1 Corinthians 6
Pṳ̌wè̤̌ khrǐphû̌ kû̌ khrǐphû̌ kaǎhtò̌ lû̌û dǒ pûkǎ hǐ
1Sî kè̌ klǐlû̌û tûmṳ̂̌lû̌û hî̌dě sî cû̌ kaǎhtò̌ cî̌htò̌ tǒ̤ lû̌û tôpwa̤ kû̌ tôpwa̤ dǒ pûkǎ dǒ a yṳ̌ǎ khrǐ tô̤̌ tokhlǒ ahǐ ma̤titè? Sî kû̌ sî kaǎ hî̌bǎplǒ tûû̌ lû̌û dě sî nocî̌htò̌ kû̌ Cǒmara a kòyò tokhlǒ tô̤̌ ma̤titè? 2Cǒmara a kòyò tokhlǒnu, a gǔ cî̌htò̌ kòyò hǎkhû̌phû̌ pěnumî̌ sî sî̌ganǎ̤ tô̤̌ ya? Sî mî̌ kòyò tokhlǒ dǒ a bǎ cî̌htò̌ kòyò hǎkhû̌phû̌ ô̌ dǒ hǎkhû̌ hǒtôbǎ lǒ̤bò pě akhû̌akhî, ta̤we̤ta̤kè pî̌tî̌nu tokhlǒ pwǎ dě sî tôbǎ hî̌bǎphlô kòyò tô̤̌ ya? 3Dǒ mǒkhû̌ pěnu, pa bǎ cî̌htò̌ mǒkhû̌ tanaphû̌ pě tokhlǒ numî̌ sî sî̌ganǎ̤ tô̤̌ ya? Pô̤̌nudě hǎkhû̌běkhû̌ a ta̤klǐtûmṳ̂̌lû̌û pô̤̌o tokhlǒ pwǎ dě pa cû̌ cî̌htò̌nǐ̤ tô̤̌ ma̤titè? 4Ta̤klǐtûmṳ̂̌lû̌û pô̤̌o kè̌ ô̌htûhtò̌ dě, sî cû̌ tô kòyò dǒ a htû gû̌ ta̤dòkû tô̤̌ tokhlǒ a ô̌ dě sî cû̌ nocî̌htò̌ tǒ̤ asî ma̤titè? 5Shòwò̤̌ gutṳ̌glǎ pwǎ. Dǒ sî ta̤dòkûphû̌ akla tûû̌ nu kòyò dǒ a ô̌ kû̌ ta̤gènè̤jò dě a hî̌bǎ cî̌htò̌jò bǎ khrǐphû̌ tokhlǒ a ta̤klǐlû̌nu bǎ aplǎkûnu pî̌tî̌lǒ tôpwa̤ numî̌ abǎ ô̌ nò pwǎ. 6Sî cû̌ ma̤ khô̌tû̌ lô̌khô sîya hî̌tè. Sî kû̌ sî cû̌ kaǎhtò̌ tǒ̤ lû̌û dǒ pûkǎ hǐ dě cû̌ nocî̌htò̌ tǒ̤ kû̌ kòyò dǒ a yṳ̌ǎ khrǐ tô̤̌ tokhlǒ ya! 7Dǒ sî kû̌ sî cû̌ hî̌bǎ wô̤̌htò̌ lû̌û dǒ pûkǎ hǐ akhû̌akhî, a dǔlè̌lṳ̌ kû̌ sî lò̤jû̌kè bòmǔtegle hǒ. Tònò̤̌ sî ma̤pô̤̌nu dě sî khòsǎphlǒhtû bǎkè sî pṳ̌wè̤̌ dǒ a ma̤si sî numî̌ awô̌khlo tô̤̌ ya? Tònò̤̌ sî kaǎhtò̌ sî pṳ̌wè̤̌ khrǐphû̌ dǒ pûkǎ ahǐnu, sî lò̤jû̌kè sî timî̌titè tokhlǒ numî̌ awô̌khlo pe. 8Bǎbǎkǎlè sî ma̤ tô̤̌. Sî cû̌ ma̤sǔ tûû̌ kè̌khîlû̌û tôpwa̤ kû̌ tôpwa̤. Htokhôtô̤̌ sî cû̌ phî̌sigwǐ yǒsaphǎ tûû̌ kè̌khîlû̌û tôpwa̤ kû̌ tôpwa̤. Sî khrǐphû̌ kû̌ khrǐphû̌ cû̌ma̤ tû̌tǒ̤ lû̌û hî̌tè. 9Kòyòkhu kòyòhe, kòyò phû̌mò̤̌ tokhlǒnu a htûjò kû̌ kòyò Cǒmara a shiphû̌gǎphû̌ dǒ ashiagǎkû tô̤̌ pě numî̌ sî sî̌ganǎ̤ tô̤̌ ya? Pô̤̌khô sî gǔ ma̤sǔ lô̌khô tô̤̌nu, gènè̤ tě̤tě̤ lô̌khô he hî̌ sînu. Kòyò dǒ a gû̌ma̤ ta̤sǎyṳ putupatǎ sî, a caba ta̤yô̤ta̤gî̌ sî, a cû̌sǔnṳ̌plěnṳ̌ kòyòphû̌kòyòma sî, pwa̤khû kû̌ pwa̤khû cû̌sǔnṳ̌plěnṳ̌ kè̌khî lû̌û nutokhlǒ, 10Htokhôtô̤̌ kòyò ǎhǔǎhî̌ sî, a kè̌lǎ sǎyṳǎbe tûû̌ sî, kòyò ǎmuômu sî, a dô̌mi̤dô̌yô̤ sî, kû̌ a lòhôǎ kòyò ru sînu a htûjò Cǒmara a shiphû̌gǎphû̌ dǒ ashiagǎkû tô̤̌. 11Dǒ sîkla tokhlǒkhlǒnu, dǒ awǐkha mî̌ a htû hto kòyòkhu kòyòhe sô̌sô̌kû̌ hǒonu hǒ bǎbǎkǎlè Cǒmara cǔbò hto sî ta̤sǔ hǒ. Dě khònò̤̌ sî htû Cǒmara ata hǒ. Dǒ Běcǎ Yeshǔ Khrǐ kû̌ Cǒmara a Yôla Plò̌shǐ akhû̌akhîdě khònò̤̌, Cǒmara bè̌hto sî pô̤̌ kòyòcǒkòyòtè̤ tokhlǒnu hǒ.Dǐnoǎ sî nǎ̤glǒnu dǒ Cǒmara abwǐdû̌sîrîhtû aya
12Dǒ sîkla tokhlǒkhlǒnu, a hî̌ kû̌, “He ma̤ titètè̌ mî̌ anǐ̤ pwǎ,” A hî̌ pô̤̌nu mî̌ amè̤̌hǒ bǎbǎkǎlè titètè̌ mî̌ awô̌ lǒ̤bò dǒ sîya mè̤̌tô̤̌. He ma̤ titètè̌ mî̌ anǐ̤ pwǎ bǎbǎkǎlè he dǐhtû henǎ̤ kû̌ lǒ̤bò ta̤ dǒ he sǎyṳ ma̤ nutokhlǒ ajû̌ tô̤̌. a 13“Shǎǎ mî̌ hǐphukû aya, hǐphukû mî̌ shǎǎ aya,” Kòyò tokhlǒkhlǒ gǔ hî̌ pô̤̌nu. Amè̤̌kǎ, bǎbǎkǎlè hǒo ginǐ̤cǒnu Cǒmara gǔ ma̤pî̌kèbò pě. Nǎ̤glǒ mî̌ lǎ̤noǎ kû̌ ta̤patupatǎ aya mè̤̌tô̤̌. Mî̌ lǎ̤noǎ kû̌ Běcǎ a ta̤sǎyṳ noma̤ pa tokhlǒ aya pwǎ. Dǒ Běcǎ akhû̌akhîdě, htû̌ nô̌kòpě a gǔ ma̤ ihtǒgesô̌ pa nǎ̤glǒnu pě. 14Cǒmara dǒ a ma̤htûpwa̤ getîkhî Běcǎ dǒ ta̤si tôpwa̤nu, a gǔ ma̤htûpwa̤ getîkhî pa dǒ ta̤si kû̌ a ta̤pô̤ta̤phǎ shû̌shonu pě. 15Sî nǎ̤glǒ nî̌ Khrǐ anǎ̤glǒ ayô̤agî̌ tokhlǒ pwǎnu sî sî̌ganǎ̤ tô̤̌ ya? He phî̌ Khrǐ ayô̤agî̌ dě he nohǎmôô̌ kû̌ pwa̤mǒ̤tili̤ mî̌ a gwǎ cǎ ya? Kè̌ ma̤pô̤̌numî̌ anǐ̤ tîkî̌ tô̤̌. 16Kòyò tôpwa̤pwa̤ dǒ a hǎmôô̌ kû̌ pwa̤mǒ̤patǎnu, a htûhtò̌ kû̌ pwa̤mǒ̤patǎ sǐtôsǐ yî̌tôyî̌nô̤̌ numî̌ sî sî̌ganǎ̤ tô̤̌ ya? “Asî hǒnu sò̌ginǐ̤ numî̌ a htûhtò̌ sǐtôsǐ kû̌ yî̌tôyî̌ nô̤̌ hǒ” b Lî̤plò̌shǐkû hî̌ pô̤̌nu. 17Bǎbǎkǎlè kòyò dǒ a htûhtò̌ kû̌ Běcǎ tôcǒ꤮ nô̤̌ tokhlǒnu, a htûhtò̌ kû̌ Běcǎ dǒsû̌dǒsò̌ tôkhô tôcǒ꤮ nô̤̌ nuhǒ. 18Cû̌ tephekè lô̌khô kû̌ ta̤cû̌sǔnṳ̌ pwa̤mǒ̤pwa̤khû nutokhlǒ nî̌꤮. Ta̤sǔ dǒ ashǔshawa̤ titètè̌ bǎbǎnu a ma̤ bǎsha kû̌ kòyò anǎ̤glǒ pô̤̌ cû̌sǔnṳ̌plěnṳ̌ pwa̤mǒ̤pwa̤khû ata̤sǔnu tô̤̌. Kòyò dǒ a cû̌sǔnṳ̌plěnṳ̌ pwa̤mǒ̤pwa̤khû tokhlǒnu a ma̤sǔ lò̤tû̌ anǎ̤glǒ hǒ. 19– 20Sî nǎ̤glǒ numî̌ Yôla Plò̌shǐ Běcǎ dǒ Cǒmara ǐlò̤ bǎ sî tôpwa̤ alǎ̤ô̌ a ta̤lṳhtò̌hô numî̌ sî sî̌ganǎ̤ tô̤̌ ya? Ma̤titèhî̌dě Cǒmara pwî̤ lě̤dû̌pwî̤htû hto sî akhû̌akhî, sî nǎ̤glǒnu sî ta mè̤̌ pe tô̤̌ hǒ. A htûhtò̌ Cǒmara ata hǒ. Pô̤̌nudě noǎ lô̌khô sî nǎ̤glǒnu dǒ Cǒmara ta̤bwǐdû̌sîrîhtû ayanu nî̌꤮. c
Copyright information for
KxfSCKXF