1Cor 5 | KxfSCKXF | STEP | Khònò̤̌dě, kòyò shôbǐǐlṳ̌bǎ he kû̌, dǒ sîklanu kòyò cû̌sǔnṳ̌plěnṳ̌ pwa̤mǒ̤ dě a cû̌sǔnṳ̌plěnṳ̌ tîkhîsô̌ tûû̌ kû̌ amǒ̤ nô̌ ô̌ tôpwa̤ he ganǎ̤de kòyò hî̌ bǎ he pô̤̌nu. Kòyò dǒ a yṳ̌ǎ Khrǐ tô̤̌ tokhlǒ dě ta̤sǔ pô̤̌onu a ma̤bǎ lô̌khô tô̤̌.

1 Corinthians 5

Ta̤cû̌sǔnṳ̌ pwa̤mǒ̤pwa̤khû ô̌htò̌ dǒ ta̤dòkû akû

1 Khònò̤̌dě, kòyò shôbǐǐlṳ̌bǎ he kû̌, dǒ sîklanu kòyò cû̌sǔnṳ̌plěnṳ̌ pwa̤mǒ̤ dě a cû̌sǔnṳ̌plěnṳ̌ tîkhîsô̌ tûû̌ kû̌ amǒ̤ nô̌ ô̌ tôpwa̤ he ganǎ̤de kòyò hî̌ bǎ he pô̤̌nu. Kòyò dǒ a yṳ̌ǎ Khrǐ tô̤̌ tokhlǒ dě ta̤sǔ pô̤̌onu a ma̤bǎ lô̌khô tô̤̌. ^a 2 Kè̌ ma̤pô̤̌nudě, sî cû̌ phǐhtò̌yô̤̌jò̌꤮ tûû̌ sînǎ̤ hî̌tè? Tònò̤̌꤮ sî phî̌htò̌yô̤̌ sînǎ̤nu, sî tô sǎplǎ̤ sikè sînǎ̤. Kòyò dǒ a cû̌sǔnṳ̌plěnṳ̌ pô̤̌o tôpwa̤pwa̤ nu, sî tô wṳ̂̌hǎhtò̌kè lû̌û dǒ sî aprṳ̂aphǎ akû. 3 He nǎ̤glǒ ô̌ yî̤ kû̌ sî bǎbǎkǎlè he sǎphlǒ icu kû̌ sî pwǎ. Kòyò dǒ a ma̤ta̤sǔ adû̌ayô̤̌ pô̤̌o tokhlǒnu, he cî̌htò̌ a dǒ Yeshǔ ami̤ akû pô̤̌ he ô̌plǒ kû̌ sînu hǒ. 4 Bǎ sî ô̌cuô̌plǒ kè̌shǐ kè̌khî wô̤̌wô̤̌ lû̌û akhapěnu, he sǎyṳ noma̤bò sî pṳ̂̌꤮ tôcǒ dǒ asô̌sô̌kû̌ he ô̌plǒ kû̌ sî pô̤̌nu. 5 Pô̤̌khô kòyò gǔ ma̤pî̌kè kòyò nutôpwa̤ a sǐshiphěyî̌ a ta̤sǎyṳsǎbǎ ayanu, sî bǎ ǐlò̤kè kòyò nutôpwa̤ dǒ hǎkhû̌tana a cǔdekû. Pô̤̌khô kòyò nutôpwa̤ a yôla htûpwa̤ gǔ nǐ̤bǎ ta̤hǎplǎge htû̌ Běcǎ a lṳmṳ̌ni̤ pě tôni̤ ayanu, sî bǎ ma̤ pô̤̌nu. Ma̤titèhî̌dě sî nǐ̤bǎhto Běcǎ a ta̤siwi̤sòwò̤ kû̌ a ta̤pô̤ta̤phǎ akhû̌akhî, ma̤ lô̌khô pô̤̌nu.

6 Sî cû̌ hî̌bǎ htò̌yô̤̌ tǒ̤ sîyô̤̌ pô̤̌numî̌ amè̤̌ tô̤̌. Gènè̤htò̌ lô̌khô yô̤̌ tômû dǒ a hî̌ kû̌, “Ta̤bû tîkî̌phû̌ pwǎ dě a ma̤kôphô̌htò̌bò mû̌ toglǒ,” kòyò hî̌ numî̌ sî sî̌ganǎ̤ bǎtô̤̌ya. Pô̤̌nudě kòyò nutôpwa̤ a ta̤sǔnu, a dǐhtûhtò̌bò sî saprṳ̂bò ata̤sǔ hǒ. ^b 7 Pô̤̌khô sî gǔ mṳ̂̌plî lîtiklǐbò ayanu, sî bǎ phî̌htò̌kè ta̤bûli̤ ata̤sǔnu, ma̤hî̌nudě sî htûhtò̌ sô̌sô̌kû̌ mû̌ sa dǒ ta̤bû ô̌patô̤̌nu pě. He sî̌ganǎ̤ tě̤tě̤mè̤̌mè̤̌ kû̌ sî mî̌ kòyò ma̤mṳ̂̌plî hto tokhlǒ hǒ, ma̤titèhî̌dě Khrǐ mî̌ pa ta̤cû̌tûlû̌pwè asû̌phû̌ dǒ a tṳ̌sikhòsi hto bǎ paya dě a plûkè pa ta̤sǔ tôpwa̤. ^c 8 Pô̤̌nudě pa ǎ ô wô̤̌wô̤̌ lû̌ ta̤cû̌tûlû̌pwènu tǎ. Mû̌ dǒ a ô̌sada kû̌ ta̤bûnu, pa tô ǎ yǎ tô̤̌. Ta̤bû hǒonu, a ma̤ dû̌htò̌ ta̤sǔ kû̌ ta̤phû̌mò̤̌shǐhtô tokhlǒ pwǎ. Pa gǔ ǎ ô wô̤̌wô̤̌ lû̌ mû̌ dǒ ta̤bû ô̌sada tô̤̌nu, kû̌ mû̌ dǒ a mṳ̂̌plînu kû̌ ta̤tě̤ta̤mè̤̌nu tokhlǒ tǎ! ^d

9 He wě̤ bǎ sî lî̤ dǒ awǐkha tôbǎ numî̌, he hî̌ sî kû̌ bǒsû̌khǎkhô tǎ̤ kû̌ kòyò dǒ a cû̌sǔnṳ̌plěnṳ̌ pwa̤mǒ̤pwa̤khû nutokhlǒ tǎ̤mǎ̤, he wě̤cû̌ bǎ sî pô̤̌nu. 10 Bǎbǎkǎlè he hî̌ pô̤̌o numî̌, he sǎyṳ hî̌ kû̌ bǎ bô̌sû̌ǐ kû̌ kòyò dǒ a yṳ̌ǎ gû̌ kòyò Yeshǔ Khrǐ tô̤̌ nutokhlǒ tǎ̤mǎ̤ pô̤̌nu mè̤̌tô̤̌. Dǒ asî akla tokhlǒkhlǒnu kòyò dǒ a cû̌sǔnṳ̌plěnṳ̌ pwa̤mǒ̤pwa̤khû, a ta̤ǎkǒôbe tûû̌ aya, a ǎhǔǎhî̌, a caba lô̌khô ta̤yô̤ta̤gî̌ sî tokhlǒnu a ô̌ akhû̌akhî, he sǎyṳ hî̌ kòyò pô̤̌nu tokhlǒ mè̤̌tô̤̌. Kòyò dǒ a yṳ̌ǎ gû̌ kòyò Cǒmara tô̤̌ tokhlǒnu sî bǎ bǒsû̌ǐ asî tô̤̌ kè̌hî̌dě, sî bǎ hǎhtò̌cû̌ tephekè plǒbò kû̌ hǎkhû̌nu hǒ. 11 He sǎyṳ hî̌ pô̤̌hî̌tèhî̌dě kòyò dǒ a hî̌lò̤ ǐtûû̌ lô̌khô anǎ̤ kû̌ ta̤dòkûphû̌ tokhlǒ bǎbǎkǎlè a kè̌ cû̌sǔnṳ̌plěnṳ̌ pwa̤mǒ̤pwa̤khû, a kè̌lǎ sǎyṳ̌ tû̌ aya, a caba ta̤yô̤ta̤gî̌, dô̌mi̤dô̌yô̤ kòyò, ǎmuômu mè̤̌tô̤̌dě ǎhǔǎhî̌sî tokhlǒnu bǒsû̌ tǎ̤ asî tǎ̤mǎ̤. Ǎcuôcu pwǎ kû̌ kòyò pô̤̌nu tokhlǒ pwǎ nu ǎcuôcu tǎ̤mǎ̤ mǎ̤.

12 – 13 Hî̌mèmè̤̌ mî̌, cî̌htò̌ kòyò ô̌ dǒ ta̤dòkû akhlo nutokhlǒ mî̌ he ta̤ma̤ mè̤̌tô̤̌. Kòyò pô̤̌nu tokhlǒ mî̌ Cǒmara cî̌htò̌ tûû̌ asî pě. Bǎbǎkǎlè sî tô cî̌htò̌ tûû̌ sî ta̤dòkûphû̌ tokhlǒ numî̌ mè̤̌tô̤̌ ya? Lî̤plò̌shǐkû hî̌ kû̌, “Wṳ̂̌hǎhtò̌kè kòyò phû̌mò̤̌ dǒ sîklanu,” ^e Dě sî bǎ ma̤ gû̌ pô̤̌nu.