1 Corinthians 14

Sû dǒ awî̤lǒ tokhlǒ numî̌ sû dǒ a ma̤jè̌ kòyò

1Sî tô jî̌pwǐ̤jî̌li̤ mô̤nṳ̌ kòyò. Htodě sǎyṳ nǐ̤bǎ lô̌khô sû dǒ Yôla Plò̌shǐ Běcǎ ǐlò̤kwenu tokhlǒ. Sû nǐ̤kwe dǒ awî̤lǒ mî̌ shôbǐǐlṳ̌ jò bǎ kòyò kû̌ Cǒmara alě̤ayô̤̌ pô̤̌ piwi̤pèshè tôpwa̤ nuhǒ. 2Ma̤titèhî̌dě kòyò tôpwa̤pwa̤ kè̌ hî̌bǎ yô̤̌sǎkhěkhô̌ dǒ kòyò sî̌yahtò̌ tô̤̌ tokhlǒ hî̌nu, a hî̌bǎ kû̌ kòyòhǎkhû̌phû̌ tokhlǒnu mè̤̌tô̤̌, a hî̌bǎ kû̌ Cǒmara pwǎ. Kòyò sî̌yaphlô lû̌û ta̤ tôpwǎ̤꤮ tô̤̌. A hî̌bǎ kû̌ Yôla Plò̌shǐ Běcǎ a ta̤pô̤ta̤phǎ dě a hî̌bǎ ayô̤̌ tokhlǒnu adû̌ayô̤̌ akhû̌akhî, kòyò sî̌yahtò̌ gû̌ lû̌û tô̤̌. 3Kè̌ kè̌tikhî klè̌ dǒ ashǔshawa̤ tôbô hî̌dě, kòyò dǒ a shôbǐǐlṳ̌ bǎ kòyò kû̌ Cǒmara alě̤ayô̤̌ tokhlǒnumî̌, a hî̌bǎ kû̌ kòyòhǎkhû̌phû̌ tokhlǒ hǒ, dě a htû ta̤ma̤jè̌ dǒ kòyòhǎkhû̌phû̌ tokhlǒ aya, a ǐkhû̌ǐǎ kòyòhǎkhû̌phû̌, dě a ma̤mô̤htò̌ sô̌ kòyòhǎkhû̌phû̌ tokhlǒ asǎphlǒ. 4Kòyò dǒ a hî̌bǎ yô̌sǎkhěkhô̌ tokhlǒnu a ma̤jè̌lò̤ tûû̌ tû̌ anǎ̤ pwǎ. Bǎbǎkǎlè kòyò dǒ a shôbǐǐlṳ̌ bǎ kòyò kû̌ Cǒmara alě̤ayô̤̌ tokhlǒnu, a ma̤jè̌bò ta̤dòkûphû̌ pṳ̂̌꤮ tôpwa̤. 5He sǎyṳ dǒ sî pṳ̂̌꤮ tôpwa̤ gǔ nǐ̤bǎbò yô̤̌sǎkhěkhô̌ sû tokhlǒ bǎbǎkǎlè he sǎyṳkhlo dǒ sî pṳ̂̌꤮ tôpwa̤ gǔ shôbǐǐlṳ̌ bǎ kòyò kû̌ Cǒmara alě̤ayô̤̌ tokhlǒ. Ma̤titèhî̌dě kòyò dǒ a nǐ̤bǎ sû dǒ a shôbǐǐlṳ̌ bǎ kòyò kû̌ Cǒmara alě̤ayô̤̌ pô̤̌ piwi̤pèshè tokhlǒnu, a lṳ̂dû̌lǒ dě a nǐ̤bwǐnǐ̤sirî bò kû̌ kòyò dǒ a nǐ̤bǎ yô̌sǎkhěkhô̌ sû tokhlǒ. Bǎbǎkǎlè kòyò dǒ a hî̌bǎ yô̌sǎkhěkhô̌ tokhlǒ tôpwa̤nu, kòyò tôpwa̤pwa̤ dǒ a gǔ shôbǐǐhtò̌ lṳ̌phlô bǎ kòyò kû̌ a shôbǐǐphlô tèplè̌htò̌ yô̤̌sǎkhěkhô̌nu yô̤̌mûyô̤̌sǎ kè̌ ô̌tô̤̌ mî̌, a nǐ̤bwǐsîrî bǎ ta̤dòkûphû̌ tokhlǒ aya pwǎ.

6Pô̤̌nudě he khô sî, he kè̌ hè hî̌bǎ bǎ sî kû̌ yô̤̌sǎkhěkhô̌nu kè̌hî̌dě a gǔ nǐ̤bwǐsîrî dǒ sîya hî̌tè? Bǎbǎkǎlè, he kè̌ phî̌hèǐ bǎ sî ta̤we̤ta̤kè dǒ Cǒmara dǔlè̌lṳ̌ bǎ he tokhlǒnu bǎbǎ, ta̤sî̌khû̌sî̌ya tokhlǒnu bǎbǎ, ta̤hî̌pô̤hî̌phǎ nǎ tokhlǒnu bǎbǎ, kû̌ ta̤sû̌ǐtòwòǐ tokhlǒnu bǎbǎ, hî̌dě, a gǔ htûbwǐhtûsîrî dǒ sîya pě. 7Kè̌ kû̌lǎmò̤̌ lô̌khô ta̤dǒta̤ǔ a timî̌titè dǒ a shôdô sǎphlǒ tokhlǒnu, kòyò tôpwa̤ kè̌ ǔtǐlû̌, mè̤̌tô̤̌dě kè̌ a dǒ tǐtu tegwe bǎbǎkǎlè a dǒpwe̤ alě̤nu a kè̌ pwe̤ nǐ̤tô̤̌ kè̌hî̌dě a sǎyṳ dǒpwe̤ kwè̌ hî̌tènu, a khô tokhlǒ cû̌ sî̌yaphlôjò lû̌û ta̤dǒpwe̤ alě̤ pwe̤nǐ̤pwe̤wô̌nu hî̌tè? 8A sô̌sô̌ pô̤̌nuhǒ, hî̌kûmṳ̂̌mò̌, kliphû̌ tôpwa̤ kè̌ sǎyṳ dǐsî̌ganǎ̤ akhô tokhlǒ kû̌ asî tô htò̌shěta̤ dě a kè̌ ǔpwe̤htò̌ bǎ asî kǐlû, bǎbǎkǎlè a ǔ dǐsî̌ganǎ̤ kòyònu, a kè̌ ǔ pwe̤phlô wô̌ kǐlû tô̤̌ kè̌hî̌dě mò̌pè tôpwa̤ cû̌ sî̌ganǎ̤jò a ta̤dǔsî̌ya kòyònu kû̌ kòyò bǎ htò̌shěta̤ hî̌tè? 9Pô̤̌nudě na kè̌ hî̌bǎ kòyò kû̌ yô̤̌sǎkhěkhô̌ dǒ kòyò sî̌ganǎ̤ yô̤̌mûyô̤̌sǎ tô̤̌nu hî̌dě kòyò cû̌ sî̌ganǎ̤jò yô̤̌mûyô̤̌sǎ hî̌tè? Na kè̌ hî̌bǎ pô̤̌nu hî̌dě, a sô̌sô̌pwǎ kû̌ na hî̌bǎ hǎlǒ̤ tônô̤ na gili̤ pwǎ. 10Dǒ hǎkhû̌nu, yô̤̌khô̌lû̌û nu a ô̌ dû̌wî̤ bǎbǎkǎlè tôcǒ kû̌ tôcǒnu yô̤̌mûyô̤̌sǎ ô̌ khô̌ tûû̌ ata̤. 11Bǎbǎkǎlè kòyò tôpwa̤pwa̤ kè̌ hî̌bǎ he dě he kè̌ sî̌ganǎ̤ lû̌ûyô̤̌ tô̤̌ hî̌dě, amî̌ a sô̌sô̌ heya kû̌ shigǎ shishawa̤phû̌ tôpwa̤ hǒ, dě he nî̌, a sô̌sô̌ aya shigǎ shishawa̤phû̌ tôpwa̤ hǒhǒ. 12Sî kè̌ sǎyṳ mè̤̌mî̌ca Yôla Plò̌shǐ Běcǎ ǐkwe sûnu hî̌nu, rû̌htò̌ lô̌khô sû dǒ a gǔ ma̤ dû̌htò̌htûhtò̌jè̌ ta̤dòkû nutokhlǒnu.

13Pô̤̌nudě kòyò dǒ a hî̌bǎjò yô̤̌sǎ tôpwa̤nu, a tôbǎ kwi Cǒmara kû̌ a gǔ ǐ lû̌û ta̤sî̌ta̤jò̌ dǒ a gǔ hî̌lṳ̌phlô tèplè̌htò̌jò bǎ kòyò kû̌ a ta̤hî̌bǎ tokhlǒ. 14Ma̤titèhî̌dě, he kè̌ kwicaba kû̌ yô̤̌sǎkhěkhô̌nu hî̌dě, he sǎphlǒ nî̌ a sî̌ganǎ̤ kû̌ he kwicaba Cǒmara bǎbǎkǎlè he gènè̤phlô tûû̌ yô̤̌mûyô̤̌sǎ tô̤̌. 15Kè̌ hî̌pô̤nudě, he bǎ ma̤ hî̌tè? He gǔ kwicaba pô̤̌ Yôla Plò̌shǐ Běcǎ nè̌klè̌nè̌klò he sǎphlǒnu pwǎ, htokhôtô̤̌ he gǔ kwicaba tûû̌ kû̌ ayô̤̌ dǒ kòyò sî̌ganǎ̤ kû̌ he nutokhlǒ pwǎ. Bǎ he sǎwǐ akhanu, he gǔ sǎwǐ pô̤̌ Yôla Plò̌shǐ Běcǎ nè̌klè̌nè̌klò he sǎphlǒ nu pwǎ, htokhôtô̤̌ he gǔ sǎwǐ tûû̌ kû̌ ayô̤̌ dǒ kòyò sî̌ganǎ̤ kû̌ he nutokhlǒ pwǎ. 16Hî̌kûmṳ̂̌mò̤̌, na kè̌ hî̌bwǐhî̌sîrî htû̌sò̌htò̌ tǒ̤pwǎ Cǒmara kû̌ yô̌sǎkhěkhô̌nu kè̌hî̌dě, kòyò dǒ a hècaba kû̌ na nutokhlǒ akla tôpwa̤pwa̤ sî̌ganǎ̤ nayô̤̌ tô̤̌ akhû̌akhî, a hî̌bwǐhî̌sîrîjò kû̌ na Cǒmara tô̤̌. 17Na ta̤kwicaba htû̌sò̌htò̌ Cǒmara nî̌, awô̌lî bǎbǎkǎlè a htûbwǐhtûsîrî dǒ kòyòya tôcǒ꤮ tô̤̌.

18Ta̤hî̌bǎ yô̤̌sǎkhěkhô̌ tokhlǒnu, he hî̌bǎjò lǒkhlo kû̌ sî akhû̌akhî, he hî̌bwǐhî̌sîrî Cǒmara. 19Bǎbǎkǎlè dǒ ta̤dòkû akûnu, he hî̌bǎ kû̌ yô̤̌sǎkhěkhô̌ tokhlǒ tô̤̌. Ma̤titèhî̌dě, he hî̌bǎ kòyò kû̌ yô̤̌sǎkhěkhô̌ amû tôsò̌nu, tònò̤̌ he sû̌ǐ pwǎ kòyò kû̌ ayô̤̌ dǒ kòyò sî̌ganǎ̤jònu yè̤̌mû pwǎnu awô̌khlo pe dǒ heya.

20He khô sî, gènè̤ lô̌khô tǎ̤ pô̤̌ phijǎphû̌ tokhlǒ gènè̤nu tǎ̤mǎ̤. Bǎbǎkǎlè tǒ̤ ta̤phû̌mò̤̌shǐhtô tôcǒnu htûhtò̌ sô̌sô̌ pô̤̌ phijǎphû̌ ô̌sa dǒ asî̌ganǎ̤ ta̤phû̌mò̤̌shǐhtô tô̤̌ nutokhlǒnî̌. Bǎbǎkǎlè ta̤ dǒ he wě̤ bǎ sî tokhlǒnu, gènè̤ lô̌khô pô̤̌ kòyò dû̌to̤yobǎ tôpwa̤ a ta̤gènè̤nu. 21Lî̤plò̌shǐkû hî̌ kû̌,

“He gǔ nohè shilǎ̤gǎkhlophû̌ tokhlǒ hè hî̌bǎ hekòyò tokhlǒ kû̌ shilǎ̤gǎkhlo ayô̤̌ tokhlǒ pě. He gǔ hî̌bǎ asî pô̤̌nu pě bǎbǎkǎlè asî ganǎ̤de he yô̤̌ tô̤̌ pě,” ^a Běcǎ hî̌ pô̤̌nu.

22Pô̤̌nu akhû̌akhî, yô̌sǎkhěkhô̌ tokhlǒ numî̌ ta̤ma̤mǎnǎ dǒ ta̤dòkûphû̌ tokhlǒ aya mè̤̌tô̤̌. Yô̤̌sǎkhěkhô̌ tokhlǒ numî̌ a dǔlè̌lṳ̌ kû̌ Cǒmara glè̌ cî̌htò̌ kòyò dǒ a yṳ̌nǐ̤nǎ̤nǐ̤ gû̌ kòyò tô̤̌ nutokhlǒ aya pwǎ. Bǎbǎkǎlè ta̤hî̌bǎpô̤ Cǒmara alě̤ayô̤̌ tokhlǒnu a dǔlè̌lṳ̌ kû̌ Cǒmara sǎphlǒô̌ ta̤dòkûphû̌ tokhlǒ pwǎ. Ta̤hî̌pô̤nǎ numî̌ pwa̤ dǒ a yṳ̌ǎ gû̌ kòyò tô̤̌ tokhlǒ ayanu mè̤̌tô̤̌. 23Hî̌kûmṳ̂̌kû̌, sî hè cubucaba wô̤̌wô̤̌ lû̌û dě sî kè̌ hî̌bǎ kû̌ yô̌sǎkhěkhô̌ tokhlǒ pṳ̂̌꤮ tôpwa̤ hî̌nu, kòyò dǒ ashǔshawa̤ tokhlǒ, tô̤̌mî̌ kòyò dǒ a yṳ̌ǎgû̌ kòyò Khrǐ tô̤̌ tokhlǒ kè̌ hècaba kû̌ sî hî̌dě asî kè̌ ganǎ̤de kû̌ ayô̤̌ tokhlǒ tôkhò̌꤮ tô̤̌ hî̌nu asî gǔ hî̌ lô̌khô sî kû̌ kòyò kimwi pě. 24Bǎbǎkǎlè, hî̌kûmṳ̂̌mò̤̌, kòyò ashǔshawa̤ dǒ a ganǎ̤de gû̌ kòyò ayô̤̌ hǒtokhlǒ tôkhò̌ tô̤̌ tokhlǒ, mè̤̌tô̤̌dě kòyò dǒ a yṳ̌ǎ gû̌ Khrǐ tô̤̌ tokhlǒ kè̌ hècaba gû̌ sî hî̌dě sî kè̌ hî̌pô̤phǎ Cǒmara alě̤ayô̤̌ pṳ̂̌tôpwa̤ hî̌nu, asî gǔ sî̌yahèlò̤ ǐtûû̌ lô̌khô anǎ̤ kû̌ asî mî̌ pwa̤phû̌mò̤̌phû̌ tokhlǒ pě. Dǒ sî hî̌pô̤phǎnu akhû̌akhî, dě asî gǔ sǎyṳ yò̤lǎ̤plǎdî̌ lô̌khô anǎ̤ pě. 25Hǒtôplǎdě, ta̤ dǒ asî sî̌ganǎ̤htûtô̤̌ dǒ a sǎphlǒkû tokhlǒnu, a gǔ gènè̤phlôhtò̌ pě, dě a gǔ dô̌gînî̤lò̤ cabahtò̌ Cǒmara dě a gǔ hî̌ kû̌, “Cǒmara a ta̤pô̤ta̤pwǎ̤ ô̌mě mî̌ca kû̌ kòyò hǒtokhlǒ,” A gǔ hî̌ lô̌khô pô̤̌nu pě.

Khûpò̌lǔ sû̌ǐtòwòǐ kòyò kû̌ cubucaba wô̤̌wô̤̌ lû̌û awe̤akè

26He khô sî, pô̤̌nudě bǎ sî hècaba wô̤̌wô̤̌ lû̌ akhanu, sî tô ma̤ hî̌tè? Tokhlǒkhlǒnu a gǔ sǎwǐ htû̌sò̌htò̌ Cǒmara, tokhlǒkhlǒnu a gǔ sû̌ǐtòwòǐ kòyò kû̌ Cǒmara alě̤ayô̤̌, tokhlǒkhlǒnu a gǔ hî̌lṳ̌htò̌ bǎ kòyò kû̌ Cǒmara dǔlè̌lṳ̌ lû̌û tokhlǒ, tokhlǒkhlǒ dě a gǔ hî̌bǎ kû̌ yô̤̌sǎkhěkhô̌ tokhlǒ, tokhlǒkhlǒ dě a gǔ hî̌lṳ̌phlô tèplè̌htò̌ bǎ kòyò yô̌sǎkhěkhô̌ nutokhlǒ yô̤̌mûyô̤̌sǎ. Sî ma̤ lô̌khô pô̤̌o mî̌ awô̌ ya. Bǎbǎkǎlè sî ma̤ tètètè̌ bǎbǎnu, no nǐ̤khû̌nǐ̤ǎ, no htûbwǐhtûsîrî bǎ pwa̤ dǒ a ganǎ̤de ta̤ tokhlǒ ayanu. 27Kòyò tôpwa̤pwa̤ kè̌ sǎyṳ hî̌bǎ kû̌ yô̤̌sǎkhěkhô̌ hǒtokhlǒ kè̌hî̌dě, a tô hî̌bǎ dû̌khlo kû̌ sò̌ginǐ̤ mè̤̌tô̤̌mî̌ sò̌su tô̤̌. Bǎbǎkǎlè asî tôbǎ hî̌bǎ tôpwa̤ hto tôpwa̤. Dě dǒ asî akla tôpwa̤nu, a tô sî̌yaphlô yô̤̌mûyô̤̌sǎ dě a tôbǎ shôbǐǐphlô tèplè̌htò̌ sô̌ bǎ kòyò. 28Bǎbǎkǎlè, kòyò dǒ a hî̌bǎ kû̌ yô̌sǎkhěkhô̌ tokhlǒnu, pwa̤hî̌lṳ̌phlô tèplè̌htò̌ bǎ lû̌û yô̤̌mûyô̤̌sǎ kè̌ ô̌ tôpwa̤ tô̤̌ hî̌dě, no ô̌ sǔtǔkǔkè asî dǒ sî ta̤dòkû akûnu, dě nokwicaba hǔ tûû̌ a kû̌ Cǒmara nupwǎ.

29Pô̤̌nudě, kòyò dǒ a hî̌pô̤phǎ Cǒmara alě̤ayô̤̌ tokhlǒnu, a tô hî̌pô̤ pwǎ sò̌ginǐ̤ mè̤̌tô̤̌mî̌ sò̌su pwǎ. Asî hî̌pô̤ tokhlǒ numî̌ Cǒmara nohî̌pô̤ mè̤mè̤̌ asî ya, mè̤̌tô̤̌ yanu, kòyò dǒ a ô̌kè tokhlǒ tôbǎ ganǎ̤de dě gènè̤kè̌ tě̤tě̤mè̤̌mè̤̌ lô̌khô asî ata̤hî̌pô̤ nutokhlǒ. 30Bǎbǎkǎlè, dǒ kòyò hǎnòò̌ ganǎ̤de ta̤ akla tokhlǒnu, kòyò tôpwa̤pwa̤ kè̌ nǐ̤bǎ ayô̤̌sǎ dǒ Cǒmara ô̌ tômûmû kè̌hî̌dě, kòyò dǒ a hî̌pô̤ta̤ nutôpwa̤ tôbǎ ô̌kǔbǎ, kòyò hǒtôpwa̤ bǎ hî̌bǎ tè̌lè aya. 31Pô̤̌nudě, pô̤̌khô kòyò pṳ̂̌tôpwa̤ gǔ nǐ̤bǎ gû̌ ta̤sî̌khû̌sî̌ya kû̌ ta̤khû̌ta̤ǎ ayanu, lǒ̤bò kòyò dǒ a hî̌pô̤ ta̤ tokhlǒnu, a tôbǎ hî̌pô̤phǎ tôpwa̤ hto tôpwa̤. 32Kòyò dǒ a sǎyṳ hî̌pô̤phǎ ta̤ tokhlǒnu, a hî̌pô̤phǎ bǎbǎ, a hî̌pô̤phǎtô̤̌ bǎbǎ, a tô khòbò̌ ǐ lô̌khô anǎ̤. 33Ma̤titè̤̌hî̌dě, bǎ sî hè cubucaba wô̤̌wô̤̌ lû̌ akhanu, sî hî̌pô̤ pwe̤nǎ̤sǎgô̌ dû̌wî̤ bò lû̌û tôplǎnô̤̌ pô̤̌nu dě Cǒmara sǎphlǒ ô̌ tô̤̌. Cǒmara sǎyṳ dǒ sî gǔ hî̌ sî gǔ ma̤ lô̌khô kû̌ aklè̌aklò tôpwa̤ hto tôpwa̤ pô̤̌nu pwǎ.

34Bǎ ta̤dòkûphû̌ ô̌plǒhî̌bǎcu lû̌û akhanu, asî lǎ̤klô ô̌ kû̌ dǒ pwa̤yṳ̌ta̤plǒcu akûnu, pwa̤mǒ̤ tokhlǒ tôbǎ ôsǔtukǔ. Asî tôbǎ hî̌bǎ tô̤̌. Bǎbǎkǎlè pô̤̌ Yǔdaphû̌ ta̤sû̌ta̤tòwò ô̌nu, kòyò tôbǎ bè̌dubè̌nǎ̤ asî. 35Asî kè̌ sǎyṳ sî̌ganǎ̤ ta̤tôcǒcǒ hî̌dě, a bǎ ge gwè̌ pwǎ awṳ̂ dǒ hǐ. Dǒ ta̤dòkû akûnu, pwa̤mǒ̤ tôpwa̤pwa̤ kè̌ hî̌bǎ ta̤ hî̌nu a htûhtò̌ ta̤ sòwò̤̌ tôcǒ.

36Cǒmara alě̤ayô̤̌ a kòshî̌gutṳ̌ mî̌ a ô̌ pwǎtǒ̤ dǒ sî Kôritu ta̤dòkû akû dě a hè nô̌ pwǎ ya? Mè̤̌tô̤̌dě a hè bǎ pwǎtǒ̤ dǒ sî hǒtokhlǒ a ô̌ pwǎ ya? 37Kòyò tôpwa̤pwa̤ gǔ gènè̤ ǐtûû̌ anǎ̤ kû̌, he mî̌ pwa̤ dǒ a hî̌pô̤phǎ bǎ Cǒmara a ta̤we̤ta̤kè tôpwa̤, mè̤̌tô̤̌dě he mî̌ kòyò dǒ a nǐ̤bǎ sû dǒsû̌dǒsò̌ tôkhô tôpwa̤ kè̌hî̌dě he wě̤ ta̤ tokhlǒnu Běcǎ a ta̤hî̌ pwǎnu a bǎ sî̌ganǎ̤ pwǎ. 38Bǎbǎkǎlè lǒ̤bò he hî̌ lû̌û hǒtokhlǒnu, a kè̌ bè̌dubè̌nǎ̤ tô̤̌ hî̌dě bè̌dubè̌nǎ̤ tǎ̤ a tôpwa̤ tǎ̤mǎ̤.

39Ma̤pô̤̌nudě, he khô sî, bè̌cu lô̌khô sî sǎphlǒ kû̌ ta̤hî̌pô̤ hǒtokhlǒ. Bǎbǎkǎlè cû̌ noô̌kǔ tǎ̤ kòyò dǒ a hî̌bǎ kû̌ yô̌sǎkhěkhô̌ nutokhlǒ tǎ̤mǎ̤. 40Sî ma̤ titètè̌ bǎbǎnu, sî tôbǎ ma̤ tě̤tô̤tě̤bǎ a dě tôbǎ cû̌ kû̌ aklè̌aklò.