1 Corinthians 15

Khrǐ si ihtǒhtûpwa̤sô̌

1He khô sî, khònò̤̌dě he sǎyṳ ǐ gènè̤htò̌sô̌ sô̌ sî kû̌ ta̤sǎlě̤we̤kè dǒ he shôbǐǐlṳ̌ bǎ hto sî dě sî nǐ̤bǎ hto dě sî bè̌shobè̌shò̌ hto sî ta̤yṳ̌ta̤nǎ̤ dǒ alô̤nu awe̤akè pwǎ. 2Hǒnumî̌ ta̤sǎlě̤ awe̤akè dǒ he shôbǐǐlṳ̌ bǎ hto sî nuhǒ. Sî kè̌ yṳ̌ǎ dě sî kè̌ pṳ̂̌mě wô̌ ta̤sǎlě̤we̤kè awe̤akè hǒtôcǒ numî̌, sî nǐ̤bǎ sî ta̤ma̤hǎplǎge hǒ. Sî kè̌ ma̤hǒotô̤̌ hî̌dě, sî ta̤yṳ̌ tokhlǒ numî̌ ta̤yṳ̌ dǒ a mè̤̌mî̌ca mè̤̌tô̤̌.

3Ta̤we̤ta̤kè dǒ a lṳ̂dû̌lǒ dǒ he nǐ̤bǎ dě he ǐlò̤ tutṳ̌ bǎ sî numî̌ amè̤̌hǒ, pô̤̌khô pa gǔ hǎplǎ kû̌ ta̤cî̌htò̌ pa ta̤sǔ nudě, Khrǐ khòlṳ̌ asǎphlǒ hǒ, lî̤plò̌shǐkû hî̌ pô̤̌nu. ^a 4Htokhôtô̤̌ lî̤plò̌shǐkû hî̌ pô̤̌ kû̌, kòyò lǔlò̤hto Khrǐ dě suni̤ tôni̤nu a ihtǒhtûpwa̤ getîkhî sô̌ dǒ ta̤si. ^b 5A htûpwa̤ getîkhî htodě a ô̌lṳ̌htò̌ bǎ Khûpetarǔ, ^c htodě a ô̌lṳ̌htò̌ bǎ pwa̤nophû̌ shǐsò̌ginǐ̤. ^d 6Htodě dǒnô̌kònu, a ô̌lṳ̌htò̌ bǎ pô̤̌ akhôphijǎ yè̤̌ya tôplǎnô̤̌. Dě kòyò dǒ a kè̌shǐ lû̌û tokhlǒnu, tokhlǒkhlǒ mî̌ a sihǒ bǎbǎkǎlè tokhlǒkhlǒnu, a ô̌htûpwa̤ pe khònò̤̌khanu a ô̌ wô̤̌khlo pe kû̌ a si hto nutokhlǒ. 7Htodě a ô̌lṳ̌htò̌ bǎ hto Khûya̤kû dě a cû̌ ô̌lṳ̌htò̌ bǎbò pwa̤nophû̌ nutokhlǒ. 8Dǒnô̌kòlǒ dě a ô̌lṳ̌htò̌ bǎ kû̌ he dǒ asô̌sô̌kû̌ phijǎphû̌ dǒ a ô̌ labe gû̌ kòyò tô̤̌ nutôpwa̤. ^e

9Dǒ pwa̤nophû̌ lǒ̤bò aklanu, he mî̌ kòyò dǒ atôabǎ kû̌ kòyò pô̤̌ pwa̤nophû̌ ashǔshawa̤ nutokhlǒ tîkî̌ tô̤̌ tôpwa̤. Ma̤titèhî̌dě bǎ he yṳ̌ǎ Yeshǔ Khrǐ khôtô̤̌ akhanu, he ma̤jî̌ma̤jû̌ kòyò dǒ a yṳ̌ǎ Yeshǔ Khrǐ tokhlǒ akhû̌akhî, kòyò gǔ kaǎ he kû̌ pwa̤nophû̌ tôpwa̤pwǎnu a gwǎ tîkî̌ tô̤̌. ^f 10Bǎbǎkǎlè, dǒ Běcǎ abwǐsîrî akhû̌akhî, khònò̤̌dě he htûhtò̌kè pwa̤nophû̌ tôpwa̤hǒ. Ta̤bwǐta̤sîrî dǒ Cǒmara ǐlò̤ he nî̌ a tônô̤ bǎtô̤̌. Ma̤titèhî̌dě he jî̌pwǐ̤ htû̌khû̌htû̌ǎ ma̤ bò kû̌ pwa̤nophû̌ ashǔshawa̤ tokhlǒ. He ma̤bò̌ pô̤̌o numî̌ hekhû̌heǎ tûû̌ mè̤̌tô̤̌. Cǒmara abwǐsîrî ma̤ kû̌ he akhû̌akhî, he ma̤bò̌ pô̤̌o nupwǎ. 11Pô̤̌nudě, he shôbǐǐlṳ̌ bǎ sî hǒtokhlǒnu bǎbǎ, asî shôbǐǐlṳ̌ bǎ sî tokhlǒnu bǎbǎ, sî yṳ̌ǎ sô̌sô̌bò lû̌û pô̤̌nu hǒ.

Pa ihtǒ htûpwa̤ge dǒ ta̤si

12Pa shôbǐǐlṳ̌ hto bǎ sî kû̌ Khrǐ ihtǒhtûpwa̤ getîkhî dǒ ta̤si bǎbǎkǎlè dǒ sîkla tokhlǒkhlǒnu, “Kòyò si hto tôcǒ dě a ihtǒhtûpwa̤ getîkhîjò pe tôkhò̌꤮ tô̤̌,” A cû̌hî̌ lô̌khô pô̤̌numî̌ ma̤titè? 13Pô̤̌ sî hî̌nu a kè̌ mè̤̌mî̌ca hî̌dě, Khrǐnu, a si ihtǒhtûpwa̤ getîkhî tô̤̌, yô̤̌mûyô̤̌sǎ hè pô̤̌nu. 14Khrǐ kè̌ si ihtǒhtûpwa̤ getîkhîsô̌ mè̤̌mî̌ca tô̤̌ kè̌hî̌dě, pa shôbǐǐlṳ̌ bǎ sî numî̌ a nǐ̤bwǐsîrî tô̤̌. Sî yṳ̌ǎ nu꤮ mî̌ a nǐ̤bwǐsîrî tô̤̌tô̤̌. 15Tǒ̤hǒonô̤̌ mè̤̌tô̤̌, sî hî̌ kû̌ kòyò sihtonu a htûpwa̤ getîkhî jòpetô̤̌nu a kè̌ mè̤̌mî̌ca hî̌dě, a lò̤tě̤ kû̌ sî hî̌ kû̌ Cǒmara ma̤htûpwa̤ getîkhî sô̌ Khrǐ mè̤̌tô̤̌ pô̤̌nu. A kè̌ mè̤̌mî̌ca pô̤̌nu hî̌dě, pa mî̌ kòyò dǒ a cû̌ hî̌ǐ lòhǎlòhô bǎ bò kòyò kû̌ Cǒmara awe̤akè tokhlǒ hǒ. Ma̤titèhî̌dě pa lě̤ shôbǐǐlṳ̌ bǎ kòyò kû̌ Cǒmara ma̤htûpwa̤ getîkhî sô̌ Khrǐ pô̤̌nu nǒ̤꤮. Bǎbǎkǎlè sî hî̌ hǒtokhlǒ numî̌ atô tôcǒ꤮ tô̤̌. 16Kòyò si tokhlǒ kè̌ ihtǒhtûpwa̤ getîkhî tô̤̌ kè̌hî̌dě, Khrǐnu꤮ mî̌ Cǒmara ma̤ ihtǒhtûpwa̤ getîkhî lû̌û dǒ ta̤si mè̤̌tô̤̌ tô̤̌. 17Khrǐ kè̌ si ihtǒhtûpwa̤sô̌ dǒ ta̤si tô̤̌ kè̌hî̌dě, sî yṳ̌ǎ Khrǐnu a tônô̤ bò hǒ. Htokhôtô̤̌ ta̤sǔ tokhlǒ comě pepwǎ sî pwǎ, a plûkè sî tô̤̌. 18Sî hî̌nu a kè̌ tô hî̌dě, kòyò dǒ a yṳ̌ǎ Khrǐ dě a si hto tokhlǒnu, a tǒ̤bò dǒ ta̤pî̌ta̤lṳ̂̌ hǒ. 19Pa dǒ a yṳ̌ǎ Khrǐ dě a ô̌htûpwa̤ pe khònò̤̌ tokhlǒnu, pa yṳ̌ǎ Khrǐ dě pa kè̌ kè̌shuǐ pwǎtǒ̤ khò̌tôhtu aya pwǎ, pa kè̌shuǐ dǒ a gǔ ma̤hǎplǎge pa htǔ꤮ nô̌kòpě tôhtu ayanu a kè̌ ô̌tô̤̌ hî̌dě, kòyò dǒ hǎkhû̌nu, tô gwèbǎǐlǒ pô̤̌ pa tokhlǒ numî̌ a ô̌ pe tô̤̌ hǒ.

20Bǎbǎkǎlè, Khrǐ si ihtǒhtûpwa̤sô̌ numî̌ a mè̤̌mî̌ca dǒ a si ihtǒhtûpwa̤sô̌ wǐlǒ kòyò dǒ ta̤si akhû̌akhî, a dǔlè̌lṳ̌ sî̌ganǎ̤ tě̤tě̤mè̤̌mè̤̌ bǎ pa kû̌ kòyò dǒ a si tûlû̌ htohǒ tokhlǒnu, a gǔ ihtǒhtûpwa̤ getîkhî bòsô̌ dǒ ta̤si pě. 21Dǒ kòyò tôpwa̤pwa̤ amè̤̌hǒ pa PhaAda ma̤ta̤sǔ akhû̌akhîdě, kòyò hǎkhû̌phû̌ pṳ̂̌꤮ tôpwa̤ bǎ si bò. Pô̤̌nudě, dǒ kòyò tôpwa̤pwa̤ mî̌ Yeshǔ ma̤ ta̤ akhû̌akhîdě, lǒ̤bò kòyò si tokhlǒ gǔ ihtǒhtûpwa̤ getîkhî bò sô̌ dǒ ta̤si pě. 22Kòyòhǎkhû̌phû̌ pṳ̂̌꤮ tôpwa̤ akhlialè lò̤tě̤ kalò̤ tutṳ̌ dǒ pa PhaAda a ô̌ akhû̌akhî, kòyò pṳ̂̌꤮ tôpwa̤ bǎ si bò pwǎ. Pô̤̌nudě, kòyò dǒ a htû kû̌ Khrǐ tôcǒ꤮ nô̤̌ tokhlǒnu, Khrǐ gǔ ma̤htûpwa̤ getîkhî lû̌û pě. 23Bǎbǎkǎlè ta̤ihtǒhtûpwa̤ getîkhînu a gǔ htûhtò̌ tôcǒ hto tôcǒ pě. Pa pṳ̂̌꤮ tôpwa̤ tôbǎ ô̌pǒ̤ tǒ̤dǒ lṳmṳ̌ni̤ tô ihtǒ nutôni̤ pě. Běcǎ Yeshǔ ihtǒ htûpwa̤ wǐ pě. Htodě htû̌ Běcǎ Yeshǔ Khrǐ hèlò̤ sô̌ pěnu a gǔ ma̤ ihtǒhtûpwa̤ getîkhî kòyò dǒ a yṳ̌ǎ lû̌û nutokhlǒ pě. 24Htopědě, hǎkhû̌ gǔ gutṳ̌kè pě. Bǎnukha pě, Khrǐ gǔ ma̤pî̌kè bò pwa̤pǒta̤ tokhlǒ, ta̤siwi̤sòwò̤ tokhlǒ kû̌ ta̤pô̤ta̤phǎ nutokhlǒ pě. Dě a gǔ ǐlò̤kè shigǎnu dǒ pha Cǒmara a cǔdekû pě. 25Ma̤titèhî̌dě Khrǐ bǎ pǒ tǒ̤ ta̤ htû̌ Cǒmara ma̤pè̤̌ bòmǔtegle htobò pwa̤dǔdǎ Khrǐ tokhlǒnu, dě a bè̌lò̤ bò asî dǒ Khrǐ a khò̌lôpô̤̌lǎ̤ pě. ^g 26Ta̤shû̌ta̤sho dǒ nô̌kòlǒ tôcǒ dǒ Cǒmara gǔ bǎ ma̤pî̌kè a numî̌ amè̤̌ ta̤sinu hǒ. 27“Cǒmara gǔ bè̌lò̤ bò ta̤pṳ̂̌꤮ tocǒ dǒ akhò̌lôpô̤̌lǎ̤ pě,” ^h Lî̤plò̌shǐkû ahî̌pô̤̌nu. Bǎbǎkǎlè ayô̤̌ hǒtômû mî̌, a sǎyṳ hî̌ kû̌ Cǒmara ô̌ dǒ Khrǐ a ta̤pô̤ta̤pwǎ̤ shû̌sho alǎ̤ pô̤̌nu mè̤̌tô̤̌, ma̤titèhî̌dě, pwa̤ dǒ a nopǒ Yeshǔ Khrǐ mî̌ Cǒmara pwǎ. 28Pô̤̌khô Cǒmara gǔ pǒ bòmǔtegle ta̤pṳ̂̌꤮ tocǒ ayanu, htǔ Yeshǔ Khrǐ pǒ ta̤lǒ̤꤮ bò pě akhanu, a gǔ ganǎ̤de a pha Cǒmara dǒ a nopǒ lû̌û nutôpwa̤ ayô̤̌ pě.

29He sǎyṳ hî̌ bǎ pô̤̌ sî tôcǒ. Kòyò sihto tokhlǒnu a kè̌ htûpwa̤ getîkhî petô̤̌ kè̌hî̌dě, kòyò tokhlǒkhlǒ cû̌ ju bǎ tǒ̤ shi dǒ kòyò si tokhlǒ aya dě a nǐ̤bwǐsirî dǒ asîya hî̌tè? Kòyò si tokhlǒnu, a kè̌ htûpwa̤ getîkhî jò petô̤̌ kè̌hî̌dě, kòyò nutokhlǒ cû̌ ju bǎ tǒ̤ asî shi ma̤titè? 30Pa nolè꤮, kòyò si tokhlǒ kè̌ ihtǒhtûpwa̤ getîkhî petô̤̌ kè̌hî̌dě, pa cû̌ khò tǒ̤ ta̤jî̌ta̤jû̌ hǒtokhlǒ pṳ̂̌꤮ tôni̤ ma̤titè? 31He khô sî꤮, he kè̌shǐbǎ kû̌ ta̤si pṳ̂̌꤮ tôni̤ dǒ sî yṳ̌ǎ Běcǎ Yeshǔ Khrǐ akhû̌akhî, sî ma̤sǎlě̤ he numî̌ Cǒmara sî̌ganǎ̤ pwǎ. Htokhôtô̤̌, he khòbǎ jî̌ ta̤jî̌ta̤jû̌ numî̌ Cǒmara sî̌ganǎ̤ gû̌ pwǎ. 32Bǎ Wî̤̌ěphěsu akûnu, he khòbǎ mî̌ca ta̤jî̌ta̤jû̌, ma̤titèhî̌dě kòyò dǒ a sǎkhěsǎkhwè̌ he tokhlǒnu a sǎyṳ ǎ heyî̌ numî̌ asô̌sô̌kû̌ ta̤ěta̤jô̌ tokhlǒnu pô̤̌nudě, he kè̌ yṳ̌ǎ kû̌ kòyò sihto tokhlǒ kè̌ htûpwa̤ getîkhî petô̤̌ kè̌hî̌dě, he cû̌ khòsǎphlǒhtû, khòjî̌khòjû̌ gètè̤̌nu ma̤titè? Kè̌ kòyò si ihtǒhtûpwa̤sô̌ pe tô̤̌ kè̌hî̌dě, awô̌lǒ mî̌ pa gǔ ma̤mô̤ma̤phi panǎ̤ dě pa gǔ hî̌ pô̤̌ kòyò hî̌ ayô̤̌ tômû kû̌,

“Pe̤wô̤pě mî̌ pa si pě ya꤮, dě paǎpaô tǎ꤮, ma̤mô̤ma̤phi ǐtûû̌ lô̌khô panǎ̤ tǎ꤮.” ⁱ Ta̤dô̌kènè ô̌ pô̤̌nu.

33Yṳ̌ǎ tǎ̤ kòyò dǒ a hî̌ pô̤̌nu tokhlǒ tǎ̤mǎ̤. Pô̤̌ kòyò hî̌ kû̌, “Sî kè̌ bǒsû̌ sî khô dǒ a ma̤ ta̤phû̌mò̤̌shǐhtô tokhlǒ dě a gènè̤ ta̤phû̌mò̤̌shǐhtô tokhlǒnu, a gǔ wǎ̤nṳ̌ sî pě dě sî gǔ htûhtò̌ sô̌sô̌kû̌ kòyò phû̌mò̤̌ pô̤̌ asînu pě.” 34Gènè̤ tě̤tôtě̤bǎ gesô̌ lô̌khô sî sǎphlǒ dě wîkè sî ma̤ta̤sǔnu tokhlǒ. Ma̤titèhî̌dě dǒ sîkla tokhlǒkhlǒnu tǒ̤lò̤ khònò̤̌ a sî̌ganǎ̤ tě̤tě̤mè̤̌mè̤̌ kû̌ tôhî̌ kòyò Cǒmara awe̤akè tô̤̌. Ta̤ô̌htûhtò̌ pô̤̌o numî̌ sî tô sòwò̤̌ mî̌caca.

Pa si ihtǒhtûpwa̤sô̌ pěnu pa nǎ̤glǒnu a gǔ sô̌sô̌ hî̌tè pě

35Hî̌kûmṳ̂̌mò̌, kòyò tôpwa̤pwa̤ kè̌ gwè̌ kû̌, “Kòyò sihtonu, a cû̌ htûpwa̤ getîkhî jò hî̌tè? A kè̌ htûpwa̤ getîkhî hî̌dě, anǎ̤glǒnu a gǔ htûhtò̌ nǎ̤glǒ hî̌tè tôcǒ pěya?” A gǔ gwè̌ pô̤̌nu pě. 36Kòyò ô̌lǒ sî lǔlò̤ ta̤khli nî̌, a kè̌ běso wǐtô̤̌ kè̌hî̌dě a phǎhtò̌ jòtô̤̌. 37Bǔkû̌lǎ phlǒ bǎbǎ, ta̤khli titètè̌ bǎbǎ, amṳ̌ dǒ a glè̌ phǎhtò̌ pěnu a yǎ̤yô̤yǎ̤gî̌ gǔ sô̌sô̌kû̌ ta̤khli aphlǒnu pě mè̤̌bǎtô̤̌. 38Ta̤khli tôcǒ kû̌ tôcǒnu a tôbǎ phlǒhǎhtò̌ ma̤ hî̌tènu, Cǒmara tîwî̌nǎ htobòtû̌ hǒ jû̌ asǎphlǒ sǎyṳ ma̤nu hǒ. Ta̤khli tôcǒ kû̌ tôcǒnu, amṳ̌ tôbǎ ma̤khô̌tû̌ hî̌tènu, Cǒmara tîwî̌nǎ lǒ̤bò hto pô̤̌ a sǎyṳ ma̤nu hǒ. 39Pô̤̌nudě, Cǒmara bô̌lò̤ ta̤htûpwa̤ tokhlǒ anǎ̤glǒ phěyî̌ tôcǒ kû̌ tôcǒnu a sô̌sô̌ lû̌û tô̤̌. Kòyò tokhlǒ anǎ̤glǒ phěyî̌ bǎbǎ, ta̤phû̌ta̤wè̤ tokhlǒ anǎ̤glǒ phěyî̌ bǎbǎ, htû̌ tokhlǒ anǎ̤glǒ phěyî̌ bǎbǎ, tò̤̌phû̌ tokhlǒ anǎ̤glǒ phěyî̌ bǎbǎ, tôcǒ kû̌ tôcǒnu a khô̌lû̌û. 40Pô̤̌nudě nǎ̤glǒphěyî̌ dǒ mǒkhû̌ ayanu a khô̌tû̌, dǒ hǎkhû̌ ayanu a khô̌. Mǒkhû̌ anǎ̤glǒ phěyî̌ a ta̤wî̤ta̤wô̌nu awî̤ khô̌ tôcǒ, hǎkhû̌nǎ̤khû̌ anǎ̤glǒ phěyî̌ a ta̤wî̤ta̤wô̌ nî̌ awî̤ khô̌tû̌ tôcǒ. 41Lṳmṳ̌ a ta̤wî̤ta̤wô̌ bǎbǎ, la a ta̤wî̤ta̤wô̌ bǎbǎ, shǎ a ta̤wî̤ta̤wô̌ bǎbǎ, tôcǒ kû̌ tôcǒnu, awî̤ khô̌ lû̌û. Shǎ tômè kû̌ tômè a ta̤wî̤ pwǎnu a khô̌ lû̌û.

42Pô̤̌nudě htû̌ kòyò si ihtǒhtûpwa̤ pě tôni̤nu, panǎ̤glǒ a khô̌ kû̌ panǎ̤glǒ khònò̤̌nu pě. Kòyò si tôpwa̤ anǎ̤glǒnu a gǔ sokè pě bǎbǎkǎlè htû̌ a siǐhtǒkè pě tôni̤nu, anǎ̤glǒnu a sijò petô̤̌ hǒ, a sojò petô̤̌ hǒ. 43Bǎ kòyò tôpwa̤ ô̌htûpwa̤ pe akhanu, anǎ̤glǒ phěyî̌ nî̌ a dǐhtûhtò̌ lû̌û ta̤sǎphlǒpî̌ kû̌ ta̤khû̌shiǎjǎ tokhlǒ pwǎ. Bǎbǎkǎlè htû̌꤮ a si ihtǒhtûpwa̤sô̌ pě tôni̤nu, anǎ̤glǒ phěyî̌ nî̌ a gǔ lǒbe kû̌ ta̤bwǐdû̌sîrîhtû kû̌ ta̤pô̤ta̤phǎ pě. 44Pa hǎkhû̌nǎ̤khû̌ anǎ̤glǒnu, kòyò gǔ lǔǐ lò̤tě̤kè a pě. Bǎbǎkǎlè htǔ pa si ihtǒhtûpwa̤sô̌ pěnu pa gǔ nǐ̤bǎ khô̌ nǎ̤glǒ asa dǒ a gǔ ô̌htûpwa̤ bò̌jò dǒ mǒkhû̌ dě a gǔ sijò petô̤̌nu pě.

Pô̤̌ pa ô̌ kû̌ nǎ̤glǒ dǒ a ô̌htûpwa̤ bò̌jò dǒ hǎkhû̌nu, pa gǔ ô̌ kû̌ nǎ̤glǒ dǒ a ô̌htûpwa̤ bò̌jò dǒ mǒkhû̌nu pě. 45“Kòyòhǎkhû̌phû̌ awǐlǒ tôpwa̤ dǒ kòyò kaǎ lû̌û kû̌ PhaAda nî̌ Cǒmara ǐ yǎ sǎphlǒhtûpwa̤,” ^j lî̤plò̌shǐkû ahî̌pô̤̌nu. Bǎbǎkǎlè Yeshǔ Khrǐ dǒ kòyò kaǎ lû̌û kû̌ PhaAda dǒ nô̌kòlǒ tôpwa̤nu, a ǐlò̤ tutṳ̌ kòyòhǎkhû̌phû̌ tokhlǒ a ta̤ô̌htûpwa̤ asa kû̌ Yôla Plò̌shǐ Běcǎ hǒ. 46Panǎ̤glǒ dǒ a sijò nî̌ a hè wǐkhlo, htodě pa nǎ̤glǒ dǒ asijò tô̤̌nu nî̌ a hè dǒ nô̌kò pwǎ. 47Kòyòhǎkhû̌phû̌ PhaAda awǐlǒ tôpwa̤ nî̌, kòyò bô̌ yǎ kû̌ lǒ̤hǎ pwǎ. Bǎbǎkǎlè Yeshǔ Khrǐ dǒ kòyò kaǎ lû̌û kû̌ PhaAda sò̌ginǐ̤ tôpwa̤ nutôpwa̤ nî̌ a ô̌ dǒ mǒkhû̌ hèlò̤. 48Kòyòhǎkhû̌phû̌ lǒ̤bò nu a ô̌ kû̌ anǎ̤glǒ dǒ asô̌sô̌kû̌ kòyòhǎkhû̌phû̌ awǐlǒ dǒ kòyò bô̌lò̤ lû̌û kû̌ lǒ̤hǎ tôpwa̤ hǒ. Bǎbǎkǎlè kòyò dǒ a gû̌ Yeshǔ Khrǐ akò tokhlǒnu, dǒ mǒkhû̌ pě, anǎ̤glǒ gǔ sô̌sô̌kû̌ kòyò ô̌ dǒ mǒkhû̌ hèlò̤ nutôpwa̤ pě. 49Pa pṳ̂̌꤮ tôpwa̤, pa ô̌ kû̌ panǎ̤glǒ dǒ asô̌sô̌kû̌ PhaAda anǎ̤glǒ nǒ̤. Bǎbǎkǎlè dǒ nô̌kò pě panǎ̤glǒ nî̌ a gǔ sô̌sô̌kû̌ Khrǐ dǒ a hèlò̤ dǒ mǒkhû̌ nutôpwa̤ anǎ̤glǒ pě.

50Khôbǒsû̌ sî, khònò̤̌ he sǎyṳ hî̌ bǎ sî kû̌ panǎ̤glǒ phěyî̌ dǒ a ô̌ kû̌ sǐ kû̌ shi nî̌ a cû̌nṳ̌ ô̌htûpwa̤jò dǒ Cǒmara ashiagǎkû tô̤̌. Ma̤titèhî̌dě panǎ̤glǒ dǒ asoapî̌lṳ̂̌ jò tûjû̌pwa̤ nî̌, a ô̌htûpwa̤ khòpè̤̌ tûjû̌pwa̤ tô̤̌. 51Khònò̤̌ he sǎyṳ hî̌ bǎ sî ta̤ dǒ kòyò sî̌ganǎ̤ khôtô̤̌ nutokhlǒ. Pa gǔ sibò pṳ̂̌꤮ tôpwa̤ pě nî̌ amè̤̌tô̤̌. Bǎbǎkǎlè panǎ̤glǒnu a gǔ htû̌lè̌ tèplè̌kèbò pṳ̂̌꤮ tôpwa̤ pě. ^k 52Dǒ a htûhtò̌ pěnu, aphwèdǎtrǐ pě, a gǔ phwèkhlo pe kû̌ pa tèhtè̌pǐ̤lǎ pamǐ̤sǎnu pě. Lṳmṳ̌ni̤ nô̌kò gutṳ̌ pě tôni̤nu, pa gǔ ganǎ̤de kǐlû pwe̤htò̌ pě. Bǎ kǐlû pwe̤htò̌ akhanu, pô̤̌khô kòyò dǒ a si tokhlǒ gǔ htûpwa̤ getîkhî lô̌khô tûjû̌pwa̤ pě ayanudě, asî ihtǒhtûpwa̤ge dǒ ta̤si pě. Bǎbǎkǎlè kòyò dǒ a ô̌htûpwa̤ pe bǎnutôni̤ pě tokhlǒnu, anǎ̤glǒ tokhlǒ gǔ htû̌lè̌ tèplè̌ gebò pě. 53Panǎ̤glǒ dǒ a sopî̌jònu, a bǎ htû̌lè̌ tèplè̌kè kû̌ nǎ̤glǒ dǒ a sopî̌jòtô̤̌nu pě. Panǎ̤glǒ dǒ a sijònu, a bǎ htû̌lè̌ tèplè̌kè kû̌ nǎ̤glǒ dǒ a sijòtô̤̌nu pě. 54Dǒ panǎ̤glǒ htû̌lè̌ tèplè̌kè kû̌ nǎ̤glǒ dǒ a sijòtô̤̌ pě akhanu, a gǔ lǒhtò̌behtò̌ sô̌sô̌kû̌ lî̤plò̌shǐkû hî̌ kû̌, “Ta̤si lò̤jû̌kè hǒ, kòyò ma̤pè̤̌ phlǔyǎ hǒ.” ^l

55“Ǒ ta̤si, na ma̤pè̤̌jò pe kòyò tô̤̌. Na ta̤wè̤̌ta̤htò ashû̌asho dǒ a gǔ ma̤pò̤̌ma̤sha kòyò tokhlǒnu a ô̌ bǎtè?” ^m

56Ta̤si a ta̤siwi̤sòwò̤ dǒ a gǔ ma̤pò̤̌ma̤sha kòyò numî̌ a nǐ̤bǎ dǒ ta̤sǔta̤plě alô̤ dě ta̤sǔta̤plě a ta̤siwi̤sòwò̤ numî̌ a nǐ̤bǎ dǒ ta̤sû̌ta̤tòwò alô̤ pwǎ. 57Bǎbǎkǎlè pa hî̌bwǐhî̌sîrî Cǒmara꤮ tô̤̌, dǒ Běcǎ Yeshǔ Khrǐ ma̤pè̤̌ hto ta̤ dǒ paya akhû̌akhî, Cǒmara ǐ hto pa ta̤ma̤pî̌ ta̤sǔ a ta̤siwi̤sòwò̤ kû̌ ta̤si a ta̤siwi̤sòwò̤ nutokhlǒ hǒ.

58Pô̤̌nudě, he khô sî, khònò̤̌dě ihtǒ tònòwô̌ lô̌khô dě ô̌měô̌gle lô̌khô dǒ sî ta̤yṳ̌ akûnu nî̌. Ma̤ shû̌shû̌ lô̌khô Cǒmara ata̤ma̤ pṳ̂̌꤮ taplǎ nî̌꤮, ma̤titèhî̌dě sî ma̤ Běcǎ ata̤ma̤nu a tônô̤ nô̌ sîya tô̤̌.