1 Corinthians 10

Ta̤dǐô̌sè̌rè̌ ta̤caba ta̤yô̤ta̤gî̌ tokhlǒ awe̤akè

1He khô sî꤮! He sǎyṳ nosî̌ganǎ̤ sî kû̌ paphipaphu dǒ Khûmṳ̂shě sûge lû̌û dǒ awǐkha tokhlǒ awe̤akè. Poǒlṳ̌ dǒ a dǔlè̌lṳ̌ kû̌ Cǒmara hèlò̤ ô̌plǒ kû̌ asî tôbǎnu, a yô̤ǔge bǎ asîkhû̌. ^a Htodě asî cû̌ge tûlû̌bò̌ wô̌wô̌bǎbǎ bò kû̌ shidû̌shite̤we̤ alî̤nu. ^b 2Lǒ̤bò asî hǒtokhlǒnu a sô̌sô̌ kû̌ asî jubò lô̌khô shi dǒ poǒlṳ̌ nutôbǎ akû kû̌ dǒ shidû̌te̤we̤ akûnu hǒ, dě asî htû bò Khûmṳ̂shě akhôphijǎ dǒ a gû̌ lû̌kò tokhlǒ hǒ. 3Asî ǎwô̤̌wô̤̌ bò lû̌û mû̌ dǒ Cǒmara ǐlò̤ asînu pṳ̂̌꤮ tôpwa̤ hǒ. ^c 4Htodě asî ôwô̤̌wô̤̌ bò lû̌û shi dǒ Cǒmara ǐ asî nuhǒ. Shi dǒ asî ô numî̌ a ô̌ dǒ lǒ̤kû hǎhtò̌. Lǒ̤ hǒnumî̌ Yeshǔ Khrǐ hǒ. Asî cû̌ bǎtè tôkû꤮ bǎbǎnu, Yeshǔ cû̌ kû̌ asî. ^d 5Cǒmara ma̤jè̌wô̌bǎ asî pwǐnu bǎbǎkǎlè dǒ asîkla tokhlǒkhlǒnu a ma̤ tô Cǒmara asǎphlǒ tô̤̌nu a ô̌ dû̌wî̤. Pô̤̌nudě asî sikè bò dǒ lǒ̤mî̌shô̌kla. ^e

6Paphipaphu nutokhlǒ gû̌ma̤ a ta̤sǎyṳ phû̌mò̤̌ tokhlǒ akhû̌akhî, a htûhtò̌ pô̤̌nu hǒ. Pô̤̌khô pa gǔ kè̌lû̌ gû̌ma̤ pô̤̌ asî ma̤ tô̤̌nu, a htûhtò̌ ta̤sû̌ǐ tôcǒ dǒ paya hǒ. ^f 7Pa bǎ caba ta̤yô̤ta̤gî̌ pô̤̌ asînu tô̤̌. Ma̤titèhî̌dě lî̤plò̌shǐkû hî̌ kû̌, “Asî hǎnòò̌ ǎmuômu lô̌khô dě kǎlǐkapò̤ bò lô̌khô.” ^g 8Pa bǎ cû̌sǔnṳ̌plěnṳ̌ pwa̤mǒ̤pwa̤khû pô̤̌ dǒ asî akla tokhlǒkhlǒ cû̌ sǔnṳ̌ nutô̤̌. Dǒ asî cû̌sǔnṳ̌plěnṳ̌ pwa̤mǒ̤pwa̤khû akhû̌akhî, tôni̤ akû pwǎnu, asî sikè kòyò ginǐ̤sò̌ kû̌ surǐ. ^h 9Běcǎ mî̌ acǒ kû̌ a ta̤olò̤ ya, mî̌ acǒ tô̤̌ ya numî̌ pa bǎ hî̌kè̌ma̤kè̌ Běcǎ pô̤̌ asî tokhlǒ hî̌kè̌ma̤kè̌ nutô̤̌. Paphipaphu tokhlǒnu a ma̤kè̌ lô̌khô pô̤̌nu akhû̌akhî, wṳ̂̌ tokhlǒ pè̌ si dû̌wî̤kè asî. ⁱ 10Pa bǎ tûmṳ̂̌ta̤ma̤ǐ pô̤̌ asî tokhlǒkhlǒ tûmṳ̂̌ta̤ma̤ nutô̤̌. Paphipaphu dǒ awǐkha tokhlǒ tûmṳ̂̌ta̤ma̤ lô̌khô akhû̌akhî, mǒkhû̌ tanaphû̌ ma̤sikè asî. ^j

11Ta̤nutokhlǒ cû̌ htûhtò̌ bò tǒ̤ pô̤̌nu ma̤titèhî̌dě pô̤̌khô kòyò dǒ ashǔshawa̤ tokhlǒ gǔ kè̌lû̌mò̌mṳ ma̤ pô̤̌nu tô̤̌nu, a dǔlè̌lṳ̌ bǎ kòyò pwǎ. Pô̤̌khô kòyò gǔ dǐsè̌rè̌ nǎ bǎ pa dǒ a ô̌htûpwa̤ dǒ nô̌kòlǒ nutôhtu tokhlǒ ayanudě, kòyò wě̤mǎnǎkè bǎ dǒ lî̤plò̌shǐkû nupwǎ. 12Pô̤̌nudě na kè̌ gènè̤ tûû̌ nanǎ̤ kû̌ he ta̤yṳ̌ta̤nǎ̤ shû̌sho hǒ kè̌hî̌dě, ô̌sè̌rè̌ tûû̌ nanǎ̤ nî̌, hî̌pě na ma̤ta̤sǔ hè̌. 13Lǒ̤bò ta̤tili̤tôlô̌ dǒ na kè̌shǐ tṳ̌bǎ tokhlǒ numî̌ a sô̌sô̌ pwǎ kû̌ kòyò hǎkhû̌phû̌ dǒ ashǔshawa̤ tokhlǒ kè̌shǐ tṳ̌bǎ nutokhlǒ pwǎ. Bǎbǎkǎlè Cǒmaranu acǒ kû̌ ayô̤̌, ma̤titèhî̌dě ta̤tili̤tôlô̌ dǒ ashû̌asho dǒ na khòbò̌ yǎ tô̤̌ tokhlǒnu, a nokhòbǎ na tô̤̌. Bǎ ta̤ma̤kè̌kè̌ lò̤bǎ na akhanu, pô̤̌khô na gǔ khòsǎphlǒhtûbò̌ yǎ, htokhôtô̤̌ pô̤̌khô na gǔ hǎplǎbò̌ kû̌ ta̤tili̤tôlô̌ ayanu, Cǒmara bǔmô bǎnǎ na klè̌ pě.

14He sû̌khô sî, caba tǎ̤ lô̌khô ta̤yô̤ta̤gî̌ tîkî̌꤮ tǎ̤mǎ̤ nî̌꤮. 15Sî mî̌ kòyò dǒ asî̌ajò̌ tokhlǒ. Pô̤̌nudě he hî̌ bǎ sî khònò̤̌ numî̌ asǔ ya mî̌ atô yanu gènè̤ tě̤tě̤mè̤̌mè̤̌ tûû̌ lô̌khô nî̌꤮. 16Bǎ pa ǎô wô̤̌wô̤̌ lû̌ Běcǎ ta̤ǎô aplò̌shǐ lṳmṳ̌hǎ akha dě pa kwihtò̌ Cǒmara kû̌ a gǔ ǐshowî̤ sîpî̌shi ashiba akhanu, a dǔlè̌lṳ̌ kû̌ dǒ Khrǐ asǐ akhû̌akhî, pa htûhtò̌kè yǎ kû̌ a tôcǒnô̌ mè̤̌tô̤̌ ya? Pô̤̌nudě bǎ pa běphwǐǎ mû̌ dě pa ǎ yǎ akhanu, a dǔlè̌lṳ̌ kû̌ pa htûhtò̌kè yǎ kû̌ Khrǐ anǎ̤glǒ tôcǒnô̤̌ hǒ, mè̤̌tô̤̌ ya? ^k 17Pa ǎcuôcu wô̤̌wô̤̌bò lû̌û mû̌ tôglǒnô̤̌. Pô̤̌nudě pa ô̌wô̤̌ô̌jûgrû bǎbǎkǎlè pa mî̌ nǎ̤glǒ tôpwa̤ nô̤̌ pwǎ.

18Gènè̤kè̌mò̌ lô̌khô Yǔdaphû̌ dǒ a ǎ lô̌khô ta̤yî̌ dǒ kòyò lṳhtò̌ kû̌ Cǒmara tokhlǒnu. Dǒ asî ǎ ta̤lṳhtò̌tòhtò̌ tokhlǒ akhû̌akhî, asî cabahtò̌bò Cǒmara nuhǒ. ^l 19He sǎyṳ hî̌ kû̌ ta̤yô̤ta̤gî̌ dǒ kòyò caba ǐyǎ numî̌ a ô̌ kû̌ a ta̤siwi̤sòwò̤ pô̤̌nu ya? Mè̤̌tô̤̌mî̌ he sǎyṳ hî̌ kû̌ ta̤ǎta̤ô dǒ kòyò lṳhtò̌ kû̌ ta̤yô̤ta̤gî̌ numî̌ a lṳ̂dû̌khlo, he sǎyṳ hî̌ pô̤̌nu ya? 20He sǎyṳ hî̌bǎ pô̤̌nu tîkî̌꤮ tô̤̌. He sǎyṳ hî̌ kû̌ ta̤ dǒ kòyò lṳhtò̌ kû̌ ta̤yô̤ta̤gî̌ tokhlǒ numî̌ a lṳhtò̌ lô̌khô pwǎ khînǎkhîno pwǎ, a lṳhtò̌ lô̌khô Cǒmara mè̤̌tô̤̌. Pô̤̌nudě he sǎyṳ no bǒsû̌khǎkhô sî kû̌ khînǎkhîno tô̤̌. ^m 21Běcǎ ta̤ǎôplò̌shǐ lṳmṳ̌hǎ dě sî cû̌ nṳ̌ǎnṳ̌ô kû̌ kòyò, kòyò dǒ a caba ta̤yô̤ta̤gî̌ tokhlǒ bô̌ǐ tûû̌ ashǎǎshǎô kû̌ khînǎkhîno tokhlǒnu dě sî cû̌nṳ̌ ǎpadô̌ kû̌ kòyò, sî cû̌ ma̤pô̤̌nu mî̌, anǐ̤ tô̤̌. Ma̤titèhî̌dě, na kè̌ cû̌ nṳ̌ǎnṳ̌ô gû̌ pô̤̌nu mî̌ asô̌sô̌kû̌ na bǒsû̌ kû̌ khînǎkhîno hǒ. 22Pa sǎyṳ no sǎphlǒdû̌ Cǒmara kû̌ panǎ̤ ya? Mî̌ pa khû̌ǎshû̌sho khlo Cǒmara ya? ⁿ

23Dǒ sîkla tokhlǒkhlǒnu a hî̌ lô̌khô kû̌, “Pa ma̤ titètè̌꤮ mî̌ anǐ̤ pwǎ,” pô̤̌nu. A hî̌ pô̤̌numî̌ amè̤̌kǎ bǎbǎkǎlè titètè̌ mî̌ a htûbwǐhtûsîrî bò bǎtô̤̌. “Pa ma̤ titètè̌ mî̌ anǐ̤ pwǎ,” Bǎbǎkǎlè titètè̌ bǎbǎ nu, a ǐshoǐshò̌htò̌ jò kòyò ta̤yṳ̌ta̤nǎ̤ tô̤̌. ^o 24Ta̤ dǒ a nǐ̤bwǐsîrî pwǎtǒ̤ sî tôpwa̤ ayanu, sî tô kè̌lǎ ma̤ tôpwǎ̤꤮ tô̤̌. Mè̤mè̤̌tôkhônu, sî tô kè̌lǎ ma̤ta̤ dǒ a nǐ̤bwǐsîrî dǒ kòyò ayanu tokhlǒ.

25Dǒ klǎkûnu, kòyò shaǎ ta̤yî̌ titètè̌ bǎbǎ, sî ǎ anǐ̤ bò pwǎ. Pô̤̌khô sî gǔ sǎphlǒmô̤ ayanu, ta̤yî̌ numî̌ kòyò lṳhtò̌ hto kû̌ ta̤yô̤ta̤gî̌ ya, mî̌ mè̤̌tô̤̌ ya gwè̌ tǎ̤ kòyò tǎ̤mǎ̤. 26He hî̌ pô̤̌o ma̤titèhî̌dě, “Hǎkhû̌ kû̌ ta̤ dǒ a ô̌ dǒ hǎkhû̌ alô̤nu pṳ̂̌꤮ tôcǒ numî̌ Cǒmara ata̤ lǒ̤bò pwǎ,” Lî̤plò̌shǐkû hî̌ pô̤̌nu. ^p

27Khrǐphû̌ mè̤̌tô̤̌ tôpwa̤ kè̌ kaǎ ǎ na dî dě na kè̌ bè̌lò̤ na sǎphlǒ kû̌ na gǔ cû̌ ǎ nu, kòyò tîwî̌tòwò bè̌lò̤ bǎ na titètè̌ bǎbǎ nu, tûlû̌ ǎ yǎ. Pô̤̌khô na sǎphlǒmô̤ ayanu, ta̤yî̌ numî̌ kòyò lṳhtò̌hto kû̌ ta̤yô̤ta̤gî̌ ya mî̌ kòyò lṳhtò̌ khôtô̤̌ yanu, gwè̌ pe tǎ̤ kòyò mǎ̤, tûlû̌ ǎ. 28Bǎbǎkǎlè kòyò tôpwa̤pwa̤ kè̌ hî̌ sî kû̌, “Ta̤yî̌nu kòyò bè̌htò̌ hto kû̌ ta̤yô̤ta̤gî̌ nî̌꤮,” A kè̌ hî̌ sî dě, pô̤̌khô sî gǔ ma̤jî̌ tǎ̤ kòyò dǒ a hî̌ sî nutôpwa̤ asǎphlǒ tǎ̤mǎ̤ nu, gènè̤ bǎ aya dě ǎ tǎ̤mǎ̤. 29Sî sî̌ganǎ̤ kû̌ sî ǎ ta̤yî̌ mî̌ anǐ̤ pwǎ akhû̌akhî, sî sǎphlǒmô̤ pwǎ. Bǎbǎkǎlè he bǎyû bǎ kòyò ashǔshawa̤ tokhlǒ aya. Hî̌kûmṳ̂̌mò̤̌, dǒ sîkla tôpwa̤pwa̤ gǔ gwè̌ kû̌, “He kè̌ ma̤ titètè̌꤮ mî̌ anǐ̤ pwǎ, ma̤titèdě he bǎcû̌ gû̌ma̤ tǒ̤ kû̌ kòyò dǒ a gènè̤mô̤ tô̤̌ nutôpwa̤ aya hî̌tè?” A gǔ hî̌ pô̤̌nu. 30Mè̤̌tô̤̌mî̌, bǎ sîkla dǒ ashǔshawa̤ tôpwa̤pwa̤ dě a gǔ gwè̌pô̤̌ kû̌, “Shǎǎshǎô dǒ he glè̌ ǎnu, he kè̌ hî̌bwǐhî̌sîrîhtò̌ Cǒmara dě he kè̌ ǎ hî̌nu, ta̤ǎta̤ô pô̤̌nu tokhlǒmî̌ ta̤sǔ ô̌ pwǎ kòyò tokhlǒkhlǒ cû̌ hî̌ tǒ̤ pô̤̌nu ma̤titè?”

31Pô̤̌nudě, he gǔ shôbǐǐphlô bǎ asî kû̌, sî ma̤ titètè̌꤮ bǎbǎ, sîǎsîô titètè̌꤮ bǎbǎ, ma̤ dǒ kòyò gǔ htû̌sò̌htò̌ lô̌khô Cǒmara ayanu. 32Dǒ Yǔdaphû̌ tokhlǒ aya bǎbǎ, Yǔdaphû̌ mè̤̌tô̤̌ tokhlǒ aya bǎbǎ, Cǒmara a ta̤dòkûphû̌ tokhlǒ bǎbǎ, sî ma̤ ta̤ titètè̌꤮ nu nohtûhtò̌ tǎ̤ ta̤lò̤khǔpo̤ dǒ asî aya tǎ̤mǎ̤. 33Gû̌ma̤ lô̌khô pô̤̌ he ma̤nu. Pô̤̌khô kòyò gǔ nǐ̤bǎ ta̤ma̤hǎplǎge ayanu, he ma̤ titètè̌ bǎbǎ, he jî̌pwǐ̤ ma̤tô bǎ kòyò sǎphlǒ a ta̤sǎyṳ tokhlǒ. He gènè̤ ma̤ pwǎ ta̤ dǒ he sǎyṳ ma̤ nutokhlǒ kû̌ ta̤ dǒ awô̌ dǒ he tôpwa̤ aya nô̤̌ nutokhlǒ mè̤̌tô̤̌. He kè̌lǎ ma̤ ta̤ dǒ awô̌ dǒ kòyò pṳ̂̌꤮ tôpwa̤ aya nutokhlǒ pwǎ.