1Ti 1 | KxfSCKXF | STEP | He mî̌ Khûpò̌lǔ. He wě̤cû̌ bǎ sî lî̤ tôbǎ. Cǒmara dǒ a ma̤hǎplǎge pa nutôpwa̤ kû̌ Yeshǔ Khrǐ dǒ pa ta̤kè̌shu nǎla̤ǐ a tôpwa̤nu, asî hî̌bǎhtò̌ hto ayô̤̌ kû̌ a nohtûhtò̌hto he kû̌ Yeshǔ Khrǐ a pwa̤nophû̌ tôpwa̤.

1 Timothy 1

1 He mî̌ Khûpò̌lǔ. He wě̤cû̌ bǎ sî lî̤ tôbǎ. Cǒmara dǒ a ma̤hǎplǎge pa nutôpwa̤ kû̌ Yeshǔ Khrǐ dǒ pa ta̤kè̌shu nǎla̤ǐ a tôpwa̤nu, asî hî̌bǎhtò̌ hto ayô̤̌ kû̌ a nohtûhtò̌hto he kû̌ Yeshǔ Khrǐ a pwa̤nophû̌ tôpwa̤. 2 He wě̤cû̌ bǎ lî̤hǒonu dǒ Khûtîmôte dǒ asô̌sô̌kû̌ he phû̌pwa̤khû sanǎ̤ dǒ ta̤yṳ̌ta̤nǎ̤ akû tôpwa̤ a ô̌. ^a

pha Cǒmara kû̌ pa Běcǎ Yeshǔ Khrǐ ǐlò̤ pû a ta̤bwǐta̤sîrî kû̌ ta̤sǎyṳgwèbǎǐ kû̌ ta̤gûjû̌kabǎ nî̌꤮.

Ta̤dǐsè̌rè̌ bǎ pwa̤sû̌ǐtòwòǐ sǔ ta̤ tokhlǒ

3 Bǎ he hǎhtò̌cû̌kè dǒ Mèsidûnǐ̤yagǎ akha, pô̤̌ he noô̌ kudǔdǔ hto na bǎ Wî̤̌Ěphěsu akûnu, dě ô̌ kudǔdǔ pô̤̌ kûmṳ̂̌ bǎnu nî̌꤮. Kòyò ô̌ bǎnu tokhlǒ sû̌ǐtòwòǐ kòyò ta̤sû̌ǐtòwòǐ dǒ ashǔshawa̤ dě asǔ tokhlǒ akhû̌akhî, na bǎ hî̌lò̤ nayô̤̌ kû̌ noô̌kǔ asî ata̤sû̌ǐtòwòǐ nutokhlǒ. 4 Pwe̤ǐbǎ asî kû̌ a gǔ ma̤bò nòdû̌ ta̤shěta̤khǎ kû̌ ta̤dô̌kènè lò̤wě̤lò̤sô dǒwǐkha nutokhlǒ kû̌ ta̤dô̌khlidô̌lè dǒ ahtû nutokhlǒ tǎ̤mǎ̤. Ta̤nutokhlǒ mî̌ a dǐô̌htò̌ pwǎ ta̤klî̌ lû̌û, kǎtô̤̌ a ma̤dǐkhû̌dǐdò pô̤̌dô̌ Cǒmara ata̤ma̤ dǒ pa ma̤jò pwǎtǒ̤ a kû̌ ta̤yṳ̌ta̤nǎ̤ nunu. 5 Ta̤hî̌lò̤ yô̤̌nu a ta̤yè̤lò̤nǎ kè̌shuǐ mî̌ pô̤̌khô a gǔ htû̌wṳ̂̌htò̌bǎ ta̤mô̤ǐ aya nupwǎ. Ta̤mô̤ǐ numî̌ a hǎhtò̌ dǒ kòyò sǎphlǒ mṳ̂̌plî nutokhlǒ akû. Htodě a hǎhtò̌ dǒ kòyò ô̌ kû̌ ta̤sî̌ya awô̌ kû̌ aphû̌mò̤̌ dě a rû̌htò̌ ta̤ dǒ awô̌ nutokhlǒ akû, kǎtô̤̌ a hǎhtò̌ dǒ kòyò ô̌ kû̌ ta̤yṳ̌ta̤nǎ̤ mè̤̌mî̌ca nutokhlǒ akû. 6 Kòyò tokhlǒkhlǒnu, a ti̤wǐ̤ khô̌kè anǎ̤ kû̌ ta̤nutokhlǒ dě asî cû̌shôbǐǐ wô̤̌wô̤̌ tîkhî lû̌û ayô̤̌ dǒ a nòdû̌ nutokhlǒ hǒ. 7 Asî sǎyṳ htûhtò̌ lô̌khô Cǒmara a pwa̤sû̌ǐ ta̤sû̌ta̤tòwò asara tokhlǒ bǎbǎkǎlè asî ata̤hî̌bǎ nutokhlǒ bǎbǎ, asî hî̌kwè̌ titènu a sî̌ganǎ̤ getîkhî lô̌khô tô̤̌. Ta̤we̤ta̤kè tokhlǒ dǒ asî hî̌bǎ shotuklǔ awe̤akè bǎbǎ, asî sî̌yaphlô tôcǒ꤮ tô̤̌.

8 Pa noǎ ta̤sû̌ta̤tòwò nî̌ bǎ agwǎ noǎ akhanu, pa sî̌ganǎ̤ kû̌ awô̌ pwǎ. 9 Pa sî̌ganǎ̤ kû̌ ta̤sû̌ta̤tòwò nutokhlǒnu, kòyò dǐô̌htò̌ a dǒ kòyòcǒkòyòtè̤ tokhlǒ ayanu mè̤̌tô̤̌. Mè̤mè̤̌tôkhô, ta̤ dǐô̌htò̌ bǎ kòyò dǒ a ma̤sǔ ta̤sû̌ta̤tòwò sî kû̌ kòyò dǒ a ganǎ̤de kû̌ kò tô̤̌ sî, htodě kòyò dǒ a bè̌dubè̌nǎ̤ gû̌ kò Cǒmara tô̤̌ sî kû̌ kòyò dǒ a ma̤ ta̤sǔta̤plě sî, kû̌ a caba kû̌ kò Cǒmara tô̤̌ sî, kû̌ a gènè̤ kû̌ kòyò Cǒmara tô̤̌ sî, kû̌ a ma̤si apha tô̤̌mî̌ amǒ̤ sî, kû̌ a ma̤si kòyò sî, 10 Kû̌, kòyò dǒ a cû̌sǔnṳ̌plěnṳ̌ pwa̤mǒ̤pwa̤khû sî kû̌, kòyò dǒ acǒatè̤ dǒ aphû̌amakhû̌ tô̤̌ sî, pwa̤khû kû̌ pwa̤khû ma̤sǔ kè̌khî lû̌û, kòyò pṳ̂̌shaǎ kòyò kû̌ ru sî, kòyò dǒ a lô̌ǎta̤ sî kû̌ kòyò dǒ a cû̌ khòlṳ̌ phô̌phô̌ sî, tô̤̌mî̌ a ma̤ta̤ dǒ ashǔshawa̤ tôcǒcǒ dǒ a lûkhô̌ kû̌ ta̤sû̌ǐtòwòǐ acǒatè̤ tokhlǒ aya pwǎ. 11 Ta̤sû̌ǐtòwòǐ dǒ acǒatè̤ numî̌, kè̌shǐ pwǎ dǒ ta̤sǎlě̤we̤kè akû nô̤̌ pwǎ. Cǒmara yṳ̌ǎ he dě a ǐ he ta̤sǎlě̤we̤kènu dǒ he bǎ wǐ̤lò̤ aya nupwǎ. Ta̤sû̌ǐtòwòǐ acǒatè̤ numî̌ a hè dǒ ta̤ǐshowî̤ a Cǒmaradû̌ dǒ kòyò htû̌sò̌htò̌ lû̌û nutôpwa̤ a ô̌.

Dǒ Běcǎ a ta̤sǎyṳgwèbǎǐ akhû̌akhî, Khûpò̌lǔ hî̌bwǐhî̌sîrî yǎ

12 Pa Běcǎ Yeshǔ Khrǐ ǐ hto he ta̤khû̌ta̤ǎ dǒ he gǔ ma̤ ata̤ma̤ aya akhû̌akhî, he hî̌bwǐhî̌sîrî yǎ. Htokhôtô̤̌ a bè̌ he pô̤̌ kòyò dǒ acǒ kû̌ ayô̤̌ tôpwa̤ dě a rû̌htò̌ he dǒ he bǎ ma̤ ata̤ma̤ akhû̌akhî, he hî̌bwǐhî̌sîrî yǎ. 13 Dǒ awǐkha numî̌, he hî̌ phû̌mò̤̌ Yeshǔ Khrǐ, he ma̤jî̌ma̤jû̌ yǎ, he pîjî̌ǐsho yǎ bǎbǎkǎlè Běcǎ gwèbǎǐ he, ma̤titèhî̌dě he yṳ̌nǐ̤nǎ̤nǐ̤ yǎ nò̌khôtô̤̌ dě he ma̤ta̤ tokhlǒnu, he sî̌ganǎ̤ khôtô̤̌ akhû̌akhî, a gwèbǎǐ he pwǎ. ^b 14 Dě pa Běcǎ glǒlò̤ bò dû̌wî̤ abwǐsîrî dǒ helô̤ dě a ǐhto he ta̤yṳ̌ta̤nǎ̤ kû̌ ta̤mô̤ǐ dǒ a ô̌ bǎ Yeshǔ Khrǐ akû nutokhlǒ hǒ.

15 Pô̤̌khô Yeshǔ Khrǐ gǔ hè ma̤hǎplǎge kòyò ta̤sǔphû̌ tokhlǒ dě, a hèlò̤ dǒ hǎkhû̌ nuhǒ. Ta̤hî̌bǎ numî̌ acǒatè̤ dě kòyò lǒ̤bò tôbǎ phî̌shǐshu lǒ̤sǔlǒ̤sò̌ yǎ. Pwa̤ma̤sǔphû̌ lǒ̤bò aklanu he mî̌ kòyò dǒ a ma̤sǔ dû̌lǒkhlo kòyò tôpwa̤ hǒ. 16 Bǎbǎkǎlè pô̤̌khô Cǒmara gǔ dǔlè̌lṳ̌htò̌ Běcǎ Yeshǔ Khrǐ a ta̤khòsǎdô alǒabe dǒ helô̤ ayanu, a gwèbǎǐ he. Ma̤titèhî̌dě he mî̌ kòyò dǒ a ma̤ta̤sǔ dû̌lǒkhlo tôpwa̤ hǒ. Pô̤̌khô he gǔ htûhtò̌ bǎ kòyò lǎ̤kè̌lû̌ dǒ pwa̤yṳ̌genǎ̤ge a dǒ nô̌kò tokhlǒ aya, htodě pô̤̌khô asî gǔ nǐ̤bǎ yôla htûpwa̤ tûjû̌pwa̤ talakhǎ aya nudě Cǒmara gwèbǎǐ he pwǎ. 17 Kòyò pṳ̂̌꤮ tôpwa̤ gǔ htû̌sò̌htò̌ pû khwǐ dǒ a pǒǐta̤ tûjû̌pwa̤ talakhǎ dě a sijòtô̤̌ tôpwa̤ nî̌. A mî̌ Cǒmara dǒ kòyò kè̌shǐjò lû̌û tô̤̌. Cǒmara mî̌ tôpwa̤ nô̤̌pwǎ. Kòyò pṳ̂̌꤮ tôpwa̤ gǔ bè̌dubè̌nǎ̤ yǎ, a gǔ ô̌ kû̌ pû ta̤bwǐdû̌sîrîhtû pṳ̂̌tôhtu nî̌꤮. Ame̤.

18 Hephû̌pwa̤khû Khûtîmôte, ta̤dǒ he noma̤ na khònò̤̌ tokhlǒ numî̌, a gû̌ma̤ pwǎ kòyò tokhlǒ a ta̤hî̌bǎ nǎ nawe̤nakè tokhlǒ nupwǎ. Pô̤̌khô na gǔ shěpě̤wô̌ ta̤ ayanu, noǎ Cǒmara a ta̤hî̌bǎ nǎ nutokhlǒ pô̤̌ kòyò noǎ ta̤wè̤̌ta̤htò tokhlǒnu nî̌꤮. 19 Dě pṳ̂̌měǐ na ta̤yṳ̌ta̤nǎ̤ kû̌ na sǎphlǒ a ta̤gènè̤ mṳ̂̌plî nutokhlǒ nî̌꤮. Kòyò tokhlǒkhlǒnu, a plûkè lô̌khô ata tokhlǒ akhû̌akhî, a ta̤yṳ̌ta̤nǎ̤ pî̌kè bò pwǎ. 20 Kòyò dǒ a ta̤yṳ̌ta̤nǎ̤ pî̌kè pô̤̌nutokhlǒ mî̌ Khûhǔmenè̌ kû̌ Khûalè̌sadru hǒ. Pô̤̌khô a gǔ htû ta̤sû̌ǐ dǒ asîya dě a gǔ ô̌kǔkè a ta̤hî̌bǎsǔ Cǒmara nutokhlǒ ayanu, he ǐlò̤kè asî dǒ hǎkhû̌tana a cǔdekû hǒ.