1Ti 4 | KxfSCKXF | STEP | Yôla Plò̌shǐ Běcǎ shôbǐǐ tě̤tě̤mè̤̌mè̤̌ kû̌ htû̌ lṳmṳ̌ni̤ gutṳ̌ tokhlǒ akû pěnu, kòyò tokhlǒkhlǒ gǔ wîkè lô̌khô a ta̤yṳ̌ta̤nǎ̤ pě dě asî gǔ ganǎ̤de khînǎ dǒ a lòhǎlòhô nutokhlǒ pě, dě a gǔ gû̌ kû̌ khînǎ dǒ a lòhǎlòhô tokhlǒ a ta̤sû̌ǐtòwòǐ tokhlǒ pě.

1 Timothy 4

Sarasǔ tokhlǒ

1 Yôla Plò̌shǐ Běcǎ shôbǐǐ tě̤tě̤mè̤̌mè̤̌ kû̌ htû̌ lṳmṳ̌ni̤ gutṳ̌ tokhlǒ akû pěnu, kòyò tokhlǒkhlǒ gǔ wîkè lô̌khô a ta̤yṳ̌ta̤nǎ̤ pě dě asî gǔ ganǎ̤de khînǎ dǒ a lòhǎlòhô nutokhlǒ pě, dě a gǔ gû̌ kû̌ khînǎ dǒ a lòhǎlòhô tokhlǒ a ta̤sû̌ǐtòwòǐ tokhlǒ pě. 2 Ta̤sû̌ǐtòwòǐ tokhlǒ numî̌ a hè dǒ kòyò lòhǎlòhô tokhlǒ a ô̌. Bǎ asî ma̤sǔ akhanu, a gènè̤ kû̌ a ma̤sǔta̤ tîkî̌꤮ tô̤̌. 3 Asî sû̌ǐsǔ kòyò kû̌ nophî̌ kòyòmakòyòwṳ̂ tô̤̌, htodě shǎǎshǎô tokhlǒkhlǒnu a no dǔǎdǔô kòyò. Bǎbǎkǎlè Cǒmara bô̌lò̤ bǎ shǎǎ nutokhlǒ dǒ pwa̤yṳ̌nǐ̤nǎ̤nǐ̤ tokhlǒ aya. Kòyò dǒ a yṳ̌nǐ̤nǎ̤nǐ̤ta̤ tokhlǒ kû̌ kòyò dǒ a sî̌ganǎ̤ ta̤tě̤ta̤mè̤̌ tokhlǒ ayanu, a kè̌ hî̌bwǐhî̌sîrîhtò̌ Cǒmara dě a phî̌ǎ shǎǎ dǒ Cǒmara bô̌lò̤ nutokhlǒ mî̌ anǐ̤ pwǎ. 4 Ma̤titèhî̌dě lǒ̤꤮ bò Cǒmara bô̌lò̤ ta̤ tokhlǒ numî̌ awô̌ bò pṳ̂̌꤮ tôcǒ pwǎ. Kè̌ na phî̌shǔjò ta̤pṳ̂̌꤮ tocǒ kû̌ ta̤hî̌bwǐhî̌sîrî numî̌ tô wîkè a tôcǒ꤮ tô̤̌. 5 Ma̤titèhî̌dě dǒ Cǒmara alě̤ayô̤̌ kû̌ pa ta̤kwicaba akhû̌akhî, Cǒmara jû dǒ a gǔ phî̌shǐshu ta̤nutokhlǒ.

Yeshǔ Khrǐ apwa̤ma̤ta̤phû̌ dǒ awô̌ tôpwa̤

6 Na kè̌ sû̌ǐbǎ pṳ̌wè̤̌ khrǐphû̌ tokhlǒ kû̌ ta̤nutokhlǒ mî̌ na gǔ htû Yeshǔ Khrǐ apwa̤ma̤ta̤phû̌ dǒ awô̌ tôpwa̤ pě. Bǎ na ma̤pô̤̌nu akha, na gǔ bǔdû̌htò̌ nanǎ̤ kû̌ ta̤tě̤ta̤mè̤̌ dǒ ta̤yṳ̌ta̤nǎ̤ akû nutokhlǒ kû̌ ta̤sû̌ǐtòwòǐ awô̌ dǒ na gû̌ma̤ nutokhlǒ pě. 7 Bǎbǎkǎlè ta̤dô̌kènè dǒ꤮ awǐkhanu a tě̤tôtě̤bǎ kû̌ Cǒmara tô̤̌ nutokhlǒ kû̌, ta̤dô̌kènè dǒ abwǐsîrî ô̌ tô̤̌ tokhlǒnu, cû̌bò̌ khabò̌kè lô̌khô nî̌꤮. Mè̤mè̤̌tôkhônu pô̤̌khô na gǔ ô̌htûpwa̤ pô̤̌ Cǒmara a ta̤sǎyṳ ayanu sû̌ǐ jògesô̌ tû̌ nanǎ̤ pṳ̂̌꤮ tôplǎ nî̌꤮. 8 Sahtò̌ sû̌ǐ nanǎ̤ dǒ nǎ̤glǒphěyî̌ tôkhô numî̌, abwǐsîrî ô̌ tokhlǒ. Bǎbǎkǎlè sahtò̌ sû̌ǐ nanǎ̤ pô̤̌ Cǒmara sǎyṳ no ô̌htûpwa̤ na numî̌ abwǐasîrî ô̌bò pa cû̌sû̌ǐ htò̌jò panǎ̤ pô̤̌ Cǒmara a ta̤sǎyṳnu ma̤titèhî̌dě, ta̤numî̌ a gǔ htûbwǐhtûsîrî mè̤̌mî̌ca hǒ tôhtu ayanu mè̤̌tô̤̌, htû̌꤮ nô̌kòpě tôhtu aya bǎbǎ, a htûbwǐhtûsîrî mè̤̌mî̌ca pě.

9 Ta̤hî̌bǎ numî̌ acǒatè̤ dě kòyò lǒ̤bò tô phî̌shǐshu lǒ̤sû̌lǒ̤sò̌ yǎ. 10 Mè̤̌kû̌ dǒ hǒonu akhû̌akhî, pa jî̌pwǐ̤jî̌le̤ mè̤̌mî̌ca ta̤, ma̤titèhî̌dě pa bè̌ pa ta̤kè̌shuǐ dǒ Cǒmara dǒ a htûpwa̤ nutôpwa̤ alô̤. A mî̌ pwa̤ma̤hǎplǎge kòyò lǒ̤꤮ bò, bǎbǎkǎlè kòyò dǒ a yṳ̌nǐ̤nǎ̤nǐ̤ a tokhlǒ ayanu, a mî̌ pwa̤ma̤hǎplǎge dǒ a tě̤mè̤̌ gutṳ̌ tôpwa̤hǒ.

11 Mǎnǎkè asî yô̤̌ dě sû̌ǐtòwòǐ asî kû̌ ta̤nutokhlǒ nî̌꤮. 12 Na mî̌ kòyò nějǎ pe akhû̌akhî, nogènè̤ pî̌tî̌ tǎ̤ kòyò kû̌ nanǎ̤ tǎ̤mǎ̤ nî̌꤮. Mè̤mè̤̌tôkhônu, na ta̤hî̌buhî̌bǎ sî bǎbǎ, na ma̤ta̤ titètè̌ bǎbǎ, na ta̤mô̤ǐ bǎbǎ, na ta̤yṳ̌ta̤nǎ̤ bǎbǎ, na sǎphlǒ ata̤mṳ̂̌plî tokhlǒ bǎbǎ, htûhtò̌ bǎ kòyò lǎ̤kè̌lû̌mò̌mṳ dǒ awô̌ bǎ ta̤dòkû tokhlǒ aya nî̌꤮. 13 Ǐ na ta̤shěta̤khǎ dě jî̌pwǐ̤ dô̌ bǎ kòyò lî̤plò̌shǐ dǒ kòyò lô̤mô̤̌ nî̌꤮, shôbǐǐlṳ̌ bǎ kòyò dě, sû̌ǐtòwòǐ bǎ kòyò htû̌ he hètǒ̤dǒ na ô̌ pěnu nî̌꤮. 14 Kè̌bò̌lû̌kè tǎ̤ Yôla Plò̌shǐ Běcǎ asû dǒ Cǒmara ǐhto nanu tǎ̤mǎ̤ nî̌꤮. Bǎ ta̤dòkû mǒ̤khumǒ̤pwǎ̤ dǒ a htû ikǒlǒkòdû̌ tokhlǒ bè̌htò̌ acǔde dǒ nalô̤ akha, na nǐ̤bǎ tutṳ̌ sû dǒ kòyò hî̌pô̤nǎ nawe̤nakè nutokhlǒ a ô̌ hǒ.

15 Pô̤̌khô kòyò lǒ̤bò gǔ kè̌shǐ na ta̤dû̌htò̌htûhtò̌ ayanu, ǐlò̤ na sǎphlǒ dǒ ta̤nutokhlǒ aya dě ma̤ yǎ pṳ̂̌꤮ tôplǎ nî̌꤮. 16 Na hî̌buhî̌bǎ bǎbǎ, na ma̤ta̤ titètè̌ bǎbǎ, na sû̌ǐtòwòǐ kòyò tokhlǒnu bǎbǎ, sè̌rè̌ǐ a nî̌꤮. Ô̌měô̌gle dǒ ta̤nutokhlǒ akû pṳ̂̌꤮ tôplǎ nî̌꤮, ma̤titèhî̌dě na kè̌ ma̤pô̤̌nu hî̌dě na gǔ ma̤hǎplǎge pwǎ nanǎ̤ mè̤̌tô̤̌, na gǔ ma̤hǎplǎge padô̌ kòyò dǒ a ganǎ̤de kû̌ na nutokhlǒ pě.