1Cor 13 | KxfSCKXF | STEP | He kè̌ hî̌bǎjò bò kòyòhǎkhû̌phû̌ ayô̤̌ sî kû̌ mǒkhû̌ tanaphû̌ tokhlǒ lǒ̤bò ayô̤̌ bǎbǎkǎlè he kè̌ mô̤ǐ kòyò tô̤̌ hî̌nu, he htû pwǎ mô̤ kû̌ cî̌ca dǒ apwe̤nǎ̤sǎgô̌ koo tônô̤ nutokhlǒ pwǎ.

1 Corinthians 13

Ta̤mô̤nṳ̌

1 He kè̌ hî̌bǎjò bò kòyòhǎkhû̌phû̌ ayô̤̌ sî kû̌ mǒkhû̌ tanaphû̌ tokhlǒ lǒ̤bò ayô̤̌ bǎbǎkǎlè he kè̌ mô̤ǐ kòyò tô̤̌ hî̌nu, he htû pwǎ mô̤ kû̌ cî̌ca dǒ apwe̤nǎ̤sǎgô̌ koo tônô̤ nutokhlǒ pwǎ. 2 He kè̌ nǐ̤bǎ ta̤sî̌ta̤jò̌ dǒ he gǔ shôbǐǐlṳ̌ jò bǎ kòyò kû̌ Cǒmara alě̤ayô̤̌ tokhlǒ bǎbǎ, he kè̌ sî̌ganǎ̤ bòmǔtegle ta̤adû̌ayô̤̌ tokhlǒ kû̌ ta̤sî̌khû̌sî̌ya tokhlǒnu lǒ̤bò bǎbǎ, he nǐ̤bǎ ta̤yṳ̌ dǒ a no sǒcû̌bò̌kè khôlô tokhlǒ bǎbǎ, he kè̌ mô̤nṳ̌ kòyò tô̤̌ hî̌nu, he mî̌ kòyò tṳ̌dè tôpwa̤ pwǎ. ^a 3 Ta̤ lǒ̤bò dǒ a ô̌ kû̌ he tokhlǒnu, he kè̌ ǐbòkè kû̌ kòyò hǎwě̤shèwè̤ tokhlǒ bǎbǎ, htokhôtô̤̌ he kè̌ lṳhtò̌kè henǎ̤ dǒ kòyò gǔ shû̌ukè he kû̌ mî̌ bǎbǎ, he kè̌ mô̤nṳ̌ kòyò tô̤̌ hî̌nu, a nǐ̤bwǐsîrî dǒ heya tôcǒ꤮ tô̤̌.

4 Pa kè̌ mô̤nṳ̌ kòyò hî̌dě, pa khòsǎdô sǎphlǒhtûbò̌, pa gwèbǎǐ kòyò, pa sǎkhwè̌ kòyò ta̤ tô̤̌, pa hî̌bǎhtò̌yô̤̌ ta̤hî̌bǎ tô̤̌, pa bè̌dû̌bè̌pwǎ̤ panǎ̤ tô̤̌. 5 Pa kè̌ mô̤ǐ kòyò hî̌dě ta̤ dǒ atôabǎ tô̤̌ tokhlǒnu pahî̌ pama̤ kòyò tô̤̌. Pa kè̌lǎ tûû̌ pwǎtǒ̤ paya nô̤̌bǎtô̤̌. Pa kè̌ mô̤ǐ kòyò hî̌nu pa sǎphlǒdû̌ yokǎkwe kòyò tô̤̌. Pa pṳ̂̌mě kòyò ta̤sǔ tô̤̌. 6 Pa kè̌ mô̤ǐ kòyò hî̌dě, bǎ kòyò ma̤ ta̤phû̌mò̤̌shǐhtô akhanu, pa sǎlě̤sǎlò̤ tô̤̌, bǎbǎkǎlè kòyò kè̌ hî̌cǒma̤cǒ ta̤ hî̌nu, pa sǎlě̤sǎlò̤ jî̌jî̌. 7 Pa kè̌ mô̤ǐ kòyò hî̌nu, pa sǎphlǒ pî̌ bǎ tôkhò̌꤮ tô̤̌. Pa yṳ̌ǎ hènè kû̌ kòyò gǔ wô̌ hè pě, pa kè̌shuǐ hènè kû̌ Cǒmara gǔ ma̤wô̌ hè kòyò pě, htokhôtô̤̌ pa khòsǎdô sǎphlǒhtûbò̌ ta̤pṳ̂̌꤮ tocǒ.

8 Ta̤mô̤nṳ̌ agutṳ̌ jòtô̤̌, a ô̌měô̌gle tûjû̌pwa̤. Piwi̤pèshè tokhlǒ a ta̤hî̌bǎ tokhlǒ bǎbǎ, ta̤hî̌bǎ tèplè̌htò̌jò yô̤̌sǎkhěkhô̌ tokhlǒ bǎbǎ, ta̤sî̌yaphlôphǎ tokhlǒ bǎbǎ, a ô̌ měgle tûjû̌pwa̤ tô̤̌, a gǔ hǎmǎkèbò pě. 9 Pa ta̤sî̌ta̤jò̌ khònò̤̌kha tokhlǒnu bǎbǎ, pa ta̤hî̌bǎ pô̤nǎ Cǒmara alě̤ayô̤̌ tokhlǒnu bǎbǎ alǒabe khôtô̤̌. 10 Bǎbǎkǎlè dô̌ nô̌kòpě bǎ Cǒmara ǐ pa ta̤sî̌khû̌sî̌ya dǒ alǒabe akhapěnu, ta̤ dǒ alǒabe tô̤̌ tokhlǒnu a gǔ hǎmǎkèbò pě. 11 Bǎ he phijǎ pe akhanu, he ta̤hî̌bǎ bǎbǎ, he ta̤bè̌ he sǎphlǒ tokhlǒnu bǎbǎ, he ta̤gènè̤ tokhlǒnu bǎbǎ, asô̌sô̌kû̌ phijǎ tôpwa̤nu pwǎ. Bǎbǎkǎlè bǎ he dû̌to̤yobǎ sî̌ya hè akhanu, he wîkèbò phijǎ alǎ̤klô tokhlǒ. 12 Ma̤pô̤̌nu ta̤ dǒ pa sî̌ganǎ̤ khònò̤̌ tokhlǒ numî̌ a sô̌sô̌pwǎ kû̌ pa kè̌ mǐ̤dǔ dǒ a lṳ̌ pôlô̤̌ tôbǎnu pwǎ. Bǎbǎkǎlè dǒ nô̌kò pěnu lṳmṳ̌ni̤ lṳmṳ̌sa dǒ pa gǔ kè̌shǐ sanǎ̤ Cǒmara kû̌ panǎ̤ pěnu, a gǔ hètǒ̤ pě, dě pa gǔ sî̌yaphlôbò pṳ̂̌꤮ tôcǒ pě. Khònò̤̌dě pa sî̌yaphlôbò Cǒmara khôtô̤̌ bǎbǎkǎlè bǎnukha pěnu, pa gǔ sî̌ganǎ̤ tě̤tě̤mè̤̌mè̤̌bò pô̤̌ Cǒmara sî̌ganǎ̤ tě̤tě̤mè̤̌mè̤̌bò panu pě.

13 Bǎbǎkǎlè khònò̤̌nu, ta̤yṳ̌nǐ̤nǎ̤nǐ̤, ta̤kè̌shuǐ kû̌ ta̤mô̤ǐ ô̌ pe sucǒ. Hǒo sucǒ aklanu adû̌lǒ mî̌ ta̤mô̤ǐ hǒ.