1 Peter 4
Ô̌htûpwa̤ cǒkû̌ Cǒmara
1Khrǐ anǎ̤glǒ khòjî̌khòjû̌ akhû̌akhî, sî tôbǎ bè̌sô̌sô̌kû̌ sî sǎphlǒ pô̤̌ Běcǎnu, dě sî tôbǎ sǎphlǒhtû gû̌ ta̤jî̌ta̤jû̌ tokhlǒ, ma̤titèhî̌dě, kòyò dǒ a khòjî̌khòjû̌ dǒ nǎ̤glǒ phěyî̌ tôkhô tokhlǒnu, a ma̤ pe ta̤sǔta̤plě tô̤̌. 2Pô̤̌nudě sahtò̌ khònò̤̌ tǒ̤hènu dě, sî lṳmṳ̌ni̤ lṳmṳ̌sa dǒ a ô̌kèpe dǒ hǎkhû̌ tokhlǒnu sî bǎ ô̌htûpwa̤ pô̤̌ Cǒmara a ta̤sǎyṳnu. Sî bǎ ô̌htûpwa̤ nǐ̤ pe pô̤̌ kòyòhǎkhû̌phû̌ a ta̤sǎyṳ phû̌mò̤̌ nutokhlǒ tô̤̌. 3Dǒ awǐkha, pô̤̌ kòyò dǒ a sî̌ganǎ̤ kû̌ kòyò Cǒmara tô̤̌ nutokhlǒ ma̤bòkè ashěakhanu sî ma̤ hǎlǒ̤tônô̤kèbò hto pô̤̌nudě. Sî ô̌htûpwa̤ hǎlǒ̤shěkhǎ nòdû̌ kwè̌꤮ kû̌ mî̌titè numî̌, sî ta̤ô̌shapwǎ̤ wô̌tô̤̌, sî sǎphlǒ putupatǎ, sî ta̤ǎmṳômṳ, sî ta̤ma̤lûma̤pwè dǒ a ô̌ kû̌ ta̤ǎtûlû̌ôtûlû̌ tokhlǒ, sî ta̤caba ta̤yô̤ta̤gî̌ dǒ ta̤ma̤yǒ̤sǐpi̤wô̤̌ nǐ̤ a tokhlǒnu hǒ. 4Pô̤̌nudě khònò̤̌ sî bǒsû̌khǎkhô ma̤mi̤pǐ̤shidô̌ pe sînǎ̤ kû̌ ta̤nutokhlǒ tô̤̌ akhû̌akhî, kòyò dǒ a sî̌ganǎ̤ Cǒmara tô̤̌ tokhlǒ ǒò̌ lô̌khô dě a pîjî̌ǐsho lǒ̤bò sî hǒ. 5Bǎbǎkǎlè asî ma̤hto kwè̌꤮ titènu, asî tôbǎ ge shôbǐǐlṳ̌ sô̌ Cǒmara kû̌ anǎ̤ pě. Cǒmara tîwî̌tòwònǎ anǎ̤ kû̌ a gǔ cî̌htò̌ kòyò htûpwa̤ tokhlǒ kû̌ kòyòsi tokhlǒ hǒ. 6Pô̤̌nudě kòyò shôbǐǐlṳ̌ bǎhto kòyò dǒ a si khònò̤̌ tokhlǒnu kû̌ ta̤sǎlě̤we̤kè numî̌ hǒonu akhû̌akhî hǒ. Kòyò cî̌htò̌hto asî nǎ̤glǒphěyî̌ pô̤̌ kòyò cî̌htò̌ hto kòyò pṳ̂̌꤮ tôpwa̤ nutokhlǒhǒ. Bǎbǎkǎlè asî ta̤ô̌htûpwa̤ tokhlǒnu a gǔ ô̌htûpwa̤ sô̌sô̌kû̌ Cǒmara ô̌htûpwa̤nu pě.Sû dǒ a hè dǒ Cǒmara ô̌ tokhlǒ
7Ta̤lǒ̤꤮ bò a glè̌ gutṳ̌kèhǒnu a hètǒ̤ phǔhǒ. Pô̤̌nu akhû̌akhî, pô̤̌khô sî kwicababò̌ gû̌ kòyònu, ô̌sòklò kû̌ lô̌khô dě sû̌ǐtòwòǐ lò̤ ǐtû̌ lô̌khô sînǎ̤, kǎtô̤̌ ô̌htûpwa̤ shapwǎ̤ kû̌ lô̌khô nî̌꤮. 8Dǒ ta̤lǒ̤꤮ bò aklanu, ta̤mô̤ mè̤̌mî̌ca lû̌û tôpwa̤ kû̌ tôpwa̤ numî̌ a lṳ̂dû̌lǒ hǒ, ma̤titèhî̌dě ta̤mô̤nu a plûkè dû̌wî̤ ta̤sǔ. a 9Kaǎmô̤shǔ lô̌khô shǐpwǎ̤shǐmè̤ dǒ sîhǐphò dǒkû nî̌꤮, tûmṳ̂̌ta̤ma̤ tǎ̤ lô̌khô mǎ̤ nî̌꤮. 10Cǒmara ǐhto sî sû tôpwa̤ kû̌ tôpwa̤hǒ. Dě noǎ padô̌ lô̌khô sî sûnu kû̌ kòyò dǒ ashǔshawa̤ tokhlǒ ayanu. Pǒǐ tě̤mè̤̌ lô̌khô sû dǒ Cǒmara yṳ̂̌lò̤ khô̌lû̌ tôpwa̤ kû̌ tôpwa̤ nunî̌꤮. 11Mò̌pèpè̌ bǎbǎ, a kè̌ shôbǐǐlṳ̌ bǎ kòyò hî̌nu, a bǎ shôbǐǐlṳ̌ bǎ kòyò pô̤̌ Cǒmara hî̌bǎ kòyò dě a noshôbǐǐ tutṳ̌ kû̌ nanu. Dě mò̌pèpè̌ bǎbǎ dǒ a kè̌ ma̤jû̌ ta̤ma̤ hî̌nu, a tôbǎ ma̤ kû̌ khû̌ǎ dǒ Cǒmara ǐlò̤ lû̌û nutokhlǒ. Kè̌ ma̤pô̤̌nu hî̌dě, dǒ Yeshǔ Khrǐ akhû̌akhî, kòyò gǔ htû̌sò̌htò̌ Cǒmara kû̌ lǒ̤bò ta̤ dǒ sî ma̤ nutokhlǒ akhû̌akhî pě. Cǒmara nǐ̤bǎ pû ta̤bwǐdû̌sîrîhtû kû̌ ta̤pô̤ta̤phǎ tûjû̌pwa̤ talakhǎ nî̌꤮. Ame̤.Dǒ sî htû Khrǐphû̌ akhû̌akhî, sî khòbǎ ta̤jî̌ta̤jû̌
12He khômô̤ sî꤮, kòyò ma̤jî̌ma̤jû̌ sî numî̌ kòyò ma̤kè̌kè̌ sî ta̤yṳ̌ pwǎ akhû̌akhî, ǒò̌ lô̌khô tǎ̤mǎ̤ nî̌꤮. Sî kè̌ htûmè̤̌ Khrǐphû̌ hî̌dě, ta̤htûhtò̌ anǎ̤ pô̤̌o numî̌ akhô̌nô̌ dǒ sîya tôcǒ꤮ tô̤̌. 13Mè̤̌mè̤tôkhônu, htû̌꤮ Khrǐ hèlò̤ ô̌lṳ̌htò̌ hǒ kû̌ ata̤bwǐdû̌sîrîhtû pěnu, pô̤̌khô sî gǔ sǎlě̤sǎlò̤ yî̤̌kǒyî̤̌sa kû̌ kòyò pě aya nudě, ta̤ dǒ sî khòjî̌khòjû̌ kû̌ Khrǐ pô̤̌o tokhlǒnu tûlû̌ sǎlě̤ lô̌khô nî̌꤮. 14Kè̌ sî khòbǎ ta̤pîjî̌ǐsho dǒ sî gû̌kû̌ Khrǐ akò kè̌hî̌dě sî nǐ̤bǎ ta̤ǐshowî̤, ma̤titèhî̌dě Cǒmara a Yôla Plò̌shǐ dǒ ata̤bwǐdû̌sîrîhtû, a ô̌plǒ kû̌ sî hǒ. 15Sî kè̌ ma̤si kòyò, mè̤̌tô̤̌dě sî kè̌ ǎhǔǎhě, mè̤̌tô̤̌dě sî kè̌ ma̤ ta̤phû̌mò̤̌shǐhtô, mè̤̌tô̤̌dě sî kè̌ cû̌nṳ̌ma̤ dǐdò kòyò kè̌hî̌dě sî tô khòbǎ ta̤jî̌ta̤jû̌ hǒ. Bǎbǎkǎlè sî hǒtokhlǒ numî̌, sî tô khòbǎ ta̤jî̌ta̤jû̌ kû̌ sî ma̤ ta̤phû̌mò̤̌ hǒtokhlǒ akò tô̤̌. 16Bǎbǎkǎlè dǒ sî htû Khrǐphû̌ akhû̌akhîdě, sî khòbǎ ta̤jî̌ta̤jû̌ hî̌nu, sòwò̤̌ tǎ̤ lô̌khô tǎ̤mǎ̤ nî̌꤮. Kòyò kaǎ sî kû̌ Khrǐ ami̤ hǒ akhû̌akhî, tûlû̌ htû̌sò̌htò̌ lô̌khô Cǒmara nî̌꤮. 17Ma̤titè̌hî̌dě, ta̤shěta̤khǎ hètǒ̤hǒ dǒ Cǒmara gǔ sahtò̌ cî̌htò̌ wǐlǒtû̌ a kòyò hǒ. Kè̌ a sahtò̌ cî̌htò̌ wǐlǒ ǐtû̌ pa pě kè̌hî̌dě kòyò dǒ a ganǎ̤de kû̌ Cǒmara a ta̤sǎlě̤we̤kè tô̤̌ tokhlǒnu a pò̤̌yǎ̤pò̤̌sha jî̌jû̌ pwǐ꤮ tè pě. 18Pô̤̌ lî̤plò̌shǐ hî̌nǎ kû̌, “Kòyò cǒtè̤ tokhlǒ gǔ nǐ̤bǎ ta̤ma̤hǎplǎge ayanu, apò̤̌asha mî̌ca. Kè̌hî̌pô̤̌nu dě kòyò dǒ a shôdô Cǒmara tokhlǒ kû̌ pwa̤ma̤sǔphû̌ tokhlǒnu a gǔpò̤̌yǎ̤pò̤̌sha pwǐ꤮ tè pěnu lǎ̤hî̌ agûlǎ̤ ô̌pe tô̤̌.” b 19Pô̤̌nudě, sî khòbǎ ta̤jî̌ta̤jû̌nu, a kè̌ tô kû̌ Cǒmara asǎphlǒ hî̌dě, sî tô ma̤wô̌ sělě hèpô̤̌, htokhôtô̤̌ sî tô bè̌lò̤ sî sǎphlǒ tômèbò dǒ Běcǎ dǒ a bô̌lò̤ ta̤ dě acǒ kû̌ ayô̤̌ hǒtôpwa̤ a cǔdekû.
Copyright information for
KxfSCKXF