1Cor 4 | KxfSCKXF | STEP | Sî tô bè̌ lô̌khô pa pô̤̌ Yeshǔ Khrǐ apwa̤ma̤ta̤phû̌ tokhlǒnu. Sî tô bè̌ lô̌khô pa pô̤̌ pwa̤ma̤ta̤phû̌ tokhlǒ dǒ a sû̌ǐtòwòǐ shôbǐǐphlô bǎ kòyò kû̌ ta̤tě̤ta̤mè̤̌ dǒ kòyò sî̌ganǎ̤ nô̌ khôtô̤̌ dǒ awǐkha nutokhlǒ. Dě Cǒmara ǐlò̤ pa ta̤ma̤ dǒ pa gǔ ma̤ ayanu hǒ.

1 Corinthians 4

Khrǐ a pwa̤nophû̌ tokhlǒ

1 Sî tô bè̌ lô̌khô pa pô̤̌ Yeshǔ Khrǐ apwa̤ma̤ta̤phû̌ tokhlǒnu. Sî tô bè̌ lô̌khô pa pô̤̌ pwa̤ma̤ta̤phû̌ tokhlǒ dǒ a sû̌ǐtòwòǐ shôbǐǐphlô bǎ kòyò kû̌ ta̤tě̤ta̤mè̤̌ dǒ kòyò sî̌ganǎ̤ nô̌ khôtô̤̌ dǒ awǐkha nutokhlǒ. Dě Cǒmara ǐlò̤ pa ta̤ma̤ dǒ pa gǔ ma̤ ayanu hǒ. 2 Kòyò dǒ kò ǐlò̤ lû̌û ta̤ma̤ tokhlǒnu, a tôbǎ cǒ kû̌ ata̤ma̤. 3 Sî kè̌ hî̌cǒ he kû̌, Khûpò̌lǔ nî̌ tôyṳ̌ǎ ya, mî̌ tôyṳ̌ǎ yǎtô̤̌ bǎbǎ, a lǎ̤hî̌ô̌ bǎtô̤̌. Kòyò ashǔshawa̤ tokhlǒ kè̌ hî̌ he bǎbǎ, a lǎ̤hî̌ô̌ nô̌tô̤̌tô̤̌, ma̤titèhî̌dě he nǎ̤běcǎ tûû̌ dě he hî̌lò̤ tûû̌ henǎ̤ pô̤̌ sî hî̌ henu tôkhò̌꤮ tô̤̌. 4 He sǎphlǒ nî̌ mô̤mô̤̌꤮ a mô̤ pwǎ, he sǎphlǒnu a bè̌ tîkhîsô̌ he ta̤sǔ tôcǒ tô̤̌. He sǎphlǒnu a hî̌ he pwî̌tètè̌ bǎbǎ, alǎ̤hî̌ ô̌ tôcǒ꤮ tô̤̌. He ma̤ta̤nu asǔ ya, mî̌ atô yanu, pwa̤ dǒ a sî̌ganǎ̤ hewe̤hekè dě a gǔ cî̌htò̌ he pě tôpwa̤nu mî̌ tǒ̤pwǎ Běcǎ tôpwa̤ nô̤̌ pwǎ. 5 Pô̤̌nudě ta̤cî̌htò̌ ashěakhǎ hè tǒ̤ nò̌khôtô̤̌nu, cû̌ cî̌htò̌ tǎ̤ kòyò tôpwǎ̤꤮ tǎ̤mǎ̤. Ô̌pǒ̤ lô̌khô tǒ̤dǒ Běcǎ hè cî̌htò̌ kòyò pě tôplǎnu. Ta̤ô̌hǔô̌sè̌ dǒ ta̤khǐsiwi̤ akû tokhlǒnu, a gǔ dǔlè̌lṳ̌htò̌ pě. Dě kòyòhǎkhû̌phû̌ a ta̤gènè̤ ta̤sûû̌ dǒ a noma̤ lû̌û tokhlǒnu, Cǒmara gǔ dǔlè̌lṳ̌ sî̌ya lû̌û pě. Bǎnukha pě dě, pô̤̌ kòyò tôpwa̤ kû̌ tôpwa̤ ma̤ ta̤nu, Cǒmara gǔ htû̌sò̌htò̌ǐ asî pě.

6 He pṳ̌wè̤̌ sî, pô̤̌khô a gǔ htûbwǐhtûsîrî dǒ sîya dě he shôbǐǐlṳ̌ bǎ sî kû̌ hewe̤hekè kû̌ Khûapò̌lǔ awe̤akè pô̤̌ ta̤ kè̌lû̌ tôcǒnu hǒ. Ta̤ dǒ he sǎyṳ hî̌ bǎ sî yô̤̌mûyô̤̌sǎ numî̌ pô̤̌o. “Ma̤ tûlû̌ tǎ̤ lô̌khô pô̤̌ lî̤plò̌shǐ wě̤ nu tǎ̤mǎ̤.” Pô̤̌nudě hǒtôpwa̤ dě awô̌khlo kû̌ dǒ nutôpwa̤, cû̌ htû̌sò̌ ǐtûû̌ lô̌khô kòyò pô̤̌nu tôpwǎ̤꤮ tǎ̤mǎ̤. 7 Mî̌mò̌pè tôpwa̤ hî̌ na kû̌ nasî̌najò̌ khô̌khlo kû̌ kòyò pô̤̌nu tôpwa̤ ya? Lǒ̤꤮ bò ta̤ dǒ a ô̌ kû̌ sîtokhlǒ numî̌ Cǒmara ǐ sî mè̤̌tô̤̌ ya? Pô̤̌nudě, sî cû̌ nè̤̌ bè̌dû̌bè̌pwǎ̤ tûû̌ sînǎ̤ asô̌sô̌kû̌ Cǒmara ǐlò̤ kwe sî mè̤̌tô̤̌nu ma̤hî̌tè?

8 Sî gènè̤ kû̌ lǒ̤꤮ bò ta̤ dǒ sî lǎ̤lṳ̂ tokhlǒnu a ô̌ bò hǒ, lǒ̤꤮ bò Cǒmara olò̤ tokhlǒnu sî nǐ̤bǎ lǒ̤bò hǒ, sî gènè̤ dòdû̌ lô̌khô pô̤̌nu. Sî gènè̤ dòdû̌ tûû̌ lô̌khô kû̌ sî htû khwǐ dǒ Cǒmara ashiagǎkû hǒ, bǎbǎkǎlè pa dě pa htûbò̌ gû̌ kòyò khwǐ tô̤̌. Pô̤̌khô pa gǔ htû khwǐ kû̌ sî dě, he sǎyṳ nohtû sî khwǐ hǒ. 9 Ma̤titè he hî̌ pô̤̌o numî̌, a sô̌sô̌ kû̌ pa pwa̤nophû̌ tokhlǒnu, Cǒmara bè̌ phǔlò̤khlo pa dǒ kòyò shǔshawa̤ tokhlǒ alǎ̤. Htokhôtô̤̌ asô̌sô̌kû̌ kòyò lò̤tě̤ dǒ apô̤kû tokhlǒ dǒ kòyò glè̌ ma̤si tètè̤̌ asî dǒ kòyò tôprṳ̂tôphǎ a lô̤mô̤̌nu. Dě asô̌sô̌kû̌ lǒ̤bò mǒkhû̌ tanaphû̌ tokhlǒ kû̌ kòyò hǎkhû̌phû̌ tokhlǒ kè̌ hè bò cakǎ pa nǒ̤. 10 Ma̤titèhî̌dě dǒ pa gû̌ Khrǐ akò akhû̌akhî, kòyò hî̌ pa kû̌ kòyò kimwi. Bǎbǎkǎlè sî dě, sî htûhtò̌ ta̤ tôcǒ nô̤̌ kû̌ Khrǐ akhû̌akhî, sî gènè̤ ǐtûû̌ lô̌khô sînǎ̤ kû̌ pwa̤sî̌pwa̤jò̌phû̌ tokhlǒ hǒ. Pa dě pa khû̌shiǎjǎ tûû̌ paya pwǎ, sî dě sî shû̌shokhò̌sho tû̌ pû nî̌. Kòyò gènè̤ pî̌tî̌ pa pwǎ. Sî dě kòyò bè̌dû̌bè̌htû cǎkǎ sî no̤. 11 Tǒ̤lò̤khònò̤dě pa ô̌tî̤wî̤̌ǎ, ô̌tî̤wî̤̌ô, pakûpasô̌ pwǎ jehǐyò̤̌ ayò̤̌ pwǎ. Pa khòbǎ tûû̌ kòyòpo̤kòyòplè pa. Pa shôdôhǐ shôdôphò tûû̌ paya pwǎ. 12 Pô̤̌khô pa gǔ ǎbǎôbǎ ayanu, pa bǎ jî̌pwǐ̤jî̌li̤ ma̤ta̤ma̤. Bǎ kòyò ǐsho pa akhanu, pa ǐshowî̤ geshěshu kòyò. Bǎ kòyò ma̤jî̌ma̤jû̌ pa akhanu, pa khòsǎphlǒhtû shěshu pwǎ kòyò pwǎ. ^a 13 Bǎ kòyò hî̌ takǎ pa akhanu, pa hî̌ geshěshǔ wô̌bǎ pwǎ kòyò pwǎ. Tǒ̤lò̤khònò̤̌nu, pa mî̌ asô̌sô̌ pwǎ kû̌ kòyò cû̌ wîkè hǎkhû ta̤î̌ta̤so kû̌ ta̤wè̤̌ta̤sô̌ nutokhlǒ pwǎ.

14 He sǎyṳ nosòwò̤̌ sî dě he wě̤ cû̌ bǎ sî lî̤nu mè̤̌bǎtô̤̌. He mô̤nṳ̌ sî pô̤̌ hephû̌ kû̌ henǎ̤ dě he sû̌ǐtòwòǐ cû̌ sî pwǎ. 15 Sara dǒ a sû̌ǐtòwòǐ sî nu a ô̌ pwa̤ tôsò̌ bǎbǎkǎlè sîpha mî̌ a ô̌ pwǎ tôpwa̤꤮ nô̤̌pwǎ. Bǎ he shôbǐǐlṳ̌ bǎ sî ta̤sǎlě̤we̤kè dě sî yṳ̌ǎhè Khrǐ akhanu, he htû sîpha hǒ. 16 Pô̤̌nudě he kwisǎyṳ sî kû̌ sî gû̌ kè̌lû̌ he ta̤ô̌htûpwa̤nu. ^b 17 Dǒ ta̤we̤ta̤kè hǒo akhû̌akhî, dě he nohè Khûtîmôte dǒ sî ô̌ hǒ. A mî̌ asô̌sô̌kû̌ hephû̌ kû̌ henǎ̤ dǒ he mô̤ǐ yǎ dě acǒ kû̌ ayô̤̌ dǒ Běcǎ akû tôpwa̤. Kòyò dǒ a gû̌ Khrǐ akò tokhlǒnu, a tô ô̌htûpwa̤ lô̌khô hî̌tènu, a gǔ dǔsî̌yabǎ sî ma̤pô̤̌ he ô̌htûpwa̤nu pě. Hǒonumî̌ ta̤ dǒ he sû̌ǐ bǎ kòyò dǒ a yṳ̌nǐ̤nǎ̤nǐ̤ Yeshǔ Khrǐ tokhlǒ dǒ gûlǎ̤ pṳ̂̌꤮ tûkû tokhlǒnu hǒ.

18 Sî gènè̤ lô̌khô kû̌ he hè ô̌lè kû̌pe sî tô̤̌ akhû̌akhî, dǒ sîkla tokhlǒkhlǒnu a phî̌htò̌lǒ lô̌khô anǎ̤. 19 Bǎbǎkǎlè kè̌ Běcǎ sǎphlǒô̌ he dǒ he bǎ cû̌ô̌lè kû̌ sî hî̌dě he gǔ hè ô̌lènṳ̌ sî pě. Htû̌ he hètǒ̤ sî ô̌ pěnu, kòyò dǒ a phî̌htò̌lǒ anǎ̤ nutokhlǒ a ma̤kwè̌ hî̌tènu he gǔ hè kè̌lǎ sî̌ya kû̌ henǎ̤ pě. Mî̌ asî nǐ̤bǎ mè̤̌mî̌ca ta̤pô̤ta̤phǎ dǒ Cǒmara a ô̌ ya, mè̤̌tô̤̌dě a ô̌ tônô̤pwǎ akhû̌phě tôbǎ a ta̤hî̌bǎ pwǎ yanu he hè kè̌lǎ sî̌ya kû̌ henǎ̤ pě. 20 Kòyò dǒ a ô̌ bǎ Cǒmara ashiagǎkû tokhlǒnumî̌, a ô̌ pwǎtǒ̤ khû̌phě tôbǎ a ta̤hî̌bǎnô̤̌ mè̤̌bǎtô̤̌. Cǒmara htû̌lè̌ tèplè̌kè htobò asî ata̤bè̌sû̌bè̌sǎ tokhlǒ kû̌ a ta̤pô̤ta̤phǎ hǒ. 21 Sî kè̌ wîkè sî ta̤ma̤ dǒ a phû̌mò̌shǐhtô tokhlǒ tô̤̌ numî̌, he gǔ hèsǎhtǎ sho sî pě. Sî kè̌ wîkè hî̌dě he gǔ hè hî̌bǎjǎhî̌bǎmô̤ pwǎ sî pě dě he gǔ mô̤ǐ tûû̌ sî pě. Pô̤̌nudě, sî sǎyṳ lô̌khô bǎtè tôcǒya?