1Cor 2 | KxfSCKXF | STEP | He sû̌khô sî, bǎ he hè hî̌ǐ bǎ sî kû̌ Cǒmara alě̤ayô̤̌ akhanu, lî̤phlǒ dǒ kòyò sî̌yahtû tô̤̌ bǎbǎkǎlè kòyò gènè̤dû̌ǐ lô̌khô anǎ̤ tokhlǒ noǎ ta̤ tokhlǒnu, he hî̌bǎnô̌ sî tôkhò̌꤮ tô̤̌.

1 Corinthians 2

Khrǐ tṳ̌sikhòsi anǎ̤ dǒ nò̌dò̌htǔlô̤ awe̤akè

1 He sû̌khô sî, bǎ he hè hî̌ǐ bǎ sî kû̌ Cǒmara alě̤ayô̤̌ akhanu, lî̤phlǒ dǒ kòyò sî̌yahtû tô̤̌ bǎbǎkǎlè kòyò gènè̤dû̌ǐ lô̌khô anǎ̤ tokhlǒ noǎ ta̤ tokhlǒnu, he hî̌bǎnô̌ sî tôkhò̌꤮ tô̤̌. 2 Ma̤titèhî̌dě, he bè̌lò̤ hto he sǎphlǒ kû̌ he gǔ shôbǐǐlṳ̌ pwǎtǒ̤ Yeshǔ Khrǐ nutôpwa̤ awe̤akè kû̌ ata̤si dǒ nò̌dò̌htǔlô̤ awe̤akè nô̤̌pwǎ. 3 Bǎ he hè dǒ sî ô̌ bǎnu tôplǎ akhanu, he sî̌ganǎ̤ ǐtûû̌ he ta̤khû̌shiǎjǎ dě he ǐsha gònò̤̌gòglè. ^a 4 Htokhôtô̤̌ bǎ he shôbǐǐlṳ̌ bǎ sî akhanu, he hî̌bǎ lô̌ǐplò̤ǐnô̌ sî kû̌ kòyò hǎkhû̌phû̌ a ta̤sî̌ta̤jò̌ tôkhò̌꤮ tô̤̌. Bǎbǎkǎlè sî yṳ̌ǎ lô̌khô ta̤ dǒ he shôbǐǐ bǎ sînu tokhlǒ, ma̤titèhî̌dě Yôla Plò̌shǐ Běcǎnu a pô̤phǎshû̌sho dě a dǐsî̌nǎ̤phlô bǎ sî dě sî yṳ̌ǎ hǒ. 5 Pô̤̌nudě, sî ta̤yṳ̌ta̤nǎ̤ tokhlǒnu, a nǎla̤ǐ dǒ kòyò hǎkhû̌phû̌ a ta̤sî̌ta̤jò̌ tokhlǒ alô̤nu mè̤̌tô̤̌. A nǎla̤ǐ dǒ Cǒmara a ta̤pô̤ta̤phǎ alô̤nu hǒ.

Cǒmara a ta̤sî̌ta̤jò̌ dǒ adû̌ayô̤̌

6 Kòyò dǒ a ta̤yṳ̌sho tokhlǒnu, he sû̌ǐ bǎ asî kû̌ ta̤sî̌ta̤jò̌ awe̤akè tokhlǒ. Ta̤sî̌ta̤jò̌ hǒtokhlǒ nî̌, a ô̌ dǒ kòyòhǎkhû̌phû̌ a hè mè̤̌tô̤̌. A ô̌ dǒ kòyòhǎkhû̌phû̌ a hè dǒ a ô̌ kû̌ a ta̤siwi̤sòwò̤ nutokhlǒ a ô̌ mè̤̌tô̤̌tô̤̌. Ma̤titèhî̌dě ta̤hǒtokhlǒnu a gǔ pî̌kèbò pě. 7 He shôbǐǐlṳ̌ bǎ kòyò kû̌ Cǒmara a ta̤sî̌ta̤jò̌ dǒ adû̌ayô̤̌ tokhlǒ. Dǒnô̌dǒhǎ akhanu, Cǒmara dǔlè̌lṳ̌ bǎ kòyò kû̌ ta̤sî̌ta̤jò̌ hǒtokhlǒ nò̌khôtô̤̌. Dǒ Cǒmara bô̌lò̤ hǎkhû̌ khôtô̤̌ akhanu, a ta̤yè̤lò̤nǎ bǎ hto dǒ a gǔ ma̤ bǎ pa ta̤bwǐdû̌sîrîhtû tokhlǒnu hǒ. 8 Ta̤sî̌ta̤jò̌nu, kòyò dǒ a htû ikǒlǒkòdû̌ dǒ hǎkhû̌ nutokhlǒ sî̌ganǎ̤ tôpwǎ̤꤮ tô̤̌. Asî kè̌ sî̌ganǎ̤ hǒo hî̌dě, asî ma̤sihtò̌ nô̌ Běcǎ dǒ a ô̌ kû̌ a ta̤bwǐdû̌sîrîhtû nutôpwa̤ dǒ nò̌dò̌htǔlô̤ tôkhò̌꤮ tô̤̌. 9 Pô̤̌ lî̤plò̌shǐ hî̌nǎ dǒ awǐkha kû̌,

“Ta̤ dǒ Cǒmara tîwî̌tòwò nǎ dǒ a gǔ ma̤ bǎ kòyò dǒ a mô̤nṳ̌ lû̌û tokhlǒ ayanu, kòyò kè̌shǐ, ganǎ̤de kû̌ gènè̤ htò̌tǒ̤ tôpwǎ̤꤮ khôtô̤̌nu” ama̤nǎ htobò hǒ. ^b

10 Bǎbǎkǎlè, Cǒmara dǔsî̌ya tutṳ̌ bǎ pa ta̤nutokhlǒ kû̌ Yôla Plò̌shǐ Běcǎ.

Yôla Plò̌shǐ Běcǎ nî̌ a sî̌ya bò ta̤pṳ̂̌꤮ tôcǒ. A sî̌ya jòbò Cǒmara a ta̤gènè̤ dǒ adû̌ayô̤̌ tokhlǒ. 11 Pô̤̌nudě, kòyò tôpwa̤ a ta̤gènè̤ lǒ̤bò tokhlǒnu, a kû̌ a sî̌ganǎ̤ tûû̌ pwǎ. Kòyò sî̌yahtû kû̌ a tôpwǎ̤꤮ tô̤̌. A sô̌sô̌kû̌ pô̤̌nudě, tǒ̤pwǎ Cǒmara Yôla Plò̌shǐ sî̌ganǎ̤ bò Cǒmara a ta̤gènè̤ tokhlǒ. Kòyò dǒ ashǔshawa̤ tokhlǒ sî̌yahtû tôpwǎ̤꤮ tô̤̌. 12 Cǒmara ǐ pa a Yôla Plò̌shǐ, dě Cǒmara a Yôla Plò̌shǐ nî̌, a ô̌ dǒ kòyòhǎkhû̌phû̌ a hè mè̤̌tô̤̌. Pô̤̌khô pa gǔ sî̌yaphlôbò ta̤ dǒ Cǒmara ǐ lò̤kwe pa tokhlǒ ayanu, pa nǐ̤bǎ Yôla Plò̌shǐ Běcǎ dǒ a hè dǒ Cǒmara a ô̌ nuhǒ. 13 Pô̤̌nudě, bǎ pa sû̌ǐ bǎ kòyò dǒ Yôla Plò̌shǐ Běcǎ ô̌ dǒ akû tokhlǒ akhanu, pa noǎ kòyò hǎkhû̌phû̌ dǒ a jò hî̌bǎ tokhlǒ a ta̤hî̌bǎ tômṳ̂̌꤮ tô̤̌. Pa hî̌bǎ pô̤̌ Yôla Plò̌shǐ Běcǎ sû̌ǐtòwòǐ pa nupwǎ. Pa hî̌phlô bǎ kòyò tokhlǒ kû̌ ta̤tě̤ta̤mè̤̌ pô̤̌ Yôla Plò̌shǐ Běcǎ sû̌ǐ pa nupwǎ. 14 Bǎbǎkǎlè mò̌pèpè̌ bǎbǎ, dǒ a nǐ̤bǎ kû̌ kòyò Yôla Plò̌shǐ Běcǎ dǒ a sǎphlǒkû tô̤̌ tokhlǒnu, a phî̌shǐshu gû̌ kòyò Cǒmara a Yôla Plò̌shǐ a ta̤sû̌ǐtòwòǐ tô̤̌. Kòyò pô̤̌nu tokhlǒnu, a sî̌yaphlôbò̌ gû̌ kòyò yô̤̌mûyô̤̌sǎ tô̤̌, a gènè̤ lô̌khô pwǎ kû̌ a ô̌lǒô̌khlo pwǎ, ma̤titèhî̌dě, pwa̤ dǒ a hî̌phlôbò̌ bǎ asî numî̌ tǒ̤pwǎ Yôla Plò̌shǐ Běcǎ tôpwa̤nô̤̌ pwǎ. 15 Lǒ̤bò kòyò dǒ a nǐ̤bǎ Yôla Plò̌shǐ Běcǎ tokhlǒnu, a sî̌ganǎ̤ bò̌bò ta̤sû̌ǐtòwòǐ tokhlǒ hǒ. Bǎbǎkǎlè kòyò dǒ a nǐ̤bǎ gû̌ kòyò Yôla Plò̌shǐ Běcǎ tô̤̌ tokhlǒnu, a sî̌yaphlôbò̌ gû̌ kòyò dǒ a ô̌ kû̌ Yôla Plò̌shǐ Běcǎ tokhlǒ a ta̤gènè̤ tokhlǒ tô̤̌. 16 Pô̤̌ lî̤plò̌shǐkû hî̌ kû̌,

“Mò̌pè tôpwa̤ sî̌ya htûbò̌ Běcǎ asǎphlǒ ya? Kòyò dǒ a dǔsî̌yajè̌ Běcǎ kû̌ a ta̤gènè̤ tokhlǒ numî̌ a ô̌ tôpwa̤pwa̤ ya?”

Bǎbǎkǎlè pa tokhlǒnu, pa nǐ̤bǎ hto Khrǐ sǎphlǒ a ta̤gènè̤ tokhlǒ hǒ. ^c