1 John 1
1Pa wě̤ cû̌ bǎ sî Yeshǔ awe̤akè, a mî̌ lě̤yô̤̌ dǒ a ǐ kòyò sǎphlǒhtûpwa̤ tôpwa̤. Anu a ô̌nǎ htohǒ dǒ hǎkhû̌ htûhtò̌ khôtô̤̌ akha pe. Pa ganǎ̤de htohǒ dě pa kè̌shǐ htotû̌ kû̌ pamǐ̤sǎ tû̌hǒ. Pa kè̌shǐ a dě pa pṳ̂̌bǎ htohǒ lû̌kû̌ pa cǔde hǒ. a 2Bǎ ta̤ô̌htûpwa̤nu ô̌lṳ̌htò̌ akhanu, pa kè̌shǐ a akhû̌akhî, a awe̤akè amè̤̌hǒ Yôla htûpwa̤ tûjû̌pwa̤ talakhǎnu, pa shôbǐǐlṳ̌ lṳ̌jò bǎ lǒ̤bò sî hǒ. Yôla htûpwa̤ tûjû̌pwa̤ talakhǎnu, a ô̌plǒ kû̌ papha Cǒmara htodě a hè ô̌ lṳ̌htò̌ bǎ hǒ pa. b 3Pô̤̌khô sî gǔ bô̌sû̌khǎkhô dô̌kû̌ pa ayanu, pa shôbǐǐ padô̌ sî ta̤ dǒ pa kè̌shǐ htohǒ dě pa ganǎ̤debǎ htohǒ nutokhlǒ hǒ. Pa ta̤bô̌sû̌khǎkhô kè̌khîlû̌û numî̌, pa bǒsû̌ panǎ̤ kû̌ pha Cǒmara kû̌ aphû̌khû Yeshǔ Khrǐ. 4Pô̤̌khô pa ta̤sǎlě̤sǎlò̤ gǔ lǒhtò̌behtò̌ ayanudě, pa wě̤ ta̤nutokhlǒ hǒ.Cǒmara mî̌ ta̤lî
5Ta̤we̤ta̤kè dǒ pa ganǎ̤de htohǒ dǒ aphû̌khû ô̌nu, pa sǎyṳ shôbǐǐlṳ̌ bǎ gû̌ sî kû̌, Cǒmara mî̌ ta̤lî dě ta̤khǐsiwi̤ ô̌ dǒ lû̌kû tôcǒ꤮ tô̤̌. 6Kè̌ pa hî̌ kû̌ pa bǒsû̌khǎkhô kû̌ a bǎbǎkǎlè pa kè̌ ô̌htûpwa̤ sělě pepwǎ dǒ ta̤khǐsiwi̤ akla dě pa kè̌ ma̤ sělě gudǔ pepwǎ ta̤sǔ hǒnumî̌, pa mî̌ kòyò lòhǎlòhò dě pa ô̌htûpwa̤ dǒ ta̤tě̤ta̤mè̤̌ akû tô̤̌. 7Bǎbǎkǎlè pa kè̌ ô̌htûpwa̤ dǒ ta̤lî akû pô̤̌ Cǒmara ô̌ dǒ ta̤lî akû hǒnumî̌, pa ô̌ kû̌ ta̤bǒsû̌khǎkhô kè̌khîlû̌û tôpwa̤ kû̌ tôpwa̤, htodě Cǒmara aphû̌khû Yeshǔ Khrǐ asǐnu a gǔ cǔbò lǒ̤bò hǒ pa ta̤sǔta̤phû̌mò̤̌ tokhlǒ. 8Kè̌ pa hî̌ kû̌ pa ma̤nô̌ ta̤sǔta̤phû̌mò̤̌ tôkhò̌ tô̤̌ hǒnumî̌ amè̤̌hǒ pa lòhôlò̤ǐtû̌ panǎ̤, dě ta̤tě̤ta̤mè̤̌ ô̌ dǒ pakû tôcǒ tô̤̌. 9Bǎbǎkǎlè pa kè̌ shôbǐǐlṳ̌ Cǒmara kû̌ pa ma̤ ta̤sǔta̤phû̌mò̤̌ tokhlǒ numî̌ Cǒmaranu acǒ kû̌ a ta̤olò̤ dě a ma̤tô̤ma̤bǎ ta̤, htokhôtô̤̌ a gǔ plûkè pa ta̤sǔ lǒ̤bò dě a ma̤mṳ̂̌plî getîkhî sô̌ lǒ̤bò pa ma̤ta̤tô tô̤̌ nutokhlǒ pě. 10Kè̌ pa hî̌ kû̌ pa ma̤nǒ ta̤sǔ tôkhò̌꤮ tô̤̌ hǒnumî̌ pa nohtû Cǒmara sô̌sô̌kû̌ kòyò lòhǎlòhò ta̤ tôpwa̤ dě alě̤ayô̤̌ ô̌ dǒ pakû tômṳ̂̌꤮ tô̤̌.
Copyright information for
KxfSCKXF