1Cor 9 | KxfSCKXF | STEP | He mî̌ pwa̤ô̌pili̤ tôpwa̤ mè̤̌tô̤̌ ya? He mî̌ pwa̤nophû̌ tôpwa̤ mè̤̌tô̤̌ ya? Mî̌ he kè̌shǐbǎ nô̌ Běcǎ Yeshǔ Khrǐ tô̤̌ ya? He gû̌ma̤ Běcǎ ata̤ma̤ akhû̌akhî, sî yṳ̌nǐ̤nǎ̤nǐ̤ Khrǐ numî̌ amè̤̌tô̤̌ ya?

1 Corinthians 9

Pwa̤nophû̌ tokhlǒ a ta̤phǐta̤ma̤ kû̌ a ta̤siwi̤sòwò̤ tokhlǒ

1 He mî̌ pwa̤ô̌pili̤ tôpwa̤ mè̤̌tô̤̌ ya? He mî̌ pwa̤nophû̌ tôpwa̤ mè̤̌tô̤̌ ya? Mî̌ he kè̌shǐbǎ nô̌ Běcǎ Yeshǔ Khrǐ tô̤̌ ya? He gû̌ma̤ Běcǎ ata̤ma̤ akhû̌akhî, sî yṳ̌nǐ̤nǎ̤nǐ̤ Khrǐ numî̌ amè̤̌tô̤̌ ya? 2 Kòyò ashǔshawa̤ tokhlǒ bè̌ he pô̤̌ pwa̤nophû̌ tôpwa̤ tô̤̌ bǎbǎkǎlè sî dě sî tôbǎ bè̌ he pô̤̌ pwa̤nophû̌ tôpwa̤nu. Ma̤titèhî̌dě sî kû̌ Khrǐ htûhtò̌kè tôcǒ nô̤̌ akhû̌akhî, sî dǔlè̌lṳ̌ tě̤tě̤mè̤̌mè̤̌ kû̌ he mî̌ pwa̤nophû̌ a mè̤̌mî̌ca tôpwa̤ hǒ.

3 Kòyò tokhlǒ kè̌ gwè̌ he kû̌ he ma̤ta̤ awe̤akè kè̌hî̌dě he gǔ hî̌shěshu asî kû̌, 4 He ma̤ ta̤ma̤ hǒo nudě he tô nǐ̤bǎ mî̌ca kòyò ta̤dǐǎdǐô henu mè̤̌bǎtô̤̌ ya? 5 He phî̌ hema dǒ a yṳ̌ǎ Khrǐ dě he kaǎcû̌ǐ a kû̌ klè̌ pô̤̌ pwa̤nophû̌ dǒ ashǔshawa̤ tokhlǒ ma̤nu bǎbǎ, pô̤̌ Běcǎ a pṳ̌pwa̤khû sî nutokhlǒ ma̤nu bǎbǎ, pô̤̌ Khûpetarǔ ma̤ nu bǎbǎ, he ma̤ pô̤̌nu mî̌ anǐ̤ bǎ tô̤̌ ya? 6 Gènè̤kè̌kè̌ mò̌ lô̌khô. Pa ma̤ta̤ pô̤̌o dě kòyò tô ma̤jè̌ mî̌ca pa tô̤̌ ya? He kû̌ Khûbanabǎ bǎ kè̌lǎǎ kè̌lǎô bǔǎlò̤ tûû̌ panǎ̤ pô̤̌o pwǎ hǒ ya?

7 Hî̌kûmṳ̂̌ mò̌, kliphû̌ tokhlǒnu, a ma̤ kli ata̤ma̤ dě a ma̤ hǎbòkè tûû̌ aru numî̌ a ô̌ cǎ ya? Pwa̤shǒǐ sîpî̌mṳ̌ tôpwa̤nu, a ǎbǎ a sîpî̌sǎ tô̤̌ numî̌ a ô̌ nǒnǒ꤮ ya? Kòyò dǒ a kè̌ǐ pṳ̂̌panǎ̤ tôpwa̤nu, a tô ôbǎ apṳ̂̌nṳ̌shi tô̤̌ ya? 8 He hî̌ bǎ sî hǒo numî̌ kòyòhǎkhû̌phû̌ a ta̤gènè̤ tûû̌ pwǎ ya? Cǒmara a ta̤sû̌ta̤tòwò hî̌ mî̌ca pô̤̌nu tô̤̌ ya? 9 “Sî no yî̤̌lò̤ pṳ̂̌ kû̌ bǔshò̌ akhanu, ma̤bǐ tǎ̤ agô̌kû tǎ̤mǎ̤” ^a Khûmṳ̂shě a ta̤sû̌ta̤tòwò hî̌ pô̤̌nu. Cǒmara hî̌ pô̤̌o numî̌ sî gènè̤ kû̌ a hî̌ bǎ pwǎtǒ̤ pṳ̂̌ aya pwǎ ya? 10 A hî̌ bǎ paya mè̤̌tô̤̌ ya? Hǒomî̌ a hî̌ mè̤̌mî̌ca bǎ paya hǒ. Kòyò dǒ a hè htě bǎ kòyò lè̤̌ kû̌ kòyò dǒ a hè kǎ bǎ kòyò bǔshò̌ tokhlǒ numî̌, a kè̌shuǐ dǒ a gǔ nǐ̤bǎ lô̌khô akhû̌akǎ tokhlǒ dǒ a lǎ̤ǎlǎ̤ô aya hǒ. 11 Pô̤̌nudě, pa shôbǐǐlṳ̌ bǎ sî kû̌ Cǒmara alě̤ayô̤̌ dǒ asô̌sô̌kû̌ kòyò dǒ a wǐ̤lò̤ ta̤khlita̤lè tokhlǒnu hǒ. Pa tô kè̌shuǐ kǎ sô̌ tûû̌ sî ta̤ma̤jè̌ dǒ sî ô̌ numî̌ a tô bǎ tô̤̌ ya? ^b 12 Kòyò ashǔshawa̤ tokhlǒ hè shôbǐǐlṳ̌ bǎ sî dě sî kè̌ ma̤jè̌ asî hî̌nu, pa dě sî tô ma̤jè mî̌ca pa mè̤̌tô̤̌ ya? Pa kwi sî ta̤ma̤jè̌ mî̌ a gwǎ pwǎ bǎbǎkǎlè pa kwinô̌ sî tôcǒ꤮ tô̤̌. Pô̤̌khô pa gǔ ma̤ dǐkhû̌dǐdò Khrǐ a ta̤sǎlě̤we̤kè tô̤̌nu, pa jî̌pwǐ̤ khòsǎphlǒhtû ta̤pṳ̂̌꤮ tocǒ. 13 Sî sî̌ganǎ̤ tě̤tě̤mè̤̌mè̤̌ tûû̌ kû̌ kòyò dǒ a ma̤ ta̤phǐta̤ma̤ dǒ ta̤lṳhtò̌hôkû tokhlǒnu, a ǎ lô̌khô pwǎ shǎǎshǎô dǒ a ô̌ bǎ ta̤lṳhtò̌hôkû nutokhlǒ pwǎ. Kòyò dǒ alṳatòhtò̌ bǎ kòyò tokhlǒnu, asî ǎ ǐtûû̌ sô̌ lô̌khô pwǎ ta̤yî̌ dǒ kòyò hè lṳhtò̌nu tokhlǒ pwǎ mî̌ sî sî̌ganǎ̤ tô̤̌ ya? ^c 14 Pô̤̌nudě kòyò dǒ a hî̌ǐ ta̤sǎlě̤we̤kè tokhlǒnu, dǒ a ma̤ ta̤ma̤nu akhû̌akhî, kòyò tô bǔǎ asî, Běcǎ hî̌nǎ pô̤̌nu. ^d

15 A gwǎ dǒ he tôkwi sî ta̤ma̤jè̌ bǎbǎkǎlè he kwi sî tôcǒ꤮ tô̤̌. Htokhôtô̤̌ he sǎyṳ noma̤jè̌ sî kû̌ henǎ̤ dě he wě̤ bǎ sî lî̤hǒnu mè̤̌bǎtô̤̌. He sǎyṳ ma̤dǐdò ta̤sǎlě̤we̤kè tîkî̌꤮ tô̤̌. Tònò̤̌ he ma̤pô̤̌nudě, he sikènu mî̌ a mô̤khlo pe. 16 He lǎ̤phî̌htò̌yô̤̌ tûû̌ henǎ̤ kû̌ he shôbǐǐshǔ bǎ kòyò ta̤sǎlě̤we̤kènu agûlǎ̤ ô̌ nô̌ tôkû̌꤮ tô̤̌, ma̤titèhî̌dě Běcǎ mǎnǎ bǎ kû̌ he bǎ shôbǐǐ bǎ kòyò ta̤sǎlě̤we̤kè. He kè̌ shôbǐǐ bǎ kòyò ta̤sǎlě̤we̤kè tô̤̌ hî̌nu, a gû̌jî̌gû̌jû̌ mî̌ca he pwǐ tè pě. 17 Ta̤ma̤ nî̌ he kè̌ rû̌phî̌rû̌ma̤ tûû̌ pwǎ kè̌hî̌dě, he phî̌ akhû̌akǎ mî̌ a gwǎ pwǎ. Bǎbǎkǎlè he rû̌phî̌rû̌ma̤ tûû̌ mè̤̌tô̤̌. Cǒmara rû̌htò̌ he dě a ǐlò̤kè ta̤ma̤nu dǒ he cǔdekû akhû̌akhî, he bǎ ma̤ pô̤̌ a ǐlò̤ he, a noma̤ he nupwǎ. 18 Kè̌hî̌pô̤̌nudě, he glè̌ nǐ̤bǎ akhû̌akǎ mî̌titè pě? Akhû̌akǎ dǒ he nǐ̤bǎ numî̌ he shôbǐǐ bǎ kòyò ta̤sǎlě̤we̤kènu hǒ. A gwǎ kû̌ he tô kwi kòyò ta̤ma̤jè̌ bǎbǎkǎlè he phî̌ gû̌ kòyò akhû̌akǎ tô̤̌ nuhǒ.

19 He mî̌ pwa̤ô̌pili̤ tôpwa̤ dě kòyò ma̤jè̌ bǎ he tô̤̌ akhû̌akhî, he lǎ̤lṳ̂ ganǎ̤de asîyô̤̌ tô̤̌. Bǎbǎkǎlè pô̤̌khô kòyò gǔ yṳ̌nǐ̤nǎ̤nǐ̤ dû̌wî̤ Běcǎ Yeshǔ ayanu, he sǎyṳ htû bǎ kòyò pṳ̂̌꤮ tôpwa̤ a jû̌. 20 Pô̤̌khô Yǔdaphû̌ tokhlǒ gǔ yṳ̌nǐ̤nǎ̤nǐ̤ Běcǎ Yeshǔ Khrǐ ayanu, bǎ he ô̌ dǒ asîkla akha, he ma̤ sô̌sô̌kû̌ pô̤̌ Yǔdaphû̌ tokhlǒ ma̤nu. He ô̌ dǒ Khûmṳ̂shě a ta̤sû̌ta̤tòwò alǎ̤ mè̤̌tô̤̌ bǎbǎkǎlè pô̤̌khô kòyò ta̤sû̌ta̤tòwò alǎ̤ tokhlǒ gǔ yṳ̌nǐ̤nǎ̤nǐ̤ ge Běcǎ Yeshǔ ayanu, he bǎ ma̤gû̌ ta̤sû̌ta̤tòwò pô̤̌ asî ma̤nu pwǎ. 21 Pô̤̌khô kòyò dǒ a sî̌ganǎ̤ gû̌ kòyò Khûmṳ̂shě a ta̤sû̌ta̤tòwò tô̤̌ tokhlǒ gǔ yṳ̌nǐ̤nǎ̤nǐ̤ gû̌ kòyò Běcǎ Yeshǔ Khrǐ ayanu, bǎ he ô̌ dǒ asîkla akha, he ma̤pô̤̌ pa Yǔdaphû̌ alǎ̤klô ma̤nu tô̤̌, he ma̤ sô̌sô̌kû̌ pô̤̌ asî ma̤nu pwǎ. Bǎbǎkǎlè he gû̌ma̤ Cǒmara a ta̤sû̌ta̤tòwò tô̤̌, he hî̌ pô̤̌nu mè̤̌tô̤̌. Kè̌ hî̌mè̤̌mè̤̌nu he mî̌ kòyò tôpwa̤ dǒ a gû̌ma̤ mî̌ca Khrǐ a ta̤sû̌ta̤tòwò tôpwa̤. 22 Pô̤̌khô kòyò dǒ kò ma̤jî̌ asî, pè̤̌ǎpè̤̌ô asî tokhlǒ gǔ yṳ̌nǐ̤nǎ̤nǐ̤ Běcǎ Yeshǔ ayanu, bǎ he ô̌plǒ dǒ asîkla akha, he ô̌htûpwa̤ sô̌sô̌kû̌ pô̤̌ asînu. Pô̤̌khô kòyò tokhlǒkhlǒ gǔ nǐ̤bǎ ta̤phǔgekhò̌ge ayanu, he kè̌lǎ ô̌htûpwa̤ lò̤tôlò̤bǎ pṳ̂̌꤮ tôcǒ pô̤̌ asî pṳ̂̌꤮ tôpwa̤ ô̌htûpwa̤nu. 23 He ma̤ titètè̌꤮ bǎbǎnu, he ma̤ dǒ ta̤sǎlě̤we̤kè aya pwǎ. Pô̤̌khô he gǔ nǐ̤bǎ ta̤sǎlě̤we̤kè a ta̤ǐshowî̤ tokhlǒnu, he ma̤ pô̤̌nu hǒ.

24 Kòyò bèkhlè̌ lû̌û taprṳ̂taphǎ bǎbǎkǎlè a khlè̌ pè̤̌bò kòyò numî̌ a ô̌ pwǎ tôpwa̤꤮ nô̤̌pwǎ. Dě kòyò ǐ ta̤bèkhlè̌ khû̌kǎ tǒ̤꤮ a nutôpwa̤ pwǎ numî̌ sî sî̌ganǎ̤tû̌ hǒ! Pô̤̌nudě, pô̤̌khô sî gû̌ nǐ̤bǎ ta̤khlè̌ khû̌kǎnu, jî̌pwǐ̤jî̌li̤ khlè̌ phǐnǐ̤ khû̌kǎ dǒ Cǒmara ô̌nu. 25 Lǒ̤bò kòyò dǒ a bèkhlè̌ tokhlǒnu, a bǎ sû̌ǐlò̤ tûû̌ lô̌khô anǎ̤, a bǎ khòǐ asǎphlǒ. Pô̤̌khô a gǔ nǐ̤bǎ gû̌ kòyò khû̌glû̌ anô̌akèjò, apî̌alṳ̂̌jò tokhlǒ ayanu pwǎ dě, a khò ǐtûû̌ lô̌khô anǎ̤ pô̤̌nu. Bǎbǎkǎlè pa dǒ a yṳ̌ǎ Yeshǔ Khrǐ tokhlǒnu, pa gǔ nǐ̤bǎ khû̌glǒ hta dǒ anôakèjò apî̌alṳ̂̌jò tô̤̌ tokhlǒ pě. 26 Pô̤̌nudě, pô̤̌khô he gǔ nǐ̤bǎ ta̤hǒo ayanu, he sô̌sô̌ kû̌ kòyò bèkhlè̌ta̤ tôpwa̤ dǒ a khlè̌ cǒrònè̌ tôtǐ dǒ ta̤ma̤mǎnǎ ahtǔ a ô̌nu tôpwa̤. He sô̌sô̌kû̌ pwa̤tûplû̌ta̤ dǒ a plû̌sǔplû̌bǎ kòyò tôpwa̤nu mè̤̌tô̤̌. 27 Pô̤̌nudě he khò ǐtûû̌ he sǎphlǒ a ta̤sǎyṳsǎbǎ tokhlǒ dě he sû̌ǐjî̌ sû̌ǐjû̌ lò̤ tûû̌ henǎ̤. He shôbǐǐlṳ̌ bǎ hto kòyò akhû̌akhî, he sǎyṳ htû kòyò dǒ a lò̤jû̌kè kòyò gûlǎ̤ tô̤̌, he sǎyṳ htû pô̤̌ he bǎ htûnu.