1 Thessalonians 5

Ô̌ tîwî̌tòwònǎ sînǎ̤ kû̌ Běcǎ ata̤hèlò̤ alṳmṳ̌ni̤

1Sapṳ̌wè̤̌sî꤮, Běcǎ gǔ hètô aněala ashěakhǎ bǎkhò̌tè pěnu pa lǎ̤lṳ̂ wě̤ shôbǐǐlṳ̌ bǎ sî tô̤̌. 2Ma̤titèhî̌dě sî sî̌ganǎ̤ tě̤tě̤mè̤̌mè̤̌ hto kû̌ Běcǎ hè alṳmṳ̌ni̤ pěnu, asô̌sô̌kû̌ pwa̤ǎhǔ hè dǒ lṳmṳ̌khǐkhanu pě. ^a 3Bǎ kòyò hî̌ kû̌, “Gǎ gûjû̌kabǎ hǒ, ta̤ bǎgû̌bǎgè̌ ô̌ pe tô̤̌” kòyò hî̌ pô̤̌o akhapěnu, ta̤pî̌ta̤lṳ̂̌ gǔ hètǒ̤sumṳ̌ bǎ asî sô̌sô̌kû̌ pwa̤mǒ̤ phû̌ô̌ hǐphusha nupě dě asî hǎplǎbò̌ tôpwǎ̤꤮ tô̤̌ pě.

4Bǎbǎkǎlè, pṳ̌wè̤̌ sî, sî mî̌ kòyò ô̌ dǒ ta̤khǐsiwi̤ alǎ̤ dě a ma̤ta̤phû̌mò̤̌ nutokhlǒ mè̤̌tô̤̌ akhû̌akhî, Běcǎ hè alṳmṳ̌ni̤nu, sî ǐsha sumṳ̌ gònò̤̌gòglè pô̤̌ pwa̤ǎhǔ hètǒ̤sumṳ̌ bǎsî ô̌ nutô̤̌. 5Lǒ̤꤮ bò sî tokhlǒ numî̌ ta̤lî aphû̌khû kû̌ lṳmṳ̌sha aphû̌khû tokhlǒ. Pa mî̌ kòyò lṳmṳ̌na̤phû̌ mè̤̌tô̤̌tô̤̌, ta̤khǐta̤lo̤phû̌ mè̤̌tô̤̌tô̤̌. 6Pô̤̌nudě pa tô hǎmôô̌ shôpě̤ pô̤̌ kòyò tokhlǒ hǎmôô̌ shôpě̤ nutô̤̌. Pa tôbǎ ô̌sòklò dě pǒǐ tûû̌ panǎ̤. 7Ma̤titèhî̌dě kòyò dǒ a hǎmôô̌ tokhlǒnu a hǎmôô̌ dǒ lṳmṳ̌khǐkha, kòyò dǒ a ǎmuômu tokhlǒ numî̌ a ǎmuômu dǒ lṳmṳ̌khǐkha. 8Bǎbǎkǎlè pa mî̌ lṳmṳ̌shaphû̌ tokhlǒ akhû̌akhî, pa bǎ pǒǐ tûû̌ panǎ̤. Pa tô yṳ̌ǎ hènè Yeshǔ dě pa tô mô̤ǐ sělě kòyò. Pa kè̌ ma̤pô̤̌nu hî̌dě asô̌sô̌kû̌ pa sô̌htò̌ǐ pa jetě̤htò̌ dǒ a takabǐ panǎ̤ nuhǒ, htodě pa ta̤kè̌shuǐ dǒ Cǒmara gǔ ma̤hǎplǎge pa numî̌ asô̌sô̌kû̌ pa glû̌htò̌ khû̌glû̌ tě̤htò̌ dǒ a takabǐ pa ikǒ nuhǒ. ^b 9Cǒmara rû̌htò̌ pa kû̌ pa gǔ khòbǎ a ta̤sǎphlǒdû̌ a ta̤cî̌htò̌nu mè̤̌tô̤̌. Dǒ pa Běcǎ Yeshǔ Khrǐ khû̌khîdě, a rû̌htò̌ pa kû̌ pa gǔ nǐ̤bǎ bò ta̤ma̤hǎplǎge nupwǎ. 10Pa si bǎbǎ, pa htûpwa̤ bǎbǎ, pô̤̌khô pa gǔ ô̌plǒ kû̌ anudě, a tṳ̌sikhòsi bǎ dǒ paya hǒ. 11Pô̤̌nudě, ǐkhû̌ǐǎ kè̌khî lû̌û tôpwa̤ kû̌ tôpwa̤ dě ma̤jè̌ kè̌khîlû̌û tôpwa̤ kû̌ tôpwa̤ pô̤̌ sî ma̤ khònò̤̌nu nî̌꤮.

Ta̤sû̌ǐ nè̌klè̌nè̌klò kû̌ ta̤hî̌mô̤hî̌wô̌ dǒ gutṳ̌kò

12Pṳ̌wè̤̌sî, kòyò dǒ a htû sî ikǒlǒkòdû̌ dǒ Běcǎ akû dě a ma̤ ta̤, a ǐsè̌rè̌nǎ bǎ sîklè̌ tokhlǒnu pa kwisǎyṳ sî kû̌ bè̌dubè̌nǎ̤ lô̌khô kòyò pô̤̌nu tokhlǒ nî̌꤮. 13Dǒ asî ma̤ lô̌khô pô̤̌o akhû̌akhî, bè̌dubè̌nǎ̤ shapwǎ̤ asî dě mô̤ lǒ̤sǔlǒ̤sò̌ asî nî̌꤮. Ô̌mô̤ô̌klaǐ kè̌khî lû̌û tôpwa̤ kû̌ tôpwa̤ nî̌꤮. 14Pṳ̌wè̤̌sî, pa kwisǎyṳ sô̌ pô̤̌ sî kû̌, ǐsè̌rè̌ kòyò cè̌klè nutokhlǒ nî̌꤮. Htodě ǐkhû̌ǐǎ bǎ kòyò dǒ a ǐsha nutokhlǒ dě ma̤jè̌ padô̌ kòyò dǒ a khû̌shiǎjǎ nutokhlǒ, htodě sǎphlǒhtû bǎ kòyò pṳ̂̌꤮ tôpwa̤ nî̌꤮. 15Noma̤ geshěshu tǎ̤ kòyò dǒ kòyò ma̤sǔ lû̌û nutokhlǒ tǎ̤mǎ̤ nî̌꤮. Mè̤̌mè̤tôkhônu, jî̌pwǐ̤ ma̤wô̌ǐ kè̌khî lû̌û tôpwa̤ kû̌ tôpwa̤ pṳ̂̌꤮ tôplǎ dě jî̌pwǐ̤ ma̤wô̌ bǎpû kòyò dǒ ashǔshawa̤ tokhlǒ nî̌꤮.

16Sǎlě̤sǎlò̤ lô̌khô pṳ̂̌꤮ plǎ.

17Kwicaba lô̌khô pṳ̂̌꤮ tôplǎ nî̌꤮.

18A htûhtò̌ hî̌tètè̌ bǎbǎ, tûlû̌ hî̌bwǐhî̌sîrî lô̌khô Cǒmara pṳ̂̌꤮ taplǎ nî̌. Ma̤titèhî̌dě, Cǒmara sǎphlǒô̌ dǒ sî tôma̤ pô̤̌nu dǒ Yeshǔ Khrǐ akû.

19Ma̤pǐ̤ tǎ̤ Yôla Plò̌shǐ Běcǎ a ta̤phǐta̤ma̤ tokhlǒ dǒnakû tǎ̤mǎ̤ nî̌꤮. 20Gènè̤ pî̌tî̌ tǎ̤ piwi̤pèshè a ta̤hî̌pô̤nǎ nutokhlǒ tǎ̤mǎ̤ nî̌꤮. 21Ma̤kè̌kè̌ htobò ta̤pṳ̂̌꤮ tocǒ dě phî̌shěshu ta̤ dǒ awô̌ nutokhlǒ nî̌꤮. 22Cû̌tephe khatephe lô̌khô ta̤phû̌mò̤̌shǐhtô pṳ̂̌꤮ tôcǒ nî̌꤮.

Khûpò̌lǔ kwicaba kû̌ Cǒmara gǔ ǐshowî̤ Tîsalònǐ ta̤dòkûphû̌ tokhlǒ

23Cǒmara dǒ a ǐ pa ta̤gûjû̌kabǎ nutôpwa̤ anǎ̤běcǎ gǔ ma̤plò̌shǐ lǒbehtò̌ pû sî nî̌꤮. Htokhôtô̤̌ dǒ pa Běcǎ Yeshǔ Khrǐ gǔ hè sô̌ pěnu, pô̤̌khô kòyò gǔ bè̌jòpe sî ta̤sǔ tô̤̌ nudě, Cǒmara gǔ kè̌pǒ̤ǐ bò pô̤̌ sî nǎ̤glǒ kû̌ sîsǎphlǒ kû̌ sî ta̤ô̌htûpwa̤ pě nî̌꤮. 24Cǒmara dǒ a kaǎ sî tôpwa̤nu, a gǔ ma̤ mè̤̌mî̌ca pû sî pô̤̌nu pě, ma̤titèhî̌dě a mî̌ Cǒmara dǒ acǒ kû̌ ayô̤̌ tôpwa̤.

25Pṳ̌wè̤̌sî, kwicaba padô̌ lô̌khô paya nî̌꤮. 26Hî̌mô̤hî̌bǎwô̌bò pṳ̌wè̤̌ dǒ a yṳ̌ǎnǎ̤ǎta̤ nutokhlǒ dě gômô̤ lû̌û tôpwa̤ kû̌ tôpwa̤ dǒ ta̤numû̌ aplò̌shǐ akûnu nî̌꤮. 27Dǒ Běcǎ ami̤ akû, he nolò̤ sî kû̌ sî gǔ dô̌lṳ̌ bǎ he lî̤hǒtôbǎ dǒ pṳ̌wè̤̌ dǒ a yṳ̌ǎnǎ̤ǎta̤ pṳ̂̌꤮ tôpwa̤ a lô̤mô̤̌ nî̌꤮.

28Běcǎ Yeshǔ Khrǐ abwǐsîrî ô̌kû̌ pû sî nî̌꤮.