1Pe 1 | KxfSCKXF | STEP | He wě̤cû̌bǎ lî̤nu dǒ Cǒmara rû̌htò̌ lû̌û dě a cû̌ ô̌kǔ tòshò̌phû̌, a cû̌ htû shǐpwǎ̤ dǒ kòshikògǎ, dě a ô̌ peshecû̌ bò dǒ agûlǎ̤ pṳ̂̌꤮ tûkû dǒ Pòtǔgǎ, Galatǐgǎ, Kapadakǐgǎ, Ashǎgǎ kû̌ Bisûnǐgǎkû nutokhlǒ a ô̌. He mî̌ Khûpetarǔ, he mî̌ Yeshǔ Khrǐ a pwa̤lǎ̤nophû̌ tôpwa̤.

1 Peter 1

1 He wě̤cû̌bǎ lî̤nu dǒ Cǒmara rû̌htò̌ lû̌û dě a cû̌ ô̌kǔ tòshò̌phû̌, a cû̌ htû shǐpwǎ̤ dǒ kòshikògǎ, dě a ô̌ peshecû̌ bò dǒ agûlǎ̤ pṳ̂̌꤮ tûkû dǒ Pòtǔgǎ, Galatǐgǎ, Kapadakǐgǎ, Ashǎgǎ kû̌ Bisûnǐgǎkû nutokhlǒ a ô̌.

He mî̌ Khûpetarǔ, he mî̌ Yeshǔ Khrǐ a pwa̤lǎ̤nophû̌ tôpwa̤. 2 Pha Cǒmara rû̌htò̌ sî pô̤̌ a ta̤yè̤lò̤nǎnu dě Yôla Plò̌shǐ Běcǎ ma̤plò̌shǐhtò̌ sî, pô̤̌khô sî gǔ ganǎ̤de Yeshǔ Khrǐ ayô̤̌ dě dǒ asǐ akhû̌akhî, a gǔ ma̤mṳ̂̌plî bǎ sî. Cǒmara ta̤bwǐta̤sîrî kû̌ sǎphlǒ ta̤gûjû̌kabǎ gǔ ô̌lǒô̌be pû kû̌ sî nî̌꤮.

Ta̤kè̌shuǐ dǒ a tě̤mè̤̌

3 Pa gǔ hî̌bwǐhî̌sîrîhtò̌ wô̤̌wô̤̌ lû̌û pa Běcǎ Yeshǔ Khrǐ apha Cǒmara tǎ꤮. Amè̤̌kû̌ a ta̤sǎyṳgwèbǎǐ tûlû̌shû̌lě pa akhû̌akhî, kû̌ Yeshǔ Khrǐ ata̤si ihtǒhtûpwa̤sô̌ akhû̌akhî, a ǐlò̤ hto pa ta̤htûpwa̤ asa hǒ. Dǒ hǒo akhû̌akhî, pa nǐ̤bǎ hènè bò pa ta̤kè̌shuǐ dǒ pa ta̤ô̌htûpwa̤ akû hǒ. 4 Dǒ a ǐlò̤ hto pa ta̤htûpwa̤ asa akhû̌akhî, Cǒmara bè̌ nǎ bǎ sî û̌tě̤û̌ca dǒ a pî̌jòtô̤̌, a sojòtô̤̌, anôakhwe jòtô̤̌ nutokhlǒ dǒ mǒkhû̌nu hǒ. 5 Dǒ sî yṳ̌ǎ Khrǐ akhû̌akhî, bǎ sî nǐ̤bǎ ta̤ma̤hǎplǎge ^{▼▼Cǒmara ma̤hǎplǎge kè hto pa khònò̤̌ bǎbǎkǎlè dǒ lṳmṳ̌ni̤ gutṳ̌ pěnu, a gǔ ma̤lǒbe bǎ bò ta̤ dǒ a tîwî̌tòwò nǎ bǎ a kòyò nutokhlǒ pě.} kǎtô̤̌ Cǒmara ô̌pǒ̤ǐ bǎ sî kû̌ ata̤pô̤ta̤phǎ. Cǒmara tîwî̌tòwò nǎhto anǎ̤ kû̌ htû̌꤮ shěkhǎ gutṳ̌ pěnu, a dǔlè̌lṳ̌ ta̤ma̤hǎplǎge nupě. 6 Pô̤̌nudě sǎlě̤sǎlò̤ lô̌khô kû̌ lǒ̤꤮ bò ta̤nutokhlǒ nî̌, bǎbǎkǎlè khònò̤̌ tòshò̌phû̌ akûnu ta̤pò̤̌ta̤sha acǒcǒ ma̤gû̌ma̤gè̌ sî. 7 Dě sî ta̤yṳ̌ta̤nǎ̤ numî̌ a mè̤̌mî̌ca ya, mî̌ a mè̤̌mî̌ca tô̤̌ yanu, ta̤pò̤̌ta̤sha khòlṳ̌ pě. Hta dǒ a pî̌jònu, kòyò bǎ tô ma̤kè̌ pe a kû̌ mî̌, pô̤̌nu akhû̌akhî, sî ta̤yṳ̌ta̤nǎ̤ dǒ alě̤dû̌pwî̤htû bò kû̌ htanu, pô̤̌khô a gǔ dǔlè̌lṳ̌ kû̌ ta̤yṳ̌ mè̤̌mî̌ca ayanu, kòyò tôbǎ ma̤kè̌ a pô̤̌nu. Htodě htû̌ Yeshǔ Khrǐ hè dǔlè̌lṳ̌htò̌ anǎ̤ akha pěnu, sî gǔ nǐ̤bǎ ta̤htû̌sò̌htò̌, ta̤bwǐdû̌sîrîhtû kû̌ ta̤bè̌dû̌bè̌htû sî pě. 8 Sî kè̌shǐbǎ a tô̤̌ bǎbǎkǎlè sî mô̤ǐ yǎ. Sî kè̌shǐ a khònò̤̌ tô̤̌ bǎbǎkǎlè sî yṳ̌ǎ yǎ. Pô̤̌nu akhû̌akhî, sî sǎlě̤sǎlò̤ mè̤̌mî̌ca dě sî sǎlě̤ pwǐ꤮ tènu hî̌jò pě tô̤̌. 9 Ma̤titèhî̌dě dǒ sî yṳ̌nǐ̤nǎ̤nǐ̤ Yeshǔ akhû̌akhî, sî nǐ̤bǎ hto sî ta̤htûpwa̤ nutokhlǒ a ta̤hǎplǎ hǒ.

10 Ta̤ma̤hǎplǎ awe̤akènu, piwi̤pèshè tokhlǒ kè̌shǐsî̌ya dě gwè̌ kè̌kè̌ tě̤tě̤mè̤̌mè̤̌ hto hǒ. Htodě ta̤bwǐta̤sîrî a sû dǒ Cǒmara gǔ ǐlò̤ sî pěnu, piwi̤pèshè tokhlǒ hî̌pô̤phǎnǎhto awe̤akè hǒ. 11 Khrǐ a Yôla Plò̌shǐ ô̌ dǒ piwi̤pèshè tokhlǒ a sǎphlǒkû dě a hî̌pô̤̌nǎ wǐ Khrǐ awe̤akè kû̌ a khòbǎwǐ ta̤jî̌ta̤jû̌ tokhlǒ pě. Htodě ta̤bwǐdû̌sîrîhtû tokhlǒ gǔ hè dǒ nô̌kò pě, asî kè̌lǎ sî̌ganǎ̤ lô̌khô kû̌ ashěakhǎ gǔ bǎ bǎkhò̌tè pě, htodě a gǔ ma̤ anǎ̤ hî̌tè pě pô̤̌nu. 12 Dě Cǒmara dǔlè̌lṳ̌ bǎ piwi̤pèshè nutokhlǒ kû̌ asî ma̤ta̤ tokhlǒ numî̌ asîya tûû̌ mè̤̌tô̤̌. Hî̌mè̤̌mè̤mî̌ sîya pwǎ. Khònò̤̌ ta̤ hǒtokhlǒnu a hî̌ bǎ sî dě sî ganǎ̤de hǒ. Dǒ Cǒmara nohè Yôla Plò̌shǐ Běcǎ a ta̤pô̤ta̤phǎ dǒ a ô̌ dǒ mǒkhû̌ hèdě, a hè ma̤ta̤nu akhû̌akhî, asî hè shôbǐǐ bǎ sî kû̌ ta̤sǎlě̤we̤kènu hǒ. Mǒkhû̌tanaphû̌ tokhlǒnu a sǎyṳ kè̌shǐsî̌ya tě̤mè̤̌ mî̌ca ta̤we̤ta̤kè hǒtokhlǒ.

Cǒmara kaǎ pa kû̌ pa gǔ ô̌htûpwa̤ plò̌shǐ

13 Ma̤pô̤̌nudě tîwî̌tòwò nǎ lô̌khô sî ta̤gènè̤ tokhlǒ dǒ sî lǎ̤ma̤ta̤ ayanu. Jî̌shapwǎ̤ lô̌khô sînǎ̤ dě bè̌htò̌ lô̌khô sî ta̤kè̌shuǐ dǒ ta̤bwǐta̤sîrî dǒ Cǒmara gǔ ǐ sî htû̌ Yeshǔ Khrǐ hè sô̌ pě alô̤nu. 14 Sî mî̌ kòyò dǒ a ganǎ̤de Cǒmara ayô̤̌ sô̌sô̌kû̌ phijǎphû̌ tokhlǒnu akhû̌akhî, ô̌htûpwa̤ petǎ̤ lô̌khô dǒ ta̤sǎyṳ phû̌mò̤̌ tokhlǒ akû pô̤̌ dǒ awǐanô̌ bǎ sî sî̌ganǎ̤ Khrǐ tô̤̌ akhanu tokhlǒ tǎ̤mǎ̤ nî̌. 15 Cǒmara dǒ a rû̌htò̌ sî tôpwa̤ numî̌ aplò̌ashî̌ akhû̌akhî, sî ma̤ta̤ titètè̌ bǎbǎnu, ô̌htûpwa̤ plò̌shǐ lô̌khô. 16 Ma̤titèhî̌dě lî̤plò̌shǐ hî̌ kû̌, “Ô̌htûpwa̤ plò̌shǐ lô̌khô, ma̤titèhî̌dě, he mî̌ pwa̤plò̌shǐ.” ^b

17 Bǎ sî kwicabahtò̌ Cǒmara akhanu, “Pha” sî kaǎ lô̌khô lû̌û pô̤̌nu. Kòyò pṳ̂̌꤮ tôpwa̤ ma̤hto ta̤titètè̌꤮ bǎbǎnu, Cǒmara cî̌htò̌ cǒcǒtè̤tè̤ pwǎ, a kè̌dû̌kè̌pî̌tî̌ tô̤̌. Pô̤̌nudě bǎ sî ô̌htûpwa̤ pepô̤̌ shǐpwǎ̤shǐmè̤ dǒ hǎkhû̌ akhanu, ô̌htûpwa̤ lô̌khô dǒ ta̤ǐsha bè̌dubè̌nǎ̤ Cǒmara akû nî̌. 18 Ma̤titèhî̌dě sî sî̌yahto kû̌ Cǒmara pwî̤ge hto sî kû̌ ruhta dǒ apî̌alṳ̂̌ jò nutokhlǒ mè̤̌tô̤̌. Pô̤̌khô sî gǔ hǎplǎhtò̌bò̌ kû̌ sîmǒ̤sîpha phiphu dǒ awǐnu tokhlǒ ǐlò̤kè sî ta̤ô̌htûpwa̤ dǒ abwǐsîrî ô̌gû̌ kòyò tô̤̌ nutokhlǒ ayanudě, a pwî̤ge sî hǒ. 19 Dǒ Khrǐ pwî̤ge sî kû̌ asǐ dǒ alě̤dû̌pwî̤htûnu akhû̌akhî, sî nǐ̤bǎ ta̤pili̤ hǒ. Khrǐ mî̌ asô̌sô̌kû̌ sû̌phû̌ dǒ kòyò kè̌shǐ a ta̤phû̌mò̤̌ ô̌ tôcǒ꤮ tô̤̌ tôdo tôpwa̤ hǒ. 20 Bǎ Cǒmara bô̌lò̤tèlò̤ hǎkhû̌ khôtô̤̌ akhanu, a rû̌htò̌ nǎhto Khrǐ nuhǒ. Bǎbǎkǎlè lṳmṳ̌ni̤ lṳmṳ̌sa dǒ nô̌kò gutṳ̌ a amè̤̌kû̌ khònò̤̌kha hǒtokhlǒnu, Cǒmara dǔlè̌lṳ̌ hto sî kû̌ Khrǐ hǒ. 21 Dǒ Khrǐ akhû̌akhî, sî yṳ̌nǐ̤nǎ̤nǐ̤ Cǒmara dǒ a ma̤ ihtǒhtûpwa̤ getîkhî sô̌ Khrǐ dǒ ta̤si dě a bè̌dû̌bè̌htû gutṳ̌ lû̌û nutôpwa̤ hǒ. Pô̤̌nudě sî ta̤yṳ̌ kû̌ sî ta̤kè̌shuǐnu, a ô̌ dǒ Cǒmara alô̤hǒ.

22 Khònò̤̌dě dǒ sî jûlě̤phî̌ Cǒmara a ta̤sû̌ǐ a ta̤tě̤ta̤mè̤̌ tokhlǒ akhû̌akhî, sî ma̤mṳ̂̌plî sî sǎphlǒ dě sî htû kòyò dǒ a mô̤nǐ̤ mè̤̌mî̌ca pṳ̌wè̤̌ Khrǐphû̌ nutokhlǒ hǒ. Ma̤pô̤̌nudě mô̤ lǒ̤sû̌lǒ̤sò̌ kè̌khî lû̌û tôpwa̤ kû̌ tôpwa̤ nî̌꤮. 23 Ma̤titèhî̌dě Cǒmara alě̤ayô̤̌nu, a htûpwa̤ dě a ô̌gleô̌mě tûjû̌pwa̤ talakhǎ akhû̌akhî, sî ô̌phijǎlò̤ gesô̌ tôplǎ hǒ. Sî ta̤ô̌htûpwa̤ asa numî̌, a hè dǒ sîmǒ̤sîpha dǒ a sijò tokhlǒ a ô̌nu mè̤̌tô̤̌. Mè̤̌mè̤̌tôkhô, sî ta̤ô̌htûpwa̤ asa numî̌, a hè dǒ Cǒmara dǒ a sijò tôkhò̌ tô̤̌ hǒtôpwa̤ a ô̌. 24 Pô̤̌ lî̤plò̌shǐ hî̌ kû̌,

“Kòyò hǎkhû̌phû̌ lǒ̤꤮ bònu asô̌sô̌kû̌ mi̤sǎmi̤phô tokhlǒ nupwǎ. A ta̤bwǐdû̌sîrîhtû tokhlǒ kû̌ a ta̤wî̤ta̤wô̌ tokhlǒnu, asô̌sô̌kû̌ ta̤phôta̤gî̌ dô̌htò̌ dǒ ya̤dakhû̌ nutokhlǒ pwǎ. Mi̤sǎ sî tokhlǒnu a khwesikè bò pě dě ta̤phôta̤gî̌ sî tokhlǒnu a lò̤sǔsikè lǒ̤bò pě. 25 Bǎbǎkǎlè Běcǎ alě̤ayô̤̌nu, a ô̌měô̌gle tûjû̌pwa̤ talakhǎ.” ^c

Alě̤ayô̤̌ numî̌ amè̤̌kû̌ ta̤sǎlě̤we̤kè dǒ kòyò shôbǐǐlṳ̌ bǎ sînu hǒ.