1Ti 2 | KxfSCKXF | STEP | Dǒ ta̤lǒ̤bò aklanu ta̤dǒ a lṳ̂dû̌lǒ dǒ he sǎyṳ ǐkhû̌ǐǎ sî numî̌ sî kwicaba pû bǎ kòyòya pṳ̂̌꤮ tôpwa̤, dě kwi bǎpadô̌ pû kòyò ashǔshawa̤ ata̤lṳ̂ tokhlǒ, htodě hî̌bwǐhî̌sîrîhtò̌ bǎ pû Cǒmara dǒ kòyò lǒ̤bò aya.

1 Timothy 2

Ta̤dòkû a ta̤cubucaba

1 Dǒ ta̤lǒ̤bò aklanu ta̤dǒ a lṳ̂dû̌lǒ dǒ he sǎyṳ ǐkhû̌ǐǎ sî numî̌ sî kwicaba pû bǎ kòyòya pṳ̂̌꤮ tôpwa̤, dě kwi bǎpadô̌ pû kòyò ashǔshawa̤ ata̤lṳ̂ tokhlǒ, htodě hî̌bwǐhî̌sîrîhtò̌ bǎ pû Cǒmara dǒ kòyò lǒ̤bò aya. 2 Caba lô̌khô pô̤̌nu dǒ khwǐ tokhlǒ aya kû̌ côphǎ lǒ̤꤮ bò tokhlǒ aya. Pô̤̌khô pa gǔ cabucabahtò̌ mô̤mô̤bǎbǎ gûjû̌kabǎ Cǒmara ayanu kû̌ pô̤̌khô pa gǔ ô̌htûpwa̤ tôbǎ kû̌ kòyò pṳ̂̌꤮ tocǒ akûnu dě, kwicaba lô̌khô pû pô̤̌nu nî̌꤮. 3 Hǒomî̌ ta̤dǒ awô̌ dě a ma̤sǎlě̤sǎlò̤ pa Cǒmara dǒ a ma̤hǎplǎge pa nutôpwa̤ asǎphlǒ. 4 Cǒmara sǎphlǒ ô̌ kû̌ kòyò pṳ̂̌꤮ tôpwa̤ gǔ nǐ̤bǎ ta̤ma̤hǎplǎge dě a sî̌ganǎ̤ lô̌khô ta̤tě̤ta̤mè̤̌. 5 Ma̤titèhî̌dě Cǒmara ô̌pwǎ tôpwa̤ pwǎ̤꤮ nô̤̌. Htodě kòyò dǒ a ma̤pè̤̌ma̤dû bǎ sô̌ Cǒmara kû̌ kòyòhǎkhû̌phû̌nu a ô̌ tôpwa̤. A mî̌ Kòyòphû̌khû Yeshǔ Khrǐ pwǎ. 6 Pô̤̌khô a gǔ ma̤hǎplǎge kòyòhǎkhû̌phû̌ lǒ̤bò ayanu, a ǐlò̤kè a ta̤htûpwa̤. A mî̌ pwa̤khòlṳ̌ dǒ a hè tôshětôkhǎ tôpwa̤. 7 Dǒ ta̤we̤ta̤kènu aya, kòyò nohtû pô̤̌ pwa̤shôbǐǐ ta̤ tôpwa̤ kû̌ pwa̤nophû̌ tôpwa̤ kû̌ sara dǒ a gǔ sû̌ǐbǎ Yǔdaphû̌ mè̤̌tô̤̌ tokhlǒ kû̌mî̌ ta̤yṳ̌ta̤nǎ̤ kû̌ ta̤tě̤ta̤mè̤̌ tôpwa̤hǒ. He hî̌ lòhǎlòhô bǎtô̤̌. He hî̌cǒtè̤ pwǎ. ^a

8 Pô̤̌nu akhû̌akhî, dǒ gûlǎ̤ pṳ̂̌꤮ tûkûnu he sǎyṳ kû̌ lǒ̤꤮ bò pwa̤khû tokhlǒ yṳ̂̌htò̌ acǔde aplò̌shǐ dě kwicabata̤. Dě dǒ a ta̤kwicaba akûnu, ta̤tô̤̌klǐ, ta̤sǎphlǒdû̌ tokhlǒnu a tôbǎ ô̌ tô̤̌.

9 He sǎyṳkû̌ kû̌ lǒ̤bò pwa̤mǒ̤ tokhlǒ gǔ bè̌sû̌bè̌sǎ lô̌khô a ta̤kûsô̌jehǐyò̤̌ tokhlǒ. Kûsô̌ lô̌khô ta̤ dǒ atôabǎ nutokhlǒ, tîwî̌ htû̌shò̌ dě sǐpû tǎ̤ khǔlṳ̌ tǎ̤mǎ̤, kûsô̌htò̌ pû kûshû̌hta kû̌ lǒ̤pô̤lòsè̌ tokhlǒ tǎ̤mǎ̤, dě kûsô̌htò̌ tǎ̤ jejû dǒ alě̤dû̌pwî̤htû nutokhlǒ tǎ̤mǎ̤. ^b 10 Mè̤mè̤̌tôkhônu, pwa̤mǒ̤ mî̌ tô tîwî̌ htû̌shò̌ ma̤wî̤ anǎ̤ kû̌ ta̤ma̤ dǒ awô̌ tokhlǒ. Pwa̤mǒ̤ dǒ a olò̤ kû̌ a gǔ bè̌dubè̌nǎ̤ Cǒmara tokhlǒnu, a tô ma̤ lô̌khô ta̤wô̌ pô̤̌nu tokhlǒ.

11 Bǎ pwa̤mǒ̤ tokhlǒ ma̤lû̌ kè̌lǎ sî̌ya lô̌khô anǎ̤ akhanu, asî tô ma̤lû̌ kè̌lǎ sî̌ya dǒ ta̤sǔtukǔ akû kû̌ ganǎ̤de bò yô̤̌ akû. 12 A gǔ phî̌nṳ̌ shěkhǎ dǒ asî gǔ sû̌ǐbǎ pwa̤khû tokhlǒ bǎbǎ, noǎ a ta̤siwi̤sòwò̤ dǒ pwa̤khû tokhlǒ akhû̌ bǎbǎ, he plûma̤ asî tô̤̌. Asî bǎ ô̌sǔtukǔ pwǎ. 13 Ma̤titèhî̌dě Cǒmara bô̌lò̤ wǐ PhaAda. ^c dě Mǒ̤ěwǎ nî̌, Cǒmara bô̌lò̤ nô̌ a dǒ nô̌kò pwǎ. ^d 14 Dě hǎkhû̌tana lô̌ǐplò̤ǐ bǎ PhaAda tô̤̌. Hǎkhû̌tana lô̌ǐplò̤ǐ yǎ dě a ma̤ta̤sǔ numî̌ pwa̤mǒ̤ pwǎ. ^e 15 Bǎbǎkǎlè pwa̤mǒ̤ tokhlǒkhlǒnu, a kè̌ ô̌měô̌gle lô̌khô dǒ a ta̤yṳ̌ta̤nǎ̤ kû̌ ata̤mô̤ǐ, kû̌ a ta̤plò̌shǐ akû dě a kè̌ ô̌ lô̌khô kû̌ a ta̤bè̌sû̌bè̌sǎ shapwǎ̤ anǎ̤ numî̌, Cǒmara gǔ ma̤hǎplǎge asî bǎ asî phû̌ô̌ akhanu pě.