1 Corinthians 16
Kû ta̤ma̤lṳ dǒ Cǒmara a kòyò tokhlǒ aya
1Khònò̤̌, he sǎyṳ hî̌ sî kû̌ sî kû ru ta̤ma̤lṳ dǒ sî gǔ ma̤jè̌ kû̌ ta̤dòkûphû̌ dǒ a hǎwě̤shèwè̤ dě a ô̌ dǒ Yǔdagǎkû nutokhlǒ awe̤akè. He sǎyṳ hî̌ sî kû̌ gû̌ma̤ pô̤̌ he hî̌nǎ Galatǐ ta̤dòkûphû̌ nutokhlǒ bǎma̤ yǎ nu. a 2Bǎ lṳmṳ̌dǔ pṳ̂̌꤮ plǎplǎ ▼▼Yǔdaphû̌ a lṳmṳ̌dǔ mî̌ mô̤gètè̤. Běcǎ siǐhtǒge alṳmṳ̌ni̤ mî̌ mô̤gètè̤ hto nutini̤
bǎ hǒnu, sî tôpwa̤ kû̌ tôpwa̤ tô bè̌ ô̌plǒ khô̌ sî ru nṳ̌ tôshô̌bě kû̌ tôshô̌bě akûnu. Sî kè̌ bè̌plǒ mò̌ lû̌û pô̤̌nu hî̌dě dǒ he hètǒ̤ akhapěnu, sî lǎ̤lṳ̂cû̌ kûplǒ petô̤̌. 3Dǒ he hètǒ̤ pěnu, sî tô rû̌htò̌ kòyò tokhlǒ dǒ a bǎ cû̌sû bǎ kòyò ru dǒ Wî̤̌yarǔshôle pě. Dě pô̤̌khô kòyò dǒ a gǔ phî̌shǐshu ruhta pěnu tokhlǒ gǔ sî̌ganǎ̤ kû̌ kòyò ǐ runu kû̌ ta̤we̤ta̤kè mî̌titè ayanu, he gǔ wě̤cû̌ǐ bǎ pwa̤phî̌shǐshu ru nutokhlǒ lî̤ tôbǎ pě, dě he nophî̌cû̌ǐ kû̌ asî pě. 4Bǎnukha pě, he lǎ̤lṳ̂ tôcû̌ pakû̌ asî pě kè̌hî̌dě asî gǔ cû̌wô̤̌wô̤̌ kû̌ he hî̌pěmî̌ anǐ̤ pwǎpwǎ. Khûpò̌lǔ a ta̤yè̤lò̤nǎ
5He lǎ̤lṳ̂ cû̌nṳ̌wǐ dǒ Mèsidûnǐ̤yagǎ akhû̌akhî, dǒ he cû̌nṳ̌ hto dǒ mèsidûnǐyagǎ pěnu, he gǔ hè tutṳ̌ dǒ sî ô̌ pě. c 6He gǔ hè ô̌lèyî̤ kû̌ sî tîkî̌ pě kǎlè. He ô̌plǒ sělě kû̌ sî dǒ gǎwô̤̌khanu pě kǎlè. Htopědě, he gǔ cû̌ sělě pô̤̌ klè̌ pě. Dě he gǔ cû̌ sělě pô̤̌ klè̌ bǎtè tôkû pěnu bǎbǎ, he kè̌shuǐ kû̌ sî gǔ ma̤jè̌bò̌ he pwǎ. 7Hè ô̌lè pwǎ tashò̌phû̌nô̤̌ dě a ma̤ sǎyṳ hè ô̌lè he tô̤̌. Běcǎ kè̌ sǎphlǒô̌ hî̌dě, he sǎyṳ hè ô̌lè yî̤ kû̌ sî tîkî̌. 8He gǔ cû̌ ô̌ bǎ Wî̤̌ěphěsu akû nu pě dě he gǔ ô̌ tǒ̤dǒ pwè dǒ kòyò kaǎ kû̌ Phîtîkhò̌sîtî htonu pě. d 9Kòyò dǒ a sǎkhěkhû̌khwè he tokhlǒnu a ô̌ dû̌wî̤ bǎbǎkǎlè he cû̌ ô̌ bǎ Wî̤̌Ěphěsu akûnu a lě̤dû̌pwî̤htû dǒ heya ma̤titèhî̌dě kòyò dǒ a sǎyṳ ganǎ̤de Cǒmara alě̤ayô̤̌ tokhlǒnu a ô̌ wô̤̌꤮ pe. 10Htû̌ Khûtîmôte hè kû̌ sî pě akhanu, kè̌pǒ̤ǐ wô̌ a nî̌, ma̤titèhî̌dě a mî̌ Běcǎ apwa̤ma̤ta̤phû̌ tôpwa̤ dǒ a sô̌sô̌ kû̌ henu hǒ. e 11Sî bǎ gènè̤ pî̌tî̌ yǎ tôpwǎ̤꤮ tô̤̌. Pô̤̌khô a gǔ getǒ̤bò̌ sô̌ dǒ he ô̌, htokhôtô̤̌ pô̤̌khô a gǔ cû̌ sělě mô̤mô̤wô̌wô̌ pô̤̌ klè̌ dǒ alô̤mô̤̌ tôkhô ayanu, sî bǎ ma̤jè̌ yǎ, ma̤titèhî̌dě he ô̌pǒ̤kè̌shuǐ a kû̌ akhô pṳ̌wè̤̌ khrǐphû̌ ashǔshawa̤ tokhlǒ gǔ getǒ̤ wô̤̌wô̤̌ lû̌û dǒ he ô̌. 12Khûapò̌lǔ mî̌ pa pṳ̌wè̤̌ khrǐphû̌ tôpwa̤. A dě he noshû̌ yǎ dǒ a gǔ cû̌ô̌lè kû̌ sî dě a gǔ cû̌kû̌ pa pṳ̌wè̤̌ khrǐphû̌ dǒ a cû̌ô̌lè kû̌ sî nutokhlǒ bǎbǎkǎlè a hî̌ kû̌ khònò̤̌dě a sǎyṳ cû̌ô̌lè khôtô̤̌, dǒ ashěkhǎ ô̌ pe dě a cû̌ô̌lè kû̌ nô̌ sî pě a hî̌ pô̤̌nu.Ta̤hî̌bǎ dǒ nô̌kò gutṳ̌ tokhlǒ
13He pṳ̌wè̤̌ sî꤮, ô̌sòklò lô̌khô sînǎ̤ pṳ̂̌꤮ taplǎ nî̌꤮, ihtǒ tònòwô̌ lô̌khô dǒ sî ta̤yṳ̌ǎ Khrǐ akûnu nî̌, bè̌ khuhe lô̌khô sî sǎphlǒ nî̌꤮, bè̌shû̌bè̌sho lô̌khô sî sǎphlǒ dǒ ta̤yṳ̌ akûnu nî̌꤮. 14Sî ma̤ tètètè̌ bǎbǎ꤮, mô̤nṳ̌ kòyò dě ma̤ lô̌khô nî̌꤮. 15Khûsôtebenǎsa kû̌ a hǐphû̌phòphû̌ awe̤akè numî̌ sî sî̌ganǎ̤ bò hǒ. Dǒ Akheyagǎkû numî̌, pwa̤ dǒ a yṳ̌nǐ̤nǎ̤nǐ̤ ge wǐ Khrǐ mî̌ asî nutokhlǒ hǒ. Dě asî ma̤jè̌ Cǒmara a kòyò nutokhlǒ pṳ̂̌꤮ taplǎ. f 16He pṳ̌wè̤̌ sî꤮, he kwisǎyṳ sî, kòyò dǒ a htû ikǒlǒkòdû̌ sô̌sô̌kû̌ Khûsôtebenǎsa kû̌ akhô pwa̤ma̤plǒ ta̤ tokhlǒ hî̌ sî dě ganǎ̤de lô̌khô asî nutokhlǒ ayô̤̌ nî̌. 17Sîkhô dokûphû̌ Khûsôtebenǎsa, Khûbûtǔnatǔ kû̌ Khûakhayǎku tokhlǒ hètǒ̤ dě he sǎlě̤ mî̌ca. Sî ô̌ yî̤ dě sî hè kè̌shǐbǎ he tô̤̌ bǎbǎkǎlè khònò̤̌ asî hè kè̌shǐ hî̌mô̤hî̌wô̌bò̌ he akhû̌akhî, a sô̌sô̌ kû̌ sî hè kè̌shǐ shěshu hî̌mô̤hî̌bǎwô̌ he hǒ. 18Pô̤̌ asî ma̤ sǎlě̤sǎlò̤ sî nu, asî ma̤ sǎlě̤sǎlò̤ he. Dě bè̌dubè̌nǎ̤ lô̌khô kòyò pô̤̌nu tokhlǒ nî̌꤮. 19Pwa̤yṳ̌ǎta̤plǒcu dǒ a ô̌ dǒ Ashǎgǎ kû nutokhlǒ sûhè bǎ sî ata̤hî̌mô̤hî̌wô̌ tokhlǒ. PhaAkǔlǎ kû̌ ama Mǒ̤phrishila kû̌ ta̤dòkûphû̌ dǒ a hècaba dǒ lû̌ûhǐ tokhlǒ sûhè padô̌ sî asî ata̤ hî̌mô̤hî̌bǎwô̌ dǒ Khrǐ akû g. 20Pa pṳ̌wè̤̌ Khrǐphû̌ dǒ a ô̌ bǒo lǒ̤bò tokhlǒnu bǎbǎ, a sûhè padô̌ sî ata̤ hî̌mô̤hî̌bǎwô̌ tokhlǒ. Sî ô̌ lô̌khô bǎnu tokhlǒ bǎbǎ, hî̌mô̤hî̌bǎwô̌ǐ tûû̌ lû̌û tôpwa̤ kû̌ tôpwa̤ dě dǔlè̌lṳ̌ lô̌khô sî ta̤mô̤nṳ̌ lû̌û tôpwa̤ kû̌ tôpwa̤nu nî̌꤮. 21He mî̌ Khûpò̌lǔ, he wě̤cû̌ bǎ sî lî̤tôplô kû̌ henǎ̤ tûû̌ he wě̤cû̌ bǎ sî dě he hî̌ pô̤̌o, “Hî̌mô̤hî̌bǎwô̌ sî pṳ̂̌꤮ tôpwa̤,” he wě̤ pô̤̌nu. 22Mòpèpè̌꤮ bǎbǎ, dǒ a mô̤ǐ Běcǎ tô̤̌ nu, ta̤ǐsho gǔ hèbǎ pû yǎ nî̌꤮. “Maranǎsa” ǒ pa Běcǎ! hèmò̌ nî̌꤮. 23Běcǎ Yeshǔ abwǐsîrî ô̌ pû kû̌ sî nî̌꤮. 24Lǒ̤꤮ bò kòyò dǒ a yṳ̌nǐ̤nǎ̤nǐ̤ Khrǐ dě a htû kû̌ Khrǐ tôcǒnô̤̌ tokhlǒnu, he ta̤mô̤nṳ̌ ô̌cu pû kû̌ asî nî̌꤮.
Copyright information for
KxfSCKXF