1Jo 4 | KxfSCKXF | STEP | He khômô̤ sî꤮, lǒ̤bò kòyò dǒ a hî̌ kû̌ pa ô̌ kû̌ Yôla Plò̌shǐ Běcǎ hǒ tokhlǒnu, yṳ̌ǎ phô̌phô̌ lô̌khô tǎ̤mǎ̤. Pô̤̌khô sî gǔ sî̌ganǎ̤ kû̌ sǎphlǒ numî̌ a hè mè̤̌mî̌ca dǒ Cǒmara a ô̌ ya, mî̌ a hè mè̤̌tô̤̌ yanu kè̌kè̌ wǐ lô̌khô asî nî̌, ma̤titèhî̌dě dǒ hǎkhû̌nu, piwi̤pèshè lòhô ô̌lṳ̌htò̌ jûgrû hǒ.

1 John 4

Sǎphlǒ acǒatè̤ kû̌ sǎphlǒ lòhǎlòhô

1 He khômô̤ sî꤮, lǒ̤bò kòyò dǒ a hî̌ kû̌ pa ô̌ kû̌ Yôla Plò̌shǐ Běcǎ hǒ tokhlǒnu, yṳ̌ǎ phô̌phô̌ lô̌khô tǎ̤mǎ̤. Pô̤̌khô sî gǔ sî̌ganǎ̤ kû̌ sǎphlǒ numî̌ a hè mè̤̌mî̌ca dǒ Cǒmara a ô̌ ya, mî̌ a hè mè̤̌tô̤̌ yanu kè̌kè̌ wǐ lô̌khô asî nî̌, ma̤titèhî̌dě dǒ hǎkhû̌nu, piwi̤pèshè lòhô ô̌lṳ̌htò̌ jûgrû hǒ. 2 Kòyò dǒ a nǐ̤bǎhǒ Cǒmara a Yôla Plò̌shǐ tôpwa̤nu, pa sî̌ganǎ̤ jò a pô̤̌hî̌tèhî̌dě, kè̌ a hî̌ kû̌ Yeshǔ Khrǐnu, a hèlò̤ pô̤̌ kòyò hǎkhû̌phû̌ tôpwa̤ a kè̌ hî̌ pô̤̌nu hǒnumî̌, pa sî̌ganǎ̤ jò hǒ kû̌ a mî̌ a nǐ̤bǎhǒ Yôla Plò̌shǐ Běcǎ ô̌ dǒ Cǒmara a ô̌ hènu hǒ. 3 Bǎbǎkǎlè, kòyò dǒ a hî̌ kû̌ Yeshǔ numî̌ a hèlò̤ pô̤̌ kòyò hǎkhû̌phû̌ tôpwa̤nu mè̤̌tô̤̌ tokhlǒnu, a nǐ̤bǎ sǎphlǒ ô̌ dǒ Cǒmara a ô̌ hènu mè̤̌tô̤̌. Sǎphlǒ pô̤̌nu mî̌ a ô̌ dǒ pwa̤sǎkhě Khrǐ nutôpwa̤ a ô̌ hè pwǎ. Sî ganǎ̤de htohǒ kû̌ a hè pě, dě khònò̤̌ a hè ô̌htò̌ hǒ dǒ hǎkhû̌nu hǒ.

4 Bǎbǎkǎlè phû̌li̤ sî, sî mî̌ Cǒmara a kòyò tokhlǒ dě sî ma̤pî̌kè hǒ piwi̤pèshè lòhǎlòhô tokhlǒ hǒ, ma̤titèhî̌dě Cǒmara ô̌ dǒ sîkû tôpwa̤nu adû̌ lǒkhlo kû̌ hǎkhû̌tana dǒ a ô̌plǒ kû̌ kòyò hǎphû̌khû dǒ a ma̤ ta̤tě̤ta̤mè̤̌ tô̤̌ nutokhlǒ akû hǒtôdonu. 5 Hǎkhû̌ lǎ̤klô phû̌mò̤̌ pǒǐ piwi̤pèshè lòhô nutokhlǒ akhû̌akhî, asî gû̌ hî̌bǎ sô̌sô̌gû̌pô̤̌ hǎkhû̌phû̌ dǒ alǎ̤klô hî̌bǎ phû̌mò̤̌ akhû̌akhî, hǒnutokhlǒ dě Cǒmara a kòyò mè̤̌tô̤̌ tokhlǒ kû̌ ganǎ̤de lǒ̤bò asîyô̤̌. 6 Bǎbǎkǎlè pa mî̌ Cǒmara a kòyò tokhlǒ. Kòpṳ̂̌tôpwa̤ bǎbǎ dǒ a sî̌ganǎ̤ Cǒmara tôpwa̤nu, a ganǎ̤de kû̌ payô̤̌. Bǎbǎkǎlè Cǒmara a kòyò mè̤̌tô̤̌ tokhlǒnu, a gû̌ ganǎ̤de gû̌ payô̤̌ tô̤̌. Pô̤̌nu akhû̌akhî, kòyò dǒ a nǐ̤bǎ Yôla Plò̌shǐ Běcǎ dǒ a hî̌bǎ ta̤tě̤ta̤mè̤̌ hǒtôpwa̤ tokhlǒ numî̌ mò̌pè, kû̌ kòyò dǒ a nǐ̤bǎ sǎphlǒ dǒ a hî̌bǎ lòhǎlòhô akhû̌akhî, nutôdo tokhlǒ numî̌ mò̌pènu, pa sî̌ganǎ̤ bè̌yò jò tû̌pwǎ.

Cǒmara mî̌ ta̤mô̤

7 Khôbǒsû̌mô̤ sî, pa tôbǎ mô̤ǐtû̌ kè̌khîlû̌û tôpwa̤ kû̌ tôpwa̤, ma̤titèhî̌dě ta̤mô̤nu mî̌ a hè dǒ Cǒmara a ô̌. Mò̌pè tôpwa̤ bǎbǎ dǒ a mô̤ǐ kòyò numî̌ amè̤̌hǒ Cǒmara aphû̌ali̤ hǒ, dě a sî̌yahto Cǒmara hǒ. 8 Mò̌pè꤮ tôpwa̤ bǎbǎ dǒ a mô̤ǐ kû̌ kòyò tô̤̌ tokhlǒnumî̌, a sî̌ganǎ̤ kû̌ kòyò Cǒmara tô̤̌, ma̤titèhî̌dě Cǒmara mî̌ ta̤mô̤. 9 Cǒmara mô̤ǐ pa pwǐ tènu a dǔlè̌lṳ̌ bǎ hǒ pa kû̌ a nohèlò̤ aphû̌khû dǒ a ô̌ tǒ̤ pwǎ tôpwa̤ nô̤̌nu dǒ hǎkhû̌nu hǒ. Pô̤̌khô pa gǔ nǐ̤bǎ kû̌ tutṳ̌ ta̤htûpwa̤ dǒ aphû̌khû alô̤nu dě, a nohè bǎ pa hǒ. 10 Ta̤mô̤ yô̤̌mûyô̤̌sǎ mè̤̌mî̌ca mî̌ Cǒmara mô̤ pa dě pô̤̌khô pa ta̤sǔta̤plě bò̌ bò gǔ plûkè ayanu, a nohèlò̤ tṳ̌sikhòsi aphû̌khû dǒ paya. Bǎbǎkǎlè pa ta̤mô̤ Cǒmaranu adû̌ sô̌sô̌kû̌ ata̤mô̤ panu tô̤̌. 11 Khôbǒsû̌mô̤ sî, Cǒmara kè̌ mô̤ǐ pa pwǐo hî̌dě, pa tô mô̤ǐtû̌ kû̌ lû̌û tôpwa̤ kû̌ tôpwa̤. 12 Kòyò kè̌shǐbǎnô̌ Cǒmara tôpwa̤ tô̤̌. Pa kè̌ mô̤ǐtû̌ lû̌û tôpwa̤ kû̌ tôpwa̤ hǒnumî̌, Cǒmara ô̌měô̌gle hǒ dǒ pakû dě ata̤mô̤ ô̌lǒô̌be hǒ dǒ pakû hǒ. ^a

13 Pa sî̌ganǎ̤ mè̤̌mî̌cahto kû̌ Cǒmara ǐlò̤ htohǒ pa Yôla Plò̌shǐ Běcǎ akhû̌akhî, pa ô̌měô̌gle hǒ dǒ lû̌kû dě a ô̌měô̌gle hǒ dǒ pakû hǒ. 14 Pa kè̌shǐbǎ htohǒ, dě pa shôbǐǐlṳ̌ bǎ hǒ kòyò shǔshawa̤ tokhlǒ kû̌ pô̤̌khô Cǒmara aphû̌khûnu gǔ hè htû kòyò pwa̤ma̤hǎplǎge kòyò hǎkhû̌phû̌ tokhlǒ ayanu, pha Cǒmara nohèlò̤ yǎ dǒ hǎkhû̌nu hǒ. 15 Kòyò tôpwa̤ gǔ shôbǐǐhtò̌lṳ̌ kû̌ Yeshǔnu, Cǒmara aphû̌khû tôpwa̤ kè̌hî̌numî̌, Cǒmara ô̌měô̌gle hǒ dǒ lû̌kû dě a ô̌měô̌gle hǒ dǒ Cǒmara akû hǒ. 16 Pô̤̌nu akhû̌akhî, pa sanǎ̤tû̌ pa sî̌yahtohǒ, dě pa yṳ̌ǎhǒ kû̌ Cǒmara mô̤ǐ pa.

Cǒmara mî̌ ta̤mô̤. Mò̌pè꤮ tôpwa̤ bǎbǎ dǒ a ô̌měô̌gle dǒ ta̤mô̤ akûnu, a ô̌měô̌gle hǒ dǒ Cǒmara akû dě Cǒmara ô̌měô̌gle hǒ dǒ lû̌kû hǒ. 17 Pa kè̌ mô̤ǐ kòyòshǔshawa̤ pô̤̌nu hǒnumî̌, Cǒmara ata̤mô̤ ô̌lǒô̌be hǒ dǒ pakû hǒ. Pô̤̌nudě htû̌ ta̤cî̌htò̌ amṳ̌ni̤ hètǒ̤ pěnu, pa gǔ sǎphlǒkhu sǎphlǒhe hǒ pě, ma̤titèhî̌dě pa ta̤ô̌htûpwa̤ dǒ hǎkhû̌nu, a sô̌sô̌ kû̌ Khrǐ a ta̤ô̌htûpwa̤ hǒ akhû̌akhî, pa gǔ sǎphlǒkhuhe pě. 18 Dǒ ta̤mô̤ pô̤̌o akû numî̌ ǐsha ô̌tô̤̌. Cǒmara ata̤mô̤ dǒ a ma̤lǒma̤be bǎ hǒ dǒ pakûnu, a wṳ̂̌hǎhtò̌kè bǎ hǒ pa ta̤sǎgònò̤̌ ǐsha nutokhlǒ hǒ, ma̤titèhî̌dě ta̤sǎgònò̤̌ ǐsha numî̌ a mî̌ ta̤cî̌htò̌ pwǎ. Kòyò tôpwa̤pwa̤ kè̌ ǐsha pe pwǎ hǒnumî̌, Cǒmara ata̤mô̤ ô̌lǒô̌be dǒ akû tô̤̌.

19 Cǒmara mô̤wǐ pa akhû̌akhî, pa mô̤ǐ lû̌û tôpwa̤ kû̌ tôpwa̤ hǒ. 20 Kòyò tôpwa̤pwa̤ kè̌ hî̌ kû̌, “He mô̤ Cǒmara,” bǎbǎkǎlè a kè̌ sǎkhěkhû̌khwè pepwǎ apṳ̌wè̤̌ Khrǐphû̌ hǒnumî̌, a mî̌ kòyò lòhô pwǎ, ma̤titèhî̌dě a kè̌shǐnô̌ apṳ̌wè̤̌ Khrǐphû̌ kû̌ amǐ̤sǎ tûû̌ bǎbǎkǎlè a kè̌ mô̤nǐ̤ tô̤̌ numî̌, Cǒmara dǒ a kè̌shǐbǎnǒ tôkhò̌ tô̤̌ hǒtôpwa̤nu, “He mô̤ Cǒmara,” a cû̌ hî̌jò hî̌tè? 21 Dě ta̤mǎlò̤ dǒ pa nǐ̤bǎ dǒ Yeshǔ Khrǐ a ô̌ numî̌ a hî̌ kû̌ kòyò dǒ a mô̤nǐ̤ Cǒmara tokhlǒnu, a tôbǎ mô̤nǐ̤ gû̌ apṳ̌awè̤̌ Khrǐphû̌ tokhlǒ.