1 Corinthians 12

Nǐ̤bǎkwe Yôla Plò̌shǐ Běcǎ asû tokhlǒ

1Pṳ̌wè̤̌ sî, khònò̤̌, he sǎyṳ shôbǐǐphlô bǎ sî kû̌ nǐ̤bǎkwe asû dǒ Yôla Plò̌shǐ Běcǎ ǐ sî tôpwa̤ kû̌ tôpwa̤ nutokhlǒ awe̤akè. 2Bǎ sî yṳ̌nǐ̤nǎ̤nǐ̤ Běcǎ Yeshǔ nò̌khôtô̤̌ akhanu, sî gû̌sǔbò ta̤yô̤ta̤gî̌ dǒ a hî̌bǎjòtô̤̌ nutokhlǒ akò, dě a sû cû̌sǔ bòkè sî klè̌. 3He sǎyṳ nosî̌yaphlô gû̌ sî kû̌ kòyò dǒ a ǐsho phû̌mò̤̌ Yeshǔ tôkhò̌ tô̤̌ nutokhlǒ mî̌, tǒ̤pwǎ kòyò dǒ Cǒmara a Yôla Plò̌shǐ nè̌klè̌nè̌klò lû̌û nutokhlǒ pwǎ. Yôla Plò̌shǐ Běcǎ kè̌ nè̌klè̌nè̌klò kòyò tôpwa̤pwa̤ tô̤̌ hî̌nu, a olò̤bò̌ lô̌khô kû̌ Yeshǔ mî̌ Běcǎ tôpwa̤, pô̤̌nu tôpwa̤꤮ tô̤̌.

4Nǐ̤bǎkwe sû dǒ Yôla Plò̌shǐ Běcǎ ǐ tokhlǒ nî̌, a sô̌sô̌ bǎ lû̌û tôcǒ꤮ tô̤̌, a ô̌ acǒcǒ bǎbǎkǎlè a kòshî̌gutṳ̌ hè mî̌ tôkûnô̤̌ pwǎ. A kòshî̌gutṳ̌ mî̌ a hè dǒ Yôla Plò̌shǐ Běcǎ a ô̌ hǒ. ^a 5Ta̤ma̤ dǒ pa gǔ ma̤ bǎ ta̤dòkûphû̌ ashǔshawa̤ tokhlǒ ayanu a ô̌ dû̌ bǎbǎkǎlè ta̤ma̤ hǒtokhlǒnu a khô̌lû̌û. Bǎbǎkǎlè Běcǎ dǒ pa ma̤ bǎ a ta̤ma̤ hǒtôpwa̤ numî̌ tôpwa̤ nô̤̌ pwǎ. 6Ta̤sǐta̤jò̌ dǒ a ô̌ kû̌ pa dǒ pa gǔ ma̤ bǎ Cǒmara a ta̤phǐta̤ma̤ ayanu, a ô̌ dû̌ bǎbǎkǎlè ta̤sî̌ta̤jò̌ tokhlǒnu a khô̌lû̌û. Bǎbǎkǎlè kòyò dǒ a ǐlò̤ pa ta̤sî̌ta̤jò̌ tôpwa̤ kû̌ tôpwa̤ dǒ pa gǔ ma̤ Cǒmara ata̤ma̤ tokhlǒ aya numî̌, Cǒmara tôpwa̤ nô̤̌ pwǎ.

7Pô̤̌khô pa gǔ ma̤jè̌ bǎ kû̌ pa pṳ̌wè̤̌ Khrǐphû̌ ashǔshawa̤ tokhlǒ ayanu, Cǒmara dǔlè̌lṳ̌ kû̌ Yôla Plò̌shǐ Běcǎ ô̌ dǒ pa pṳ̂̌꤮ tôpwa̤ akû hǒ. 8Dǒ pakla tokhlǒkhlǒnu, Yôla Plò̌shǐ Běcǎ ǐlò̤ asî ta̤we̤ta̤kè dǒ ta̤sî̌ta̤jò̌ adû̌ayô̤̌ tokhlǒ, tokhlǒkhlǒnu a ǐlò̤ asî ta̤we̤ta̤kè dǒ a lǒbe kû̌ ta̤sî̌khû̌sî̌ya tokhlǒ. 9Tokhlǒkhlǒnu Yôla Plò̌shǐ Běcǎ ǐlò̤ yǎ ta̤yṳ̌nǐ̤nǎ̤nǐ̤shû̌, tokhlǒkhlǒnu a ǐlò̤ lû̌û ta̤pô̤ta̤phǎ dǒ a ma̤hǎmǎ bǎ kòyò ta̤shǐta̤sha tokhlǒ. 10Tokhlǒkhlǒnu Yôla Plò̌shǐ Běcǎ ǐlò̤ lû̌û ta̤pô̤ta̤phǎ dǒ a ma̤lṳ̌jò ta̤cô̌klǐcô̌sè tokhlǒ. Tokhlǒkhlǒnu Yôla Plò̌shǐ Běcǎ ǐ asî ta̤sî̌jò̌ dǒ a gǔ htûhtò̌ piwi̤pèshè tokhlǒ, tokhlǒkhlǒnu a ǐlò̤ lû̌û ta̤sî̌jò̌ dǒ a sî̌ganǎ̤jò ta̤ dǒ kòyò hî̌bǎ tokhlǒ dě kòyò hî̌bǎ ta̤ tokhlǒ numî̌ a ô̌ dǒ Yôla Plò̌shǐ Běcǎ a ô̌ hè mî̌ ya, mî̌ amè̤̌tô̤̌ ya pô̤̌nu. Tokhlǒkhlǒnu a ǐlò̤ lû̌û ta̤hî̌bǎjò yô̤̌sǎkhěkhô̌ tokhlǒ. Tokhlǒkhlǒnu a shôbǐǐphlô tèplè̌htò̌jò bǎ kòyò kû̌ yô̤̌sǎkhěkhô̌ dǒ kòyò sî̌yahtû tô̤̌ nutokhlǒ yô̤̌mûyô̤̌sǎ. 11Pwa̤ dǒ a ǐlò̤ bò sû tokhlǒ numî̌ Yôla Plò̌shǐ Běcǎ tôpwa̤ nô̤̌ pwǎ. Dě nǐ̤bǎkwe sû nu, a ǐ lò̤bò ta̤dòkûphû̌ pṳ̂̌tôpwa̤. A ǐlò̤ kòyò jû̌ tûû̌ pô̤̌ a sǎyṳ ǐlò̤ kòyònu pwǎ.

Nǎ̤glǒ ayô̤agî̌ ô̌dû̌wî̤ bǎbǎkǎlè nǎ̤ ô̌cu lû̌û tôpwa̤pwǎ̤꤮ nô̤̌ pwǎ

12Kòyòhǎkhû̌phû̌ anǎ̤glǒnu ayô̤agî̌ ô̌dû̌wî̤ bǎbǎkǎlè nǎ̤glǒ ô̌cupwǎ lû̌û tôpwa̤pwǎ̤꤮ nô̤̌ pwǎ. Ma̤pô̤̌nu pa dǒ a yṳ̌nǐ̤nǎ̤nǐ̤ Yeshǔ Khrǐ tokhlǒnu, a ô̌dû̌ ô̌wî̤ bǎbǎkǎlè pa htû wô̤̌wô̤̌pwǎ lû̌û nǎ̤ tôpwa̤pwǎ̤꤮ nô̤̌ pwǎ. ^b 13Pô̤̌nudě, dǒ pakla nu, tokhlǒkhlǒ mî̌ Yǔdaphû̌, tokhlǒkhlǒ mî̌ Yǔdaphû̌ mè̤̌tô̤̌, tokhlǒkhlǒ mî̌ jû̌, tokhlǒkhlǒ mî̌ kòyòpili̤phû̌. Bǎbǎkǎlè dǒ Yôla Plò̌shǐ Běcǎ nutôpwa̤ ô̌cupwǎ lû̌û akhû̌akhî, pa ju wô̤̌wô̤̌bò lû̌û shi dǒ Khrǐ anǎ̤glǒ tôpwa̤ nô̤̌ akû pwǎ. Pa nǐ̤bǎ sô̌sô̌bò lû̌û Yôla Plò̌shǐ Běcǎ tôpwa̤pwǎ̤꤮ nô̤̌ pwǎ.

14Ma̤titèhî̌dě, kòyò anǎ̤glǒ nu, ayô̤agî̌ ô̌ pwǎ tôcǒnô̤̌ mè̤̌tô̤̌. A ô̌ dû̌wî̤. 15Hî̌kûmṳ̂̌mò̌, khò̌lôpô̤̌ kè̌ hî̌ kû̌, “He mî̌ cǔde mè̤̌tô̤̌, pô̤̌nudě he mî̌ nǎ̤glǒ ayô̤agî̌ mè̤̌tô̤̌,” A kè̌ hî̌ pô̤̌nu bǎbǎkǎlè, a htûpe pwǎ nǎ̤glǒ ayô̤agî̌ pwǎ. 16Htodě kè̌ nò̌kulǎ hî̌ kû̌, “He mî̌ mǐ̤sǎphlǒ mè̤̌tô̤̌, pô̤̌nudě he mî̌ nǎ̤glǒ ayô̤agî̌ mè̤̌tô̤̌,” A kè̌ hî̌ pô̤̌nu bǎbǎkǎlè a htûpe pwǎ nǎ̤glǒ ayô̤agî̌ pwǎ. 17Pa nǎ̤glǒnu a kè̌ ô̌ còcè̌ pwǎ mǐ̤sǎphlǒ hî̌dě, pa gǔ cû̌ ganǎ̤dejò hî̌tè? Nǎ̤glǒnu a kè̌ ô̌ còcè̌ pwǎ nò̌kulǎ hî̌dě, pa glè̌ cû̌numò̤̌jò hî̌tè? 18Bǎbǎkǎlè nǎ̤glǒ ayô̤agî̌ tôcǒ kû̌ tôcǒ nu, Cǒmara bè̌lò̤ lû̌û agûlǎ̤ kû̌ agûlǎ̤ dě a bè̌lò̤ lû̌û jû̌ tûû̌ pô̤̌ atô lû̌û sǎphlǒ nu hǒ. 19Nǎ̤glǒ ayô̤agî̌ gûlǎ̤ pṳ̂̌꤮ tûkû nu, a kè̌ ô̌ còcè̌ pwǎ mǐ̤sǎphlǒ, tô̤̌mî̌ a kè̌ ô̌ còcè̌ pwǎ nò̌kulǎ kè̌hî̌dě nǎ̤glǒ ô̌ pe nô̌ tô̤̌. 20Pô̤̌nu akhû̌akhî, nǎ̤glǒ ayô̤agî̌ ô̌dû̌wî̤ bǎbǎkǎlè nǎ̤ ô̌ pwǎ tôpwa̤ nô̤̌ pwǎ.

21Pô̤̌nudě, “He lǎ̤lṳ̂ na tô̤̌,” Mǐ̤sǎphlǒ bǎ hî̌ cǔde tô̤̌. Pô̤̌nudě, “He lǎ̤lṳ̂ na tô̤̌,” Ikǒ bǎ hî̌ khò̌lô̤pô̤̌ tô̤̌. 22Kè̌hî̌tě̤tě̤ dě, nǎ̤glǒ ayô̤agî̌ dǒ a lṳ̂dû̌bǎ tô̤̌, kòyò gènè̤pî̌tî̌ yǎ tokhlǒnu, a lṳ̂dû̌shî̌ khlo sô̌ kû̌ akhô. 23Nǎ̤glǒ ayô̤agî̌ dǒ a lṳ̂dû̌bǎ tô̤̌ pa gènè̤ ǐ yǎ tokhlǒnu, pa bè̌dû̌ ǐ yǎ. Nǎ̤glǒ ayô̤agî̌ dǒ kòyò tô kè̌shǐ awî̤ tô̤̌ tokhlǒnu, pa bǎ ma̤bǐma̤hǔ wô̌bǎbò yǎ. 24Nǎ̤glǒ ayô̤agî̌ dǒ kòyò kè̌shǐ dě a lǎ̤hî̌ô̌tô̤̌ tokhlǒnu, pa lǎ̤lṳ̂ tîwî̌ kûbǐsô̌bǐwô̌ yǎ tô̤̌. Bǎbǎkǎlè, bǎ Cǒmara bô̌ pa nǎ̤glǒ akha, ta̤ dǒ pa gènè̤ kû̌ a lṳ̂dû̌bǎ tô̤̌ tokhlǒnu, a bè̌dû̌ wô̌bǎ lû̌û. 25Pô̤̌khô sî sǎphlǒ gǔ lûkhô̌ lû̌û tôpwa̤ kû̌ tôpwa̤ tô̤̌ nu, Cǒmara ma̤htûhtò̌ Khrǐ anǎ̤glǒ pô̤̌nu hǒ. Pô̤̌nudě, khònò̤̌, nǎ̤glǒ ayô̤agî̌ tôcǒ kû̌ tôcǒ bǎ ma̤wô̤̌wô̤̌lû̌ ta̤ dě bǎ ma̤jè̌ma̤kwe kè̌khî lû̌û tôpwa̤ kû̌ tôpwa̤. 26Ayô̤agî̌ tôcǒ kè̌ khòbǎ ta̤pò̤̌ta̤sha hî̌dě ayô̤agî̌ lǒ̤bò gǔ khòbǎ kû̌ lû̌û. Kòyò kè̌ htû̌sò̌htò̌ ayô̤agî̌ tôcǒ hî̌dě, ayô̤agî̌ lǒ̤bò gǔ sǎlě̤ wô̤̌wô̤̌bò lû̌û.

27Khònò̤̌, sî lǒ̤bò tokhlǒ numî̌, sî htû wô̤̌wô̤̌ lû̌û Khrǐ anǎ̤glǒ tôcǒ nô̤̌. Dě sî tôpwa̤ kû̌ tôpwa̤ numî̌ anǎ̤glǒ ayô̤agî̌ tôcǒ nô̤̌ hǒ. 28Dǒ ta̤dòkû akûnu, Cǒmara bè̌htò̌ wǐgutṳ̌ pwa̤nophû̌ tokhlǒ, ginǐ̤tô̤̌tôtô̤̌ mî̌ piwi̤pèshè tokhlǒ, sutô̤̌tôtô̤̌ mî̌ sara tokhlǒ, dǒnô̌kòdě kòyò dǒ a ma̤lṳ̌ ta̤cô̌klǐcô̌sè tokhlǒ, kòyò dǒ a nǐ̤bǎ ta̤siripô̤phǎ dǒ a ma̤hǎmǎjò bǎ kòyò ta̤sha tokhlǒ, ma̤jè̌ kòyò sî, nè̌klè̌nè̌klò bǎ kòyò sî, kû̌ hî̌bǎtèplè̌htò̌jò yô̤̌sǎkhěkhô̌sî nutokhlǒ hǒ. ^c 29Kòyò pṳ̂̌꤮ tôpwa̤ htûbòbǎ pwa̤nophû̌ tô̤̌. Kòyò pṳ̂̌꤮ tôpwa̤ htûbòbǎ piwi̤pèshè tô̤̌. Kòyò pṳ̂̌꤮ tôpwa̤ htûbòbǎ sara tô̤̌. Kòyò pṳ̂̌꤮ tôpwa̤ nǐ̤bǎbò ta̤siripô̤phǎ dǒ a gǔ ma̤lṳ̌ bǎ kòyò ta̤cô̌klǐcô̌sè tokhlǒnu tô̤̌. 30Kòyò pṳ̂̌꤮ tôpwa̤ ma̤hǎmǎjò bòbǎ kòyò ta̤shǐta̤sha tô̤̌, kòyò pṳ̂̌꤮ tôpwa̤ hî̌bǎjò bòbǎ yô̤̌sǎkhěkhô̌ tokhlǒ tô̤̌, kòyò pṳ̂̌꤮ tôpwa̤ htûbò pwa̤ dǒ a shôbǐǐphlô tèplè̌htò̌jò kòyò kû̌ yô̤̌sǎkhěkhô̌ tokhlǒ yô̤̌mûyô̤̌sǎ mè̤̌bǎtô̤̌. 31He sǎyṳ dǒ sî gǔ sǎphlǒshû̌ lô̌khô sû dǒ awî̤lǒ dǒ a ma̤jè̌ mè̤̌mî̌ca kòyò nu tokhlǒ. Bǎbǎkǎlè dǒ ta̤lǒ̤꤮bò nutokhlǒ aklanu, awî̤lǒnu a ô̌ pe tôcǒ. Hǒonu tôcǒmî̌ mô̤nṳ̌ lû̌û tôpwa̤ kû̌ tôpwa̤ nuhǒ.