌ sî khònò̤̌ he kwisǎyṳ shû̌ sî kû̌ ta̤siwi̤sòwò̤ dǒ Běcǎ Yeshǔ Khrǐ ǐ he nuhǒ. He sǎyṳ kwisǎyṳ sî mî̌ pô̤̌hî̌tèhî̌dě, he sǎyṳ dǒ sî gǔ mô̤nṳ̌klanṳ̌ lû̌û, ô̌khô̌ma̤khô̌ lû̌û tôprṳ̂ kû̌ tôprṳ̂ tǎ̤mǎ̤. He sǎyṳ shò̌gû̌ sî kû̌ sî ta̤gènè̤ tokhlǒ bǎbǎ, sî ta̤gènè̤nǎ tokhlǒ bǎbǎ, no sô̌sô̌ pwǎ lû̌û tôcǒcǒ pwǎ nî̌. 11Ma̤titèhî̌dě, pṳ̌wè̤̌ sî, Mǒ̤kalò̤e a khô akla tokhlǒkhlǒ shôbǐǐlṳ̌ bǎ he kû̌, sîklî̌sîhto kè̌khî tû̌bò lû̌û tôpwa̤ kû̌ tôpwa̤ a hî̌ cǎkǎ, 12Sîklǐsîhto kwè̌ lû̌û pô̤̌hî̌tèhî̌dě, tôpwa̤ dě a hî̌ kû̌, “He mî̌ Khûpò̌lǔ akhôphijǎ” dǒ ashǔshawa̤ tôpwa̤ dě a hî̌ kû̌, “He mî̌ Khûapò̌lǔ akhôphijǎ,” tôpwa̤ dě a hî̌ pô̤̌ kû̌, “He mî̌ Khûkephǎ akhôphijǎ,” dǒ ashǔshawa̤ tôpwa̤ hî̌ pô̤̌ dě a hî̌ kû̌, “He mî̌ Khrǐ akhôphijǎ,” pô̤̌nu yahî̌. ^b

13Khrǐ anǎ̤glǒ numî̌ kòyò ma̤lûpò̌ lû̌û tôprṳ̂ kû̌ tôprṳ̂ pô̤̌numî̌ anǐ̤ ya? He mî̌ Khûpò̌lǔnu a tṳ̌sikhòsi bǎ sîya dǒ nò̌dò̌htǔlô̤ ya? Sî ju sînǎ̤ kû̌ shi dǒ sî gǔ htûhtò̌ he khôphijǎ ya? 14He jubǎ pwǎtǒ̤ Khûkayǔ kû̌ Khûkrǐsapǔ sò̌ginǐ̤ nô̤̌pwǎ akhû̌akhî, he hî̌bwǐhî̌sîrî Cǒmara. 15Pô̤̌nudě, sî cû̌hî̌ kû̌ he ju hto shi kû̌ Khûpò̌lǔ ami̤ hǒ, pô̤̌numî̌ anǐ̤ tôpwa̤ tô̤̌ nî̌꤮. 16(Ǒ a mè̤̌mî̌ca, he ju bǎ mî̌ca pe Khûsôtebenǎsa kû̌ a hǐphû̌phòphû̌ tokhlǒ. He to̤ǐ pwǎtǒ̤ hǒtokhlǒ nô̤̌pwǎ. Dǒ ashǔshawa̤ mî̌ a ô̌pe ya, mî̌ a ô̌ pě tô̤̌ yanu he to̤ǐ pe tô̤̌.) ^c 17Khrǐ plûhè he kû̌ he bǎhè ju bǎ kòyò shi mè̤̌tô̤̌. A plû hè he dǒ he gǔ hè shôbǐǐlṳ̌ bǎ kòyò kû̌ ta̤sǎlě̤we̤kè pwǎ. Dě bǎ he shôbǐǐlṳ̌ bǎ kòyò ta̤sǎlě̤we̤kè akhanu, he hî̌bǎnô̌ kû̌ pwa̤sî̌jò̌phû̌ tokhlǒ ayô̤̌ tô̤̌. Ma̤titèhî̌dě he kè̌ nǎla̤ǐ pwa̤sî̌jò̌phû̌ a ta̤hî̌bǎ tokhlǒ hî̌dě, he ma̤ phèbò Khrǐ ata̤si a ta̤pô̤ta̤phǎ shû̌sho dǒ nò̌dò̌htǔlô̤nu hǒ.

Khrǐ mî̌ Cǒmara a ta̤pô̤ta̤phǎ shû̌sho kû̌ a ta̤sî̌ta̤jò̌

18Kòyò tokhlǒkhlǒ yṳ̌ǎ ta̤ tô̤̌ akhû̌akhî, Cǒmara gǔ cî̌htò̌ asî pě. Kòyò pô̤̌nu tokhlǒnu, a gènè̤ lô̌khô kû̌ Khrǐ si dǒ nò̌dò̌htǔlô̤ awe̤akè numî̌ a tṳ̌dè pwǎ. Bǎbǎkǎlè pa dǒ a nǐ̤bǎ ta̤ma̤hǎplǎge tokhlǒ ayanu, ta̤we̤ta̤kè mî̌ Cǒmara a ta̤pô̤ta̤phǎ dǒ paya hǒ. 19Cǒmara alě̤ayô̤̌ hî̌ kû̌,

“He gǔ ma̤pî̌kè pwa̤sî̌jò̌phû̌ tokhlǒ a ta̤sî̌ta̤jò̌ tokhlǒ pě. He gǔ wîkè pwa̤jò̌pwa̤lîmòphû̌ tokhlǒ a ta̤sî̌ta̤jò̌ nutokhlǒ pě,” ^d a hî̌ pô̤̌nu.

20Kè̌ ma̤pô̤̌nudě pwa̤sî̌jò̌phû̌ tokhlǒ bǎbǎ, pwa̤sû̌ǐ ta̤sû̌ta̤tòwò asara tokhlǒ bǎbǎ, pwa̤ dǒ a htè̌shěshujò kòyò tokhlǒ bǎbǎ, pa sî̌ganǎ̤ kû̌ asî ta̤sî̌jò̌ tokhlǒnu, a ô̌lǒô̌khlo pwǎ. ^e A dǔlṳ̌pô̤̌ kû̌, hǎkhû̌ a ta̤sî̌ta̤jò̌ tokhlǒnu a ô̌lǒô̌khlo pwǎ. ^f 21Cǒmara a ta̤sî̌ta̤jò̌ mî̌ adû̌ayô̤̌ mè̤̌mî̌ca. Pô̤̌nudě kòyòhǎkhû̌phû̌ tokhlǒ gǔ kè̌lǎsî̌yabò̌ Cǒmara kû̌ asî ta̤sî̌ta̤jò̌ tokhlǒnu, a bò̌ tôkhò̌ tô̤̌. Ma̤titèhî̌dě, Cǒmara sǎphlǒô̌ dǒ a gǔ ma̤hǎplǎge kòyò dǒ a yṳ̌ǎ Khrǐ a ta̤sǎlě̤we̤kè dǒ pa shôbǐǐlṳ̌ bǎ kòyònu tokhlǒ pě. Bǎbǎkǎlè kòyò dǒ a yṳ̌ǎ ta̤sǎlě̤we̤kè tô̤̌ tokhlǒnu, a gènè̤sǔ lô̌khô kû̌ ta̤shôbǐǐlṳ̌ hǒtokhlǒ numî̌ a ô̌lǒô̌khlo pwǎ, a gènè̤ lô̌khô pô̤̌nu. 22Yǔdaphû̌ tokhlǒnu, a kè̌ kè̌shǐ Cǒmara ata̤ma̤ cô̌klǐcô̌sè tokhlǒ tô̤̌ hî̌dě, a yṳ̌ǎ gû̌ lô̌khô kòyò ta̤sǎlě̤we̤kè nutô̤̌. Grěphû̌li̤ tokhlǒ aya nudě, Khrǐ a ta̤sǎlě̤we̤kènu a htû ta̤ô̌lǒô̌khlo dǒ asîya pwǎ. Ma̤titèhî̌dě a sǎyṳ ganǎ̤de lô̌khô pwǎ kòyò dǒ a ô̌ kû̌ ta̤sî̌ta̤jò̌ dě a hî̌bǎjòhî̌bǎnǐ̤ tokhlǒ a ta̤hî̌bǎ pwǎ. 23Pô̤̌nudě bǎ pa shôbǐǐlṳ̌ Khrǐ si dǒ nò̌dò̌htǔlô̤ akhanu, Yǔdaphû̌ tokhlǒ gènè̤ sǎphlǒsha mî̌ca. Yǔdaphû̌ mè̤̌tô̤̌ tokhlǒ dě a hî̌ kû̌ yô̤̌mûyô̤̌sǎ ô̌ dǒ asîya tôcǒ tô̤̌. 24Bǎbǎkǎlè kòyò dǒ Cǒmara kaǎ lû̌û dǒ a gǔ yṳ̌ǎ ta̤sǎlě̤we̤kè tokhlǒ ayanu, Yǔdaphû̌ tokhlǒ bǎbǎ, Yǔdaphû̌ mè̤̌tô̤̌ tokhlǒ bǎbǎ, Khrǐ si dǒ nò̌dò̌htǔlô̤ numî̌ amè̤̌hǒ Cǒmara a ta̤pô̤ta̤phǎ kû̌ a ta̤sî̌ta̤jò̌ hǒ. 25Ma̤titèhî̌dě, bǎ pa shôbǐǐlṳ̌ bǎ kòyò Khrǐ ata̤si awe̤akè akhanu, tokhlǒkhlǒdě a hî̌ lô̌khô kû̌ Cǒmara ma̤ta̤ nu, a ô̌lǒô̌khlo bò hǒ, a gènè̤sǔ lô̌khô pô̤̌nu. Cǒmara ma̤ta̤nu, a jò̌lǒkhlo pe kû̌ kòyòhǎkhû̌phû̌ dǒ a ta̤sî̌ta̤jò̌ dû̌gutṳ̌ tôpwa̤ pě. Cǒmara a ta̤khû̌shiǎjǎnu, a shû̌sho khlo pe kû̌ kòyòhǎkhû̌phû̌ dǒ a shû̌shogutṳ̌ tôpwa̤ pě.

26Pṳ̌wè̤̌ sî, gènè̤kè̌ tûû̌ mò̌ sînǎ̤ bǎ Cǒmara kaǎ sî nò̌khôtô̤̌ akhanu. Kè̌ hî̌ kû̌ kòyòhǎkhû̌phû̌ a ta̤kè̌shǐ hî̌dě, dǒ sîklanu, pwa̤ dǒ ta̤sî̌jò̌ tokhlǒ bǎbǎ, pwa̤ dǒ a ô̌ kû̌ a ta̤siwi̤sòwò̤ tokhlǒ bǎbǎ, kòyò dǒ akhlialè dû̌yò̤̌htò̌sa tokhlǒnu bǎbǎ, a ô̌ pa tîkî̌phû̌nô̤̌ pwǎ. 27Pô̤̌khô kòyò dǒ a gènè̤ ǐ lô̌khô anǎ̤ kû̌ kòyò sî̌jò̌ tokhlǒ gǔ sòwò̤̌kè ayanu, Cǒmara kaǎ takǎ bǎ kòyò dǒ kòyò gènè̤ asî kû̌ a ô̌lǒô̌khlo nutokhlǒ pwǎ. Pô̤̌khô kòyò dǒ a gènè̤ ǐ lô̌khô anǎ̤ kû̌ a ô̌ kû̌ ta̤siwi̤sòwò̤ nutokhlǒ gǔ sòwò̤̌kè ayanu, Cǒmara kaǎ takǎ bǎ kòyò dǒ kòyò gènè̤ asî kû̌ a ta̤siwi̤sòwò̤ ô̌ gû̌ kòyò tô̤̌ nutokhlǒ hǒ. 28Pô̤̌khô Cǒmara gǔ ma̤pî̌kè ta̤ dǒ kòyò hǎkhû̌phû̌ gènè̤dû̌ anǎ̤ tokhlǒ ayanudě, a kaǎ pwǎ kòyò dǒ kòyò bè̌dû̌ asî tô̤̌ nutokhlǒ pwǎ, kòyò gènè̤pî̌tî̌ asî nutokhlǒ kû̌ kòyò bè̌ asî kû̌ kòyò ô̌lǒô̌khlo nutokhlǒ pwǎ. 29Pô̤̌nudě, dǒ Cǒmara a lô̤mô̤̌, kòyò bè̌htò̌yô̤̌ jò kòyònǎ̤ tôpwǎ̤꤮ tô̤̌. 30Cǒmara ma̤htûhtò̌ hto sî kû̌ Yeshǔ Khrǐ tôcǒ꤮ nô̤̌ hǒ. A ma̤htû sî kû̌ Khrǐnu tôcǒ꤮ nô̤̌ hǒ, a htûhtò̌ pa ta̤sî̌ta̤jò̌ hǒ. Dǒ Khrǐ akhû̌akhîdě Cǒmara bè̌ pa pô̤̌ kòyòcǒkòyòtè̤ tokhlǒnu hǒ. Htokhôtô̤̌ pa htûhtò̌ Cǒmara a kòyò aplò̌shǐ dě Khrǐ plûhǎhtò̌ pili pa dǒ ta̤sǔ ajû̌ agûlǎ̤ hǒ. 31Ma̤pô̤̌nudě, pô̤̌ lî̤plò̌shǐkû hî̌ kû̌, “Kòyò dǒ a sǎyṳ phî̌htò̌yô̤̌ anǎ̤ tokhlǒnu, a tô bè̌htò̌yô̤̌ pwǎtǒ̤ Běcǎ ma̤htobò bǎ lû̌û nutokhlǒ pwǎ.” ^g