1Th 4 | KxfSCKXF | STEP | Sapṳ̌wè̤̌ sî, dǒ nô̌kòlǒnu, sî bǎ ô̌htûpwa̤ tô kû̌ Cǒmara asǎphlǒ hî̌tènu, pa sû̌ǐ hto sî hǒ. Dě khònò̤̌ sî ô̌htûpwa̤ numî̌ amè̤̌hǒ. Khònò̤̌ pa kwisǎyṳ sî dě pa shò̌gû̌ sîkò dǒ Běcǎ Yeshǔ agûlǎ̤ kû̌, sî gǔ ma̤ dû̌htò̌htûhtò̌ sělě pô̤̌nu.

1 Thessalonians 4

Ta̤ô̌htûpwa̤ dǒ atô Cǒmara sǎphlǒ

1 Sapṳ̌wè̤̌ sî, dǒ nô̌kòlǒnu, sî bǎ ô̌htûpwa̤ tô kû̌ Cǒmara asǎphlǒ hî̌tènu, pa sû̌ǐ hto sî hǒ. Dě khònò̤̌ sî ô̌htûpwa̤ numî̌ amè̤̌hǒ. Khònò̤̌ pa kwisǎyṳ sî dě pa shò̌gû̌ sîkò dǒ Běcǎ Yeshǔ agûlǎ̤ kû̌, sî gǔ ma̤ dû̌htò̌htûhtò̌ sělě pô̤̌nu. 2 Ta̤ dǒ pa hî̌ hto sî kû̌ sî tôbǎ ma̤ tokhlǒnu, sî sî̌yahtohǒ. Ta̤ tokhlǒ numî̌ Běcǎ Yeshǔ bè̌lò̤ ta̤ma̤ dǒ pakhû̌ dǒ pa tôbǎ shôbǐǐ bǎ sî pwǎ.

3 Cǒmara sǎyṳ kû̌ sî ta̤ihtǒhǎnòò̌ sîtokhlǒ bǎ mṳ̂̌plî dě bǎ cû̌sǔnṳ̌ pwa̤mǒ̤pwa̤khû tîkî̌꤮ tô̤̌. 4 Sî pṳ̂̌꤮ tôpwa̤ tôbǎ pǒǐ tûû̌ sînǎ̤ kû̌ ta̤ô̌htûpwa̤ plò̌shǐ dǒ kòyò gǔ bè̌dubè̌nǎ̤ sî tokhlǒ. 5 Nopǒ lò̤ǐ tǎ̤ sînǎ̤ kû̌ ta̤lṳ̂ma̤mô̤ǐ nǎ̤ tokhlǒ kû̌ ta̤putupatǎ a ta̤sǎyṳsǎbǎ pô̤̌ kòyò dǒ a sî̌ganǎ̤ Cǒmara tô̤̌ nutokhlǒ tǎ̤mǎ̤ nî̌꤮. 6 Sî tôbǎ ma̤sǔ sî pṳ̌wè̤̌ Khrǐphû̌ tokhlǒ kû̌ ta̤ pô̤̌nu tokhlǒ tôpwǎ̤꤮ tô̤̌. Sî tôbǎ lô̌ǎ tikhlǐkhû̌ tikhlǐkò dǒ sî pṳ̌wè̤̌ Khrǐphû̌ tokhlǒ akhû̌ tôpwǎ̤꤮ tô̤̌. Kòyò dǒ a ma̤pô̤̌nu tokhlǒnu, Běcǎ gǔ cî̌htò̌ asî pě. Pô̤̌o tokhlǒnu pa shôbǐǐlṳ̌ bǎ htobò sî hǒ, pa dǐsè̌rè̌ htobò sî hǒ. 7 Ma̤titèhî̌dě Cǒmara kaǎ pa dǒ pa bǎ ô̌htûpwa̤ ma̤sǔ pwa̤mǒ̤pwa̤khû ayanu mè̤̌tô̤̌. Pô̤̌khô pa ta̤ihtǒ hǎnòò̌ sîtokhlǒ gǔ mṳ̂̌plî ayanudě, a kaǎ pa pwǎ. 8 Pô̤̌nu akhû̌akhî, kòyò tôpwa̤pwa̤ dǒ a htè̌shěshu ta̤sû̌ǐtòwòǐ numî̌, a htè̌shěshu kòyòhǎkhû̌phû̌ mè̤̌tô̤̌. A htè̌shěshu Cǒmara dǒ a ǐ sî Yôla Plò̌shǐ Běcǎ nutôpwa̤ hǒ.

9 Ta̤mô̤ǐ pṳ̌wè̤̌ dǒ a yṳ̌nǐ̤nǎ̤nǐ̤ ta̤ tokhlǒ awe̤akènu, pa lǎ̤lṳ̂ wě̤ bǎ sî tô̤̌. Ma̤titèhî̌dě ta̤ dǒ bǎ mô̤ǐ kè̌khî lû̌û tôpwa̤ kû̌ tôpwa̤nu sî sanǎ̤ pwǎ, Cǒmara sû̌ǐtòwòǐ hto tûû̌ sî hǒ. 10 Kè̌hî̌kû̌mî̌ sî mô̤ǐbò sîpṳ̌sîwè̤̌ dǒ a ô̌ dǒ Mèsidûnǐ̤yagǎ tôgǎ nutokhlǒ. Bǎbǎkǎlè pa shò̌gû̌ pô̤̌ sî kû̌ sî gǔ mô̤ǐ dû̌htò̌ lǒkhlo pô̤̌ kû̌ hǒo nunî̌꤮.

11 Jî̌pwǐ̤ ô̌htûpwa̤ mô̤kla pè̤̌dû lô̌khô kû̌ kòyò dǒ ta̤pṳ̂̌꤮ tocǒ akû nî̌꤮. Na ta̤we̤ta̤kè mè̤̌tô̤̌ tokhlǒnu, cû̌nṳ̌ ma̤shû̌shǎ tǎ̤ kòyò tǎ̤mǎ̤ nî̌꤮. Pô̤̌ pa shôbǐǐ hto sînu, kè̌lǎǎ kè̌lǎwè̤ dě bǔǎlò̤ lô̌khô tûû̌ sînǎ̤ nî̌꤮. 12 Pô̤̌khô kòyò dǒ a yṳ̌nǐ̤nǎ̤nǐ̤ Cǒmara tô̤̌ tokhlǒ gǔ kè̌shǐ sî ta̤ô̌htûpwa̤ dě asî gǔ bè̌sû̌bè̌sǎ sî, htokhôtô̤̌ ta̤ dǒ sî lṳ̂ǎlṳ̂ô tokhlǒnu, pô̤̌khô sî gǔ nǎla̤ǐ kòyò tô̤̌nu, ma̤ lô̌khô pô̤̌ pa hî̌ sînu nî̌꤮.

Běcǎ ata̤hèlò̤ sô̌

13 Pṳ̌wè̤̌sî, pa sǎyṳ nosî̌ya sî kû̌ kòyò dǒ a yṳ̌ǎnǎ̤ǎta̤ dě a si hto nutokhlǒ awe̤akè. Pô̤̌ kòyò dǒ a kè̌shuǐ kû̌ kòyò tô̤̌ nutokhlǒ sǎplǎ̤nu, pa sǎyṳ nohtû kû̌ sî pô̤̌nutô̤̌. 14 Pa yṳ̌ǎ kû̌ Yeshǔ sihto dě a htûpwa̤ getîkhî hǒ. Pô̤̌nudě pa yṳ̌ǎ kû̌ htû̌꤮ Yeshǔ hèlò̤ sô̌ pěnu, Cǒmara gǔ kaǎge plǒ sô̌ kòyò dǒ a yṳ̌ǎ Yeshǔ dě a si hto nutokhlǒ kû̌ apě. ^{▼▼yô̤̌mûyô̤̌sǎ dǒ ashǔshawa̤ mî̌ dǒ Yeshǔ akhû̌akhî, Cǒmara gǔ kaǎge kòyò dǒ a si htohǒ kû̌ Yeshǔ nupwǎ.} 15 Ta̤ dǒ pa glè̌ hî̌ bǎ pô̤̌ sî tokhlǒnumî̌, Běcǎ sû̌ǐtòwòǐ kû̌ anǎ̤ sanǎ̤. A hî̌ kû̌, dǒ Běcǎ Yeshǔ hè sô̌ akhapěnu, pa dǒ a ô̌htûpwa̤ pe tokhlǒnu, pa gehtò̌wǐ kòyò dǒ a yṳ̌ǎ dě a si hto nutokhlǒ mè̤̌tô̤̌. ^b 16 Ma̤titèhî̌dě Běcǎ sanǎ̤ gǔ ô̌ dǒ mǒkhû̌ dě hèlò̤ pě, dě a gǔ kaǎgǔhtò̌ yô̤̌sǎ tômû pě. Htodě mǒkhû̌ tanaphû̌ a ikǒdû̌lǒ tôpwa̤ gǔ kaǎgǔ hî̌bǎlò̤ pě. Htodě kòyò gǔ ganǎ̤de Cǒmara ǔpwe̤htò̌ kǐlû pě dě kòyò dǒ a yṳ̌ǎ Khrǐ dě a si hto tokhlǒnu, a gǔ ihtǒ gewǐ pě. 17 Htodě pa dǒ a ô̌htûpwa̤pe tokhlǒnu, pô̤̌khô pa gǔ cû̌ kè̌shǐshěshu kû̌ Běcǎ dǒ mǒlǎ̤ pěnudě, Cǒmara gǔ johtò̌ pa kû̌ asî dǒ poǒlṳ̌kla pě. Htopědě pa gǔ cû̌ ô̌plǒ kû̌ Běcǎ tûjû̌pwa̤ talakhǎ pě. 18 Pô̤̌nu akhû̌akhî, shôbǐǐ mô̤ kè̌khî lô̌khô sî sǎphlǒ kû̌ ta̤we̤ta̤kènu tôpwa̤ kû̌ tôpwa̤ nî̌꤮.