1Pe 3 | KxfSCKXF | STEP | Pô̤̌nudě sî htû ma tokhlǒ nubǎbǎ, shò̌lò̤ lô̌khô sîsǎphlǒ dǒ sîwṳ̂ tokhlǒ alǎ̤ nî̌꤮. Dǒ asî klanu, a kè̌ yṳ̌ǎ kû̌ kòyò Cǒmara alě̤ayô̤̌ tô̤̌ kè̌ô̌ tôpwa̤pwa̤ hî̌dě, sî hî̌ bǎ asî ayô̤̌ tômṳ̂̌꤮ tô̤̌ bǎbǎ, dǒ sî ta̤ô̌shapwǎ̤ sînǎ̤ akhû̌akhî, a gǔ htû̌nṳ̌cî̌nṳ̌ ge asî sǎphlǒ dě a yṳ̌nǐ̤nǎ̤nǐ̤ kû̌ Khrǐ pě.

1 Peter 3

Ma kû̌ wṳ̂ tokhlǒ awe̤akè

1 Pô̤̌nudě sî htû ma tokhlǒ nubǎbǎ, shò̌lò̤ lô̌khô sîsǎphlǒ dǒ sîwṳ̂ tokhlǒ alǎ̤ nî̌꤮. Dǒ asî klanu, a kè̌ yṳ̌ǎ kû̌ kòyò Cǒmara alě̤ayô̤̌ tô̤̌ kè̌ô̌ tôpwa̤pwa̤ hî̌dě, sî hî̌ bǎ asî ayô̤̌ tômṳ̂̌꤮ tô̤̌ bǎbǎ, dǒ sî ta̤ô̌shapwǎ̤ sînǎ̤ akhû̌akhî, a gǔ htû̌nṳ̌cî̌nṳ̌ ge asî sǎphlǒ dě a yṳ̌nǐ̤nǎ̤nǐ̤ kû̌ Khrǐ pě. ^a 2 Dǒ asî kè̌shǐ sî ta̤ô̌htûpwa̤ cǒtè̤ tokhlǒ kû̌ sî ta̤bè̌dubè̌nǎ̤ Cǒmara tokhlǒ akhû̌akhîdě, a htûge kû̌ ta̤dòkûphû̌ pě. 3 Na ta̤twè̤̌ta̤wî̤ tokhlǒnu nǎla̤htò̌ǐ tǎ̤ dǒ sî ta̤sǐ khǔlṳ̌, sî tîwî̌htò̌ sînǎ̤ kû̌ ru kû̌ hta, kûsô̌htò̌ jewî̤jewô̌ dǒ a ô̌lṳ̌ pwǎtǒ̤ dǒ akhlo tokhlǒnu tǎ̤mǎ̤ nî̌꤮. ^b 4 Mè̤mè̤̌tôkhônu, htû lô̌khô kòyò dǒ a tîwî̌wî̤wô̌ asǎphlǒ hǐphukû nutokhlǒ nî̌꤮. Sî tôbǎ sǎphlǒ sǎdôhôbǐ, sî tôbǎ sǎphlǒ gûjû̌kabǎ. Ta̤twè̤̌ta̤wî̤ pô̤̌o tokhlǒnu, a ô̌khòyî̤ dě Cǒmara bè̌ lě̤dû̌pwî̤htû mî̌ca yǎ. 5 Ma̤titèhî̌dě pwa̤mǒ̤ dǒ awǐnu dǒ a bǎ a ta̤kè̌shuǐ dǒ Cǒmara a ô̌ nutokhlǒ a ta̤tîwî̌ wî̤ anǎ̤ mî̌ amè̤̌kû̌ a shò̌lò̤ lô̌khô asǎphlǒ dǒ awṳ̂lǎ̤ nuhǒ. 6 Mǒ̤sara mî̌ pwa̤mǒ̤ pô̤̌nu tôpwa̤ hǒ. A ganǎ̤de PhaAbraha ayô̤̌ dě a kaǎ awṳ̂ kû̌ aběcǎ. Dǒ sî htûpwa̤ yṳ̌ǎ akhû̌akhî, sî kè̌ ma̤wô̌ta̤ dě sî ǐsha tocǒ꤮ tô̤̌ numî̌, khònò̤̌ sî htûhtò̌ sô̌sô̌ kû̌ Mǒ̤sara nuhǒ. ^c 7 Pô̤̌nudě sî dǒ a htû wṳ̂ tokhlǒnu, bǎ sî ô̌plǒ kû̌ sîma akha, sî̌ganǎ̤ jè̌ kû̌ asî mî̌ a khû̌shiǎjǎ khlo kû̌ sî pô̤̌nu nî̌꤮. Sî̌ganǎ̤ bè̌dubè̌nǎ̤ shěshu sîma nî̌꤮. Ma̤titèhî̌dě Cǒmara ǐkwe yôla htûpwa̤ sûnu, asî nǐ̤bǎ sô̌sô̌ kû̌ sîsî pwǎ. Bǎ sî kwicaba akha, pô̤̌khô ta̤ gǔ ma̤dǐdò tě̤tṳ tǎ̤ sî tǎ̤mǎ̤nu, tûlû̌ ma̤ lô̌khô pô̤̌nu nî̌꤮. ^d

Ta̤khò ta̤jî̌ta̤jû̌ dǒ ta̤ma̤wô̌ aya

8 He sǎyṳ hî̌ pô̤̌ sî dǒgutṳ̌kòlǒ kû̌, sî pṳ̂̌꤮ tôpwa̤ tôbǎ ô̌ lû̌û kû̌ ta̤gènè̤ tôcǒ꤮ nô̤̌, ta̤bè̌sû̌bè̌sǎ tôcǒ꤮ nô̤̌ nî̌꤮. Mô̤ǐ kè̌khî pû lû̌û tôpwa̤ kû̌ tôpwa̤ pô̤̌ pṳ̌wè̤̌nu nî̌꤮. Sǎyṳgwèbǎǐ pû lû̌û tôpwa̤ kû̌ tôpwa̤ dě shò̌lò̤ pû lô̌khô sî sǎphlǒ tôpwa̤ kû̌ tôpwa̤ nî̌꤮. 9 Ma̤phû̌mò̤̌shǐhtô shǔ tǎ̤ kòyò tǎ̤mǎ̤ nî̌꤮, ǐsho getîkhî shǔ tǎ̤ kòyò tǎ̤mǎ̤, mè̤mè̤̌tôkhônu ǐshowî̤ getîkhî shǔ kòyò nî̌꤮. Ma̤titèhî̌dě Cǒmara kaǎ sî dǒ sî gǔ ma̤wô̌ geshěshu kòyò pô̤̌nu. Pô̤̌khô Cǒmara gǔ ǐshowî̤ sînu dě ma̤ lô̌khô pô̤̌nu nî̌꤮. 10 Pô̤̌ lî̤plò̌shǐ ô̌tôtô̤̌ dě a hî̌ kû̌,

“Mò̌pè bǎbǎ, kòyò dǒ a mô̤ǐ tûû̌ a ta̤ô̌htûpwa̤ tokhlǒ dě a sǎyṳ kè̌shǐ lṳmṳ̌ni̤ lṳmṳ̌sa dǒ awô̌ tokhlǒnu, a tôbǎ hî̌bǎ phû̌mò̤̌ ta̤ tô̤̌. Kǎtô̤̌ a tôbǎ wîkè ta̤hî̌bǎ lòhǎlòhô tokhlǒ. ^e 11 A tôbǎ htû̌tiwǐkhô̌kè anǎ̤ kû̌ ta̤phû̌mò̤̌shǐhtô dě a tôbǎ ma̤ta̤ dǒ awô̌ tokhlǒ. A tôbǎ jî̌pwǐ̤jî̌li̤ jî̌pwǐ̤ ô̌pè̤̌ô̌dû sělě kû̌ kòyò. 12 Ma̤titèhî̌dě, Běcǎ kè̌khwè̌ǐ kòyòcǒkòyòtè̤ dě a ganǎ̤de asî ata̤kwicaba tokhlǒ. Bǎbǎkǎlè kòyò dǒ a ma̤ ta̤phû̌mò̤̌shǐhtô tokhlǒnu, Běcǎ htû̌ti̤wǐ̤ kè̌cû̌khô̌kè asî.” ^f

13 Kè̌ sî sǎphlǒshû̌ ma̤wô̌ta̤ hî̌dě mò̌pè tôpwa̤ glè̌ ma̤jî̌ sî ya? 14 Bǎbǎkǎlè dǒ ta̤tě̤ta̤mè̤̌ akhû̌akhîdě, sî kè̌ khòbǎ ta̤jî̌ta̤jû̌ hî̌nu, sî nǐ̤bǎ ta̤ǐshowî̤ pě. ^gAsî ma̤pò̤̌ma̤sha sî bǎbǎkǎlè ǐsha tǎ̤ asîlǎ̤ tǎ̤mǎ̤ nî̌꤮, sǎphlǒgû̌gè̌ tǎ̤ asî gûlǎ̤ tǎ̤mǎ̤mǎ̤. ^h 15 Bǎbǎkǎlè, bè̌dubè̌nǎ̤ lô̌khô Khrǐ dǒ sî sǎphlǒkû pô̤̌ sî Běcǎ tôpwa̤nu nî̌꤮. Mò̌pè tôpwa̤ bǎbǎ, a kè̌ gwè̌ sî kû̌ sî ta̤kè̌shuǐ awe̤akè hî̌nu, pô̤̌khô sî gǔ hî̌shěshujò bǎ kû̌ kòyò dě ô̌tîwî̌tòwònǎ lô̌khô sînǎ̤ pṳ̂̌꤮ tôplǎ nî̌꤮. Bǎbǎkǎlè tûlû̌ hî̌bǎ sǎdôhôbî̌ shǔ asî dě bè̌dubè̌nǎ̤ asî nî̌꤮. 16 Sî sǎphlǒ kè̌ hî̌lò̤ sî kû̌ sîta̤sǔ ô̌tô̤̌ hî̌nu, tûlû̌ ma̤ hèsělě nî̌꤮. Sî kè̌ ma̤pô̤̌nu hî̌dě kòyò dǒ a hî̌bǐhî̌ô̌, a hî̌ phû̌mò̤̌ sî ta̤ô̌shapwǎ̤ sî̌yawô̌ dǒ Khrǐ akû tokhlǒnu, a sòwò̤̌ ǐtû̌ sô̌ kû̌ a ta̤hî̌bǎhî̌shô̌ akò pě. 17 Ma̤titèhî̌dě Cǒmara kè̌ sǎphlǒô̌ kû̌, dǒ pa ma̤ta̤wô̌nu akhû̌akhîdě, pa bǎ khòbǎ ta̤jî̌ta̤jû̌ hî̌nu, awô̌khlo pě kû̌ pa ma̤ ta̤phû̌mò̤̌shǐhtô dě pa khòbǎ ta̤jî̌ta̤jû̌ tokhlǒ. 18 Ma̤titèhî̌dě Khrǐ tṳ̌sikhòsi bǎ pwǎ anǎ̤ dǒ kòyò ta̤sǔ aya tôplǎnô̤̌pwǎ dě ahtoaphlǔ bò hǒ, a lǎ̤lṳ̂ tṳ̌sikhòsi petô̤̌. Pô̤̌khô a gǔ sûcû̌ sî dǒ Cǒmara a ô̌ dě kòyò cǒtè̤ hǒtôpwa̤nu a hè tṳ̌sikhòsi hto kòyò ta̤sǔphû̌ tokhlǒ agûlǎ̤ hǒ. Kòyò ma̤si anǎ̤glǒ bǎbǎkǎlè Cǒmara ma̤htûpwa̤ getîkhîsô̌ a dǒ Yôla Plò̌shǐ Běcǎ akû. 19 Dě dǒ Yôla Plò̌shǐ Běcǎnu akhû̌akhîdě, a cû̌ hî̌ǐ bǎ yôla htûpwa̤ dǒ a ô̌ dǒ kòyò lǎ̤dǒnṳ̌ kòyòpô̤kû khònò̤̌nu tokhlǒ. 20 Ta̤ô̌htûpwa̤ hǒtokhlǒ numî̌ amè̤̌kû̌ bǎ Phanṳ̂̌a ma̤htò̌ sǒkhlidû̌ dǒ wǐkha dě bǎ Cǒmara ô̌pǒ̤ sǎphlǒhtû bǎ asî akha bǎbǎkǎlè a jûlě̤phî̌yô̤̌ kû̌ lû̌yô̤̌ tô̤̌ nutokhlǒ hǒ. Dǒ sǒkhlidû̌ akûnu kòyò nṳ̌nî̌ pî̌tî̌ pwǎ. Lǒ̤꤮ bò Cǒmara ma̤hǎplǎge asî kû̌ shi numî̌ a ô̌ pwǎ pwa̤lǐ̤sô̌ pwǎ. ⁱ 21 Sî ju sînǎ̤ kû̌ shi numî̌, a dǔlè̌lṳ̌ kè̌lû̌mò̌mṳ shi dǒ Phanṳ̂̌a htukha nukû̌, Cǒmara ma̤hǎplǎge sî khònò̤̌ nupwǎ. Sî ju sînǎ̤ kû̌ shi numî̌ a cǔbò nǎ̤glǒ akwǐakrû̌nu mè̤̌tô̤̌. Mè̤mè̤̌tôkhônu, ta̤jushi numî̌ amè̤̌ ta̤olò̤ Cǒmara kû̌ sî gǔ ma̤ ata̤ dǒ ta̤sǎphlǒ ma̤mṳ̂̌plî akû pô̤̌nupwǎ. Yeshǔ Khrǐ si dě a htûpwa̤ getîkhî akhû̌akhî, sî ju sînǎ̤ kû̌ shi numî̌ a ma̤hǎplǎge sî pwǎ. 22 Yeshǔ Khrǐ ge ihtǒ dǒ mǒkhû̌ dě a ge hǎnòò̌ô̌ dǒ Cǒmara acǔde cǔtômû tôkhô hǒ. Dě a pǒǐ lǒ̤bò tanaphû̌ tokhlǒ kû̌ ta̤shû̌ta̤sho tokhlǒ, kû̌ ta̤pô̤ta̤phǎ tokhlǒ hǒ.