1Cor 8 | KxfSCKXF | STEP | Khònò̤̌dě he sǎyṳ wě̤cû̌ bǎ sî shǎǎ dǒ kòyò bǔǎhtò̌ kû̌ ta̤yô̤ta̤gî̌ nutokhlǒ awe̤akè. Sî hî̌ kû̌ ta̤yô̤ta̤gî̌ tokhlǒ numî̌ a ta̤pô̤ta̤phǎ shû̌sho dǒ a lǎ̤ma̤pè̤̌ pa nî̌ a ô̌ tô̤̌nu pa sî̌ganǎ̤, sî hî̌ pô̤̌nu mî̌ amè̤̌kǎ. Sî ta̤sî̌khû̌sî̌yanu, a nophî̌htò̌yô̤̌ sî kû̌ sî nǎ̤ bǎbǎkǎlè ta̤mô̤ǐnu a ma̤jè̌ mè̤̌mî̌ca kòyò.

1 Corinthians 8

Shǎǎ dǒ kòyò bǔǎ kû̌ ta̤yô̤ta̤gî̌ tokhlǒ awe̤akè

1 Khònò̤̌dě he sǎyṳ wě̤cû̌ bǎ sî shǎǎ dǒ kòyò bǔǎhtò̌ kû̌ ta̤yô̤ta̤gî̌ nutokhlǒ awe̤akè. Sî hî̌ kû̌ ta̤yô̤ta̤gî̌ tokhlǒ numî̌ a ta̤pô̤ta̤phǎ shû̌sho dǒ a lǎ̤ma̤pè̤̌ pa nî̌ a ô̌ tô̤̌nu pa sî̌ganǎ̤, sî hî̌ pô̤̌nu mî̌ amè̤̌kǎ. Sî ta̤sî̌khû̌sî̌yanu, a nophî̌htò̌yô̤̌ sî kû̌ sî nǎ̤ bǎbǎkǎlè ta̤mô̤ǐnu a ma̤jè̌ mè̤̌mî̌ca kòyò. 2 Kòyò dǒ a gènè̤ ǐtûû̌ anǎ̤ kû̌ he sî̌ganǎ̤ dû̌wî̤ tokhlǒnu, ta̤ dǒ a tô sî̌ganǎ̤ tokhlǒnu, a sî̌ganǎ̤ tôcǒ tô̤̌. 3 Bǎbǎkǎlè kòyò tôpwa̤pwa̤ dǒ a mô̤ǐ Cǒmaranu, Cǒmara sî̌ganǎ̤ lû̌û kû̌ a mî̌ a kòyò hǒ.

4 Pô̤̌nu akhû̌akhî, ǎshǎǎ dǒ kòyò bǔǎ kû̌ ta̤yô̤ta̤gî̌ tokhlǒnu, pa sî̌ganǎ̤ kû̌ ta̤yô̤ta̤gî̌ numî̌ a tônô̤ pwǎ, yô̤̌mûyô̤̌sǎ ô̌ tôcǒ tô̤̌. Pa sî̌ganǎ̤ pô̤̌ tûû̌ kû̌ Cǒmara numî̌ a ô̌ pwǎ tôpwa̤ nô̤̌ pwǎ. 5 Cǒmara mè̤̌tô̤̌ dǒ kòyò caba lû̌û tokhlǒ numî̌ a ô̌ dû̌wî̤. Dě asî hî̌ lô̌khô kû̌, Cǒmara hǒtokhlǒ numî̌ a ô̌ dǒ mǒkhû̌, tô̤̌mî̌ a ô̌ bǎ hǎkhû̌, pô̤̌nu. Dě Cǒmara mè̤̌tô̤̌ tokhlǒnu asî cabahtò̌ lû̌û pô̤̌ asî Cǒmara kû̌ asî Běcǎ nutokhlǒ. 6 Bǎbǎkǎlè pa sî̌ganǎ̤ kû̌ Cǒmara mî̌ a ô̌pwǎ tôpwa̤pwǎ̤ nô̤̌ pwǎ. A mî̌ papha, a mî̌ a bô̌lò̤ ta̤pṳ̂̌꤮ tocǒ dě pa ô̌htûpwa̤ bǎ aya. Běcǎ mî̌ a ô̌pwǎ tôpwa̤pwǎ̤ nô̤̌, a mî̌ Yeshǔ Khrǐ hǒ. Cǒmara nobô̌lò̤ tutṳ̌ ta̤pṳ̂̌꤮ tocǒ kû̌ Yeshǔ Khrǐ. Pwa̤ dǒ a ǐ pa ta̤htûpwa̤ mî̌ a hǒ.

7 Bǎbǎkǎlè, pa pṳ̌wè̤̌ Khrǐphû̌ tokhlǒkhlǒ dǒ a sî̌ganǎ̤ tě̤tě̤mè̤̌mè̤̌ gû̌bò ta̤sî̌khû̌sî̌ya dǒ he wě̤ bǎ sî khònò̤̌ khôtô̤̌nu a ô̌ tokhlǒ. Bǎ asî yṳ̌ǎ Yeshǔ khôtô̤̌ akhanu, asî gènè̤ kû̌ ta̤yô̤ta̤gî̌ tokhlǒ numî̌ a ta̤siwi̤sòwò̤ ô̌ akhû̌akhî, asî glè̌ wîkè a ta̤gènè̤ tokhlǒnu, apò̤̌asha jî̌ dǒ asî aya. Dě bǎ asî ǎshǎǎ dǒ kòyò lṳhtò̌ kû̌ ta̤yô̤ta̤gî̌ tokhlǒ akhanu, a mô̤ lû̌ sǎphlǒ tô̤̌, dě a ma̤sǔ ta̤ hǒ a gènè̤ lô̌khô pô̤̌nu. 8 Shǎǎshǎô nî̌ a ma̤wô̌htò̌ pa ta̤bǒsû̌khǎkhô kû̌ Cǒmara tîkî̌ tô̤̌. Pa ǎ bǎbǎ, pa ǎ tô̤̌ bǎbǎ, a lǎ̤htûbwǐ htûsîrî pô̤̌ paya tôcǒ꤮ tô̤̌.

9 Sî sǎyṳ ǎ ta̤ titètè̌nu sî ǎ yǎ anǐ̤ pwǎ bǎbǎkǎlè, to̤ǐ lô̌khô sînǎ̤ nî̌. Ma̤titèhî̌dě sî ma̤ ta̤ tokhlǒnu, nohtûhtò̌ tǎ̤ ta̤lò̤khǔpo̤ dǒ kòyò a ta̤yṳ̌ta̤nǎ̤ pî̌tî̌ tokhlǒ aya tǎ̤mǎ̤. 10 Hî̌kûmṳ̂̌ mò̌ kû̌, kòyò dǒ ata̤yṳ̌ pî̌tî̌ tôpwa̤pwa̤ kè̌ kè̌shǐ kû̌ sî cû̌ phî̌ ǎshǎ dǒ kòyò lṳhtò̌ kû̌ ta̤yô̤ta̤gî̌nu, hî̌ mò̌nu. Sî sî̌ganǎ̤ kû̌ ta̤yô̤ta̤gî̌ numî̌ a tṳ̌dè pwǎ, yô̤̌mûyô̤̌sǎ ô̌ tôcǒ tô̤̌ bǎbǎkǎlè kòyò dǒ a sî̌ganǎ̤ gû̌ kòyò tô̤̌ tôpwa̤nu a kè̌lû̌ gû̌ sî dě a gǔ cû̌phî̌ǎ kû̌ sî pě. A phî̌ǎ dě a mô̤ lû̌sǎphlǒ tô̤̌, bǎbǎkǎlè a gǔ phî̌ǎ pě. 11 Pô̤̌nudě sî pṳ̌wè̤̌ dǒ ata̤yṳ̌ pî̌tî̌ tôpwa̤nu, sî tôbǎ sî̌ganǎ̤ kû̌ Khrǐ tṳ̌sikhòsi bǎ dǒ aya. Ma̤titèhî̌dě dǒ sî sî̌ganǎ̤ ta̤hǒo kû̌ sî ma̤ta̤ akhû̌akhî dě sî ma̤pò̤̌ma̤sha sî pṳ̌wè̤̌ hǒ. 12 Dǒ sî ma̤pô̤̌nu akhû̌akhî, sî ma̤sǔ sî pṳ̌wè̤̌ nutokhlǒ hǒ. Ma̤titèhî̌dě ata̤yṳ̌ pî̌tî̌ dě a gû̌ kè̌lû̌mò̌mṳ ma̤ sî dě asǎphlǒ mô̤ tô̤̌ akhû̌akhî, a sô̌sô̌ kû̌ sî ma̤sǔ Khrǐnu hǒ. 13 Ma̤pô̤̌nudě, dǒ he ǎ ta̤yî̌ khû̌khî dě a kè̌ dǐhtûhtò̌ pṳ̌wè̤̌ Khrǐphû̌ tôpwa̤pwa̤ a ta̤lò̤khǔpo̤ hî̌nu, he ǎ pe ta̤yî̌ tôkhò̌ tô̤̌. Ma̤titèhî̌dě he sǎyṳ nohtûhtò̌ ta̤lò̤khǔpo̤ dǒ he pṳ̌wè̤̌ Khrǐphû̌ nutokhlǒ aya tô̤̌ akhû̌akhî, he ǎ pe tô̤̌ pwǎ.