1 Peter 5
Cǒmara sû̌phû̌ tôprṳ̂
1He mî̌ ta̤dòkû mǒ̤pwǎ̤ ikǒdû̌ tôpwa̤, htodě he mî̌ pwa̤khòlṳ̌ bǎ Khrǐ a ta̤khò̌jî̌jû̌ awe̤akè tôpwa̤. Htokhôtô̤̌ htû̌꤮ Cǒmara dǔlè̌lṳ̌ hǒ kòyò kû̌ a ta̤bwǐdû̌sîrîhtû akhapěnu, he bǎbǎ, he ô̌plǒ kû̌ a ta̤sîrîdû̌sîrîhtû nupě. Khònò̤̌dě he kwisǎyṳ sî ta̤dòkû mǒ̤khumǒ̤pwǎ̤ dǒ a htû ikǒlǒkòdû̌ tokhlǒ kû̌, 2Sî dǒ a htû ta̤dòkû ikǒdû̌kûshû̌htû dǒ asô̌sô̌kû̌ pwa̤kè̌sû̌phû̌ sî tokhlǒnu, kè̌khwè̌ǐ lô̌khô Cǒmara asû̌phû̌ dǒ a ǐ sî nutôprṳ̂, dě ô̌pǒ̤kè̌wô̌ lô̌khô ta̤dòkûphû̌ nutokhlǒ, dě sǎphlǒ ô̌ kè̌wô̌ lô̌khô asî pô̤̌ Cǒmara sǎyṳ nokè̌ sî nunî̌꤮. Ma̤ tǎ̤ pô̤̌ kòyò noshû̌ sî dě sî ma̤pwǎnu tǎ̤mǎ̤. Kè̌dû̌ lô̌khô khû̌kǎ dě ma̤ lô̌khô tǎ̤mǎ̤ nî̌꤮. Mè̤̌mè̤tôkhônu, sî gǔ htû khô̌ kòyò dǒ a sǎphlǒshû̌ ma̤ Cǒmara a ta̤phǐta̤ma̤ tokhlǒ nî̌꤮. a 3Pwa̤yṳ̌ǎta̤plǒcu dǒ Cǒmara nokè̌khwè̌ǐ sî tokhlǒnu, noǎ sî ta̤siwi̤sòwò̤ dě pǒshû̌pǒsho nǐ̤ asî tǎ̤mǎ̤ nî̌꤮. Mè̤̌mè̤tôkhônu, htûbǎtû̌ sû̌phû̌ nutôprṳ̂ alǎ̤kè̌lû̌mò̌mṳ sî nî̌꤮. 4Dě bǎ pwa̤kè̌sû̌phû̌ a ikǒdû̌lǒ Khrǐnu gǔ hè akhapěnu, a gǔ ǐ sî ta̤bwǐdû̌sîrîhtû akhû̌glû̌hta dǒ asîrî hǎmǎkè bǎpe tôkhò̌꤮ tô̤̌ nupě. 5Pô̤̌ he hî̌ bǎ htohǒ sî kû̌ ta̤shò̌lò̤sǎphlǒ awe̤akènu hǒ, sî dǒ a nějǎkhlo tokhlǒnu, sî bǎ shò̌lò̤ lô̌khô sî sǎphlǒ dǒ mǒ̤khumǒ̤pwǎ̤ tokhlǒ alǎ̤. Sî pṳ̂̌꤮ tôpwa̤ tôbǎ kusô̌htò̌ lô̌khô ta̤shò̌lò̤ sǎphlǒ tôpwa̤ kû̌ tôpwa̤ sô̌sô̌kû̌ sî kusô̌htò̌ jehǐyò̤̌nu, ma̤titèhî̌dě, lî̤plò̌shǐkû hî̌ kû̌, “Cǒmara ma̤tě̤tṳ̌ shěshu kòyò dǒ a bè̌htò̌lṳ̌ asǎphlǒ nutokhlǒ, bǎbǎkǎlè abwǐsîrî nî̌ a ǐlò̤ dû̌wî̤khlo kòyò dǒ a shò̌lò̤ asǎphlǒ nutokhlǒ pwǎ.” b 6Pô̤̌nu akhû̌akhî, shò̌lò̤ lô̌khô sî sǎphlǒ dǒ Cǒmara a ta̤pô̤ta̤phǎ alǎ̤nu nî̌꤮. Htû̌꤮ shěkhǎ tôbǎ kû̌ Cǒmara asǎphlǒ hǒ pěnu, a gǔ bè̌htò̌yô̤̌ sî pě. c 7Cǒmara sǎphlǒô̌ kè̌khwè̌ǐ sî akhû̌akhî, bè̌htò̌ lô̌khô sî ta̤ bǎgû̌bǎgè̌ lǒ̤꤮ bò dǒ Cǒmara alô̤nu. 8Sû̌ǐlò̤ ǐtû̌ gû̌ sînǎ̤ dě ô̌sè̌rè̌ kû̌ lô̌khô, ô̌sòklò kû̌ lô̌khô nî̌꤮. Hǎkhû̌tana dǒ a sǎkhě sînu tôdonu a cû̌lè kè̌cô kòyò sô̌sô̌kû̌ khî dǒ akǒ dě a lǎ̤kè̌pǒ̤ kòyò dǒ a gǔ pǐsaklûnṳ̌ asî pě nutokhlǒ. 9Ô̌měô̌gle lô̌khô dǒ sî ta̤yṳ̌ta̤nǎ̤ akû. Dě ma̤tě̤tṳshěshu lô̌khô hǎkhû̌tana nî̌꤮, ma̤titèhî̌dě, sî sî̌ganǎ̤ kû̌ sîpṳ̌sîwè̤̌ dǒ a ô̌ dǒ hǎkhû̌ teběbò dǒ a yṳ̌ǎnǎ̤ǎta̤ sô̌sô̌kû̌ sî tokhlǒnu, a khòbǎ hǒ ta̤jî̌ta̤jû̌ pô̤̌ sî khòbǎ nuhǒ. 10Cǒmara mî̌ ta̤bwǐta̤sîrî lǒ̤꤮ bò a Běcǎ dě a kaǎ sî dǒ a ǐ sî kû̌ a ta̤sîrîdû̌sîrîhtû tûjû̌pwa̤ dǒ Yeshǔ Khrǐ akûnu pě. Bǎ sî khòbǎ ta̤jî̌ta̤jû̌ tòshò̌phû̌nu gǔ tûlû̌ htopěnu, Cǒmara anǎ̤běcǎ tû̌ a gǔ ma̤měma̤gle tònò gesô̌ sî pě, htodě a ǐshoǐshû̌htò̌ sîkhû̌sîǎ pě. 11Cǒmara gǔ pǒǐ pû ta̤bwǐdû̌sîrîhtû kû̌ ta̤pô̤ta̤phǎ tûjû̌pwa̤ talakhǎ nî̌꤮. Ame̤.Ta̤hî̌mô̤hî̌wô̌ dǒ nô̌kò gutṳ̌
12He wě̤pǔtǔ bǎ pwǎ sî lî̤nu pwǎ. He ǐkhû̌ǐǎ sî, htodě he khòlṳ̌ hesǎphlǒ kû̌ ta̤numî̌ Cǒmara abwǐsîrî mè̤̌mî̌ca. Ô̌měô̌gle lô̌khô dǒ ta̤nu akû nî̌꤮. Khûshǐla dǒ he bè̌ a pô̤̌ he pṳ̌wè̤̌ dǒ acǒ kû̌ ayô̤̌ tôpwa̤nu, a wě̤jè̌ padô̌ he lî̤hǒtôbǎ. d 13Hephû̌pwa̤khû Khûmakǔ kû̌ sî pṳ̌wè̤̌ ta̤dòkû dǒ Wî̤̌babǔlû akû dǒ Cǒmara rû̌htò̌ gû̌ a sô̌sô̌kû̌ sî nutokhlǒ, sû cû̌bǎ dô̌ sî ta̤hî̌mô̤hî̌wô̌ tokhlǒ e. 14Hî̌mô̤hî̌bǎwô̌ kè̌khîlû̌û dě gômô̤ kè̌khîlû̌û kû̌ Khrǐphû̌ ata̤mô̤nu nî̌꤮. Lǒ̤꤮ bò sî dǒ a htûhto Khrǐ ata̤ tokhlǒnu, Cǒmara a ta̤gûjû̌kabǎ gǔ ô̌ kû̌ sî nî̌꤮.
Copyright information for
KxfSCKXF