1 Corinthians 7

Ta̤gwè̌ ta̤phî̌maphî̌wṳ̂ awe̤akè

1Khònò̤̌dě, he gǔ wě̤ geshěshu bǎ sî kû̌ sî gwè̌ he dǒ sî lî̤kû nutokhlǒ. Sî gwè̌ he kû̌ kè̌ phî̌maphî̌wṳ̂ tô̤̌ mî̌ awô̌khlo hò̌ sî hî̌ pô̤̌nu. Pwa̤khû kè̌ phî̌ ama tô̤̌ mî̌ awô̌khlo. 2Bǎbǎkǎlè kòyò dǒ a cû̌sǔnṳ̌plěnṳ̌ kòyòphû̌kòyòma, a cû̌sǔnṳ̌plěnṳ̌ pwa̤mǒ̤pwa̤khû tokhlǒ sǔ sǔ ô̌dû̌wî̤ tûlû̌shû̌lě akhû̌akhî, pwa̤khû pṳ̂̌꤮ tôpwa̤ tô phî̌ lô̌khô ama, dě pwa̤mǒ̤ pṳ̂̌꤮ tôpwa̤ tô phî̌ lô̌khô awṳ̂. 3Pwa̤khû tôbǎ hǎmôô̌ kû̌ ama. Bǎ wṳ̂ sǎyṳ hǎmôô̌ kû̌ ama akhanu, ma tô yô̤ǐ tô̤̌, pô̤̌nudě, bǎ ma sǎyṳ hǎmôô̌ kû̌ a wṳ̂ akhanu, wṳ̂ tô yô̤ǐ tô̤̌. 4Ma anǎ̤glǒ numî̌ ata tûû̌ mè̤̌tô̤̌, wṳ̂ atata. Pô̤̌nudě wṳ̂ anǎ̤glǒnu a ta tûû̌ mè̤̌tô̤̌, ma atata pwǎ. 5Ma kû̌ wṳ̂ a ta̤sǎyṳsǎbǎ tôpwa̤ kû̌ tôpwa̤nu, bǎ yô̤ǐ lû̌û tô̤̌. Bǎbǎkǎlè bǎ sî sǎyṳ kwicaba sǔtǔkǔ tû̌ akhanu, sî kè̌ sǎphlǒtô lû̌û dǒ sî gǔ hǎmôô̌ tephekè khô̌ yî̤kè lû̌û tô̤̌ kè̌hî̌numî̌ anǐ̤ pwǎ. Bǎbǎkǎlè sî kwicaba htokhanu, sî bǎ hǎmôô̌ wô̤̌wô̤̌ sô̌ lû̌û, ma̤titèhî̌dě kè̌ sî khòǐpè̤̌ sî sǎphlǒ tô̤̌ hî̌nu, hǎkhû̌tana tili̤tôlô̌ sî pě. 6He hî̌ sî pô̤̌onumî̌ he noshû̌ sî mè̤̌bǎtô̤̌. He dǔsî̌yajè̌ sî pwǎ. 7Kè̌ hî̌mî̌camî̌ he sǎyṳ noô̌pili bò sî pô̤̌ he. Bǎbǎkǎlè Cǒmara ǐlò̤ tôpwa̤ kû̌ tôpwa̤ numî̌ a sô̌sô̌ lû̌ tô̤̌. Hǒtôpwa̤ dě a ǐlò̤ lû̌û sû tôcǒ dǒ nutôpwa̤ dě a ǐlò̤ khô̌lû̌û sû dǒ ashǔshawa̤ tôcǒ a ma̤ pô̤̌nu.

8Pô̤̌nudě kòyò dǒ a ô̌ kû̌ hǐ kû̌ phò tô̤̌ sî tokhlǒ, kû̌ pwa̤mǒ̤khwè̌ sî tokhlǒnu, awô̌mî̌ ô̌pili sělě lô̌khô pô̤̌ henu hǒ. 9Bǎbǎkǎlè sî kè̌ khòbò̌ sî sǎphlǒ tô̤̌ hî̌dě, tûlû̌ phî̌ lô̌khô phî̌phû̌phî̌manu. Ô̌ kû̌ hǐphò mî̌ awô̌khlo pe kû̌ sǎphlǒ gènè̤ putupatǎ phû̌mò̤̌ nutokhlǒ.

10Kòyò dǒ a ô̌ kû̌ phû̌maphû̌wṳ̂ tokhlǒnu, he sǎyṳ sû̌ǐlò̤kè asî yô̤̌ tômû. Ta̤sû̌ǐ numî̌ he ta̤sû̌ǐ mè̤̌tô̤̌, Běcǎ ta̤sû̌ǐ kû̌ anǎ̤ dě a hî̌ kû̌ ma bǎ bè̌kè awṳ̂ tô̤̌. ^a 11Bǎbǎkǎlè a kè̌ bè̌kè hî̌dě a bǎphî̌ tèplè̌ pe awṳ̂ tô̤̌. A kè̌ ô̌ tû̌ mî̌ anǐ̤ pwǎ, mè̤̌tô̤̌dě a kè̌ hî̌bǎ sô̌ kû̌ a wṳ̂ dě a kè̌ ge ô̌plǒ sô̌ kû̌ lû̌û numî̌ anǐ̤ pwǎ. Wṳ̂ mî̌ a bǎ bè̌kè ama tô̤̌tô̤̌.

12He sǎyṳ hî̌ bǎ pô̤̌ kòyò ashǔshawa̤ dǒ sîkla nutokhlǒ. (Bǎbǎkǎlè, Hǒomî̌ Běcǎ hî̌nǎ mè̤̌tô̤̌.) He ta̤sû̌ǐ tûû̌ pwǎ. He sǎyṳ ta̤sû̌ǐ wṳ̂ dǒ a kè̌ htûhto Khrǐphû̌ dě ama kè̌ yṳ̌ǎ Khrǐ tô̤̌ bǎbǎkǎlè ama nî̌ a kè̌ sǎyṳ ô̌sělě hènè pe kû̌ awṳ̂ hî̌nu, awṳ̂ bǎ bè̌kè ama tô̤̌. 13Pô̤̌nudě ma dǒ a htûhto Khrǐphû̌ dě a wṳ̂ kè̌ yṳ̌nǐ̤nǎ̤nǐ̤ kû̌ Yeshǔ Khrǐ tô̤̌ bǎbǎkǎlè awṳ̂ kè̌ sǎyṳ ô̌sělě hènè pe kû̌ lû̌û hî̌nu, a bǎ bè̌kè awṳ̂ tô̤̌. 14Ma̤titèhî̌dě, sî dǒ a yṳ̌ǎ pa Běcǎ Yeshǔ tokhlǒnu, sîma bǎbǎ, tô̤̌mî̌ sîwṳ̂ bǎbǎ, a kè̌ yṳ̌ǎ pa Běcǎ Yeshǔ khôtô̤̌ kè̌hî̌dě, dǒ sî yṳ̌ǎ ta̤ akhû̌akhî, Cǒmara gǔ ǐshowî̤ asî pě. Dě a gǔ ǐshowî̤ sîphû̌sîli̤ tokhlǒ pě. Cǒmara kè̌ ǐshowî̤ sîphû̌ tokhlǒ tô̤̌ hî̌nu, sî phû̌ tokhlǒnu a gǔ sô̌sô̌ bò kû̌ kòyò dǒ a yṳ̌ǎ Běcǎ tô̤̌ nutokhlǒ aphû̌ali̤ nutokhlǒ pě.

15Bǎbǎkǎlè ma bǎbǎ, wṳ̂ bǎbǎ dǒ a yṳ̌ǎ Khrǐ tô̤̌ tôpwa̤nu a kè̌ sǎyṳ bè̌kèwǐ hî̌dě a bè̌kè tûû̌. A kè̌ ma̤pô̤̌nu hî̌dě, kòyò dǒ a yṳ̌ǎ Khrǐ tôpwa̤nu a tôbǎ ô̌ kû̌ kòyò dǒ a yṳ̌ǎ Khrǐ tô̤̌nu tôpwa̤ tô̤̌. Ma̤titèhî̌dě Cǒmara kaǎ sî dǒ sî gǔ ô̌ kû̌ yǎ ta̤pè̤̌ta̤dû pwǎ. 16Ma dǒ a htûhto ta̤dòkûphû̌ tokhlǒ sî, dǒ sîkhû̌sîkhî dě wṳ̂ htûhtò̌jò ta̤dòkûphû̌ tô̤̌ sî hî̌jò tô̤̌. Pô̤̌nudě wṳ̂ dǒ a htûhto ta̤dòkûphû̌ tokhlǒ sî, dǒ sîkhû̌sîkhî dě sîma htûhtò̌jò ta̤dòkûphû̌ tô̤̌ sî hî̌jò tô̤̌.

Ô̌htûpwa̤ pô̤̌ Cǒmara kaǎ nanu

17Sî pṳ̂̌tôpwa̤ tô ô̌htûpwa̤ sělě lô̌khô pô̤̌ Cǒmara ǐlò̤ sî bǎ a kaǎ sî akhanu. A ma̤ nǎ htobò dǒ pa gǔ ô̌htûpwa̤ pô̤̌onu hǒ. Ta̤sû̌ǐtòwòǐ pô̤̌onu, he sû̌ǐlò̤ bò hto dǒ ta̤dòkû akû pṳ̂̌ tôkû hǒ. 18Kòyò dǒ a dǔtṳ̌ hto bě dě Cǒmara kè̌ kaǎ lû̌û tokhlǒnu, a tôbǎ ma̤hǎmǎkè a ta̤dǔsilǐbě a ta̤ma̤mǎnǎnu tô̤̌. Kòyò dǒ a dǔtṳ̌ gû̌ kòyò phě tô̤̌ tokhlǒnu, Cǒmara kè̌ kaǎ asî hî̌dě a lǎ̤lṳ̂ dǔtṳ̌ pe phě tô̤̌. 19Ma̤titèhî̌dě, dǔtṳ̌aphě bǎbǎ, dǔtṳ̌aphě tô̤̌ bǎbǎ a lṳ̂dû̌shî̌ mè̤̌bǎtô̤̌. Ta̤ dǒ a lṳ̂dû̌shî̌ tôcǒmî̌ ta̤ganǎ̤de Cǒmara ta̤mǎlò̤ tokhlǒnu hǒ. 20Bǎ Cǒmara kaǎ kòyò tôpwa̤pwa̤ akhanu, a htû kòyò hî̌tè tôpwa̤nu a tô ô̌htûpwa̤ sělě pô̤̌nu. 21Bǎ Cǒmara kaǎ na akhanu, na htû jû̌ bǎbǎ, a lǎ̤hî̌ nô̌ tô̤̌. Bǎbǎkǎlè na běcǎ kè̌ hî̌ na kû̌ sǎyṳ cû̌ bǎtè mî̌ anǐ̤ hǒ a kè̌ hî̌ dě hǎhtò̌cû̌nu. 22Ma̤titèhî̌dě na htû jû̌ bǎbǎkǎlè, bǎ na yṳ̌ǎhto Běcǎ Yeshǔ akhanu, a bè̌hto na pô̤̌ kòyò tôpwa̤ dǒ anǐ̤ ta̤pilinu hǒ. Pô̤̌nudě kòyò dǒ a htûbǎ jû̌ tô̤̌ tôpwa̤nu, bǎ a yṳ̌ǎ Běcǎ Yeshǔ Khrǐ akhanu, a htûhto Běcǎ Yeshǔ Khrǐ ajû̌ hǒ. 23Cǒmara pwî̤ lě̤dû̌pwî̤htû sî akhû̌akhî, cû̌ htû pe tǎ̤ lô̌khô kòyòhǎkhû̌phû̌ ajû̌ tǎ̤mǎ̤. 24Pô̤̌nudě pṳ̌wè̤̌ sî, bǎ Cǒmara kaǎ na akhanu, na htû kòyò hî̌tè, na ma̤ ta̤ma̤ titènu, tûlû̌ ô̌htûpwa̤, bǒsû̌ hènè Cǒmara kû̌ na ta̤ma̤ nu.

Ta̤gwè̌ kòyò dǒ a hǐphû̌phòphû̌ ô̌tô̤̌ tokhlǒ kû̌ pwa̤mǒ̤khwè̌ tokhlǒ awe̤akè

25Khònò̤̌dě he gǔ shôbǐǐphlô bǎ sî kû̌ kòyò ô̌ kû̌ hǐphò khôtô̤̌ tokhlǒ awe̤akè. Ta̤we̤ta̤kè hǒo numî̌, Běcǎ mǎkèbǎ ayô̤̌ tô̤̌. Bǎbǎkǎlè he sǎyṳ dǐsî̌ganǎ̤ bǎ sî kû̌ he ta̤kè̌shǐnu. Ma̤titèhî̌dě Cǒmara gwèbǎǐ he akhû̌akhî, yṳ̌ǎnṳ̌ lô̌khô he no̤. 26Ma̤titèhî̌dě, pa htukha khònò̤̌nu, ta̤pò̤̌ta̤sha, ta̤ma̤jî̌ma̤jû̌ ô̌ kû̌ ta̤dòkûphû̌ tokhlǒ akhû̌akhî, kòyò dǒ a ô̌ kû̌ hǐphò khôtô̤̌ tokhlǒnu, ô̌sělě lô̌khô pô̤̌numî̌ awô̌khlo he gènè̤ pô̤̌nu. 27Sî ma ô̌ ya? A kè̌ ô̌ hî̌dě gènè̤ kû̌ gǔ bè̌kè a tǎ̤mǎ̤. Sî phû̌sǎ lô̌khô ya? Sî kè̌ phû̌sǎ pe lô̌khô hî̌dě kè̌lǎphî̌ tǎ̤ lô̌khô sîmasîwṳ̂ tǎ̤mǎ̤ nî̌꤮. 28Bǎbǎkǎlè sî kè̌ phî̌ sîmasîwṳ̂ hî̌dě sî ma̤sǔ ta̤ mè̤̌tô̤̌. Pwa̤mǒ̤ ô̌pili tôpwa̤ kè̌ phî̌ awṳ̂ hî̌dě a ma̤sǔ ta̤ mè̤̌tô̤̌. Bǎbǎkǎlè pô̤̌khô ma kû̌ wṳ̂ bǎ kè̌shǐbǎ kû̌ ta̤pò̤̌ta̤sha dǒ a ta̤ô̌htûpwa̤ bǎ hǎkhû̌ akû tokhlǒnu, he sǎyṳ nokè̌shǐ sî tô̤̌.

29Khôbǒsû̌ sî, he sǎyṳ hî̌ sî mî̌ pô̤̌o: lṳmṳ̌ni̤ gutṳ̌ phǔhtò̌ hǒ. Sahtò̌ khònò̤̌ hènè, kòyò dǒ ama ô̌ awṳ̂ ô̌ tokhlǒnu, a tô ô̌htûpwa̤ lô̌khô pô̤̌ kòyò dǒ ama ô̌tô̤̌ awṳ̂ ô̌tô̤̌ tokhlǒnu. 30Kòyò dǒ ahǎ tokhlǒnu, a tô ma̤ lô̌khô pô̤̌ asî sǎplǎ̤ tô̤̌. Kòyò dǒ a sǎlě̤ tokhlǒnu, a tô ma̤ lô̌khô pô̤̌ asî sǎlě̤ tô̤̌. Htokhôtô̤̌ kòyò dǒ a pwî̤ ta̤ tokhlǒnu, a tôbǎ bè̌ pô̤̌ ata nu tô̤̌. 31Kòyò dǒ a noǎ ta̤phû̌ta̤li̤ dǒ hǎkhû̌ tokhlǒnu, a bǎ gènè̤dû̌ ǐ tě̤ta̤ dǒ hǎkhû̌ tokhlǒnu tô̤̌. Ma̤titèhî̌dě lǒ̤bò ta̤ dǒ a ô̌ bǎ hǎkhû̌ tokhlǒnu, a ô̌měô̌gle̤ yî̤ tûjû̌pwa̤ mè̤̌tô̤̌ akhû̌akhî, he hî̌ sî pô̤̌o pwǎ.

32Hǎkhû̌ a ta̤phû̌ta̤li̤ tokhlǒnu, he sǎyṳ no gû̌gè̌ sî tô̤̌. Kòyò dǒ ama ô̌ tô̤̌ tôpwa̤nu, a sǎyṳ ma̤tô Běcǎ asǎphlǒ akhû̌akhî, a bè̌ plò̌shǐ a ta̤gènè̤ tokhlǒ dǒ Běcǎ aya. 33Bǎbǎkǎlè, kòyò dǒ ama ô̌ tôpwa̤nu, agû̌agè̌ kû̌ hǎkhû̌ a ta̤phǐta̤ma̤ tokhlǒ aya. Ma̤titèhî̌dě a sǎyṳ gû̌ ma̤tô pwǎ ama sǎphlǒ. 34Pô̤̌nudě, kòyò dǒ ama ô̌ tôpwa̤nu, asǎphlǒ ô̌ ginǐ̤mè. Pwa̤mǒ̤ dǒ awṳ̂ ô̌ tòkhò̌ khôtô̤̌ tôpwa̤, tô̤̌mî̌ pwa̤mǒ̤khwè̌ tôpwa̤nu, a bè̌ plò̌shǐ a ta̤gènè̤ tokhlǒ dǒ Běcǎ a ta̤phǐta̤ma̤ tokhlǒ aya. Ma̤titèhî̌dě a sǎyṳ ǐlò̤bò anǎ̤glǒ kû̌ asǎphlǒ ginǐ̤cǒbò dǒ Cǒmara aya. Bǎbǎkǎlè pwa̤mǒ̤ dǒ awṳ̂ ô̌ tôpwa̤nu, a bǎgû̌ bǎgè̌ kû̌ hǎkhû̌nǎ̤khû̌ a ta̤phǐta̤ma̤ tokhlǒ. Ma̤titèhî̌dě a sǎyṳ gû̌ ma̤tô awṳ̂ sǎphlǒ. 35Pô̤̌khô a gǔ htûbwǐhtûsîrî dǒ sîya dě he hî̌ pô̤̌o pwǎ. He cû̌ ma̤dǐdò tě̤tṳ sî mè̤̌tô̤̌. Pô̤̌khô sî gǔ ô̌htûpwa̤ lò̤tôlò̤bǎ lô̌khô, htokhôtô̤̌ pô̤̌khô sî gǔ ǐlò̤ lǒ̤sû̌lǒ̤sò̌ lô̌khô sînǎ̤ dǒ Běcǎ a ta̤phǐta̤ma̤ ayanudě, he sǎyṳ ma̤jè̌ sî pô̤̌nu pwǎ.

36Hî̌kûmṳ̂̌ mò̌, pwa̤mǒ̤ dǒ na hègwè̌ shû̌dè hto a tôpwa̤nu, na sǎyṳ jî̌jî̌ yǎ dě na gènè̤ shěshu pwǎ kû̌ na gǔ phî̌ kû̌ lû̌û kè̌hî̌dě, phî̌ge anu. Na kè̌ ma̤pô̤̌numî̌ ta̤sǔ ô̌ tô̤̌. 37Bǎbǎkǎlè pwa̤khû tôpwa̤ kè̌ bè̌lò̤ hto asǎphlǒ kû̌ a gǔ phî̌ pe pwa̤mǒ̤ hǒtôpwa̤ tô̤̌, htodě a kè̌ khòbò̌ asǎphlǒ kè̌hî̌dě, a kè̌ phî̌pe ama tô̤̌ dě a kè̌ô̌ pô̤̌o numî̌ awô̌ pwǎ. 38Pô̤̌nu akhû̌akhî, pwa̤khû dǒ a phî̌ amanu awô̌ jî̌lî, bǎbǎkǎlè pwa̤khû dǒ a phî̌ ama tô̤̌nu awô̌ khlo pe.

39Pwa̤mǒ̤ tôpwa̤nu, awṳ̂ kè̌ si nò̌khôtô̤̌ hî̌dě a kè̌ phî̌ tèplè̌ awṳ̂ numî̌ anǐ̤ tô̤̌. Bǎbǎkǎlè awṳ̂ kè̌ si htohǒ kè̌hî̌dě a kè̌ sǎyṳ phî̌ tèplè̌ pwa̤khû dǒ ashǔshawa̤ numî̌ anǐ̤ pwǎ. Bǎbǎkǎlè a tôbǎ phî̌ pwǎ pwa̤khû dǒ a yṳ̌ǎ Běcǎ Yeshǔ Khrǐnu pwǎ. 40Bǎbǎkǎlè a kè̌ phî̌ pe awṳ̂ tô̤̌ hî̌nu, a mô̤ khlo lû̌û. Hǒomî̌ amè̤̌kû̌ he ta̤kè̌shǐ kû̌ he ta̤gènè̤ tokhlǒ. He ta̤hî̌bǎnu, he yṳ̌ǎ kû̌ Cǒmara a Yôla Plò̌shǐ dǔlè̌lṳ̌ he pwǎ.