1 John 2

1Hephû̌heli̤ Khrǐphû̌ sî, pô̤̌khô sî gǔ ma̤pe tǎ̤ ta̤sǔ tǎ̤mǎ̤ ayanu, he wě̤ hto sî pô̤̌nu hǒ. Bǎbǎkǎlè kòyò tôpwa̤pwa̤ kè̌ ma̤ta̤sǔ hî̌dě, pa pwa̤cǒpwa̤tè̤ Yeshǔ Khrǐ dǒ a kwisǎyṳ bǎ dǒ paya dǒ pha Cǒmara a ô̌nu, a ô̌ tôpwa̤. 2Pô̤̌khô Cǒmara gǔ plûkè pa ta̤sǔta̤phû̌mò̤̌ nudě Khrǐ tṳ̌sikhòsihto asǎphlǒ hǒ. Bǎbǎkǎlè tǒ̤pwǎ pa ta̤sǔta̤phû̌mò̤̌ tûû̌ ayanu mè̤̌tô̤̌, a plûkè sada bò hǎkhû̌phû̌ tokhlǒ a ta̤sǔta̤phû̌mò̤̌.

3Dǒ pa jûlě̤phî̌yô̤̌ Cǒmara ta̤mǎlò̤ akhû̌akhî, pa sî̌ganǎ̤ tě̤tě̤mè̤̌mè̤̌ hǒ kû̌ pa sî̌ganǎ̤hè Cǒmara hǒ. 4Kòyò tôpwa̤pwa̤ kè̌hî̌kû̌ he sî̌yahto Cǒmara a hî̌ bǎbǎkǎlè a kè̌ jûlě̤phî̌yô̤̌lû̌ ta̤mǎlò̤ tô̤̌ hî̌nu, a mî̌ kòyò lòhô dě ta̤tě̤ta̤mè̤̌ ô̌ dǒ lû̌kû tôcǒ꤮ tô̤̌. 5Bǎbǎkǎlè mò̌pè tôpwa̤ bǎbǎ, a kè̌ jûǎ lû̌yô̤̌ hî̌nu, ta̤mô̤ǐtû̌ Cǒmara lǒhtò̌behtò̌ mè̤̌mî̌ca hǒ dǒ akû hǒ. Dǒ pa jûǎ ayô̤̌ akhû̌akhî, pa sî̌ganǎ̤ tě̤tě̤mè̤̌mè̤̌ hǒ kû̌ pa htûhtò̌kè ta̤tôcǒ꤮ nô̤̌ kû̌ Cǒmara hǒ. 6Mò̌pè tôpwa̤ bǎbǎ a kè̌ hî̌htò̌lṳ̌ hǒ anǎ̤ kû̌ a htûhtò̌kè ta̤tocǒ꤮ nô̤̌ hǒ kû̌ Cǒmara hǒ hî̌nu, a tôbǎ gû̌kha yî̤̌kû̌ Yeshǔ Khrǐ akhò̌lôpô̤̌ gûlǎ̤.

Ta̤mǎlò̤ asa

7He khô sî, ta̤mǎlò̤ dǒ he wě̤ bǎ sî numî̌ asa mè̤̌tô̤̌, mî̌ ta̤mǎlò̤ ali̤ dǒ sî nǐ̤bǎ htohǒ dǒ sî htûsakhû̌lû̌ Khrǐphû̌ akha pěnu tômè pwǎ. Ta̤mǎlò̤ ali̤ hǒtôplô numî̌ amè̤̌kû̌ ta̤we̤ta̤kè dǒ sî ganǎ̤de htohǒ nutokhlǒ hǒ. ^a 8Bǎbǎkǎlè ta̤mǎlò̤ dǒ he wě̤ bǎ sî khònò̤̌ numî̌ asa mè̤̌mî̌ca, ma̤titèhî̌dě ta̤khǐsiwi̤ glè̌ hǎmǎ hǒ dě ta̤lî mè̤̌mî̌canu lî̤htò̌ akhû̌akhî, ta̤mǎlò̤ asa numî̌ acǒatè̤ dě sî kè̌shǐjò a dǒ Khrǐ akû kû̌ dǒ sîkû.

9Kòyò tôpwa̤pwa̤ kè̌hî̌kû̌ a ô̌ dǒ ta̤lî akûhǒ bǎbǎkǎlè kè̌ a sǎkhěpepwǎ kòyò yṳ̌ǎ Khrǐ dǒ ashǔshawa̤ tokhlǒ tû̌pwǎ hǒnumî̌, tǒ̤lò̤ khònò̤̌nu a ô̌pepwǎ dǒ ta̤khǐsiwi̤ akû pwǎ. 10Kòyò dǒ a mô̤ǐtû̌ kòyò tôpwa̤pwa̤nu, a ô̌htûpwa̤ dǒ ta̤lî akûhǒ. Dě ta̤ dǒ a lǎ̤htò̌tukhu lò̤khǔpo̤ cû̌ dǒ ta̤sǔ akûnu, a ô̌pe tôcǒ tô̤̌ hǒ. 11Bǎbǎkǎlè kòyò tôpwa̤pwa̤nu, a kè̌ sǎkhî̌ pě pwǎ kòyò dǒ a yṳ̌ǎ Khrǐ dǒ ashǔshawa̤ tokhlǒ pepwǎ hî̌numî̌, a ô̌ dǒ ta̤khǐsiwi̤ akû. Dě a glè̌ cû̌tǒ̤ bǎtè tôkûyanu a sî̌ganǎ̤ ǐtû̌ anǎ̤ tô̤̌, ma̤titèhî̌dě ta̤khǐsiwi̤ ma̤lîkè lû̌û mǐ̤sǎphlǒ.

12Hephû̌heli̤ sî, he wě̤ hto sî lî̤hǒtôbǎ, ma̤titèhî̌dě dǒ Yeshǔ Khrǐ akhû̌akhîdě, Cǒmara plûkèbò hǒ sî ta̤sǔta̤phû̌mò̤̌ lǒ̤꤮ bò hǒ.

13Phasî, he wě̤ bǎ hǒ sî lî̤nu, ma̤titèhî̌dě kòyò dǒ a ô̌nǎ pě dǒ mǒkhû̌hǎkhû̌ htûhtò̌ tǒ̤khôtô̤̌ akhanu tôpwa̤nu, sî sî̌ganǎ̤ htohǒ lû̌û hǒ.

Pwa̤khûphû̌sǎ sî, dǒ sî ma̤pè̤̌htohǒ hǎkhû̌tana nutôdo akhû̌akhî, he wě̤ hto sî lî̤hǒtôbǎ.

Hephû̌heli̤ sî, sî sî̌ganǎ̤ htohǒ pha Cǒmara akhû̌akhî, he wě̤ bǎhto sî lî̤nu.

14Phasî, he wě̤ bǎhǒ sî lî̤nu, ma̤titèhî̌dě kòyò dǒ a ô̌nǎ pě dǒ mǒkhû̌hǎkhû̌ htûhtò̌ tǒ̤khôtô̤̌ akhanu tôpwa̤nu, sî sî̌ganǎ̤ htoyǎ hǒ.

Pwa̤khûphû̌sǎ sî, he wě̤ bǎhǒ sî lî̤nu, ma̤titèhî̌dě Cǒmara alě̤ayô̤̌ ô̌htûpwa̤ hǒ dǒ sîkû dě sî sǎphlǒshû̌ dě sî ma̤pè̤̌kè hǒ hǎkhû̌tana nutôdo hǒ.

15Lǒ̤bò hǎkhû̌běkhû̌ a lǎ̤bû̌lǎ̤klô phû̌mò̤̌ tokhlǒnu bǎbǎ, ta̤ ô̌ dǒ hǎkhû̌ hǒtôbǎ alô̤ lǒ̤bò nutokhlǒ bǎbǎ, mô̤nǐ̤ tǎ̤ a tǎ̤mǎ̤ nî̌꤮. Ta̤ titètè̌ bǎbǎ dǒ a ô̌ dǒ hǎkhû̌ tokhlǒnu, sî kè̌ mô̤ǐ a hǒnumî̌, sî mô̤ǐ pha Cǒmara tô̤̌. 16Ma̤titèhî̌dě, lǒ̤bò ta̤ dǒ a ijò kû̌ hǎkhû̌ nutokhlǒ mî̌ amè̤̌kû̌ panǎ̤glǒ a ta̤sǎyṳsǎbǎ ta̤ dǒ awô̌tô̤̌, pa mǐ̤sǎphlǒ sǎyṳ kè̌ ta̤ dǒ a phû̌mò̤̌ tokhlǒ, ta̤phî̌htò̌yô̤̌ tû̌nǎ̤ kû̌ ta̤dû̌yò̤̌htò̌sa kû̌ ta̤pṳ̂̌tocǒ nutokhlǒ hǒ. Lǒ̤bò ta̤ hǒtokhlǒ numî̌ a ô̌dǒ pha Cǒmara a ô̌ hè mè̤̌tô̤̌, a ô̌ dǒ hǎkhû̌nu dě a hè pwǎ. 17Hǎkhû̌nu kû̌ titètè̌ bǎbǎ dǒ a ô̌ dǒ lû̌kû lǒ̤꤮ bò dǒ kòyò sǎlě̤sǎyṳ lû̌û tokhlǒnu, a hǎmǎkè lǒ̤bò pě, bǎbǎkǎlè kòyò dǒ a ma̤tô Cǒmara asǎphlǒ tokhlǒnu, a ô̌htûpwa̤ tûjû̌pwa̤ talakhǎ pě.

Pwa̤ sǎkhěkhû̌khwè Khrǐ tokhlǒ

18Hephû̌heli̤ sî, lṳmṳ̌ni̤ gutṳ̌ phǔhèhǒ, kòyò shôbǐǐlṳ̌ htohǒ sî kû̌ pwa̤sǎkhěkhû̌khwè Khrǐ nutôpwa̤ hè pě dě khònò̤̌ pwa̤sǎkhěkhû̌khwè Khrǐ hǒtokhlǒnu a hèô̌lṳ̌htò̌ dû̌ hǒ akhû̌akhî, pa sî̌ganǎ̤ kû̌ lṳmṳ̌ni̤ gutṳ̌ phǔhèhǒ. 19Asî hǎhtò̌cû̌kè dǒ pakla hǒ. Asî hǒtokhlǒ numî̌ a ô̌plǒ mè̤̌mî̌ca kû̌ pa ta̤bǒsû̌khǎkhô lû̌nu mè̤̌tô̤̌. Asî kè̌ ô̌pagû̌ mè̤̌mî̌ca kû̌ pa hǒnumî̌ asî klè̌ ô̌plǒ nô̌ kû̌ pa pwǎ. Bǎbǎkǎlè asî hǎhtò̌cû̌kè dǒ pakla dě asî ata̤hǎhtò̌cû̌kènu, a dǔlè̌lṳ̌ lîtîklî̌kè hǒ kû̌ asî ô̌plǒ mè̤̌mî̌ca pe kû̌ pa tôpwa̤ tô̤̌ hǒ.

20Bǎbǎkǎlè Yeshǔ Khrǐ ǐlò̤ Yôla Plò̌shǐ Běcǎ dǒ sîlô̤ akhû̌akhî, lǒ̤bò sî hǒtokhlǒ numî̌ sî sî̌yahto ta̤tě̤ta̤mè̤̌ hǒ. 21Sî sî̌yakû̌ ta̤tě̤ta̤mè̤̌ tô̤̌ akhû̌akhîdě, he wě̤ bǎ sî pô̤̌nu mè̤̌tô̤̌. Sî sî̌yahto ta̤tě̤ta̤mè̤̌ dě he wě̤ bǎ sî pwǎ. Htokhôtô̤̌ ta̤lòhônu a hè ô̌ htò̌jò dǒ ta̤tě̤ta̤mè̤̌ akû tôkhò̌ tô̤̌nu, sî sî̌ganǎ̤tû̌ hǒ. 22Kè̌hî̌pô̤̌nudě kòyò dǒ a lòhô tôpwa̤ numî̌ mò̌pè? Kòyò tôpwa̤pwa̤ kè̌ hî̌ kû̌ Yeshǔ numî̌ Khrǐ mè̤̌tô̤̌ hî̌nu, a mî̌ amè̤̌kû̌ pwa̤sǎkhě khû̌khwè Khrǐ nutôpwa̤ hǒ. Htokhôtô̤̌ a mî̌ kòyò dǒ a wîkè bò hǒ pha kû̌ kòyòphû̌khû sò̌ginǐ̤ lǒ̤bò hǒ. 23Kòyò dǒ a wîkè kòyòphû̌khû numî̌ amè̤̌kû̌ a wîkè pha Cǒmara hǒ. Kòyò dǒ a kaǎmô̤shǔ kòyòphû̌khû numî̌ amè̤̌kû̌ a kaǎmô̤shǔ pha Cǒmara hǒ.

24Ma̤pô̤̌nudě, dǒ sî htûhtò̌ sakhû̌lû̌ Khrǐphû̌ akhanu, shû̌nṳ̌ ô̌měô̌gle wô̌ lô̌khô ta̤we̤ta̤kè dǒ sî ganǎ̤de htohǒnu tokhlǒ dǒ sî sǎphlǒkûnu. Sî kè̌ ma̤pô̤̌nu numî̌ sî ô̌měô̌gle dǒ kòyòphû̌khû kû̌ pha akû hǒ. 25Htodě Khrǐ anǎ̤běcǎ tûû̌ a olò̤ kû̌ a ǐ pa pě numî̌ yôla htûpwa̤ tûjû̌pwa̤ talakhǎ nuhǒ.

26He wě̤ bǎ sî numî̌, kòyò dǒ a cû̌ lô̌ǐplò̤ǐ kòyò nutokhlǒ awe̤akè pwǎ. 27Sîya dě, Khrǐ ǐlò̤ htohǒ a Yôla Plò̌shǐ Běcǎ dǒ sîlô̤ hǒ, dě a Yôla Plò̌shǐ ô̌měô̌gle dǒ sîkû akhû̌akhî, kòyò lǎ̤lṳ̂ sû̌ǐ pě sî tôpwa̤ tô̤̌, ma̤titèhî̌dě a Yôla Plò̌shǐ sû̌ǐ hǒ sî ta̤pṳ̂̌tocǒhǒ. Htokhôtô̤̌ a sû̌ǐ sî numî̌ ta̤tě̤ta̤mè̤̌, ta̤lòhô mè̤̌tô̤̌. Pô̤̌nudě ô̌měô̌gle lô̌khô dǒ Khrǐ akû pô̤̌ a Yôla Plò̌shǐ sû̌ǐ htohǒ sî nunî̌.

28Dě khònò̤̌ Hephû̌heli̤ sî, htǔ Běcǎ Khrǐ hè sô̌ alṳmṳ̌ni̤ pě tôni̤nu, pô̤̌khô sî gǔ ǐsha ô̌û̌ô̌shò̌ tǎ̤mǎ̤, htokhôtô̤̌ pô̤̌khô sî gǔ sòwò̤̌ tǎ̤mǎ̤nu, ô̌měô̌gle lô̌khô dǒ Khrǐ akû nî̌꤮.

29Sî sî̌ganǎ̤ kû̌ Khrǐ mî̌ kòyòcǒkòyòtè̤ tôpwa̤. Pô̤̌nudě sî tô sî̌ganǎ̤ kû̌ kòyò dǒ a ma̤tôta̤ tokhlǒ numî̌, amè̤̌kû̌ Cǒmara aphû̌ali̤ tokhlǒ hǒ.