1 John 3
Cǒmara aphû̌ali̤ tokhlǒ
1Pha Cǒmara mô̤ǐtû̌ htohǒ pa pwǐ꤮ tènu, kè̌mò̌ lô̌khô, a mô̤ǐtû̌ panu, tǒ̤ dǒ kòyò bǎ kaǎ pa kû̌ Cǒmara aphû̌ali̤ tokhlǒ. Pa htû mè̤̌mî̌ca Cǒmara aphû̌ali̤ tokhlǒ hǒ. Kòyò hǎkhû̌phû̌ tokhlǒ sî̌ganǎ̤ Cǒmara tô̤̌ akhû̌akhî, a sî̌ganǎ̤ pa tô̤̌. a 2He khômô̤ sî, khònò̤̌ pa htû hǒ Cǒmara aphû̌ tokhlǒ hǒ bǎbǎkǎlè pa gǔ htûhtò̌ kòyò hî̌tè pě tôcǒyanu, kòyò dǐsî̌ganǎ̤ ô̌nǎ pa tôcǒ tô̤̌. Bǎbǎkǎlè, ta̤hǒonu pa sî̌ganǎ̤ htohǒ kû̌, htǔ Běcǎ Yeshǔ Khrǐ hèô̌lṳ̌htò̌ akha pěnu, pa sô̌sô̌kû̌ a pě, ma̤titèhî̌dě pa kè̌shǐ mè̤̌ a pô̤̌ a mè̤̌mî̌ca nupě. 3Kòyò dǒ a ô̌pǒ̤kè̌shuǐ lô̌khô kû̌ a htûhtò̌ sô̌sô̌kû̌ Yeshǔ Khrǐ pě tokhlǒnu, pô̤̌ Khrǐ aplò̌shǐnu, a bè̌plò̌shǐ kû̌ anǎ̤ pô̤̌nu pě. 4Lǒ̤bò kòyò dǒ a ma̤ ta̤sǔta̤phû̌mò̤̌ tokhlǒnu, a cû̌tûlû̌ khatûlû̌ hǒ Cǒmara a ta̤sû̌ta̤tòwò hǒ. Ma̤titèhî̌dě ta̤sǔta̤phû̌mò̤̌ mî̌ amè̤̌kû̌ ta̤cû̌tûlû̌khati̤li̤ Cǒmara a ta̤sû̌ta̤tòwònu hǒ. 5Bǎbǎkǎlè pô̤̌khô Khrǐ gǔ phî̌cû̌kè pa ta̤sǔta̤phû̌mò̤̌ tokhlǒ ayanu, a hèlò̤ htohǒ dǒ hǎkhû̌ numî̌ sî sî̌ganǎ̤ htotû̌ hǒ. Htokhôtô̤̌ sî sî̌yahto kû̌ Yeshǔ Khrǐ numî̌ a ta̤sǔta̤phû̌mò̤̌ ô̌kû̌ kòyò tôcǒ tô̤̌. b 6Ma̤pô̤̌nudě lǒ̤bò kòyò dǒ a ô̌měô̌gle dǒ Yeshǔ Khrǐ akû tokhlǒnu, a bǎ ma̤ sělě pe ta̤sǔta̤phû̌mò̤̌ tô̤̌. Bǎbǎkǎlè kòyò tôpwa̤pwa̤ dǒ a ma̤ sělě gutṳ̌pe ta̤sǔta̤phû̌mò̤̌ numî̌, kòyò dǒ a kè̌shǐnô̌ Yeshǔ Khrǐ tôkhò̌꤮ tô̤̌, htodě a sî̌ganǎ̤bǎnô̌ Yeshǔ Khrǐ tôplǎ꤮ tô̤̌. 7Phû̌li̤sî, nolô̌ǐ cû̌ tǎ̤ kòyò kû̌ sînǎ̤ tôpwa̤ tǎ̤mǎ̤ nî̌. Kòyò tôpwa̤pwa̤ dǒ a ma̤ ta̤tě̤ta̤mè̤̌ numî̌ amè̤̌ kòyò dǒ acǒatè̤ sô̌sô̌ kû̌ Yeshǔ Khrǐ cǒtè̤nu hǒ. 8Kòyò tôpwa̤pwa̤ dǒ a ma̤ sělě gutṳ̌pe ta̤sǔta̤phû̌mò̤̌ hǒnumî̌, hǎkhû̌tana pǒǐ pepwǎ lû̌û, ma̤titèhî̌dě hǎkhû̌tananu, a ma̤cǒwô̌ ta̤sǔta̤phû̌mò̤̌ dǒ akòshî̌kha pe, dě a ma̤ sělě pe tǒ̤ khònò̤̌. Pô̤̌khô Cǒmara aphû̌khûnu gǔ ma̤pî̌kè ta̤ dǒ hǎkhû̌tana ma̤htohǒ nutokhlǒ ayanudě, a hèlò̤ dǒ hǎkhû̌nu hǒ. 9Mò̌pè tôpwa̤ bǎbǎ, a kè̌ htûhto Cǒmara aphû̌ali̤ hî̌nu, a ma̤ sělě pe ta̤sǔta̤plě tô̤̌, ma̤titèhî̌dě ta̤ô̌htûpwa̤ asa dǒ Cǒmara ǐnu a ô̌mětegle dǒ lû̌kû hǒ. Dě Cǒmara mî̌ apha hǒ akhû̌akhî, a ma̤ sělějò pe ta̤sǔta̤plě tô̤̌. 10Cǒmara aphû̌ali̤ tokhlǒ kû̌ hǎkhû̌tana aphû̌ali̤ tokhlǒnu, pa sî̌ganǎ̤ tě̤tě̤mè̤̌mè̤̌ jò a pô̤̌o hǐdě, mò̌pèpè bǎbǎ a kè̌ ma̤ sělě gutṳ̌pe ta̤ dǒ a tôtô̤̌ tokhlǒ, mè̤̌tô̤̌mî̌ a mô̤ǐtû̌ kû̌ apṳ̌awè̤̌ Khrǐphû̌ tokhlǒ tô̤̌ numî̌ Cǒmara aphû̌ali̤ mè̤̌tô̤̌.Cǒmara aphû̌ali̤ mî̌ a mô̤ǐtû̌ kè̌khîlû̌ tôpwa̤ kû̌ tôpwa̤
11Ta̤we̤ta̤kè dǒ sî ganǎ̤de dǒ sî htûhtò̌ sakhû̌lû̌ Khrǐphû̌ akhanumî̌, pa tôbǎ mô̤ǐtû̌ lû̌û tôpwa̤ kû̌ tôpwa̤nu hǒ. c 12Pa tôbǎ sô̌sô̌ kû̌ Khûkayi̤ dǒ hǎkhû̌tana pǒǐ lû̌û dě a ma̤si ǐtû̌ apṳ̌ nutôpwa̤ tô̤̌. A cû̌ ma̤si tǒ̤ apṳ̌ ma̤titèhî̌dě a ma̤ta̤ tokhlǒ numî̌ a phû̌mò̤̌ dě apṳ̌ ma̤ta̤ tokhlǒ numî̌, a cǒtè̤ akhû̌akhî, a ma̤sikè apṳ̌ pwǎ. d 13Pô̤̌nudě he pṳ̌wè̤̌ Khrǐphû̌ sî, kòyò dǒ a ma̤ ta̤tě̤ta̤mè̤̌ tô̤̌ tokhlǒ kè̌ sǎkhě sî hî̌dě ǒò̌ lô̌khô tǎ̤mǎ̤ nî̌. 14Dǒ awǐkha numî̌, pa sô̌sô̌kû̌ kòyòsi nutokhlǒ pwǎ. Bǎbǎkǎlè khònò̤̌ dǒ pa mô̤nǐ̤ hǒ pa pṳ̌wè̤̌ Khrǐphû̌ tokhlǒ akhû̌akhî, pa sî̌ganǎ̤ kû̌ pa htûhtò̌kè kòyò dǒ a htûpwa̤ tokhlǒ hǒ. Kòyò dǒ a mô̤ǐtû̌ apṳ̌wè̤̌ Khrǐphû̌ tô̤̌ tokhlǒ numî̌ a ô̌měô̌gle pepwǎ dǒ ta̤si akû pwǎ. e 15Mò̌pèpè bǎbǎ a kè̌ sǎkhěkhû̌khwè kòyò yṳ̌ǎ Khrǐ dǒ ashǔshawa̤ tôpwa̤pwa̤ numî̌, a ma̤si kòyò hǒ. Dě sî sî̌ganǎ̤ kû̌ kòyò dǒ a ma̤si kòyò tôpwa̤pwa̤nu, a nǐ̤bǎ kû̌ kòyò yôla htûpwa̤ tûjû̌pwa̤ talakhǎ tô̤̌. 16Ta̤mô̤nu pa sî̌ganǎ̤jò a hî̌tè hî̌dě, Yeshǔ Khrǐ ǐlò̤kè a sǎphlǒhtûpwa̤ dǒ paya, dě pa tôbǎ ǐlò̤kè gû̌ pa sǎphlǒhtûpwa̤ dǒ pa pṳ̌wè̤̌ Khrǐphû̌ tokhlǒ aya. 17Kòyò dǒ a ô̌ kû̌ hǎkhû̌ a ta̤dû̌yò̤̌htò̌sa tôpwa̤pwa̤nu, kè̌ a kè̌shǐ apṳ̌wè̤̌ Khrǐphû̌ lǎ̤lṳ̂ ta̤tôcǒcǒ bǎbǎkǎlè a kè̌ gwèbǎǐ lû̌tô̤̌ numî̌, Cǒmara ata̤mô̤ ô̌ dǒ lû̌kû tô̤̌. 18Hephû̌heli̤ sî, pa ta̤mô̤nu nopwe̤htò̌ tǎ̤ tǒ̤pwǎ dǒ sî khû̌phělô̤nu tǎ̤mǎ̤ nî̌꤮. Sî tôbǎ ma̤jè̌ mè̤̌mî̌ca kòyò pô̤̌ Cǒmara mô̤ mè̤̌mî̌ca panu. 19Pa kè̌ mô̤ ǐtû̌ lû̌û tôpwa̤ kû̌ tôpwa̤ pô̤̌nu hî̌dě pa sî̌ganǎ̤ kû̌ pa ô̌gû̌ dǒ ta̤tě̤ta̤mè̤̌ tôkhô hǒ. Dě pa gǔ sǎphlǒmô̤, sǎphlǒ gûjû̌kabǎ hǒ dǒ Cǒmara a lô̤mô̤̌ hǒ. 20Pa sǎphlǒ kè̌ hî̌lò̤ ǐtû̌ pa kû̌ pa ma̤sǔ hǒ ta̤ bǎkhò̌tè꤮ bǎbǎnu, pa sî̌ganǎ̤ kû̌ Cǒmara mî̌ adû̌khlo kû̌ pa sǎphlǒ dě a sî̌ganǎ̤ lǒ̤bò ta̤pṳ̂̌tocǒ. 21Pô̤̌nudě khômô̤ sî, pa sǎphlǒnu, a kè̌ hî̌lò̤ ǐtû̌ pa kû̌ pa ta̤sǔ ô̌tô̤̌ hî̌dě, pa gǔ hènṳ̌ dǒ Cǒmara a lô̤mô̤̌ pěnu, pa ǐsha pe tôcǒ꤮ tô̤̌ hǒ. 22Htokhôtô̤̌ pa lě̤ jûǎ ta̤mǎlò̤ dě pa lě̤ ma̤tô lû̌sǎphlǒ akhû̌akhî, pa kwi ta̤ titètè̌꤮ bǎbǎnu, pa nǐ̤bǎ ta̤ dǒ a ô̌ nutokhlǒ pě. 23Cǒmara mǎnǎ ayô̤̌ dě a hî̌ kû̌, pa bǎ yṳ̌ǎ aphû̌khû Yeshǔ Khrǐ ami̤ dě pa gǔ mô̤ǐtû̌ kè̌khîlû̌û tôpwa̤ kû̌ tôpwa̤ pô̤̌ a mǎnǎ htohǒ ayô̤̌ kû̌ panu. f 24Kòyò dǒ a jûlě̤phî̌yô̤̌ Cǒmara ta̤mǎlò̤ hǒtokhlǒ numî̌ a ô̌měô̌gle dǒ Cǒmara akû hǒ, dě Cǒmara ô̌měô̌gle kû̌ dǒ asî akû hǒ. Cǒmara ǐ htohǒ pa Yôla Plò̌shǐ Běcǎ akhû̌akhî, a dǐsî̌ganǎ̤ htohǒ pa kû̌ a ô̌měô̌gle dǒ pakû hǒ.
Copyright information for
KxfSCKXF