1Th 3 | KxfSCKXF | STEP | Dǒ nô̌kò gutṳ̌nu pa khòbò̌ pe tô̤̌ akhû̌akhî, pa gǔ ô̌kè bǎ Wî̤̌ate akûnu pa bè̌lò̤kè pa sǎphlǒ pô̤̌nu.

1 Thessalonians 3

1 Dǒ nô̌kò gutṳ̌nu pa khòbò̌ pe tô̤̌ akhû̌akhî, pa gǔ ô̌kè bǎ Wî̤̌ate akûnu pa bè̌lò̤kè pa sǎphlǒ pô̤̌nu. ^a 2 Dě pa sûlò̤ Khûtîmôte dǒ sîô̌, a mî̌ pa pṳ̌wè̤̌ tôpwa̤ dě a htû Cǒmara pwa̤ma̤ta̤phû̌ tôpwa̤. A ma̤ kû̌ pa, dě a shôbǐǐlṳ̌ bǎ kòyò kû̌ Khrǐ a ta̤sǎlě̤we̤kè. Pô̤̌khô a gǔ ǐkhû̌ǐǎ sî dě a gǔ tûsû shò̌gû̌ sî ta̤yṳ̌ta̤nǎ̤ akò nudě, pa sûlò̤ a dǒ sîô̌. 3 Kòyò ma̤jî̌ma̤jû̌ sî akhû̌akhî, dě pô̤̌khô sî gǔ wîkè sî ta̤yṳ̌ta̤nǎ̤ tôpwa̤ tô̤̌nu, pa nohè Khûtîmôte dǒ sîô̌. Sî sî̌ganǎ̤ wô̌wô̌bǎbǎ kû̌ Cǒmara ta̤yè̤lò̤ nǎ dǒ pa bǎ khòbǎ ta̤ma̤jî̌ma̤jû̌ pô̤̌o tokhlǒ nuhǒ. 4 Ma̤titèhî̌dě bǎ pa ô̌pe kû̌ sî akhanu, pa hî̌ sǎla̤la̤ hto bǎ sî kû̌ pa gǔ khòbǎ ta̤ma̤jî̌ma̤jû̌ pô̤̌o nupě. A hè htûhtò̌ kû̌ sî kwè̌ hî̌tènu sî kè̌shǐbǎ mè̤̌mî̌ca htohǒ. 5 He ô̌khò petô̤̌ akhû̌akhî, pô̤̌khô Khûtîmôte gǔ sî̌ganǎ̤ kû̌ sî ô̌mětegle pe dǒ sî ta̤yṳ̌ta̤nǎ̤ akûya, mî̌ sî ô̌mě pe tô̤̌ yanu, he sûlò̤ a dǒ sî ô̌. He bǎyô̤ kû̌ hǎkhû̌tana glè̌ lô̌ǐplò̤ǐ sî hǒ. Htodě lǒ̤bò ta̤phǐta̤ma̤ dǒ pa ma̤hto bòkè tokhlǒnu, a gǔ tṳ̌dè̌tṳ̌dè bòkèhǒ, he bǎyô̤ pô̤̌nu.

6 Bǎbǎkǎlè khònò̤̌ Khûtîmôte ô̌ dǒ sîô̌ dě a getǒ̤ sô̌ dǒ paô̌ hǒ. Dě a ge pwe̤ǐ bǎ pa kû̌ ta̤we̤ta̤kè dǒ a mô̤ tokhlǒ. A pwe̤ǐlṳ̌ bǎ pa kû̌ sî ta̤yṳ̌ta̤nǎ̤ kû̌ sî ta̤mô̤ tokhlǒ awe̤akè. Kǎtô̤̌ a hî̌lṳ̌ bǎ pa kû̌ sî gènè̤htò̌bǎ pa pṳ̂̌꤮ taplǎ, dě sî ô̌ kû̌ ta̤sǎlě̤sǎlò̤, kǎtô̤̌ sî nǎsǔ mî̌ca pa pô̤̌ pa nǎsǔ sînu, a shôbǐǐlṳ̌ bǎ pa pô̤̌nu. ^b 7 Pô̤̌nudě sapṳ̌wè̤̌sî, bǎ pa khòbǎ ta̤pò̤̌ta̤sha dǒ adû̌ayô̤̌ kû̌ ta̤jî̌ta̤jû̌ lǒ̤bò tokhlǒ akha nudě, sî yṳ̌ǎ nǎla̤ǐ pe Khrǐ akhû̌akhî, a nǐ̤khû̌nǐ̤ǎ mî̌ca dǒ paya. 8 Ma̤titèhî̌dě, dǒ sî ihtǒ měgle dǒ Běcǎ akû akhû̌akhî, pa ô̌htûpwa̤ khònò̤̌nu, phi꤮ aphiamô̤hè sô̌ pa hǒ. 9 Dǒ sî khû̌khîdě, pa hî̌bwǐhî̌sîrî pa Cǒmara dě pa sǎlě̤sǎlò̤ mè̤̌mî̌ca dǒ a lô̤mô̤̌ dě pa sǎlě̤sǎlò̤ hî̌bwǐhî̌sîrî Cǒmaranu, a gutṳ̌jò pè̤̌ tô̤̌. 10 Pô̤̌khô pa gǔ kè̌shǐ lò̤bǎ sô̌ kû̌ sî dě pa gǔ ma̤jè̌ dû̌htò̌pô̤̌ sî ta̤yṳ̌ta̤nǎ̤ dǒ a lǎ̤lṳ̂ tokhlǒnudě, pa kwicaba lṳ̌mṳ̌khǐkhǐ lṳmṳ̌shasha.

11 Pô̤̌khô pa gǔ hè bǎ sô̌ dǒ sîô̌nu, pa Cǒmara dǒ a mî̌ papha sanǎ̤ nutôpwa̤ kû̌ pa Běcǎ Yeshǔ gǔ tîwî̌tòwò bǔmôphlô pû paklè̌ nî̌꤮. 12 Běcǎ gǔ ma̤dû̌htò̌ pû sî ta̤mô̤ǐ lû̌û dě, sî gǔ mô̤ lǒ̤sǔlǒ̤sò̌ kè̌khî lû̌û tôpwa̤ kû̌ tôpwa̤, htodě sî gǔ mô̤dû̌htò̌ pô̤̌ kòyò dǒ ashǔshawa̤ tokhlǒ sô̌sô̌kû̌ pa mô̤ǐ sînu nî̌꤮. 13 Bǎ pa Běcǎ Yeshǔ hèlò̤ kû̌ a kòyò plò̌shǐ tokhlǒ lǒ̤bò pě akhanu, pô̤̌khô kòyò lǎ̤bè̌ sî ta̤sǔ gǔ ô̌ pe tô̤̌nu, kǎtô̤̌ pô̤̌khô sî gǔ plò̌shǐ dǒ pa Cǒmara kû̌ papha nutôpwa̤ alô̤mô̤̌ pěnu, a gǔ ǐshû̌ǐsho pû sî sǎphlǒ akhû̌aǎ nî̌꤮.