1Jo 5 | KxfSCKXF | STEP | Mò̌pè tôpwa̤ bǎbǎ a kè̌ yṳ̌ǎ kû̌ Yeshǔ mî̌ Khrǐ hî̌nu, a htûhto Cǒmara aphû̌ali̤ tôpwa̤hǒ. Htokhôtô̤̌ kòpṳ̂̌tôpwa̤ bǎbǎ a kè̌ mô̤nǐ̤ pha numî̌, a mô̤ǐ tûû̌ aphû̌ali̤ tokhlǒ hǒ.

1 John 5

Pa ta̤ma̤pè̤̌ hǎkhû̌

1 Mò̌pè tôpwa̤ bǎbǎ a kè̌ yṳ̌ǎ kû̌ Yeshǔ mî̌ Khrǐ hî̌nu, a htûhto Cǒmara aphû̌ali̤ tôpwa̤hǒ. Htokhôtô̤̌ kòpṳ̂̌tôpwa̤ bǎbǎ a kè̌ mô̤nǐ̤ pha numî̌, a mô̤ǐ tûû̌ aphû̌ali̤ tokhlǒ hǒ. 2 Bǎ pa mô̤nǐ̤ Cǒmara dě pa jûlě̤phî̌yô̤̌ a ta̤mǎlò̤ akhanu, pa sî̌yahǒ kû̌ pa mô̤nǐ̤ Cǒmara aphû̌ali̤ tokhlǒ hǒ. 3 Ma̤titèhî̌dě ta̤mô̤nǐ̤ Cǒmara yô̤̌mûyô̤̌sǎ mî̌ amè̤̌hǒ ta̤jûǎ a ta̤mǎlò̤ hǒtokhlǒ hǒ. Dě pa gǔ gû̌ma̤ bò lǒ̤bò a ta̤mǎlò̤ nutokhlǒ hǒnumî̌ apò̤̌ bǎtô̤̌. ^a 4 Ma̤titèhî̌dě Cǒmara aphû̌ pṳ̂̌꤮ tôpwa̤nu a ma̤pè̤̌ lǒ̤bò hǒ hǎkhû̌ lǎ̤klô phû̌mò̤̌ tokhlǒhǒ. Pa ma̤pè̤̌ hǎkhû̌ lǎ̤klô phû̌mò̤̌ tokhlǒ kû̌ pa ta̤yṳ̌ta̤nǎ̤ akò hǒ. 5 Mò̌pè tôpwa̤ gǔ ma̤pè̤̌bò hǎkhû̌ alǎ̤klô phû̌mò̤̌ hǒtokhlǒ ya? Tǒ̤pwǎ kòyò dǒ a yṳ̌ǎ kû̌ Yeshǔ numî̌ Cǒmara aphû̌khû tôpwa̤ nutokhlǒ ma̤pè̤̌ pě.

Cǒmara khòlṳ̌ asǎphlǒ kû̌ aphû̌khû Yeshǔ Khrǐ awe̤akè

6 Yeshǔ Khrǐ hèlò̤ dǒ hǎkhû̌nu dě a hèju anǎ̤ kû̌ shi, a hè tṳ̌sikhòsi anǎ̤ dě asǐ bǎlò̤. A hè tǒ̤pwǎ kû̌ shi tôcǒ mè̤̌tô̤̌. A hè lǒ̤bò shi kû̌ sǐ ginǐ̤cǒ lǒ̤bò. Yôla Plò̌shǐ Běcǎ tû̌ khòlṳ̌ kû̌ numî̌ a tôhǒ, ma̤titèhî̌dě Yôla Plò̌shǐ Běcǎ mî̌ acǒatè̤. 7 Ta̤khòlṳ̌ numî̌ a ô̌ sucǒ. 8 A ô̌ kwè̌ mî̌titè hǒnumî̌ Yôla Plò̌shǐ Běcǎ kû̌ shi kû̌ sǐ dě sucǒ lǒ̤bònu a sǎphlǒtô sô̌sô̌gelû̌ tocǒnô̌. 9 Pa yṳ̌ǎ kòyòhǎkhû̌phû̌ a ta̤khòlṳ̌ bǎbǎkǎlè Cǒmara a ta̤khòlṳ̌ numî̌ a tôkhlo kû̌nu, ma̤titèhî̌dě numî̌ ta̤khòlṳ̌ dǒ Cǒmara ǐhto pa kû̌ aphû̌khû awe̤akè hǒ. 10 Pô̤̌nudě kòyò dǒ a yṳ̌ǎ Cǒmara aphû̌khû hǒtokhlǒnu, a sî̌ganǎ̤ tě̤tě̤mè̤̌mè̤̌ kû̌ Cǒmara khòlṳ̌ asǎphlǒ numî̌ atô mè̤̌mî̌ca. Bǎbǎkǎlè kòyò dǒ a yṳ̌ǎ Cǒmara tô̤̌ tokhlǒnu, a hî̌ Cǒmara kû̌ kòyò lòhô, ma̤titèhî̌dě dǒ a yṳ̌ǎ gû̌ Cǒmara khòlṳ̌ asǎphlǒ kû̌ aphû̌khû awe̤akènu tô̤̌ akhû̌akhî, a hî̌ lô̌khô pô̤̌nu pwǎ. 11 Dě ta̤khòlṳ mî̌ titèya hî̌dě, Cǒmara ǐlò̤ bǎ pa yôla htûpwa̤ tûjû̌pwa̤ talakhǎ dě yôla htûpwa̤ a kòshî̌ numî̌ a ô̌ dǒ aphû̌khû akûnu. ^b 12 Mòpèpè̌ bǎbǎ dǒ a nǐ̤bǎ aphû̌khû numî̌, a nǐ̤bǎhǒ ta̤htûpwa̤nu hǒ. Bǎbǎkǎlè mòpèpè̌ bǎbǎ dǒ a nǐ̤bǎ gû̌ kòyò Cǒmara aphû̌khûhǒo tô̤̌ numî̌, a nǐ̤bǎ gû̌ kòyò ta̤htûpwa̤ tô̤̌.

Ta̤htûpwa̤ tûjû̌pwa̤ talakhǎ

13 Ta̤ dǒ he wě̤ bǎ sî hǒonumî̌, pô̤̌khô sî dǒ a yṳ̌ǎ Cǒmara aphû̌khû ami̤ tokhlǒ gǔ sî̌ganǎ̤ tûû̌ sînǎ̤ kû̌ sî nǐ̤bǎhto yôla htûpwa̤ tûjû̌pwa̤ talakhǎ ayanudě, he wě̤ bǎ sî pwǎ. 14 Dǒ Cǒmara alô̤mô̤̌nu, pa yṳ̌ǎlò̤ ǐtûû̌ panǎ̤ kû̌ pa kwi titètè̌ bǎbǎ, kè̌ atô kû̌ lû̌sǎphlǒ numî̌, a bǎ ganǎ̤de pa ta̤kwicaba hǒ. 15 Pa sî̌yahto kû̌ a ganǎ̤de pa ta̤kwicaba hǒ akhû̌akhî, pa yṳ̌ǎhto kû̌ a ǐlò̤ pa ta̤ dǒ pa kwi a nutokhlǒ pě hǒ.

16 Kòyò tôpwa̤pwa̤ kè̌ kè̌shǐ apṳ̌wè̤̌ Khrǐphû̌ tôpwa̤pwa̤ ma̤ta̤sǔ dǒ a gǔ ǐ htûhtò̌lû̌ ta̤si mè̤̌tô̤̌ hî̌nu, a gǔ kwita̤ dǒ Cǒmara a ô̌ dě Cǒmara ǐ kòyò dǒ a ma̤ta̤sǔnu tôpwa̤ sǎphlǒhtûpwa̤ pě. Bǎbǎkǎlè ta̤sǔ dǒ a gǔ ǐ htûhtò̌ lû̌û kû̌ ta̤si numî̌, he sǎyṳ hî̌ sî kû̌ ta̤sǔ pô̤̌nu tokhlǒnu sî tô kwicabahtò̌ bǎ lû̌ya dǒ Cǒmara a ô̌ tô̤̌. 17 Lǒ̤bò ma̤ ta̤phû̌mò̤̌shǐhtô tokhlǒ numî̌ ta̤sǔhǒ, bǎbǎkǎlè ta̤sǔ dǒ a sûcû̌ kòyò dǒ ta̤si tô̤̌nu a ô̌ pwǎ.

18 Pa sî̌ganǎ̤ kû̌ Cǒmara aphû̌ali̤ tokhlǒ numî̌, a ma̤ hènè pe ta̤sǔta̤plě tôkhò̌ tô̤̌. Ma̤titèhî̌dě Cǒmara aphû̌khû Yeshǔnu a tugǔtaka tě̤tṳ ǐtûû̌ asî dě hǎkhû̌tana dǒ a ma̤ ta̤phû̌mò̤̌ hǒtôdonu a ma̤shajò asî tô̤̌. 19 Pa sî̌ganǎ̤ kû̌ pa hǒtokhlǒ numî̌ Cǒmara aphû̌ali̤ tokhlǒ bǎbǎkǎlè lǒ̤bò kòyò dǒ ashǔshawa̤ tokhlǒ numî̌, a ô̌ lô̌khô dǒ hǎkhû̌tana dǒ a ma̤ ta̤phû̌mò̤̌ hǒtôdo a ta̤pǒ alǎ̤. 20 Pô̤̌khô pa gǔ sî̌ganǎ̤ kû̌ kòyò Cǒmara dǒ atô hǒtôpwa̤nu, pa sî̌yahto kû̌ Cǒmara aphû̌khû hè ǐ sî̌yaphlô bǎ pa hǒ. Pa ô̌ dǒ Cǒmara dǒ atô hǒtôpwa̤ kû̌ aphû̌khû Yeshǔ Khrǐ tôpwa̤ akû hǒ. A mî̌ Cǒmara dǒ atô tôpwa̤, htokhôtô̤̌ Cǒmara dǒ a ǐ kòyò yôla htûpwa̤ tûjû̌pwa̤ tôpwa̤.

21 Hephû̌heli̤ sî꤮ caba tǎ̤ lô̌khô Cǒmara dǒ ashǔshawa̤ nutokhlǒ tǎ̤mǎ̤ nî̌꤮.