1Ti 3 | KxfSCKXF | STEP | Ta̤hî̌bǎ numî̌ acǒatè̤ dě kòyò tôpwa̤pwa̤ kè̌ sǎyṳ htû ta̤dòkû ikǒlǒkòdû̌ dě, ta̤ma̤ dǒ a sǎyṳma̤ numî̌ ta̤ma̤ dǒ awô̌ tôcǒ hǒ.

1 Timothy 3

Ta̤dòkû ikǒlǒkòdû̌ sî tokhlǒ

1 Ta̤hî̌bǎ numî̌ acǒatè̤ dě kòyò tôpwa̤pwa̤ kè̌ sǎyṳ htû ta̤dòkû ikǒlǒkòdû̌ dě, ta̤ma̤ dǒ a sǎyṳma̤ numî̌ ta̤ma̤ dǒ awô̌ tôcǒ hǒ. 2 Kòyò dǒ a htû ta̤dòkû ikǒlǒkòdû̌ tôpwa̤nu, kòyò bè̌ ta̤sǔ dǒ alô̤nu a bǎ ô̌ tô̤̌, a ma bǎ ô̌pwǎ tôpwa̤ nô̤̌, a bǎ ma̤ surǔsara anǎ̤, a bǎ pǒǐlò̤jò anǎ̤, a tôbǎ ihtǒhǎnòò̌ tě̤bǎtě̤tô wô̌, a tô kaǎmô̤shǔ shǐpwǎ̤shǐmè̤ dǒ ahǐ, a tô sû̌ǐtòwòǐjò ta̤. ^a 3 Htodě a tôbǎ ǎmuômu tô̤̌, a tôbǎ sǎphlǒphǔtǔ tô̤̌, mè̤mè̤̌tôkhônu a tôbǎ mè̤̌ kòyò dǒ a sǎdôhôbî̌, kòyò dǒ atô̤̌klǐ tô̤̌, a bǎmô̤ǐ ruhta tô̤̌. 4 A bǎ mè̤̌ kòyò dǒ a pǒjòwô̌bǎ a hǐphû̌phòphû̌ sî htodě a tôbǎ bǔdû̌ sû̌ǐdû̌htò̌ aphû̌ sî dǒ a gǔ ganǎ̤de lû̌û ayô̤̌ dě a gǔ bè̌dubè̌nǎ̤ lû̌û dǒ ta̤lǒ̤꤮ bò akû. 5 Ma̤titèhî̌dě kòyò tôpwa̤pwa̤ dǒ a bǎ pǒǐ a hǐphû̌phòphû̌ sî pô̤̌ hî̌tènu, a kè̌ sî̌ganǎ̤ tô̤̌ hî̌dě a kè̌ǐ jò Cǒmara a ta̤dòkû tô̤̌. 6 Pô̤̌khô a gǔ bè̌htò̌yô̤̌ asǎphlǒ tô̤̌, htodě pô̤̌khô Cǒmara gǔ cî̌htò̌ a sô̌sô̌kû̌ a cî̌htò̌ hǎkhû̌tana tô̤̌nu dě, a bǎ htû kòyò dǒ a yṳ̌ǎsa mô̤̌pepwǎ nutô̤̌. 7 Kòyò dǒ a yṳ̌ǎ Yeshǔ tô̤̌ tokhlǒ gǔ bè̌dubè̌nǎ̤ lû̌û ayanu, a ta̤hǎnòò̌ihtǒ hî̌bǎ tokhlǒ bǎ tôbǎ wô̌ pṳ̂̌꤮ tôplǎ. Kòyò dǒ a yṳ̌ǎ Yeshǔ tô̤̌ tokhlǒ kè̌ bè̌dubè̌nǎ̤ lû̌û pô̤̌nutô̤̌ hî̌nu, a ma̤sòwò̤̌ lû̌û pě, htokhôtô̤̌ a nǐ̤bǎ hǎkhû̌tana htò̌glǒ pě.

Pwa̤ma̤jè̌ ta̤dòkû tokhlǒ

8 Ma̤pô̤̌nu kòyò htû ikǒlǒkòdû̌ dǒ a ma̤jè̌ ta̤dòkû tokhlǒnu, kòyò pṳ̂̌꤮ tôpwa̤ tôbǎ bè̌dubè̌nǎ̤ asî, dě asî tôbǎ hî̌bǎjò ayô̤̌, asî tôbǎ ô tûlû̌shû̌lě sîpî̌shǐyô̤̌ tô̤̌, htodě a bǎ sǎyṳsǎbǎ ru dǒ kòyòkhû̌ tô̤̌. 9 Ta̤yṳ̌ta̤nǎ̤ dǒ acǒatè̤ adû̌ayô̤̌nu, asî tôbǎ pṳ̂̌měǐ wô̌ kû̌ sǎphlǒ ata̤mṳ̂̌plî. 10 Kòyò tôbǎ ma̤kè̌bǎwǐ asî. Asî kè̌ khòbò̌ ta̤ma̤kè̌kè̌nu, htodě kòyò pè̤̌wǎ̤ ta̤sǔ dǒ alô̤ kè̌ ô̌tô̤̌ hî̌dě plûma̤ asî kû̌ pwa̤ma̤jè̌ ta̤dǒ ta̤dòkû akûnu.

11 Asî ma tokhlǒnu bǎbǎ, kòyò pṳ̂̌꤮ tôpwa̤ tôbǎ bè̌dubè̌nǎ̤ asî, asî tôbǎ dô̌ kòyô̤ tô̤̌, asî bǎma̤ surǔsara anǎ̤ dě asî tôbǎ mè̤̌ kòyò dǒ acǒ kû̌ ayô̤̌ dǒ ta̤lǒ̤꤮ bò akû.

12 Pwa̤ma̤jè̌ ta̤dòkû tôpwa̤ nî̌ ama bǎ ô̌pwǎ tôpwa̤ nô̤̌, a tôbǎ pǒǐjò wô̌ a hǐphû̌phòphû̌. 13 Pwa̤ma̤jè̌ta̤ tokhlǒ dǒ a ma̤wô̌ ta̤phǐta̤ma̤ tokhlǒnu, kòyò glè̌ bè̌dû̌bè̌htû asî pě, dě bǎ asî sû̌ǐ bǎ kòyò kû̌ a ta̤yṳ̌ǎnǎ̤ǎ Běcǎ Yeshǔ Khrǐ akhapěnu, a gǔ sǎphlǒkhuhe hè dě yṳ̌ǎhè ǐ anǎ̤ pě.

Pa ta̤cubucaba dǒ adû̌ayô̤̌

14 Khûtîmôte, bǎ he wě̤ bǎ na lî̤ hǒtôbǎ akhanu, he kè̌shuǐ kû̌ yî̤khôtô̤̌ pěnu, he gǔ hè kè̌shǐ phwè kû̌ na pě. 15 Bǎbǎkǎlè he kè̌ hè pò̤̌yǎ̤ hî̌dě pa tô ô̌htûpwa̤ dǒ Cǒmara a hǐphû̌phòphû̌ aya hî̌tènu, he lî̤ gǔ dǐsî̌ganǎ̤ na pě. Hǐ nî̌ Cǒmara dǒ a htûpwa̤ tôpwa̤ a ta̤dòkû nuhǒ. Ta̤dòkû numî̌ a dǐ shû̌htò̌ ta̤tě̤ta̤mè̤̌ ata̤sû̌ǐ tokhlǒ dǒ asô̌sô̌kû̌ hǐhtǔ kû̌ nò̌dò̌ dǒ a tûhtû̌ mě hǐ tômè nuhǒ. 16 Pa ta̤cubucaba adû̌ayô̤̌ pwǐtènu kòyò ma̤bǐjòǐ a tôpwǎ̤꤮ tô̤̌.

Khrǐ ô̌lṳ̌htò̌ pô̤̌ kòyòhǎkhû̌phû̌ tôpwa̤, dě Yôla Plò̌shǐ Běcǎ khòlṳ̌ kû̌ Khrǐ nî̌ a ma̤tô Cǒmara asǎphlǒ, dě mǒkhû̌ tanaphû̌ tokhlǒ kè̌shǐbǎ a hǒ. Htodě awe̤akè nî̌, kòyò shôbǐǐlṳ̌ a dǒ kòyò ashǔshawa̤ tokhlǒ aklahǒ. Kòyò ô̌ dǒ hǎkhû̌ tokhlǒkhlǒ nî̌ a yṳ̌nǐ̤nǎ̤nǐ̤ lû̌û hǒ. Cǒmara johtò̌ a dǒ mǒkhû̌ bǎ ta̤bwǐdû̌sîrîhtû akûhǒ.