1 Corinthians 11

1Pô̤̌nudě, kè̌lû̌mò̤̌mṳ lô̌khô he pô̤̌ he kè̌lû̌mò̤̌mṳ Khrǐnu. ^a

Bǎ caba akha sè̌rè̌ lô̌khô sî sǎphlǒsǐshi ata̤bè̌lò̤ tokhlǒ

2Sî gènè̤htò̌sô̌ he pṳ̂̌꤮ plǎ, htokhôtô̤̌ sî gû̌ma̤ pô̤̌ kòyò ta̤sû̌ǐ he dě he sû̌ǐ tutṳ̌ bǎ sî nutokhlǒ akhû̌akhî he htû̌sò̌ jî̌jî̌ sî.

3Bǎbǎkǎlè he sǎyṳ no sî̌yaphlô wô̌ pô̤̌ sî kû̌ Khrǐ mî̌ pwa̤khû tokhlǒ a ikǒ. Dě wṳ̂ mî̌ a htû ma a ikǒ, dě Cǒmara mî̌ a htû Khrǐ a ikǒ. 4Pô̤̌nu akhû̌akhî, kè̌ pwa̤khû tôpwa̤pwa̤ sǎyṳ kwicaba dǒ ta̤cabahǐkû bǎbǎ mè̤̌tô̤̌dě a kè̌ sǎyṳ shôbǐǐlṳ̌ bǎ kòyò kû̌ ayô̤̌ dǒ Cǒmara nohî̌lṳ̌ lû̌û nutokhlǒ dǒ ta̤cabahǐkû nu bǎbǎ, a kè̌ bôbǐ a ikǒ hî̌nu, a sô̌sô̌ kû̌ a bè̌dubè̌nǎ̤ Khrǐ tô̤̌ nuhǒ. 5Pwa̤mǒ̤ tokhlǒ ayadě, a kè̌ kwicaba dǒ ta̤cabahǐkû bǎbǎ mè̤̌tô̤̌dě a kè̌ shôbǐǐlṳ̌ bǎ kòyò kû̌ ayô̤̌ dǒ Cǒmara nohî̌lṳ̌ lû̌û nutokhlǒ dǒ ta̤cabahǐkû bǎbǎ, a kè̌ bôbǐ bǎ a ikǒ tô̤̌ hî̌nu, a sô̌sô̌ kû̌ a bè̌dubè̌nǎ̤ awṳ̂ tô̤̌ hǒ. Htokhôtô̤̌ a sô̌sô̌ kû̌ pwa̤mǒ̤ dǒ a dǐtuplǔ akhǔlṳ tôpwa̤ dě a htûhtò̌ ta̤sòwò̤̌nu hǒ. 6Pwa̤mǒ̤ dǒ a sǎyṳ kôbǐ ikǒ tô̤̌ tôpwa̤pwa̤nu, a tô dǐtuplǔkè akhǔlṳ mî̌ awô̌khlo. Bǎbǎkǎlè dǐtuplǔkè yǎ dě sòwò̤̌ pwǎ a kè̌hî̌dě, kô̌bǐkè a ikǒ mî̌ awô̌khlo. 7Bǎbǎkǎlè pwa̤khû ayadě bǎ a cubucaba kû̌ kòyò akhanu, a tô kôbǐ ikǒ tô̤̌. Ma̤titèhî̌dě Cǒmara bô̌lò̤ pwa̤khûnu sô̌sô̌kû̌ anǎ̤ akhû̌akhî, pwa̤khû mî̌ Cǒmara a ta̤bwǐdû̌sîrîhtû, bǎbǎkǎlè pwa̤mǒ̤ mî̌ pwa̤khû a ta̤bwǐdû̌sîrîhtû. ^b 8Ma̤titèhî̌dě bǎ Cǒmara bô̌lò̤ pwa̤khû akhanu, a phî̌ pwa̤mǒ̤ ayô̤agî̌ dě a bô̌lò̤ lû̌û mè̤̌tô̤̌. Bǎbǎkǎlè bǎ a bô̌lò̤ pwa̤mǒ̤ akhanu, a phî̌ pwa̤khû awě̤lǎ̤ ayô̤agî̌ dě a bô̌lò̤ lû̌û. ^c 9Pô̤̌nudě dǒ pwa̤mǒ̤ akhû̌akhî, dě Cǒmara bô̌lò̤ pwa̤khû mè̤̌tô̤̌. Bǎbǎkǎlè pô̤̌khô pwa̤khû gǔ nǐ̤sû̌nǐ̤khô ayanudě, a bô̌lò̤ pwa̤mǒ̤ pwǎ. 10Pô̤̌khô mǒkhû̌ tanaphû̌ tokhlǒ gǔ sî̌ganǎ̤ kû̌ pwa̤mǒ̤ tokhlǒ ô̌ lô̌khô kû̌ a ta̤siwi̤sòwò̤ ayanu, a tô bôbǐ bǎ lô̌khô a ikǒ. Asî bôbǐ a ikǒ numî̌ a dǔlè̌lṳ̌ ta̤ma̤mǎnǎ tôcǒ dǒ a kwicaba bǎbǎ, a shôbǐǐlṳ̌ Cǒmara alě̤ayô̤̌ bǎbǎ, a ô̌ kû̌ a ta̤siwi̤sòwò̤ pô̤̌nu.

11Ma̤hî̌tètè̌꤮ bǎbǎ, lǒ̤bò kòyò dǒ a htûhtò̌kè kû̌ Běcǎ tôcǒnô̤̌ tokhlǒnu, pwa̤khû bǎbǎ, pwa̤mǒ̤ bǎbǎ, a lǎ̤lṳ̂bǎ lû̌û tôpwa̤ kû̌ tôpwa̤. 12Pa lǎ̤lṳ̂ lû̌û tôpwa̤ kû̌ tôpwa̤ numî̌ a mè̤̌mî̌ca. Ma̤titèhî̌dě Cǒmara phî̌ pwa̤khû awě̤lǎ̤ ayô̤agî̌ dě a bô̌lò̤ kû̌ pwa̤mǒ̤. Bǎbǎkǎlè pwa̤khû pṳ̂̌꤮ tôpwa̤ nu, a ô̌phijǎlò̤ pwǎ dǒ pwa̤mǒ̤ ahǐphukû pwǎ. Pwa̤ dǒ a nohtûhtò̌ lǒ̤꤮bò ta̤pṳ̂̌꤮ tocǒ tôpwa̤ numî̌ Cǒmara pwǎ. 13Sî gènè̤kè̌kè̌mò̌, pwa̤mǒ̤ tôpwa̤ hè caba dǒ ta̤cabahǐkû dě a kè̌ bô̌bǐ bǎ a ikǒ tô̤̌ hî̌nu, awô̌tô̤̌ numî̌ sî sî̌ganǎ̤ tûû̌ hǒ. 14Kòyò lǎ̤klô hî̌ kû̌, pwa̤khû dǒ a bè̌htû akhǔlṳ nu, a htû ta̤sòwò̤̌ dǒ lû̌ya, 15Bǎbǎkǎlè pwa̤mǒ̤ dǒ a bè̌htû akhǔlṳ nu, awî̤awô̌ dǒ lû̌ya, kòyò hî̌ pô̤̌nu yahě? 16Bǎbǎkǎlè, he hî̌ pô̤̌o dě dǒ sîkla nu, kòyò dǒ asǎphlǒ tô tô̤̌ nu a ô̌ tokhlǒ. Ta̤ dǒ he sǎyṳ hî̌ asî numî̌ pô̤̌hî̌tèhî̌dě, pa pwa̤nophû̌ tokhlǒ sû̌ǐkhô̌ bǎ kòyò kû̌ lǎ̤bû̌lǎ̤klô ashǔshawa̤nu a ô̌ tôcǒ꤮ tô̤̌. Htokhôtô̤̌ ta̤dòkûphû̌ dǒ a ô̌ dǒ wî̤̌ bǎtè tôwî̤̌ akû tokhlǒnu bǎbǎ, bǎ asî caba akha, a ma̤sô̌sô̌bò pô̤̌nu pwǎ.

Bǎ Kôrituphû̌ tokhlǒ ǎ ô lô̌khô Běcǎ ta̤ǎô aplò̌shǐ lṳmṳ̌hǎ akha, a ma̤sǔ lô̌khô ta̤

17Htodě he sǎyṳ sû̌ǐ bǎ pô̤̌ sî nu a ô̌ pe tokhlǒ. He glè̌ sû̌ǐ bǎ pô̤̌ sînu, he gǔ htû̌sò̌ sî ma̤ta̤ tokhlǒnu a ô̌ tôcǒ tô̤̌, ma̤titèhî̌dě bǎ sî cubucaba wô̤̌wô̤̌ lû̌ akhanu, sî tôma̤ ta̤ dǒ awô̌khlo tokhlǒ bǎbǎkǎlè sî ma̤bòta̤ dǒ a phû̌mò̤̌ tokhlǒkhlǒ. 18Awǐlǒ tôcǒ mî̌ sî hè cubucaba culû̌û bǎkhò̌tè̌꤮ bǎbǎ nu, sî sǎphlǒ lûkhô̌sô̌, kòyò hî̌ bǎ he pô̤̌nu. Pô̤̌ kòyò hî̌ bǎ he nî̌ he yṳ̌ǎ kû̌ tokhlǒkhlǒ mî̌ atô pwǎ. 19Pô̤̌khô kòyò gǔ kè̌shǐ sî̌ganǎ̤ kû̌ kòyò tokhlǒ mî̌ a yṳ̌ǎ mè̤̌ ya, mè̤̌tô̤̌ yanu, ta̤sǎphlǒ lûkhô̌lû̌ nî̌ a bǎ ô̌htò̌ nò pwǎ. 20Bǎ sî hè ǎ ô wô̤̌wô̤̌ lû̌û Běcǎ ta̤ǎô aplò̌shǐ lṳmṳ̌hǎ akhanu, sî ǎ ô sô̌sô̌pe kû̌ kòyò ǎ ô Běcǎ ta̤ǎô aplò̌shǐ lṳmṳ̌hǎ nutô̤̌. 21Ma̤titèhî̌dě, sî hè ǎ ô Běcǎ ta̤ǎta̤ô aplò̌shǐ lṳmṳ̌hǎ bǎkhò̌tè bǎbǎnu, sî hè ǎkǒôbe wǐbò shǎǎshǎô tokhlǒ, sî bè̌kè bǎ kòyò tô̤̌. Kòyò ô̌tiwǐ̤nu a ô̌ tokhlǒ. Kòyò dǒ a ǎmṳômṳ tûlû̌nu a ô̌ tokhlǒ. 22Sî ǎ lô̌khô dǒ sîhǐ tô̤̌mî̌ sîhǐ ô̌ bǎtô̤̌ ya? Mî̌ sî sǎyṳ ma̤pǐ̤mi̤shidô̌ takǎ lǒ̤bò ta̤dòkûphû̌ nutokhlǒ ami̤ ya? Mî̌ sî sǎyṳ ma̤ sòwò̤̌kè kòyò shèphǔshèwè̤ nutokhlǒ ya? He glè̌ hî̌ pe sî hî̌tè? He tôbǎ htû̌sò̌ǐ sî ya? Lǎ̤htû̌sò̌ǐ sînu a ô̌ tôcǒ꤮ tô̤̌.

23Ma̤titèhî̌dě, ta̤ dǒ sî ma̤ tokhlǒnu, asô̌sô̌ kû̌ Běcǎ Yeshǔ ta̤sû̌ǐ bǎ he nutokhlǒ tô̤̌. Ta̤ dǒ a sû̌ǐ bǎ he tokhlǒnumî̌, he sû̌ǐ bǎ htobò sî hǒ. He sû̌ǐ bǎ sî kû̌, bǎ kòyò shaǎlò̤kè Běcǎ Yeshǔ nutôhǎ akhanu, a phî̌htò̌ mû̌, 24Dě a hî̌bwǐhî̌sîrîhtò̌ Cǒmara, htodě a běphwǐkè mû̌ dě a hî̌ kû̌, “Hǒo mî̌ he nǎ̤glǒ dǒ a ǐlò̤kè dǒ sîya. Pô̤̌khô sî gǔ gènè̤htò̌bǎsô̌ he pṳ̂̌꤮ taplǎ nudě, ma̤ lô̌khô pô̤̌o pṳ̂̌꤮ taplǎ nî̌꤮.” 25Asî ǎhto mû̌ dě, a phî̌htò̌ sîpî̌shishǐbè dě a ma̤sô̌sô̌ pô̤̌khô a ma̤wǐnu, dě a hî̌ kû̌, “Sîpî̌shi numî̌ Cǒmara ta̤olò̤ asa a ta̤ma̤mǎnǎ tôcǒ. ^d Cǒmara ma̤měma̤gle tě̤tě̤mè̤̌mè̤̌ htokè ta̤olò̤nu kû̌ hesǐ dǒ a sǐlò̤ dǒ sîya nuhǒ. Sî ô sîpî̌shinu bǎkhò̌tè̌꤮ bǎbǎnu, pô̤̌khô sî gǔ gènè̤htò̌bǎsô̌ he pṳ̂̌꤮ taplǎ nudě, ma̤ lô̌khô pô̤̌onu nî̌.” ^e 26Sî ǎ mû̌ dě sî ô sîpî̌shi dǒ balěkûnu bǎkhò̌tè̌꤮ bǎbǎnu, sî shôbǐǐlṳ̌htò̌ Běcǎ ata̤si awe̤akè tǒ̤dǒ a hè sô̌ pě tôplǎnu hǒ.

27Pô̤̌nudě, mòpèpè̌꤮ bǎbǎ dǒ a ǎ mû̌nu dě a ô Běcǎ ashiba dǒ ta̤bè̌dubè̌nǎ̤ lû̌û akû tô̤̌ tokhlǒnu, a ma̤sǔ Běcǎ anǎ̤glǒ kû̌ asǐ nuhǒ. 28Pô̤̌nudě na tô gwè̌lò̤ kè̌bǎ tûû̌ nanǎ̤, dě na tô ǎnô̌ mû̌, ônô̌ sîpî̌shi dǒ shibakûnu. 29Bǎ sî ǎ mû̌, sî ô sîpî̌shi akhanu, sî bǎ gènè̤ tě̤tě̤mè̤̌mè̤̌ Khrǐ anǎ̤glǒ yô̤̌mûyô̤̌sǎnu. Sî kè̌ gènè̤ tě̤tě̤mè̤̌mè̤̌ tô̤̌ hî̌nu, Cǒmara gǔ plè sî pě. 30Dǒ sî gènè̤ tě̤tě̤mè̤̌mè̤̌ lô̌khô pô̤̌nu tô̤̌ akhû̌akhî, dǒ sîklanu, kòyòshǐkòyòsha tokhlǒ mî̌ a ô̌ dû̌wî̤wî̤, kòyò khû̌shiǎjǎ tokhlǒ mî̌ a ô̌plṳ̂ô̌phǎphǎ, kòyòsi mî̌ a ô̌ tokhlǒkhlǒ. 31Sî kè̌ gwè̌lò̤ kè̌bǎwǐ tûû̌ sînǎ̤ numî̌, Cǒmara plèbǎ sî tô̤̌. 32Dǒ Cǒmara cî̌htò̌ kòyò dǒ a yṳ̌ǎ lû̌û tô̤̌ nutokhlǒ akhapěnu, pô̤̌khô a gǔ cî̌htò̌ pe pa kû̌ asî tô̤̌nu, a sû̌ǐ pa, a plèǐ pa pô̤̌o nupwǎ.

33Pô̤̌nudě, he khô sî bǎ sî hè̌ô̌plǒ lû̌û dǒ sî gǔ ǎwô̤̌wô̤̌ ôwô̤̌wô̤̌ Běcǎ ta̤ǎô aplò̌shǐ lṳmṳ̌hǎ akhanu, ô̌yṳ̂̌ô̌pǒ̤ gûmṳ̂̌ lû̌û tôpwa̤ kû̌ tôpwa̤ dě ǎwô̤̌wô̤̌ ôwô̤̌wô̤̌. 34Bǎbǎkǎlè bǎ sî ǎ ô Běcǎ ta̤ǎô aplò̌shǐ lṳmṳ̌hǎ akha, dǒ sîklanu, kòyò tôpwa̤pwa̤ kè̌ sǎǎsǎô hǒ kè̌hî̌dě pô̤̌khô Cǒmara gǔ plè sî tô̤̌nu, sî tô ǎ ô hè wǐ lô̌khô dǒ sîhǐ.

Ta̤ dǒ he lǎ̤lṳ̂ hî̌ sû̌ǐtòwòǐ sînu a ô̌ pe tokhlǒ, bǎbǎkǎlè he gǔ hî̌ bǎ sî dǒ he hètǒ̤ dǒ sî ô̌ pě.